13
1-2 नना रेंडवा जोका मिह्गा वासि मनेके, पाप किय्वलिरा गोस्टित बारेते मीकुन दम्कि सीसि मत्तोन.
नना इंके मी मुने सेलोन.
बति उंडे उंदि जोका अदेन वेह्चेर मंतोन.
इद मूडवा जोका वाता पेजे, इदेन मुने अनि इंके, पाप कीसेर मंवलिर बोरे सिक्सतल तपुसिया परुर.
बारितेके, दर्मा-ग्रंत्नगा, “हर उंदि गोस्टित इविर, सेलेके मुविर गवदारकुन मुने निरुपन कियना”+ इन्जेर लिहि कीसि मंता.
3 किरिस्तु ना तोड्दे वड्कंतोर इंवडुन, मिरट निसनि पूसि कीसेर मंतिट.
किरिस्तु मीवा गोस्टि सूड्नेके, सक्ति सेलोर वोन मोडि आयो बति, तंवा ताकद मी नड्डुम तोहंतोर.
4 जिगि सेल्वक मनेके वोर किरिसतुन, मोद्नगा मोलने पासि जीवा येत्तेर.
बति बगवंतना सक्तिते वोर नेंड्सि, जीवतेन मंतोर.
ममोट गिर वोन दात जिगि सेल्वक मंतोम.
बति ममोट किरिस्तुना केय्दे बगवंतना सक्तितुन मी नड्डुम गिर तोहंतोम.
5 मिरट निसनितुन पूसि कियन बद्लि, मीवा मिरट दिहंते सूड्सि करि कीम्ट.
येसु किरिस्तु मी रोपो मंतोर इंवल मीकुन टावा सेले कि?
मीकुन तप्वक टावय!
वोर किरिस्तु मी रोपो सेल्वेके, मीवा बरोसा लबडय आंद.
6 अनि इहिन मीवा मिरट दिहंते सूड्नेके, ममोट करलेन किरिस्तुनुर अपोस्तुल्क आंदुम इन्जि, करि कीकिट इन्जेर, आसते सूड्सेर मंतोम.
7 मोका ममोट करल अपोस्तुल्क आयोम इत्तप मीकुन दिस्तेके गिर, मिरट बदे गल्ति किय्वक्ने, सिरिप चोकोट्नतुने कियना इन्जेर मी साटि बगवंतन पार्तना कीसेर मंतोम.
8 मिरट सतेमुन पिय्सि ताककिट्ते ममोट मीकुन उल्टा आया परोम.
इदेन बद्लि ममोट मीकुन मदत किया लागर.*
9 ममोट जिगि सेलुर वूर मोडि दिस्तेके गिर, मिरट ताकद वालिर आसि मंवडुन हिंदल, आनंद येतंतोम.
इद तीर्दे मिरट बाव-बक्तितगा बर्पुर सक्ति वालिर आयना इन्जेर, पार्तना कीसेर मंतोम.
10 अदेन साटि नना मिह्गा वाता पेजे, पर्बु नाकुन सीता अदिकारदुन पिय्सि, मी सङा कटिंते ताक्वा इन्जेर, इद चिटितुन मिह्गटल लङ मनेकेन, लिहि कीसेर मंतोन.
मिरट बक्तितल बूड अर्वक्ने, उंडे तान्गा बडे माय्ले वाप्रि किय्लेने, अद अदिकारदुन नाकुन सीतोर.
दंडोस वेह्वल
11 दादलिर-बायिक्निट!
आक्रित मीकुन वेह्वल बतल इत्तेके, कुसिते बरोसतगा बर्पुर आय्ले कोसिद कीम्ट.
वोरोन वोरोर मदत कीसेर, नना वेह्वलिकुन पिय्सि ताकट.
उंदि येकि आसि सांतिते मंट.
अस्के पेर्मा अनि सांति सिय्वल बगवंतल मी सङा मंदंतोर.
12 वोरोन वोरोर पवित्रा पेर्मते कलिसि दंडोस वेहट.
13-14 इगे मंवलिर बक्तलिर सम्दिर मीकुन दंडोस वेह्चेर मंतेर.
येसु किरिस्तु पर्बुना पेर्मता-दया, बगवंतना लाड अनि पवित्रा आत्मता सात मी सङा मनि!