पव्लुन दर्सन्क दिस्वल
12
1 पोक्डते वेह्वडुन हिंदल बतय पाय्दा सेले बति, नना पोक्डते वेह्वल आसेर मंता.
पर्बु नाकुन तोह्तङ दर्सनकुन बारेते, अनि अर्तम आनल वेह्तङ अव गोस्टिन बारेते वेहंतोन.
2-4 किरिस्तुनगा बरोसा इर्वल वोरोर मायनल नाकुन टावा.
बगवंतल वोन चोव्दा (14) सालकुन मुने तंवा बस्केट मंवल सोबता वाडितगा* वोतोर.
वोर मेंदोडे सोत्तोर कि, सेलेके मेंदोल सेल्वक सोत्तोर इंवल नाकुन टावा सेले बति, बगवंतन टावा.
अगा वोर मायनल बह्रि वेहा पर्वट आतङ अनि दुस्रुरकुन वेह्ले जमे मायोङ आतङ गोस्टिङ केन्ज्तोर.
5 वोन बारेते नना गर्वते वेहंतोन.
बति ना बारेते नना किया परोन अव गोस्टिन तपुसि, दुस्रोक बवे गोस्टिन बारेते गर्वते वेहोन.
6 मोका नना पोक्डते वेह्तेके गिर, नना करल वेह्ता काड्कि, नाकुन पिसल इंदा वायो.
नना वेह्तङ अवेन तेर, कीतङ अवेन तेर अदिक ना बारेते मिरट सोन्च किय्वा इंवले नावा इचा.
अदेन साटि, ना बारेते नना पोक्डते वेह्वक मंले, नावा मंदुन रोकि कींतोन.
7 बगवंतल तोह्तङ इव गोस्टिन बारेते, नाकुन गर्वा वाय्वा इन्जेर, नावा मेंदोडगा दुक्सतुन उंदि सापुन मोडि इर्तोर.
नाकुन दाबि कीसि इर्लेने, अद साप सय्तंदोर दूतन मोडि मंता.
8 अद सापुन नह्गटल तेंड्सि वाटा इन्जेर, मूंद जोकङ पर्बुन विनंति कीतोन.
9 बति पर्बु, “नावा पेर्मता-दया नीकुन मस्त आंता.
निमे जिगि सेल्वक मनेके, नावा सक्ति नी रोपो बर्पुर आंता” इन्जेर ना सङा वेह्तोर.
ते किरिस्तुना सक्ति ना सङा मंदना इन्जेर, बवेंते नना किया परोनो अवेन बारेतेन, कुसिते अनि गर्वते वेहंतोन.
10 इद कारंतेने, किरिसतुन साटि नना किया परोन अवेनगा, हिजत सोंवलिक्नगा, तक्लिब्क्नगा, दुक्सनगा अनि संकट्क्नगा मनेके गिर, आनंद येच्चेर मंतोन.
बारितेके नना बस्केते जिगि सेल्वक मंदंतोनो, अस्के किरिस्तु नाकुन लगुसींतोर.
कोरंतितुर बारेते पव्लु पिकर किय्वल
11 मीवा बल्मितेन नना इहिन पिसन मोडि पोक्डा वेह्वना आतोन.
नना येटितोनय आंदुन बति, बेय मुके वालिर इन्जेर केय्वलिर अपोस्तुल्क्नगटल कमि वालेना असले आयोन.
इदेन हिंदल मीवा मेप येत्वना आसि मंतोन.
12 नना करल अपोस्तुल्ता आंदुन इन्जेर निरुपन किय्ले, मी नड्डुम नना चमत्कार्क अनि मय्मतङ काम्क, सक्ति तोह्वलिक काम्क बर्पुर वोप्के पिय्सि कीतोन.
13 नावा वजन मी पोरो तोचुस्मकि इंवल उंदि गोस्टितुन तपुसि, बद गोस्टितगा मिरट दुस्रोक चर्चिनुर्गटल अलग मंतिट?
अलग असले सेल्विट!
इदेन बारेते नना असले बगड-नियत्ने ताक्मकि.
बति बगड-नियत्ने ताक्तोर इंद्किट्ते मिरट नाकुन मापि कीम्ट.
14 इचुला!
इद मूडवा जोका मिह्गा वाय्ले, नना तयर मंतोन.
वाता पेजे नावा वजन मी पोरो वाटोन.
मिह्गा मंवलिक वस्तुङ वटिन बति, मिरटे नाकुन पह्जे.
तम्वा मरि-मियडुन जुरत मंवलिकुन अवल-बाबोये सिया लागर.
बति मरि-मियड अवल-बाबोन सियुर.
15 अदेन साटि नावा नना अनि नह्गा मंवल सम्दो मीवा आत्मता बाव-बक्ति बडे माय्ले, कुसिते कर्चा कींतोन.
इहिन नना मीकुन वेले पेर्मते सूड्तेके, मिरट नाकुन कमि पेर्मते सूडंतिट कि?
16 इद सूड्वडा गोस्टि सुटि कीम्ट.
नना मी पोरो नावा वजन तोचुस्मकि बति, “कपट्ने मीकुन ना वोटिते वाड्तोन” इन्जेर कहितुर इंदा वचो.
17 नना मिह्गा रोह्तुर्गटल बोना केय्देन आयि मीकुन पसि कियुसि, कमय कीतोन कि?
असले किय्मकि!
18 नना तीतु दादन मिह्गा सोंदना इन्जेर कोर्तन.
अनि वोन सङा मावोर उंडे वोरोर दादन मिह्गा रोह्तोन.
ते तीतु वासि मीकुन बतय पसि कीतोर कि बतल?
असले किय्मकि!
मा दाते वीर इविर्ते उंदि आत्मते अनि उंदि तीर्दे ताक्तेर इंवल मीकुन टावय.
आक्रितङ दम्किङ अनि सूचनङ
19 इंके वेरि वेह्ता अद सम्दो सिरिप ममोट बरोबरे कीतोम इंले जवब वेह्चेर मंतोम इंतिट कि?
असले इन्मट!
ममोट बगवंतना नदुडे किरिस्तुनुर सेव्कलिर मोडि वड्क्सेर मंतोम.
लाड्नुर दादलिर-बायिक्निट!
सिरिप मीवा बाव-बक्ति उंडे इचुर बडे मायना इन्जेरेन, इव सम्दो वेह्चेर मंतोम.
20 बारितेके नना मिह्गा वाता पेजे, मीवा ताक्वडुन सूड्सि, नाकुन दुक्सा लागर इन्जेर वेरिसेर मंतोन.
मोका मी नड्डुम लोलिङ, कड्क वेय्वल, सोङ, जग्डङ, चह्डिङ वड्क्वल, रेह्चि वड्क्वल, गर्वा-गमंडि इंवलिक सम्दो मंदनुङ्ते, नना मी सङा वेले कटिंते ताका लागर.
नना इहिन ताक्वल मीकुन दुक्सा लागुसंतयो बतलो.
21 नना मिह्गा वाता पेजे, बे-सुदुड काम्क, लन्जेतनम अनि आड्बङि काम्क कीसि, तम्वङ मनकुन मार्युस्मकि वूर वेलेटिर मंवडुन हिंदल, नावोर बगवंतन मुने नावा लजा दांतयो बतलो इन्जेर, नाकुन वेरे पिय्सेर मंता.
वीरा गोस्टित सूड्सि, मंदगा दुक्सा येच्चेर मंवल आंतयो बतलो इन्जेर, नाकुन वेरे पिय्सेर मंता.