पोरोलकुन पिय्सि वीर बूर आंदिर
अकुला वेर डेरङ कोट्वल अनि यूदुल्क्ना जातितल येसुन नम्सि, पव्लुन दोस्तल आसि मत्तोर. वेना वेय्लोना पोरोल पिरिस्किला. (अपो. का. 18:26)
अब्राहम अब्राहम यूदुल्क्ना जातितुरकुन अनि बगवंतनगा बरोसा इर्वलिरकुन मोदोडोर बाबो आंदुर. बगवंतल वेन उर इंवल नाटनल वोना कांदांतुरकुन वाग्दन सिय्वल देस्नगा ताकुस्तोर. सडसाट मंवल तंवा वेय्लो सारनल इसक्ना जल्मा आयुसि, कहा परुर अचोर पर्जतोर बाबोन मोडि, बगवंतल निपुस्तोर. (अपो. का. 3:25)
अहरोन अहरोन मोसेनोर तादल आंदुर. वेर इज्रयेल्क्नुर पेर्सुर कटोडलिर्गटल मोदोडोर आंदुर. वेन्गटल कटोडा-पान इंवल मोदोल आता. बति बोडि गुटनगा पर्जा कोर्ता तीर सोनेता पड्डा निव्डि कीतोर वेरे आंदुर. (अपो. का. 7:40)
आदम बगवंतल कलितगा गडि कीतोर वोर मोदोडोर मायनल आदम आंदुर. वेन बगवंतल येदोन इंवल वाडितगा इर्सि मत्तोर. बगवंतल वोन आगे सीसि, तिन्मा इत्ता अद पंडितुन तिंवल कीनेके, पाप नेङ्सि, पूरो कलितगा मंवलिकुन मरन इंवल वाता. (1वा कोरंति 15:45)
आंद्रेयल वेर बारा जन्क अपोस्तुल्क्नगटल वोरोर आंदुर. वेनोर तादना पोरोल पेतुरु. वीर बोयलिर आंदिर. (मार्क 1:16)
इसक बगवंतल वाग्दन सीता तीर अब्राहमुन अनि सारन वेर इसक मातरि-पांदे जल्मा आतोर. अहन कहि साल्क आता पेजे बगवंतल वेर मरिन नाकुन बलिदान सीम इन्जेर अब्राहमुन परिक्सा कीतोर. बति आक्रित वोर मरिन बलिदान सिय्वडल बगवंतल तंवोर दूतन रोह्चि आपुस्तोर. इसक रिब्कन तुङ्तोर. वीरकुन येसवु अनि याकोब इंवलिर इविर येमलिर जल्मा आतेर. (याकोब 2:21)
इस्करियोत्नोर यूदल वेर यूदल बारा जन्क अपोस्तुल्क्नगटल वोरोर आंदुर. वेना नाट्ना पोरोल इस्करियोत. इद नार हेब्रोंतुन करुम मंता. वेर आक्रिता गट्कते येसुन दोका सीतोर अनि तना सोन्जि सर्पासा वाड्सि सातोर. (योहन 6:71)
एलिजबेत इद बायि जकरिया कटोडना वेय्लो आंदु. तंवा मातरि-पांदे बाप्तिस्मा सिय्वल योहंतुन जल्मा सीता. (लूका 1:5-13)
कयपा कयपल पेर्सोर कटोडल आंदुर. येसु बगवंतन रेह्चि वड्क्तोर इन्जेर कसुर वाड्सि, मरंता सिक्सा वाट्ले, पिलातुनगा सारि कीतोर वोर वेरे आंदुर. (योहन 11:49)
कोर्नेलि रोमा सर्कार्दा दलम्नोर कमंडर आंदुर. कय्सरिया इंवल नगुडे मंदुर. येसु पर्बुनगा बरोसा इर्सि ताक्तोर आंदुर. (अपो. का. 10:22)
क्लेयोपल येसुनुर वेलेटिर सिस्यलिर्गटल वेर वोरोर आंदुर. किरिस्तु नेंड्ता पेजे एंमायि इंवल नाटे सोनेके बेटे मातोर. (लूका 24:18)
