1वा पेतुरु
पेतुरु लिहि कीता मोदोडा चिटि
दंडोस वेह्वल
1
1 नना येसु किरिस्तुनोर अपोस्तुल* आय्वल पेतुर्ता आंदुन.
रोमा राज्नङ येरियङ, पोंतु, गलतिया, कपदोकिया, आसिया अनि बितुनियतगा पग्रे मासि, मुसपरिर दात मिरट पिसेर मंतिट.
बगवंतना केय्दे नेमे मातुर मी साटि, इद चिटि लिहि कीसेर मंतोन.
2 मा बाबो आय्वल बगवंतल मीकुन तंवा बविसत्ना गियंतुन पिय्सि, पवित्रा आत्मते तंवा साटि आच्चि अलग कीतोर.
बारितेके मिरट येसु किरिस्तु वेह्ता तीर ताकना अनि वोना नेतुडे मीवङ पाप्क सुदुड आयना इन्जेर बगवंतल मीकुन नेमि कीतोर.
वोरे मीकुन तंवा पेर्मता-दया अनि सांति बर्पुर सियिर.
करल आसा
3-4 मा येसु किरिस्तु पर्बुनोर बाबो आय्वल बगवंतने डगुर-पान वायि.
बगवंतल तंवा वेले दयते, माकुन पूना जल्मा वायुस्तोर.
अद पूना जल्मतुन हिंदल करल आसा मी रोपो पुटुस्तोर अनि स्वर्ग्नगा मी साटि जाय्जत इर्तोर.
येसु किरिसतुन सातुर्गटल बगवंतल नेंडुस्वडुन हिंदल, अद आसा मीकुन पुड्ता.
अनि स्वर्गना अद जाय्जत बस्केट नासेडम आयो.
अद जाय्जत बर्पुर सुदुड वाले आंद अनि बस्केट मारियो अद आंद.
5 बगवंतल मीवा बरोसतुन हिंदल, आक्रिता दिवोस वेरि, मीकुन तंवा सक्तिते काबाडंतोर.
अस्के तना वेह्चि तोह्ता पिलंतुन पिय्सि, बगवंतल सम्दिर लोकुरकुन बर्पुर बहन बचि कींतोर इंवडुन तोहंतोर.
6 अदेन साटि मिरट बस्केट आनंद्ने मंदना.
तेर बति इचुसा कालम वेरि, मोका मिरट वेले तीर्क्नङ तक्लिब्क बोगे माया लागर.
7 मूरे माय्वल सोनेतुने तड्मितगा वाट्सि, परिक्सा कींतेर.
बति मीवा बरोसा सोनेतुन तेर वेले बारिता आंद.
मी बरोसा करल आंद कि सेले इन्जेर परिक्सा किय्ले, इव दुक्सङ वासेर मंतङ.
इहिन परिक्सा किय्वल मार्ता पेजे, येसु किरिस्तु मल्सि वाय्वल दिवोसुन नेटि, बगवंतल मीकुन मेच्चि, डगुर-पान अनि मय्मा सींतोर.
8 मिरट येसु पर्बुन सूड्मकि तेर बति, पेर्मा कीसेर मंतिट.
इंके गिर मिरट सूड्सेर सेल्विट तेर बति, वोन पोरो बरोसा कीसेर, गोस्टिने वेहा वायो अचोर मय्मता आनंद्ने निन्चि मंतिट.
9 बारितेके मीवङ आत्मङ बर्पुर बचे मासेर मंतङ.
तान साटिने मिरट येसु किरिसतुन पोरो बरोसा इर्तिट.
10 मीकुन पुट्ता इद बचे माय्वडुन बारेते पर्वक्तलिर बेय दिहंते सूड्सि, मह्क्तेर.
वूर मी साटि बगवंतल इर्ता पेर्मता-दयतुन बारेते वेह्तेर.
11 वूर्गा मंवल किरिस्तु बोगे माय्वलिक दुक्सङ अनि अवेन हिंदल, वाय्वल मय्मतुन बारेते किरिस्तुना आत्मा मोदोले वेह्ता.
अद आत्मा वेह्ता कालम अनि गट्नन बारेते करि किय्ले, वूर कोसिद कीतेर.
12 वूर तम्वा लाबमुन साटि इहिन सेवा किय्मकि बति, मी साटिन कीतेर.
इद गोस्टितुन बगवंतले वूरकुन करे मानल कीतोर.
