याकोब
याकोब लिहि कीता चिटि
1
1 बगवंतल अनि येसु किरिस्तु पर्बुनोर सेव्कल याकोब्ना आंदुन.
दुनिया पूरो पग्रे मासि मंवलिर बगवंतनुर बक्तलिर्कुन* दंडोस दोसि, इद चिटि लिहि कीसेर मंतोन.
बरोसा अनि बुदि-गियन
2-3 नावुर दादलिर-बायिक्निट!
मीकुन तक्लिब्क अनि दुक्सङ वातेके गिर मिरट वेले आनंद्ने मंट.
बरोसते अव तक्लिब्क अनि दुक्सन मेय्सि मुने सोत्तेके, मीकुन उंडे इचुर वोर्च्वल गुन अब्बंता इन्जेर मीकुन टावये.
4 मिरट वोर्च्वल गुंतगा बडे मासि गट आतेकेन, चोकोटे बरोसतगा गट आसेर बे-कसुर वालिर आया परंतिट.
5 मिह्गटल बोने बुदि-गियन सेल्वेके वोर बगवंतन कोरना.
अहन कोर्तोर वोन, राङि सिय्वक्ने कोर्ततुन तेर अदिक सिय्वल बगवंतल आंदुर.
6 बति बगवंतन कोर्नेके, सींतोरो सियोरो इन्जेर अनुमानम्ना बरोसते तल्क्मट.
अनुमानम्ने तल्क्वल सम्दुर्तङ हेल्वङ बहन वडिदे तेदंतङो अहन मंदंतोर.
7-8 आतोर रंड तीर्क्ने सोन्च किय्वल मायनल तंवा सर्दगा बस्केन बरोबर ताका परोर.
अदेन साटि पर्बुनगटल तनकुन उंडे बतय पुट्मड मंदर इन्जेर आतोर आसा किय्वा.
गरिब अनि दनेवंतल
9 गरिब बक्तलिर तमकुन बगवंतल सीता डगुर-पांदुन पिय्सि, आनंद्ने मंदा लागर.
10 बति दनेवंतलिर बक्तलिर तमकुन बगवंतल सीता चुडुर-पांदुन पिय्सि, आनंद्ने मंदा लागर.
बारितेके वूर गिर जाडिता पुङडुन दात साया लागर.
11 पोड्द पेसियंता, अद येदिते जाडि वतंता इंवल माकुन टावये.
जाडि पुङडा सोबता रूप करब आंता.
अह्ने दनेवंतलिर बक्तलिर गिर तम्वङ काम्क कीसेर, मनेकेन नासेडम आंतेर.
करब गुन्क बगवंतनल वायोङ
12 दुक्सङ वानेके अवेन वोर्चि मेय्सि, मुने सोंवलिर बक्तलिर आसिर्वाद येतंतेर.
तनकुन पेर्मा किय्वलिरकुन बगवंतल वाग्दन सीतोर अद जीवता किरिट* दुक्सङ वानेके, बरोसतगा गट निल्तुरकुन पुटंता.
13 बोनय आयि कसुर कियन साटि मन वित्तेके, बगवंतले नावा मंदुन वितुसेर मंतोर इन्जेर इंवा.
बारितेके बगवंतल तंवा मंदुन कसुर कियन साटि वितुसोर अनि मीवा मंदुन आतल बुदि पुटुसोर.
14 बति हर मायनल तंवा कसुर कियना इंवल बुदिते, नियतुन बह्के मासि करब्ना आसतगा कोंडे मांतोर.
15 आतल करब्ना आसा पिंडमुन दात बडे मासि, पाप इंवडुन जल्मा सींता.
अद पाप बेर्सनचोर बेर्सि, आत्मता सावदुन जल्मा सींता.
16 नावुर लाड्नुर दादलिर-बायिक्निट!
मिरट पसे माय्मट.
17 हर उंदि चोकोट्ना अनि पूरो बर्पुर वाले वस्तु, स्वर्ग्नगा मंवल बगवंतनल वासेर मंता.
वोरे बाबो हाबडगा वेड्चि सिय्वलिकुन निव्डि कीतोर.
अव वस्तुना वेड्चिते दड्मि मारियंता, बति बगवंतल बस्केट्के मारियोर.
18 बगवंतल तंवा सते गोस्टितुन हिंदल तना निव्डि कीता कलितगा मरट पंटता मोदोडा ईसतुन दात* मंदना इन्जेर मिय्तोर.
सते गोस्टितुन केन्चि अद गोस्टि तीर काम किय्वल
19 नावुर लाड्नुर दादलिर-बायिक्निट!
इद गोस्टितुन करि कीम्ट.
हर मायनल केन्ज्ले तयर मंदना अनि वड्क्नेके सोन्च कीसि जोक्सि वड्कना.
वेय्ने सोङुन वाय्वा.
20 बारितेके माय्नना सोङ बगवंतल इचा किय्वल, नियत्ना सरि ताकुसा परो.
21 अदेन साटिने मिह्गा मंवल करब-पांदुन अनि बगड-नियतुन सुटि कीसि ताकट.
मीवा मन-दिलतुन रोपो बगवंतल इर्ता अद गोस्टितुन पिय्सि ताकट.
इद गोस्टि मीकुन बचि किया परंता.
22 बगवंतना वचन सिरिप केन्ज्वले आयो बति, अद वचन वेह्ता तीर ताकना.
अहन ताक्वेके मीवा मिरट मोसेम कीतुर आंतिट.
23-24 बगवंतना गोस्टि केन्चि, अद गोस्टि तीर कियोर वोर मायनल आर्सतगा तंवा मोकोम सूड्सि, तना बहन मंतोरो इंवल बह्रि सोन्जि, येंटने मरुङ्वन दात मंदंतोर.
25 बति बगवंतना वचंतुन दिहंते सूड्तेके तान्गा बतय कमि सेले.
पर्जतुन अद मोक्डो सुटि कियुसा परंता.
अदेन साटि बोर्ते मायनल अद वचंतुन केन्चि, अद वेह्ता तीर कींतोरो, अद वचंतुन वोर बस्केन मर्न्गोर.
बति अद वेह्ता तीर पिसंतोर.
आतोर मायनल बद काम कीतेके गिर बगवंतल वोन आसिर्वाद सींतोर.
26 बोर्ते तंवा तनय बक्तना इन्जेर वेह्चेर, तंवा वेन्जेडुन जरब्ने इरा परोरो, वोर तंवा तनकुन मोसेम किय्वल आंतोर.
वोना बक्ति बततुने कामि सियो.
27 रांडे वेय्लोकुन अनि पोसटि मरि-मियडुन तक्लिब मनेके, वूरकुन मदत किय्वल बक्तितुने बगवंतल कोर्सेर मंतोर.
अह्ने इद दुनियता पाप तनकुन तुंड्वक्ने सुदुड मंवल बक्तितुन गिर बगवंतल कोर्सेर मंतोर.
इहिन कल्ति सेल्वक्ने मंवल बक्तिये करल बक्ति आंद.