जकयल जकयल टेक्सा वसुलि किय्वल आंदुर. वेर बगड तरिकते डगुर दनेवंतल आतोर. येरिको चहर्ते येसु वानेके सूडना इन्जेर तोया मरतगा तेर्ग्सि सूड्सेर मत्तोर. बस्केते येसु, वोना रोतगा आरम किय्ले जकयन बूड केय्तोरो, अस्के वोर बेय कुसिते रेय्तोर. वोर जकयल मोदोल पसि कीसि, दुस्रुर्गटल कमय कीता अदेन पूरो तूसि सीतोर. (लूका 19:1-10)
तबितल इद बायिन दोर्का इन्जेर गिर केयंतेर. (अपो. का. 9:36)
तिमोति वेर तिमोति, येसुन बारेते पव्लु वेह्नेके बरोसा इर्तोर बक्तल आंदुर. रेंडवा जोका चोकोट्ना कबुर वेह्ले सोनेके, अपोस्तुल आय्वल पव्लु वेन गिर तंवा सङा वोतोर. अनि पव्लु 1वा अनि 2वा तिमोति चिटिङ वेन साटि लिहि कीतोर. (1वा कोरंति 4:17)
तीतु वेर दुस्रो जातितोर आसि गिर पर्बुनगा बरोसा इर्तोर. ते पव्लु वेन केरेतु इंवल लंकतगा सेवा किय्ले रोह्तोर. तीतु इंवल चिटि पव्लु वेन साटि लिहि कीतोर. (2वा कोरंति 8:6)
तोमल तोमल येसुनुर बारा जन्क अपोस्तुल्क्नगटल वोरोर आंदुर. येसु सासि-नेंड्तोर इन्जि दुस्रुर वेह्ता केन्चि, अनमिना आसेर मत्तोर वोर आंदुर. वेर तोमले मावा बारत देस्नगा किरिस्तु सकम लग-बग पनस रंड (52) साल्दगा वासि, येसुन बारेता चोकोट्ना कबुर मोदोल वेह्तोर आंदुर. (योहन 20:27)
दाविद दाविद, येसयिनोर मर्क्नगटल सेव्टतोर आंदुर. बाबोनङ गोरेङ मेह्चेर मंदुर. अस्के समुयेल पर्वक्तल सव्लु राजन बद्लि राजल आय्ले, तलदगा निय वेडिसि नेमि कीतोर. दाविद पिलिस्तिया जातितोर गोलियतु इंवन जक्तोर. दाविद्ना पोरोल सोत्ता काड्कि, सव्लु राजल वेन जक्ले सूड्सेर मत्तोर. ते वोर राजना केय्दल तंवा जीवा दकुस्ले बोडि गुटनेके परर आसि सोत्तोर. सव्लु राजल मार्ता पेजे, दाविद राज ताकुस्वल मोदोल कीतोर. दाविद येरुसलेमुन तंवा राज्वाडा कीतोर अनि अगा बगवंतना नियम्क मंवल संदोकुन तरुस्तोर. वेर दाविद डगुर पोरोल सोत्तोर वोर राजल आंदुर. किरिस्तुनल हजर साल्क मुने वेर दाविद राजल राज ताकुस्तोर. वेर वेले कीर्तन्क गिर लिहि कीतोर. (अपो. का. 13:22)
दोर्का इद बायि योप्पेकु चहर्ता बक्ते आंदु. गरिबकुन अनि रांडे वेय्लोकुन वेले मदत कीता. तेना मरन आता पेजे, पेतुरु वासि, तान नेंडुस्तोर. (अपो. का. 9:36)
निकोदेमल वेर निकोदेमल परिसया वर्गतोर अनि यूदुल्क्नोर अदिकारि आंदुर. उंदि दिया रात्ना येलते येसुनगा वासि, बोदा केन्ज्तोर. अनि येसुना कूरदुन माति कीनेके वेर मदत कीतोर. (योहन 3:1-9)
