चुडुर-पांदे सूड्वा
2
1 नावुर दादलिर-बायिक्निट!
मय्मते जगा जगा मिड्चेर मंवल, येसु किरिस्तु पर्बुन पोरो बरोसा इर्वलिर मिरट, बोने बेद-बाव्ते सूड्मट.
2 नमुनतुन वोरोर मायनल सोनेतङ मुदङ अनि बारितङ कप्डिङ केर्सि अनि उंडे वोरोर माक्डे मातङ कप्डिङ केर्सि, मिरट मीरे माय्वल रोतगा वातेर इंटु.
3-4 अस्के मिरट बारितङ कप्डिङ केर्सि सजे मासि वातोन सङा, “दादा!
निमे इद चोकोट्ना कुर्सितगा उदा” इन्जेर वेह्चि, गरिबुन सङा, “निमे अगा निला सेलेके इगे बूड उदा” इन्जेर वेह्तेके, मिरट बेद-बाव तोह्चि, करब बुदिते तस्वा कीतुर आंतिट.
5 नावुर लाड्नुर दादलिर-बायिक्निट!
इद गोस्टि केन्जट.
इदेन मुनेन तनकुन पेर्मते बक्ति किय्वलिरकुन तंवा राज सींतोन इन्जेर बगवंतल वाग्दन सीतोर.
अदेन साटि बगवंतले दुनियतुरा नदुडुन मुने गरिब मंवलिरकुन बरोसतगा दनेवंतलिर कींतोर.
अनि वोरे तंवा राज्ना ईसा येतना इन्जेर वूरकुन नेमि कीतोर.
6 मिरट वीर गरिब लोकुरा हिजत वोसेर मंतिट.
बति मी पोरो अदिकार ताकुसेर, मीकुन कोट्क्नगा* हव्लि किय्वलिर वीर दनेवंतलिरे आंदिर कि आयुर?
ओहो, वीरे आंदिर!
7 मिरट बक्ति किय्वल किरिस्तुना चोकोट्ना पोरोडुन रेह्चि वड्क्वलिर वीरे दनेवंतलिर आंदिर कि आयुर?
ओहो, वीरे आंदिर!
8 “नीवा नीकुन पेर्मा कीतपे नी आजु-बाजुतुरकुन गिर पेर्मा कियना” इंवल दर्मा-ग्रंत्ना मुके हुकुमुन मिरट पिय्सि ताक्तेके, अद चोकोट्नय गोस्टि आंद.
9 बति उंदि मोका मिरट बेद-बाव तोह्किट्ते, दर्मता कानुंतङ हुकुमकुन पिय्सि बय्मन आसि पापिर आंतिट.
10 बारितेके बोरे आयि अद कानुंतगा मंवलिक सम्दो हुकुमकुन पिय्सि ताक्सेर, उंदि हुकुमुन टूटि कीसि ताक्तेके गिर, वोर पूरो दर्मता कानुंतङ हुकुमकुन पिय्सि ताक्मकि इंवल बद्नम आंतोर.
11 बारितेके “पीर किय्वा” इन्जेर वेह्तोर वोरे, “बोनय जीवा गिर येत्वा” इन्जेर वेह्तोर.
अदेन साटि वोरोर मायनल पीर किय्वेके गिर उंदि मोका बोनय जीवा येत्तेके, वोर अद कानुंतङ हुकुमकुन बय्मन आसि ताक्तोर आंतोर.
12 अदेन साटि माकुन मोक्डो सुटि किय्वल कानुंतुन पिय्सि, वड्क्ततुन हिंदल अनि काम कीततुन हिंदल बगवंतल तस्वा किय्वल मंतोर इन्जेर दिहंते ताकना.
13 बारितेके दुस्रुर पोरो दया तोहुर वूरकुन बगवंतल तस्वा कीनेके, वूर पोरो गिर दया तोहोर.
बति बूर्ते दुस्रुर पोरो दया तोहंतेरो, बगवंतल तस्वा कियन नेटि वूर वेले संतोस अनि आनंद्ने मंदंतेर.
