मीवा वेन्जेडुन जरब्ने मनल करुसट
3
1 नावुर दादलिर-बायिक्निट!
मिह्गटल वेलेटिर बोदा वेह्वलिर आय्मट.
बारितेके बोदा वेह्वलिर माकुन वेले कटिंता तस्वा मंदंता इंवल मीकुन टावये.
2 मरट सम्दिर गिरे बचोङो गल्तिङ कींतट.
तना वड्क्वलिक गोस्टिनगा उंदि गिर तप कियोर वोर बर्पुर गुन वाले मायनल आंतोर.
आतोर मायनल तंवा पूरो मेंदोडुन जरब्ने इरा परंतोर.
3 मरट ताकुस्ता तीर ताकना अनि मावा जरब्ने मंदना इन्जेरेंते कोंदन* वेसुनि दोहंतट.
4 अह्ने डगुर रूकता नमुना येत्तेके गिर, बेय जोर्ते वडि वासि तान दुर्सेर वोंता.
बति तान ताकुस्वल मायनल अद रूकतुन पेजे मंवल चुडुसि कटेतुन* तिरुस्तेके, तना बेके सोंदना इत्तेके हके तान मलुसा परंतोर.
5 अह्ने वेन्जेर मावा मेंदोडगा चुडुसि बागम आंद.
बति अद बेय डगुक डगुक गोस्टिङ वड्कंता.
अदे तीर्दे, चुडुसि मिन्गुल डगुर केडतुन बचोर-बहन डुंडुसंतयो सोन्च कीम्ट.
6 मावा वेन्जेर गिरे उंदि तड्मित दात्नय आंद.
करब्ने निन्चि मंवल मावा मेंदोडगा उंदि बागम आसि मंता.
अद वेन्जेर करबुन पूरो मेंदोडगा पग्रि कीसि, माय्नना जिन्गनितुन तड्मित दात लावि कींता.
अहन लावि किय्वल सक्तितुन अद वेन्जेर पातड्तल* येतंता.
7 सम्दि जंवरकुन, पिटे-पुरडुन, पुर्ग-बुसितुन, सम्दुरतगा मंवलिक जिव्रस सम्दोतुन इदेन मुने अनि इंके गिर मायनल जरब्ने इर्सेरेन मंतोर.
8 बति वेन्जेडुन इंके वेरि बोरे तंवा जरब्ने इरा पर्मकि.
अद वेन्जेर जीवा तेंड्वल विक्ने निन्चि अविवक्ने करब कीसेरेन मंदंता.
9 इद वेन्जेडेन मरट पर्बु आय्वल बाबो बगवंतन डगुर-पान सींतट.
इदे वेन्जेडे बगवंतना रूप्ने पुट्तोर माय्नन सापेना सींतट.
10 आसिर्वाद अनि सापेना उंदिय तोड्दल बह्रि वासेर मंतङ.
नावुर दादलिर-बायिक्निट!
अहन मरट मंवा.
11 सोवोर येर अनि चोकोट्ना येर बस्केट्के उंदि जलतल पूटे मायोङ.
12 नावुर दादलिर-बायिक्निट!
अन्जुरि मरतुन मर्का पंडिङ* बस्केट्के सादोङ.
अह्ने आङुर वेलितुन अन्जुरि पंडिङ बस्केट्के सादोङ.
अदे तरिकते, सोवोर येता जलतल चोकोट्ना येर पूटे मायो.
बुदि-गियन वालिर
13 बुदि-गियन वालिर अनि समज्दार्क मी रोपो बोरे मंतेर कि?
अहन मत्तेके वूर सते-पांदे ताक्सेर, बुदि-गियन सीता अद चुडुर-पांदुन पिय्सि, वूरङ कार्यन तोहट इंट.
14 उंदि मोका मीवा दिलतगा कुटा कुटा अनि लाल्सल गुंते मन्जि, डगुक डगुक गोस्टिङ वेह्चेर सतुन मकुसिय्मट.
15 मिह्गा मंवल ईतल बुदि-गियन स्वर्गनल रेय्सि वाय्मकि.
इद मीकुन दुनियतल वाता बुदि-गियन आंद.
ईतडगा बाव-बक्ति सेले.
इद सय्तंदा बुदि-गियन आंद.
16 बहन इत्तेके बगते कुटा कुटा अनि लाल्सलिक गुन्क मंदंतङो, अगा जगडङ लोलिङ अनि सम्दो तीर्क्नङ करब काम्क मंदंतङ.
17 बति स्वर्गनल वाय्वल बुदि-गियन वेले पवित्रा आंद.
अद बुदि-गियन सांतितुन पेर्मा कींता.
अद बोने बतय इंवक सादु आसि मंदंता.
अद बुदि-गियन वेह्ता तीर केन्जंता अनि दयते सूडंता.
अनि अद चोकोट्नङ काम्क कीसेर बेद-बाव तोह्वक मंदंता.
अद बुदि-गियन सतेमुन पिय्सि ताकंता.
18 सते-पांदे अनि सांतिते ताक्वलिर अद विजतुन वीच्चि, सत्ना अनि सांतिता पंटतुन कोयंतेर.