पव्लु अनि वोन उल्टा निल्वलिर बारेते
11
1 नना जरसि पिसन मोडि वड्क्तेके गिर मिरट नाकुन सोसि कियना इन्जेर कोर्सेर मंतोन.
दया कीसि नाकुन सोसि कीम्ट.
2 मी बारेते नना बेय आसते मंतोन.
इद आसतुन बगवंतले ना रोपो पुटुस्तोर.
बारितेके, तंवोर वोरोरे मंवल माड्सोना केय्दे हव्लि किय्वल पवित्रा वाले अनि बे-कसुर वाले कोरो पेडिन मोडि, मीकुन किरिस्तुना केय्दे हव्लि कियना इन्जि मत्तोन.
3 बति तरस तंवा कपेटल पिलंते हवन पसि कीतपे,+ मीवङ मनकुन किरिस्तुनगा मंवल बर्पुर बाव-बक्तितल, बह्कि कींतयो बतलो इन्जेर नाकुन वेरे पिय्ता.
4 बारितेके ममोट मीकुन येसुन बारेते, बगवंतना चोकोट्ना कबुडुन बारेते, अनि आत्मतुन बारेते वेह्तोम.
बति इव गोस्टिन उल्टा बूरे मिह्गा वासि वेह्तेके गिर, वूरकुन वोपंतिट.
5 वीर बेय मुके वालिर इन्जेर केय्वलिर अपोस्तुल्क्नगटल, जरा गिर नना कमि वालेना आयोन इन्जेर वेह्चेर मंतोन.
6 चोकोट वड्क्वल नाकुन अनुबव सेल्वेके गिर, दर्मा-ग्रंत्नगा मंवडुन बारेते वेले गियन अनि अनुबव मंता.
इदेन मीकुन मोदोले तात्कर तोह्वल जर्ग्ता.
7 मीकुन बगवंतना चोकोट्ना कबुर पोकोटे वेह्तोन.
मीकुन डगुर-पान सीसि, नावा नना चुडुर-पान येत्तोन.
इहिन किय्वडुन हिंदल पाप कीतोन कि बतल?
असले किय्मकि!
8-9 नना मिह्गा मनेके नावङ जुरतकुन पूरि किय्ले, मिह्गटल बोन पोरोन नावा वजन तोचुस्मकि.
अदेन बद्लि, मासिदोनिया येरियतल पर्बुन नम्तुर वूर दादलिर-बायिक वासि, नावङ जुरतकुन पूरि कीतेर.
इद गोस्टि, अव चर्चिनुर्गटल लूटि कीसि मीकुन मदत कीतप मंता.
नना मी पोरो बततय वजन वाट्वक्ने सूड्तोन अनि उंडे मुने गिर वाटोन.
10 किरिस्तुना सतेम ना रोपो मंता, अनि नना पोकोटे किय्वल इद सेवतुन अकया येरियतुर बूरे गिर इस्का पाया परुर इन्जेर, वोट वाट्सि वेह्चेर मंतोन.
11 नना मिह्गटल कोतना मदत येत्मकि इत्तेके, मी पोरो नाकुन पेर्मा सेले इत्तप कि?
असले आयो!
मीकुन नना बचोर पेर्मा कींतोन इंवल बगवंतन टावा.
12 कहितुर पोक्डा कीसेर वेह्तङ गोस्टिनगा मा दाते मंतोम इन्जेर तोह्ले सूड्सेर मंतेर.
आतल मोकत साटि मह्क्वलिरकुन मोका पुट्वक कियना इंवले नावा इचा.
तेर बति नना पोकोटे किय्वल सेवतुन उंडे गिर मुने कीसेरेन मंदंतोन.
13 बारितेके वूर आतुर किरिस्तुनुर अपोस्तुल्क्ना येसेम वाट्सि, कले काम अनि पसि किय्वलिर लबड अपोस्तुल्क आसि मंतेर.
14 इदेनगा गुल आय्वल बतय सेले!
सय्तन गिर वेड्चि सिय्वल दूतन मोडि येसेम वाट्सि मंतोर.
15 ते सय्तंतुर सेव्कलिर नियत्नुर मोडि येसेम वाट्वडगा गुल आय्वल बतय जुरत सेले.
वूर किय्वलिक कामकुन पिय्सि आक्रित वूरा नासेडम मंदंता.
पव्लु तंवङ तक्लिबकुन पिय्सि पोके माय्वल
16 नना पिसना आंदुन इन्जि बोरे सोन्च किय्वा इन्जेर उंडे उंदि जोका वेह्चेर मंतोन.
बति मोका नाकुन पिसले इंद्किट्ते, पिसन मोडि पोके मासि, उंडे जरसि वेहा सीम्ट.
17 नना पोक्डा वेह्नेके, पर्बु वेह्ता तीर वेह्चेर सेलोन बति, पिसन मोडि वेह्चेर मंतोन.