बरोसा अनि काम कीसि तोह्वल
14 नावुर दादलिर-बायिक्निट!
“नाकुन येसु किरिसतुन पोरो बरोसा मंता” इन्जेर वोरोर मायनल वेह्तोर इंटु बति, अद बरोसा मत्ता तीर काम किय्वेके, आतल बरोसा बततुने कामि सियो.
आतल बरोसा माय्नन बचि किया परंता कि बतल?
बचि किया परो.
15 नमुनतुन वोरोर दादले आयि, सेलेके उंदि बायिय आयि, तिंले तिंडि सेल्वक सेलेके, पोंड्ले कप्डिङ सेल्वक मत्तेर इंट.
16 अस्के मिरट वोर दादन सेलेके, अद बायिन बतय मदत किय्वक्ने, वूर सङा, “सांतिते सोन्जि, पेटिमेन तिंटु अनि मेंदोल-मेन कप्डिङ पोंडट.
अस्के मीकुन गर्मि वांता.
इव सम्दो मीकुन बगवंतल सींतोर” इन्जेर सिरिप गोस्टिनेन वेह्तेके बतय पाय्दा पुटो.
17 अदे तीर्दे बरोसा मंता इन्जेर वेह्चि, बरोसा मत्ता तीर काम किय्वेके गिर आतल बरोसा वोंटरि आसि सांता.
18 बति नमुनतुन बोरे ना सङा, ‘नाकुन येसुन पोरो बरोसा मंत’ इंदनुर्ते, अस्के नना, ‘नावा बरोसतुन चोकोट्नङ काम्क कीसि तोहंतोन्’ इन्जेर वोन वेह्चि, ‘नीवा बरोसतुन काम किय्वक्ने तोहा पर्कि कि बतल?’
इन्जेर पूसि कींतोन.
19 बगवंतल वोरोरे मंतोर इन्जेर निमे बरोसा किय्वल चोकोटे बति, बतल पाय्दा?
अहन बूत्क गिरे बरोसा कीसेर, वेरिसि तरा तरा आसेर मंतङ.
20 एहे पिसटि!
काम कीसि तोह्वक्ने मंवल बरोसा बततुने कामि सियो इंवडुन गवा पह्जे कि बतल?
21 मा तोत्तोर बाबो अब्राहमुन हेतु कीम.
वोर तंवोर मरि इसकुन बलिदान सिय्वल बोव्लत पोरो बलि सिय्ले आनेकेते, बगवंतल वोना कार्यतुन सूड्सि, वोन नियत्नोर इन्जेर वोप्तोर कि सेले?
22 वोना बरोसतुन केय्दे कीसि तोह्वल मिरट करि कींतिट कि सेले?
वोर तंवा बरोसा बातल इंवल केय्दे तोह्तोर.
23 “अब्राहम बगवंतन पोरो बरोसा इर्तोर.
अदेन हिंदले वोन नियत्नोर इन्जि बगवंतल वोप्तोर” इंवल दर्मा-ग्रंत्ना वचन पूरे माता.
अद तरिकते अब्राहमुन बगवंतनोर सोप्तल इंवल पोरोल वाता.
24 इद सूड्सि, मायनल सिरिप तंवा बरोसतुन हिंदल आयो बति, तंवङ कामकुन हिंदले, नियत्नोर इन्जेर बगवंतल वोप्तोर इंवल मिरट करि कींतिट.
25 अदे तीर्दे, राहबु+ इंवल लन्जे वेय्लो इज्रयेल देस्नुर कब्रियलिरकुन तंवा रोन मकुसि, सम्दो मान-मर्यदा कीसि दुस्रो सरिय सारि कीता.
अद चोकोट्ना कामुन हिंदल, ‘नियत्ना वेय्लो’ इन्जेर बगवंतल वोप्तोर.
26 बहंते परन सेले अद मेंदोल साता लेकते वांतयो, अह्ने चोकोट्ना काम कीसि तोहुर वूरा बरोसा गिरे साता लेकतेन वांता.