पव्लु पव्लुन मोदोल सव्लु इन्जेर केय्ंदिर. वेना जल्मा तार्सिस नगुडे आता अनि वेर परिसयुल्क्ना रीति-रिवज पिय्सि बेर्स्तोर. उंदि दिया अचनक दमस्कु सोनेके, बक वेड्चिते दीपे मासि अर्तोर. अद तीर्दे येसु पावे माता काड्कि, वोर पर्बुनगा बरोसा इर्सि दुस्रो जातितुरकुन पर्बुना चोकोट्ना कबुर वेह्ले सेव्कल आतोर. वेर चोकोट्ना कबुर वेह्ले नालुङ जोकङ यात्रा कीतोर. अनि अहन यात्रा कीनेके, बक्तलिरा बक्तितुन बडे माय्ले वेले मदत कीतोर. वोर बरोसा इर्तुर वूर बक्तलिरकुन मदत किय्ले, वेले चिटिङ लिहि कीतोर. रोमा सर्कार्तोर नीरो महराजल पव्लुन किरिस्तु सकम 67तगा मरंता सिक्सा वाट्तोर. (रोमा 1:1)
पिरिस्किला इद बायि अकुलना वेय्लो आंदु. यूदुल्क्ना जातितल येसुन नम्ता वेय्लो आंदु. वीर आड-माड्सो पव्लुनुर दोस्तलिर आंदिर. (1वा कोरंति 16:19)
पिलातु वेर पिलातु रोमा सर्कार्तोर यूदया येरियतोर गवर्नर आंदुर. वोर येसु बे-कसुर वाले इन्जेर पिलातुन करे माता पेजे गिर वोन मरंता सिक्सा वाड्तोर. (मार्क 15:1-15)
पिलिपु येसुनुर बारा जन्क सिस्यलिर्गटल वेर गिर वोरोर आंदुर. वेर पिलिप गलिलया येरियता बेत्सयिदा नाट्नोर आंदुर. (योहन 1:45)
पेतुरु (सीमोन पेतुरु) वेर पेतुरु बोयल आंदुर. वेन येसु तंवुर बारा जन्क अपोस्तुल्क्नगटल वोरोर आय्ले केय्तोर. सासि-नेंड्ता पेजे येसु मुकेते पेतुरतुन दिस्तोर. अद आता पेजे पूना-पूनि बरोसा इर्वलिर चर्च्नुरकुन ताकुस्वल आतोर. वेर 1वा अनि 2वा पेतुरु इंवलिक चिटिङ लिहि कीतोर. रोमा सर्कार्दुर वेना जीवा येत्तेर. (लूका 5:8)
बर्नबल योसेप इन्जेर गिर वेर बर्नबन केयंतेर. वेर यूदुल्क्ना जातितल येसुनगा बरोसा इर्तोर आंदुर. वेर बर्नबल पव्लुन सङा मीरे मासि, यात्रा कीसेर चोकोट्ना कबुर वेह्तेर. वेना पोरोडा अर्तम: गटि-दीर्या सिय्वल मरि. (अपो. का. 4:36)
बाप्तिस्मा सिय्वल योहन वेर योहन बचि किय्ले वाय्वल किरिस्तुना सरि सुद्रि किय्ले वातोर आंदुर. वेर सादरन तरिकते पिस्तोर अनि पाप्कनल मंदुन मार्युसिय्वडुन बारेते अनि बाप्तिस्मतुन बारेते बोदा कीतोर. वेन जेल्दगा वाटुसि, हेरोद अंतिपस वेना तला नट्कुसीतोर. (मत्तयि 11:11)
मग्दलेने नाट्ना मरियल इद मरियल गलिलया येरियता मग्दलेने नाट्ना आंदु. तेन येसु इट्सि चोकोट कीतोर. येसु सासि-नेंड्ता पेजे मोदोल इदे बेटे माता. (मत्तयि 28:1)
मत्तयि वेर मत्तयिन लेवि इन्जेर गिर केयंतेर. येसु वेन केयन मुने वेर टेक्सा वसुलि किय्वल आंदुर. वेर येसुनुर बारा जन्क अपोस्तुल्क्नगटल वोरोर आंदुर. वेर पूना नियम्ना मोदोडा पुस्तक लिहि कीतोर. (मत्तयि 9:9)
मरियल-1 इद मरियल येसुना अवल अनि योसेप्ना वेय्लो आंदु. बगवंतनगा इर्ता बरोसतुन बारेते, लूकल लिहि कीता पुस्तक्नगा इद मरियल वार्ता उंदि पाटा लिहि कीसि मंता. मरता मोद्नगा तंवा परन सुटि कीनेके, येसु तंवा अवना चोकोट-वायुट सूडा इन्जेर योहंतुन वेह्तोर. (लूका 1:46-55)