18 वूर्गटल वेलेटिर तम्वा मेंदोडे किय्वडुन पिय्सि पोके मासेर वेह्ता काड्कि, नना गिर अह्ने वेह्चेर मंतोन.
19 मिरट बेय गियन वालिर अले.
अदेन साटिने पिसलिरकुन कुसिते वोर्चेर मंतिट अले.
20 अचोरे आय्वा, मीकुन दासि-पांदे इर्वलिरकुन, मीकुन लूटि किय्वलिरकुन, मीवा पाय्दा येत्वलिरकुन, मीकुन कमि-पांदे सूड्वलिरकुन अनि मीवा कोर्वित पाय्वलिरकुन गिर वोर्चेर मंतिट अले.
21 वूर कीतपिनय ममोट किय्ले, माकुन लजन वाटेङ आसेर मंता इन्जेर, वोप्सेर मंतोम.
बति बूरे आयि, वूरा गोस्टितुन पिय्सि पोके मानिर्ते, नावा गोस्टितुन पिय्सि, नना गिर दर्यम्ने पिसन मोडि पोके माया परंतोन.
22 वूर तम्वा तमा पोके मासि, हेब्रि जातितोम आंदुम इंदनिर्ते, नना गिर हेब्रि जातितोनय आंदुन.
यूदुल्क्ना दर्मतुर आंदुम इंदनिर्ते, नना गिर यूदुल्क्ना दर्मतोना आंदुन.
अब्राहम्ना संतांदुर आंदुम इंदनिर्ते, नना गिर अब्राहम्ना संतांदोना आंदुन.
23 वूर किरिस्तुनुर सेव्कलिर आंदिर कि?
नना वूरकुन तेर अदिक किरिस्तुना सेवा किय्वना आंदुन इन्जेर, पिसन मोडि वेह्चेर मंतोन.
वूरकुन तेर अदिक काया-कस्टम कीतोन.
लेका सेलेङ अचोङ दन्कङ तित्तोन.
वेले जोकङ टानेतगा कोंडे मासि मत्तोन.
वेले जोकङ परन सोंवलिक गंडल्क्नगा अर्सि मत्तोन.
24 नावुर यूदुल्क्ना केय्दे सियुङ जोकङ, चाटल्क्ने तीसा नोव* (39) दन्कङ तितोन.
25 मूंद जोकङ डुड्डुने पातेर.
उंदि जोका बंडने पासि जक्ले सूड्तेर.
+ मूंद जोकङ रूका काच-कूच आसि, तक्लिब बोगे मातोन.
उंदि रात-दिहा सम्दुर्तगन मत्तोन.
26 गडि गडि यात्रा कीसेर मंतोन.
लव्डिना ऊसन हिंदल आपतिङ वातङ.
कले-कङ्रलिर हिंदल आपतिङ वातङ.
ना सोंता जातितुर हिंदल आपतिङ वातङ.
दुस्रोक जातिनुर हिंदल आपतिङ वातङ.
नगुक्नगा, बोरे मनुर अव बोडि गुटनगा अनि सम्दुर्क्नगा गिर आपतिङ वातङ.
पर्बुन नम्तोम इंवलिर लबड बक्तलिरा केय्दे गिर आपतिङ वातङ.
27 नना बचोरो काया-कस्टम कीसेर, कडकुन जोप सेलेङ अव वेले रात्क सूड्तोन.
येर अनि काने सेल्वक करुते मंवल इत्तेके बतलो नना करि कीतोन.
बरोबर पाङुक सेल्वा पीनिते तरा तरा आसेर मत्तोन.
28 उंडे गिर वेह्वलिक वेले मंतङ.
इव सम्दोय आय्वा चर्चिनुर सम्दिर बारेता पिकर हर रोज नावा दिलतगा वजन आसेर मंता.
29 इवेन सूड्सि, बोरे आयि तंवा बरोसतगा कम्जोर आनुर्ते, नना तकपिका आयोन कि?
तप्वक आंतोन.
बोरे आयि दुस्रुरकुन बरोसतल बह्कि कीनुर्ते, वोन पोरो नाकुन बेय सोङ वायो इंतिट कि?
तप्वक सोङ वांता.
30 मोका पोक्डा वेह्का इंद्कते, नना किया परोन अव गोस्टिन बारेतेन, पोक्डा वेहंतोन.
31 नना लबड वेह्चेर सेलोन इन्जेर, बस्केट डगुर-पान येत्वल येसु किरिस्तु पर्बुनोर बाबो आय्वल बगवंतन टावय.
32 दमस्कु नगुडे नाकुन पियना इन्जेर ना साटि, अरेता इंवल राजन बूड मंवल अदिकारि सिपायिरा केय्दे केपुसेर मत्तोर.
33 बति अस्के नाकुन कहितुर उंदि डालतगा उपुसि, किड्कितल गोडये बूड रेह्तेर.
अद तीर्दे नना वोना केय्दल तपुस्तोन.