6
1 बगवंतना पोरोडुन अनि बोदतुन करब पोरोल वाय्वक मंदना इत्तेके, तम्वुर माल्कलिरकुन, दासि-पांदगा मंवलिर चोकोट मान-मर्यदा सियना.
2 तम्वुर माल्कलिर बक्तलिर मत्तेके, वूरकुन चुडुर-पांदे सूड्वा.
सेवता पाय्दा येत्वलिर मी दात लाड्नुर बक्तलिर आता काड्कि, उंडे इचुर अदिक सेवा कियना इन्जेर वूरकुन वेह्चि, गटि-दीर्या सीम.
लबड बोदङ अनि करल दन-दव्लतुन पोरो आसा
3 बाव-बक्तिते पिस्ले, येसु किरिस्तु पर्बु वेह्तङ सते बोदन उल्टा बोरे वेहनुर्ते,
4 वोर गर्वा-गमंडि वाले आंदुर अनि वोन बतय करे मायो.
आतोनगा गोस्टिन बारेते जग्डङ, पाय्दा सेलेङ अव चर्चङ कियना इंवल करब आसा मंदंता.
इदेन हिंदल कपट, जग्डङ, राङ्वल, आगव अनुमान्क वांतङ.
5 ईतुर नड्डुम जग्डङ-लोलिङ आसेरेन मंदंतङ.
अचोरे आय्वा सतुन करि किय्वक्ने, बगवंतना बक्तितुन दन-दव्लत कमय किय्वल उंदि आय्तर इन्जेर सम्जे मांतेर.
6 बति मत्ता अदेनेन आनंद्ने मंवल बक्तिये डगुर दन-दव्लत आंद.
7 बारितेके इद कलितगा मरट वानेके बतय तर्मकि.
इद कलितल सोनेके बतय वोय्वट.
8 अदेन साटि माकुन पन्चा-पाङुड अनि तिंवल काने मत्तेके, अवेनेन मरट आनंद्ने मंद्कट.
9 बति दनेवंतलिर आकोम इंवलिर, तम्वङ दुक्सङ सिय्वलिक आसन हिंदल, करब काम्क्नगा अर्सि, कोंडे मांतेर.
अव आतङ काम्क वूरकुन पूरो नासेडम कींतङ.
10 बारितेके कोतना लालुस सम्दो करबुन आदर आसि निलंता.
कहि जन्क अद लालुस्ने, किरिसतुन पोरो मंवल बरोसतल बह्के मातेर.
इदेन हिंदल वूर दुक्सनगा कोंडे मातेर.
तिमोतिन वेह्ता बोदा
11 बति निमे बगवंतनोर बक्तनि आंदि.
इव सम्दो आसन सुटि कीम.
बाव-बक्तिते, बरोसते, पेर्मते, वोर्च्वल गुंते, सादु-पांदे अनि नियत्ने पिस्ले कोसिद कीम.
12 नीवा बरोसतुन बचि किय्ले, चोकोट लडेय कीम.
बस्केट पिस्वल जीवतुन गट पिय्या.
तान साटिने बगवंतल नीकुन केय्तोर.
इद डगुर सतुन वेलेटिर गवदारकुन मुने वोप्ति.
13-14 सम्दितुन जीवदान सिय्वल बगवंतना नदुडुन मुने, अनि पोंति पिलातुन मुने, दर्यम्ने गवा सीतोर वोर येसु किरिस्तु पर्बुना नदुडुन मुने, नीकुन इद हुकुम सीसेर मंतोन.
बतल इत्तेके, मा पर्बु येसु किरिस्तु उंदुंदि जोका पावे मानल वेरि, निह्गा बदे तप्ना डाग सेल्वक्ने पिसा.
15 राज ताकुस्वल डगुर-पान वाले, पर्बुरोर पर्बु अनि राजलिरोर राजल वोर बगवंतले आंदुर.
वोरे बरोबर वकत्ने स्वर्गनल किरिसतुन मल्सि सारि कींतोर.
16 मरट करुम सोंदा पर्वट आतल वेड्चितगा मंवल अनि बस्केट जीवते मंवल वोरे आंदुर.
बगवंतन इंके वेरि बोरे सूड्मकि अनि उंडे बोरे गिर सूडा परुर.
सक्तिवंतल बगवंतने पिडिनङ-पिडिङ डगुर-पान वायि.
आमेन!
17 इद दुनियतगा दनेवंतलिर गर्वते, मूरे मासि सोंवल दन-दव्लतुन पोरो बरोसा इर्वा.
इदेन बद्लि बगवंतन पोरो बरोसा इरना.
वोरे मावा सुकमुन साटि, पह्जे मत्ता सम्दो दया कींतोर इन्जेर इव सम्दोन बारेते वूरकुन हुकुम सीम.
18-19 इदे आय्वा चोकोट्नङ उंडे वेले काम्क कीसेर, जुरत मंवलिक सम्दो गिर दुस्रुरकुन दयते तूसेर मंट इन्जेर वूरकुन हुकुम सीम.
इद तरिकते वूर बाव-बक्ति इंवल दन-दव्लतुन कमय कीतेके, बविसतुन साटि अद चोकोट्ना बुनदि दोहंता.
अदेन हिंदल करल पिस्वडा अनुबव येतंतेर.
20 ये तिमोति!
नीकुन हव्लि कीता सतुन चोकोट नेरुसा.
बाव-बक्ति सेलुर वूर किय्वलिक करेबलिक चर्चनल अनि गियन इन्जेर वेह्वलिक लबड गोस्टिनल हब्रि मन.
21 कहि जन्क अव गोस्टिङ केन्चि, बरोसतल बह्के मातेर.
बगवंतना पेर्मता-दया मी सम्दिर पोरो मनि.