मरियल-2 इद मार्तना सेलड आंदु. इद मरियल, येसुना मरंतुन मुने, येसुन पोरो सेंट वेडिता. (योहन 11:2)
मार्तल इद मार्तल, मरियल अनि लाजर्ता तका आंदु. इद तंवा सेलड अनि तमुन सङा बेतनि इंवल नाटे पिसेर मत्ता. (योहन 11:1)
मोसे मोसे इंवल पडना नियम्नोर पर्वक्तल आंदुर. ईजिप्ट देस्नगा मंवलिर इज्रयेल पर्जतुन वूरा दासि-पांदल सुटि कियुसि बगवंतल वेह्तपिनय वूरकुन बह्रि तत्तोर. इज्रयेल पर्जा सम्दिर गिर वेर मोसे लिहि कीतङ सियुङ ग्रंतकुन ( इत्तेके पुट्गड्मि, बह्रि पेसिवल, कटोडलिरा, इसोब्ना, रेंडवा उपदेस इंवलिक चुडुक पुस्तकुन) कानुंतुन दात मानि कींतेर. (अपो. का. 7:20-44)
याकोब-1 याकोब इसक्नोर मरि आंदुर. वेर तंवोर बाबोन अनि तंवोर तादल येसवुन पसि कीसि मडनोर मरिना हकुन इस्का पातोर आंदुर. वेर लेयन अनि राहेलतुन तुङ्सि, बारा जन्क मरकुन मिय्तोर. वीरे यूदुल्क्नुर तोत्तुर बाबुर आंदिर. बगवंतनोर दूतन सङा लडेय कीसि मेय्ता पेजे, वेन इज्रयेल इन्जेर पोरोल वाता. (मत्तयि 1:2)
याकोब-2 वेर याकोब येसुनोर तमुर आंदुर. पेंतेकोस्तु सड आता पेजे येरुसलेम्ना चर्च्नुरकुन ताकुस्वल पेदोल आतोर. वेरे याकोब इंवल चिटितुन लिहि कीतोर. (गलति 1:19)
याकोब-3 वेर याकोब योहंतोर तमुर आंदुर. वीर बोयलिर आंदिर. वीरकुन येसु तंवुर अपोस्तुल्क आय्ले केय्तोर. येसु तंवा रूप मार्युस्नेके वोन सङा मत्तोर आंदुर. हेरोद अग्रिपल वेन मरंता सिक्सा वाड्तोर. वेरे आय्वा आल्पयिनोर मरि याकोब इंवल उंडे वोरोर अपोस्तुल मंतोर. (अपो. का. 1:13)
येहोसुवल मोसे मार्ता पेजे, इज्रयेल लोकुरकुन कनान देस्नगा ताकुस्तोर अनि दुस्रोक जातिनुर सङा लडेय कीसि मेय्तोर. अनि वूर बारा कांदानुरकुन अद देसुन पाकि कीतोर. (अपो. का. 7:45)
येलियल वेर तोत्तुर इज्रयेल लोकुरोर पर्वक्तलिर्गटल वेले दर्यम वाले पर्वक्तल आंदुर. येसु तंवा रूप मार्युस्नेके, अद गुटत पोरो मोसे अनि वेर येलिया पर्वक्तल दिस्तेर. (मत्तयि 17:3)
येसु बगवंतना सक्तिते कोरो पेडि आय्वल मरियन पुट्तोर वोर मरिना पोरोल येसु. वेने दुनियतुरकुन बचि किय्ले बगवंतल नेमि कीतोर. वोर बेय वेले मय्मतङ काम्क कीतोर अनि बगवंतना राजुन बारेता कबुर वेह्तोर. अनि तोले पर्वक्तलिर वेह्तङ सम्दो गोस्टिङ पूरि किय्ले, वेर येसु कोरो पेडिना पीटे जल्मा आतोर. बेय पवित्रा अनि सुदुड पिस्तोर. सम्दिरङ पापकुन कंडि किय्ले मोद्नगा तंवा तना बलिदान आतोर. अनि मूंद रोज्क्ने नेंड्तोर. इंके बगवंतन सङा कलिता राज ताकुसेर मंतोर. बय्बिलतगा वेह्वल सते बगवंतल सिरिप वोरोरे मंतोर. अनि वोर, मूंद तीर्क्ने उंदि आसि मंतोर. इत्तेके बाबो बगवंतल, मरि