ते इंके स्वर्गनल रोह्ता अद पवित्रा आत्मता सक्तिते कहितुर मिह्गा चोकोट्ना कबुडुन पिय्सि वातेर अनि वूर मीकुन सम्जे मानल वेह्तेर.
इवेन बारेते करि कियना इन्जेर बगवंतनुर दूतलिर गिर सूड्सेर मंतेर.
पवित्रा मंदना
13 अदेन साटि दिहंते मन्जेर, मीवा मंदुन जरब्ने इर्सि, तयर मंट.
येसु किरिस्तु पावे मांतोर अस्के, मीकुन पुट्वल बगवंतना पेर्मता-दयते बचे माय्वडुन बारेते बर्पुर आसते मंट.
14 मिरट मोदोल करे माय्वा सोन्जि, करब आसने ताक्तिट.
इंके चुडुर मरि-मियड वेह्ता तीर बहंते ताकंतेरो, अह्ने मिरट गिर बगवंतनुर मरि-मियडुन मोडि ताकट.
15-16 बति दर्मा-ग्रंत्नगा बगवंतल, “नना पवित्रा वालेना आता काड्कि, मिरट गिर पवित्रा मंदना” इन्जेर वेह्तोर.
अदेन साटि मीकुन केय्वल बगवंतल पवित्रा वाले आता काड्कि, मिरट गिर सम्दो तीर्दे पवित्रा मंदना.
17 बेद-बाव सेल्वक्ने हर वोरोनङ कामकुन पिय्सि, तस्वा किय्वल बगवंतन मिरट ‘बाबा!’
इन्जेर पार्तना कीसेर मंतिट.
ते स्वर्ग मीवा सोंता रोन आता काड्कि, मिरट मुसपरिर मोडि, इद दुनियते पिस्वल कालम पूरो गिर बगवंतन वेरिसि ताकट.
18 बारितेके मी तोत्तुर्गटल वातङ रीति-रिवजकुन पिय्सि, मी जिन्गनिता अर्तम सेल्वक्ने पिस्तिट.
बति इंके आतल जिन्गनितल बगवंतल मीकुन सुटि कियुस्तोर.
अद सुटि कियुस्वल कार्या मूरे माय्वलिक सोने-कूरा इंवलिक वस्तुने सिरिप जर्ग्मकि.
19 बति अद काम येसु किरिस्तुना नेतुडुन हिंदले जर्ग्ता इन्जेर मीकुन टावा.
अद काम सिरिप सुदुड, बे-कसुर वाले, बदे तप्ना डाग सेले अद गोरे पिलत दात्ना किरिस्तुना+ बेय विलुवता नेतुडेन जर्ग्ता.
20 इद कार्यतुन साटिने बगवंतल कलि गडि किय्वक मुनेने किरिसतुन नेमि कीतोर.
बति इव आक्रितङ दिवोस्क्ने बगवंतल मी साटिने वोन उजगिरि अरुस्तोर अनि इद दुनियते सारि कीतोर.
21 वोन हिंदले मिरट बगवंतनगा बरोसा कीसेर मंतिट.
बारितेके किरिस्तु मार्ता पेजे बगवंतल वोन नेंडुसि मय्मा सीतोर.
अदेन साटि मिरट मीवा बरोसा अनि आसा बगवंतन पोरो इर्तिट.
वोरोन वोरोर पेर्मते सूडना
22 येसु वेह्ता सतेमुन केन्ज्वल अनि पिय्सि ताक्वल कीनेके, मीवङ आत्मङ सुदुड आतङ.
अदेन हिंदल वोरोन वोरोर मिरट करल पेर्मते सूडा पर्सेर मंतिट.
इद तीर्दे मी दात बक्तलिर आसि मंवलिरकुन बर्पुर दिल्दे पेर्मा कीसेर मंट.
23 बारितेके मीकुन पूना जीवा बगवंतनल पुट्ता.
सासि सोंवडल इद पुट्मकि बति, बस्केट मंवडल पुट्ता.
बगवंतना जीवा वाले अनि बस्केट मंवल वचंतुन हिंदल अद पूना जल्मा पुट्ता.
24-25 इद बहन इत्तेके, बगवंतनोर वोरोर कब्रियल इहिन वेह्तोर:
“नरिमन्कलिर जाडितुन दात्नुर आंदिर.
वूर्गा मंवल सोबा पुङकुन दात्ना आंद.
जाडि वतंता अनि पुङक जडे मांतङ.
बति पर्बुना वचन बस्केन मूरे मायो!”
+
अद बतल इत्तेके, मिरट केन्ज्ता अद चोकोट्ना कबुरे आंद.