दनेवंतलिरकुन दम्कि सिय्वल
5
1 ये दनेवंतलिर्निट, केन्जट!
मिरट दुक्सते आड्सेर किलियट.
बारितेके मीकुन गाचर-गंडल्क वाय्वलिक मंतङ.
2 मीवा दन-दव्लत कडियंता अनि मीवङ पाङुक वेलुम पियंतङ.
3 मिह्गा मंवल सोने अनि कूरा चिलिम पियंता.
अद चिलिम मी पोरो उल्टा गवा वेह्चि, मीवङ मेंदोलकुन तड्मित दात डुंडुसंता.
इव आक्रितङ दिवोस्क्ने गिरे मिरट वेले दन-दव्लत्ना डीग वाड्सेर मंतिट.
4 केन्जट!
मी वहुक्नगा काम किय्वलिर बूय्तलिरकुन, मिरट बूति सिय्वक्ने पसि कीतिट.
वूरङ बूतिङ मी पोरो पिरदि कीसेर मंतङ.
वूर बूय्तलिरा आड्वल स्वर्ग्ना दलम्नोर पर्बुनङ* केवकुन केन्जा वाता.
5 बोमित पोरो मीकुन पसंद वाता तीर सुक-बोग्ने पिसेर, कोय्वल दिनमुन साटि, मीवङ दिलकुन कोड्युसि तयर कीसेर मंतिट.
6 मिरट नियत्ने ताक्वलिरकुन सिक्सा वाट्सि, वूरकुन जक्तिट बति, वूर मीकुन मर्ला बड्मकि.
सम्दोतुन वोर्चि मुने दायना
7 अदेन साटि दादलिर-बायिक्निट!
पर्बु मल्सि वानल वेरि, मिरट वोर्चि चोकोटे सूड्सेर मंट.
बहन इत्तेके, वोरोर केतिदारल तंवा बोमितगा वाट्वल चोकोट्ना पंटतुन साटि, बहन सूड्सेर मंदंतोरो दिहंते करि कीम्ट.
वोर केतिदारल मोदोडा पिर वासि* पंटा पिरंता अगटल्ते बेर्सि, पंटा कोय्ले वानल वेरि वोर्चिकुन चोकोटे सूड्सेर मंदंतोर.
8 मिरट गिर मंदुन गट कीसि, वोर्चि सूड्सेर मंट.
बारितेके पर्बुना मल्सि वाय्वल वकत करुम वासेर मंता.
9 नावुर दादलिर-बायिक्निट!
वोरोन पोरो वोरोर चह्डिङ वेह्मट.
अहन वेह्तुरकुन पर्बु सिक्सा वाटंतोर.
केन्जट!
वोर नाय्दा तस्वा किय्वल अदिकारि वेय्ने वाय्वल मंतोर.
10 नावुर दादलिर-बायिक्निट!
पर्बुन बारेते वेह्तुर पर्वक्तलिर तक्लिब्क बोगे मातेर.
वूर पर्वक्तलिरा नमुना येच्चि मिरट ताकट.
11 तक्लिब्क वोर्चि बरोसते ताक्तुरकुन आसिर्वाद येत्तुर इंतट.
योबुना वोर्च्वल गुंतुन बारेते केन्चि मंतिट.
पर्बु वोन आक्रित बातल इनम सीतोर इंवल मिरट सूड्तिट.
पर्बु वेले दया अनि किवुल वाले आंदुर.
12 नावुर दादलिर-बायिक्निट!
सम्दिन तेर मुके बतल इत्तेके, स्वर्ग्ना पोरोडेन आयि, बोमिता पोरोडेन आयि, उंडे दुस्रो बततय पोरोडेन आयि, मिरट वोट वाट्वा.
सिरिप बतल मंता अद वेहट.
अहन मत्ता तीर वेह्तेकेन बगवंतल मीकुन सिक्सा वाटोर.
13 मिह्गटल बोरे आयि तक्लिब्क्नगा अर्सि मत्तेके, वोर पार्तना कियना.
आनंद्ने मत्तोर वोर, बगवंतन पार्तना-विंति कीसेर पाटङ वारना.
14 मिह्गटल बोरे आयि येड्कि-दुक्ने मत्तेके, चर्चितुर पेदोलकुन वोर केयुसना.
वूर वासि पर्बुना पोरोडे निय सोक्सि, वोन साटि पार्तना कियना.
15 अहन बरोसते वूर पार्तना कीतेके, वोर दुकेलल चोकोट आंतोर.
पर्बु वोन चोकोट कींतोर.
उंदि मोका वोर पाप्क कीसि मत्तेके, वोनङ पापकुन पर्बु मापि कींतोर.
16 अदेन साटि बवे पाप्क कीसि मन्किट्ते, बोनङ वोह्क पाप्क मी नड्डुम मिरट वोपट अनि वोरोन साटि वोरोर पार्तना कीम्ट.
इदेन हिंदल, मीवा तबियत चोकोट आंता.
नियत्नोना पार्तना वेले सक्तिते मन्जि बचोरो चोकोट किया परंता.
17 येलियल मा दात्नोरे सादरन मायनल आंदुर.
पिर अर्वा इन्जेर तंवा मंदे पार्तना कीतोर.
ते सडे मूंद साल्क वेरि, बोमित पोरो पिर अर्मकि.
18 अद आता पेजे पिर अरना इन्जेर मर्ला पार्तना कीतोर.
अस्के हाबर पिरदुन अरुस्ता अनि बोमि तन्गा उर्स्तङ पंटङ पंडुस्ता.