बगवंतल अनि पवित्रा आत्मा बगवंतल. येसु बाप्तिस्मा येत्नेके मरट वीर मुविर बारेते सूडंतट. बस्केते मरि बगवंतल आय्वल येसु येतल बह्रि वासेर मत्तोरो, अस्के पवित्रा आत्मा बगवंतल पोरोडल पावेरता रूप्ने वोन पोरो रेय्तोर, अनि बाबो बगवंतल पोरो स्वर्गनल वड्क्तोर. वीर मुविर्ते अलग अलग मंतेर बति, गुन्क्नगा बर्पुर येकि आसि मंवल कीनेके वोरोरे बगवंतल इन्जेर केयंतट. (मत्तयि 3:16-17)
योना वेर योनल हेब्रि जातितोर पर्वक्तल आंदुर. वेन निनेवा नगुडुरकुन तंवा गोस्टि वेह्ले बगवंतल नेमि कीतोर. बगवंतनगा बरोसा इर्मकि वूर दुस्रो जातितुर्गा सोत्तुर वूर पर्वक्तलिर्गटल मोदोडोर आंदुर. वेर परर आसि सम्दुर्तेके सोत्तोर. अगा सम्दुरतगा मुडुङ्सि साय्वक्ने डगुर मींदुन रोह्चि, बगवंतल वेन काबाड्तोर. (मत्तयि 12:41)
योसेप-1 योसेप याकोब्नोर मरि आंदुर. वेन तंवुर तादलिर पगा पिय्सि ईजिप्ट सोंवलिरकुन वोम्तेर. अगा वोन पोरो लबड कसुर वाट्तेर अनि वोर जेल्दगा कोंडे मासि मत्तोर. अद आता पेजे परो राजना सप्नता अर्तम पोडि कीसि वेह्तोर. अदेन साटि वोन परो राजल तंवा राज्नगा डगुर मंत्रि इन्जि नेमि कीतोर. दुनियतगा करु अर्सि मंवल गट्कते तंवा कुटुंबतुरकुन ईजिप्ट केयुसि, अद करुतल बचि कीतोर आंदुर. (हेब्रि 11:22)
योसेप-2 (मरियनोर माड्सो) वेर योसेप दाविद्ना कांदांतोर आंदुर. वेर वाडे काम कींदुर. वेरे येसुना अवल आय्वल मरियन तुङ्तोर. पवित्रा आत्मता सक्तिते मरियल पीटे रेहे माता इन्जेर करि कीसि तान करुम कीतोर. अनि नोव महिनङ नोव गट्कङ निंदनल वेरि तान सङा वोर मींड्मकि बति, तान चोकोटे सूड्तोर. (लूका 1:27)
योसेप-3 (अरिमतया) यूदुलकुन बचि किय्ले वाय्वन साटि सूड्सेर मंवल बक्तल आंदुर. संहेद्रिंतुर पेदोल्क्नगटल वोरोर आंदुर. वेर अरिमतया चहर्तोर आंदुर. येसुनगा बरोसा इर्सि, मक्डिते सेवा कीसेर मंदुर. तंवा कूर इरन साटि नार्युसीता बंडता पूना बुयरितगा येसुना कूरदुन इर्तोर. (लूका 23:50-51)
योहन वेर योहन याकोब्नोर तमुर आंदुर. वीर बोयलिर आंदिर. वेन येसु वेले लाड कींदुर. येसु मरता मोदुन पोरो तंवा परन सोंदन मुने, तंवा अवना चोकोट-वायुट सूड्वडा जिमा वेन पोरो वाड्तोर. वेरे, 1वा, 2वा, 3वा योहन इंवलिक चिटिङ, योहन लिहि कीता चोकोट्ना कबुर अनि उजगिरि अरुस्वल ग्रंत गिर लिहि कीतोर. वेर योहने आय्वा, अद गट्कते दुस्रुर योहन्क गिर मत्तेर. (लूका 22:8)
लाजर वेर मार्तल अनि मरियनोर तमुर आंदुर. वेर बेतनि इंवल नाटे मंदुर. वेर साता पेजे येसु वेन नेंडुस्तोर. (योहन 11:1-44)
