आक्रितङ दिवोस्क्ने लबड बोदङ
4
1 तेर बति आक्रितङ दिवोस्कुने कहितुर बरोसतुन सुटि कींतेर अनि पसि किय्वलिक बूत्क्नङ केन्चि, अवेनङ बोदन पिय्सि ताकंतेर इन्जेर पवित्रा आत्मा तात्कर वेहंता.
2 वूर आतुर कपट्ने लबड वड्कंतेर.
वूरङ मन-दिल्क सातपिनय मंतङ.
3 वूर लबड बोदा किय्वलिर, मर्मिङ आय्वल तप आंद इंतेर.
अनि कहि तीर्क्ना काने गिर तिंवा इन्जेर बोदा कींतेर.
बति बगवंतल अव सम्दि कानेतङ चीजकुन तिंदन साटिने निव्डि कीतोर.
सतुन करि कीतुर बक्तलिर, बगवंतन दनेवाद वेह्चि, अद कानेतुन तिंदना.
4 बगवंतल गडि कीता हरियेक चीज चोकोट्नय आंद.
अदेन साटि बदे गिर चीजुन वटिय इंवक्ने बगवंतने दनेवाद वेह्चि तिंदना.
5 बारितेके बगवंतना वचन अनि मीवा पार्तना अव चीजकुन तिंले सुदुड कींतङ.
येसु किरिस्तुनोर चोकोट्नोर सेव्कल
6 निमे इव गोस्टिङ बक्तलिरकुन पोडि कीसि वेह्तेके, येसु किरिस्तुनोर चोकोट्नोर सेव्कनि आंति.
बरोसा इर्तङ गोस्टिङ केन्ज्वडुन हिंदल अनि चोकोट्नङ बोदन पिय्सि ताक्वडुन हिंदल निमे बाव-बक्तितगा बडे माति इन्जेर वूरकुन तोहंति.
7 आगम गोस्टिनल अनि बनि कीतङ कतनल लक मन.
बाव-बक्तिते मंले कोसिद कीम.
8-9 इद गोस्टि बरोसा इरनल अनि वोपनल मंता: मेंदोडुन साटि किय्वल सिक्संते जरसि पाय्दा मंता.
बति बगवंतना बाव-बक्ति कीतेके, इंकेडा अनि बविसत्ने पिस्वडुन रोपो गिर चोकोटे जर्गंता इंवल वाग्दन मंता.
अद वाग्दन सम्दि तीर्क्ने पाय्दा सींता.
10 दुनियतेर लोकुरकुन बचि किय्वन, मुकेते तंवा पोरो बरोसा इर्तुरकुन बचि किय्वल जीवते मंवल बगवंतनगा आसा इर्तट.
अदेन साटिने काया-कस्टम कीसेर मंतट.
11 इव गोस्टिन बारेते हुकुम सीसि, वूरकुन करुसा.
12 निमे डियोनि आता काड्कि, नीकुन बोरे चुडुर-पांदे सूडा सिय्मा.
बति नीवा वड्क्वडगा, ताक्वडगा, पेर्मा तोह्वडगा, बरोसतगा अनि पवित्रा मंवडगा दुस्रुर बक्तलिर नीवा नमुना येतनल मन.
13 नना वानल वेरि बगवंतनङ गोस्टिङ बक्तलिर मुने वाचि कीसि, केन्जुसेर, वूरा बरोसतुन बडि कीसेर, बोदा वेह्चेर मन.
14 चर्चितुर पेदोल्क नी पोरो केय्क इर्सि पार्तना कीनेके, बविसत्ने जर्गंता इन्जेर वेह्ता वरम नीकुन पुड्ता.
अद वरमुन वाडकम कीम.
15 नना वेह्तङ गोस्टिङ पिय्सि, बर्पुर दिल्ते ताका.
अस्के निमे बाव-बक्तितगा बडे माय्वल दुस्रुर करि कींतेर.
16 नीवा पिस्वडुन बारेते अनि निमे वेह्वल बोदतुन बारेते दिहंते मन.
इहिन पिसेर मंद्किते, नीवा निमे बचि कींति अनि नी बोदा केन्ज्तुर वूरकुन गिर बचि कींति.