सम्दि वहिनुरकुन कामि सिय्वलिक हुकुम्क
5
1 वेडिलतुन राङि सिय्मा, बति नी बाबोन दात सम्जे मासि चोकोट ताकना इन्जेर कोरा.
डियुरकुन नी तमुकुन दात सम्जे मायना.
2 मातरिन नीवा अवन दात सम्जे माम.
बर्पुर पवित्रा दिल्ते, डिया पेकिन नीवङ सेलड-तककुन दात सम्जे माम.
3 करलेन बोरे दिक सेलेङ अव रांडे वेय्लोकुन मान सीसि डगुर-पान सीम.
4 बति रांडे वेय्लोन मरि-मियड आयि, तङ्मरि-तङ्मियक आयि मत्तेके, वूर मुके तम्वा रोतुरकुन पोसि किय्वल करियना.
अहन कीतेके, तम्वुर बेये-बाबन अनि आजि-तादुरकुन चोकोट सूड्तप आंता.
इहिन किय्वल बगवंतन आनंद सींता.
5 करल दिक सेले अद रांडे वेय्लो मत्तेके, अद वोरोये मन्जि, तंवा आसा बगवंतन पोरो इर्सि, बगवंतना मदतुन साटि, नर्का-पियल पार्तनङ अनि विनंतिङ कीसेर मंदंता.
6 बति सुक-बोग येच्चेर पिस्वल रांडे वेय्लो जीवते मन्जि गिर साता लेकतेन वांता.
7 बक्तलिरकुन बोरे तप्नगा साप्डि किय्वक्ने मंले, इव गोस्टिन सम्दिरकुन हुकुम सीम.
8 बोरे आयि तंवुर तोडो पुट्तुर्गटल मुकेते, तंवा रोतुरकुन पोसि किय्वेके दानुर्ते, वोर बरोसतल बह्के मासि, बरोसा कियोर वोन्गटल तेर, बेकर आंतोर.
9-10 वोरोने तुङ्सि, वोर मार्ता पेजे अद रांडे वेय्लो साट (60) साल्क्ना वहि वीड्सि मंदना.
अचोरे आय्वा, अद वेय्लो चोकोट्नङ काम्क कींता इंवल पोरोल कमय कियना.
मरि-मियडुन जरब्ने इर्वल, वेर्तलिरकुन येर-पानि किय्वल, बक्तलिरङ काल्क नोर्वल,* तक्लिब्ने मंवलिरकुन मदत किय्वलिक ईतङ सम्दो गुन्क, अद रांडे वेय्लोनगा मंदना.
अस्केने ताना पोरोल रांडे वेय्लोक्ना दप्तरतगा लिहि किया वचो.
11 बति जवनिते मंवलिक रांडे वेय्लोक्नङ पोरोल्क, अद दप्तरतगा लिहि किय्वा.
बारितेके तम्वङ मेंदोडङ आसङ किरिस्तुना बक्तितुन तेर अदिक आसि, पाट्क आय्ले सूडंतङ.
12 इहिन अव तमा येत्ता मोदोडा वोटनल बह्के मासि, सिक्सतुन तम्वा पोरो तरंतङ.
13 अचोरे आय्वा अव रांडे वेय्लोक गह्ललिक आसि, रोह्क रोह्क तिरिसेर चह्डिङ वेह्चेर, दुस्रुरा जोलित सोन्जि, बव गोस्टिङ्ते वड्क्वयो अव गोस्टिङ वड्क्सेर मंदंतङ.
14 अदेन साटि जवनिते मंवलिक रांडे वेय्लोक पाट आसि, मरि-मियडुन जल्मा सियना अनि रोता जिन्गनितुन सूडना इन्जेर कोर्सेर मंतोन.
अस्केने पगा-दारल अवेनगा बतय तप साप्डि किय्वक मंदंतोर.
15 इवेनगटल कहि जनिक इदेन मोदोले सतनल बह्के मासि, सय्तंता सरि ताक्वल मोदोल कीतङ.
16 बदे बक्ति वाले वेय्लोना कुटुंबतगा रांडे वेय्लोक मत्तेके, अवेकुन तमय मदत कियना.
अस्के चर्चितुर अवेकुन मदत किय्वडुन बद्लि, करल पोसटि रांडे वेय्लोकुन मदत किया परंतेर.
17 चर्चितुरकुन ताकुस्वलिर पेदोल्क्नगटल मुकेते, बोदा अनि चोकोट्नङ गोस्टिङ वेह्वलिरकुन सम्दिर्गटल अदिक मान कीसि, बेय चोकोट सूडना.
18 बारितेके दर्मा-ग्रंत्नगा, काम किय्वलिर बारेते, “बूय्तन बूति पुटना” अनि, काम किय्वलिक जंवरकुन बारेते, “कडतगा पाति पुह्वल कोंदतुन मुस्के दोस्वा” इन्जेर गिर लिहि कीसि मंता.
19 इविर सेलेके मुविर गवदार्क मत्तेके तपा, चर्चितुरकुन ताकुस्वलिर पेदोल्क्नगटल वोरोन पोरो वाट्ता गल्तितुन वोप्वा.
20 पाप कीतुरकुन चर्चितुर मुने उजगिरि दम्कि सीम.
अहन सिय्वल सूड्सि, मेय्तुर गिर पाप किय्वक्ने वेरिसि पिसंतेर.
21 नना बगवंतन मुने, येसु किरिसतुन मुने, नेमि कीतुर दूतलिर मुने गिर वेह्वल बतल इत्तेके; बोरे वोरोना बाजुन आय्मा अनि बोने बेद-बाव्ते सूड्मा.
इव वेह्तङ हुकुमकुन पिय्सि ताका.
22 पर्बुना सेवतुन साटि नेमि किय्ले, लह्कि वर्सि बोन पोरोन केय इर्सि पार्तना किय्मा.
उंदि मोका वोर पाप कीनुर्ते, अद पाप्नगा निमे ईसा येत्तोनि आंति.
बस्केट नीवा निमे पवित्रा मन.
23 नीकुन नड्डुम नड्डुम वाय्वल पेटि नोपितुन अनि दुस्रोक बेमरिन साटि, वटि येरे उंवक्ने, जरसि आङुर रसा गिर उन.