लूदियल इद बायि बारितङ कप्डिङ वोम्वल तुयतय्रता बेपरि-दारे आंदु. पव्लु चोकोट्ना कबुर वेह्ततुन हिंदल येसुनगा बरोसा इर्ता. (अपो. का. 16:14)
सारयि (सारल) इद सारल अब्राहम्ना वेय्लो अनि इसक्ना अवल आंदु. तेना जिन्गनितगा मातरि-पांदे मनेके बगवंतना वाग्दन पूरे माता. (हेब्रि 11:11)
सीजर अव्गुस्तु महा राजल वेर महा राजल किरिस्तु पूर्वम चालिस नालुङ साल्क्नल्ते किरिस्तु सकम चोव्दा (44-14) साल्क वेरि पूरो रोमा राज्नगा सांतिते राज ताकुस्तोर. येसु वेना गट्कतेन जल्मा आतोर. (लूका 2:1)
सीजर महा राजल सीजर इत्तेके, रोम राज्नोर महा राजल आंदुर. वेन बूड उंडे वेल्लेटिर अदिकारिर मंदंतेर. (लूका 2:1)
सीलल वेर सीलल येरुसलेम्ना चर्च्नुरकुन ताकुस्वल पेदोल्क्नगटल वोरोर आंदुर. अनि वेर पव्लुन सङा चोकोट्ना कबुर वेह्ले रेंडवा यात्रतगा मीरे मासि सोत्तोर वोर आंदुर. (1वा पेतुरु 5:12)
स्टीपेन येरुसलेम नगुडगा अपोस्तुल्क्ना केय्दे काने अनि कोतङ तूस्वडा सेवा किय्ले, नेमे मातुर येड्विर्गटल वेर गिर वोरोर आंदुर. वेर यूदुल्क्ना जातितोर आंदुर बति, वेन ग्रीकु बासा गिर वांदु. अनि येसुनुर बक्तलिर्गटल दुस्रुरा केय्दे मोदोल जीवा सुटि कीतोर वोर वेरे आंदुर. (अपो. का. 6:5-8)
हवल बगवंतल मोदोडोर मायनल आय्वल आदमुन जोड आसि मंले, इद हवन गडि कीतोर. बस्केते हवल अनि आदम, बगवंतल तिंवा इत्ता अद पंडितुन तित्तेरो, अस्के इद कलितगा पाप अनि मरन इंवल वाता. वीर गल्ति कीता काड्कि, बगवंतल येदोन वाडितल तेंड्सि पूड्तोर. (2वा कोरंति 11:3)
हेरोद राजल येसुना जल्मा आय्वल गट्कते वेर हेरोद राज ताकुसेर मत्तोर. यूदया येरियतगा बेय डगुर महल दोहुस्तोर. दुस्रोक देस्कनल गियन वालिर पूनोर राजल आय्वल येसुन पार्तना-विंति किय्ले वासि, दुस्रो सरिय सोत्ता पेजे, अद येरियतुर मोड्डलिरकुन जकना इन्जेर वेर राजल आगे सीतोर. वेर राजल किरिस्तु पूर्वम तीसा येडुङ (37) साल्क्नल्ते किरिस्तु सकम नालुङ (4) साल्क वेरि, राज ताकुस्तोर. (मत्तयि 2:1)
हेरोद अंतिपस राजल वेर हेरोद राजनोर मरि आंदुर. बाबो मार्ता पेजे, यूदया येरियतुन राजल आतोर. वेर हेरोद योहंतुन जेल्दगा वाटुसि, तला नट्कुसीतोर. येसु गलिलया येरियतोर आता काड्कि, वोन सिक्सा वाट्ले पिलातु, वेर हेरोद्नगा सारि कीतोर. वेर किरिस्तु पूर्वम नालुङ (4) साल्क्नल्ते किरिस्तु सकम तीसा नोव (39) साल्क वेरि राज ताकुस्तोर. (लूका 9:7)
हेरोद अग्रिपा राजल वेर हेरोद राजनोर तङ्मरि आंदुर. रोमा सर्कार्दल यूदया येरितगा राज ताकुस्वल आक्रितोर राजल आंदुर. वेर किरिस्तु सकम चालिस उंदि (41) साल्दल्ते चालिस नालुङ (44) साल्क वेरि राज ताकुस्तोर. (अपो. का. 26:1-32)