बगवंतन करुम वरट
4
1 मिह्गा जग्डङ अनि लडेय्क बततुन हिंदल जर्ग्सेर मंतङ?
मीवा दिलतगा पुट्वलिक आसन उंदितुन उंदि अर्सि वाय्वा सोन्जिने इव जर्ग्सेर मंतङ.
2 मिरट आसा कीकिट बति, अद मीकुन पुटो.
अद कुटा कुटा गुंता आसतुन साटि माय्नन जकंतिट.
जग्डङ अनि लडेय्क कींतिट बति, आसा कीकिट अद मीकुन पुटो.
मिरट कोर्ता अद मिह्गा मनो.
बारितेके बगवंतन मिरट तल्क्विट.
3 मिरट बगवंतन तल्क्तेके गिरे अद मीकुन पुटो.
बारितेके मीवा सुक-बोगुन साटि कर्चि किय्ले करब्ना आसते तल्कंतिट.
4 इद दुनियतङ सुक-बोगुन सङा दोस्तन कीतेके, बगवंतन पेर्मा कीतप आयो बति, पीर कीतप आंता इंवल टावा सेले कि बतल?
इद दुनियतुर सङा दोस्तन कीका इंवल, बगवंतन पगा-दारल आंतोर.
5 “बगवंतल मा सम्दिरकुन सीता, अद आत्मते मरट तंवय बक्ति कियना” इन्जेर दर्मा-ग्रंत्नगा, वटि आगमे लिहि कीसि मंता इंतिट कि बतल?
6 बगवंतल माकुन वेले पेर्मता-दयते सूड्सेर मंतोर.
अदेन साटिने दर्मा-ग्रंत्नगा,
“बगवंतल गर्वते मंवलिरकुन उल्टा तिरियंतोर.
बति कमि-पांदे मंवलिर पोरो पेर्मता-दया तोहंतोर”+
इन्जेर लिहि कीसि मंता.
7 अदेन साटि, बगवंतन मुने चुडुर-पान कीसि मंट.
सय्तंदुन उल्टा तिरियट.
अस्के वोर सय्तन मिह्गटल परर आंतोर.
8 बगवंतन करुम वरट.
अस्के बगवंतल मी करुम वांतोर.
पापेस्तलिर्निट!
मीवङ पापकुन नोरट.
बह्के मातुर्निट!
मीवङ दिलकुन सुदुड-पान कीम्ट.
9 पापेस्तलिर्निट!
विचर्ते अनि दुक्सते मंट.
जोर्ते आडट.
कव्वडुन बद्लि आड्सेर अनि आनंदुन बद्लि दुक्सते मंट.
10 पर्बुना नदुडुन मुने मीवा मिरट चुडुर-पान कीसि मंट.
अस्के पर्बु मीकुन डगुर-पान सींतोर.
11 दादलिर-बायिक्निट!
मीवा मिरट वोरोन वोरोर बय्मंते राङ्मट.
तंवोर सोप्तन राङि सीतेके आयि सेलेके वोन पोरो तस्वा कीतेके आयि, वोर मायनल दर्मता कानुंतुन बय्मन आतोना लेकते वांतोर.
मीवा काम सिरिप अद कानुंतुन पिय्सि ताकना.
अद कानुन चोकोट्ना सेलेके वायुट्ना इन्जेर तस्वा किय्वल मीकुन हक सेले.
12 पर्जतुन पोरो नाय्दा तस्वा किय्वल अनि दर्मता कानुंतगा हुकुम्क लिहि कियुस्वल वोरोरे बगवंतल आंदुर.
पर्जतुन बचि किय्वल अनि नासेडम किय्वल गिर वोरे आंदुर.
ते आजु-बाजुतुर पोरो सिक्सा वाटट इन्जेर वेह्ले नीकुन बोर अदिकार सीतोर?
डगुक डगुक गोस्टिङ वेह्मट
13 केन्जट!
“नेंड सेलेते नाडि बत्तेर उंदि चहर्दे सोन्जि, अगा उंदि साल वेरि मंदंतोम.
वरट!
अगा बेपरि कीसि कोतङ वेले कमय कीकट” इन्जेर वेह्वलिर्निट करि कीम्ट.
14 नाडि बतल जर्गंतयो मीकुन टावा सेले.
मीवा जीवतुन बारेते सोन्च कीम्ट.
मिरट जुलुक दिसि उंडे जुलुक्ने मयड आसि सोंवल, पोयता दुहरतुन दात्नुर आंदिट.
15 अहन इंवडुन बद्लि मिरट, “पर्बु जीवते इर्तेके, इद कीकोम अद कीकोम” इन्जेर वेहना.
16 बति मिरट अहन किय्विट.
लांडि-लबड डगुक डगुक गोस्टिङ वेह्चेर गल्तिङ कींतिट.
17 अदेन साटि चोकोट कियना इंवल, टावा मन्जि गिर चोकोट कियोर वोन पाप लागंता.