तंवा सेवतुन बारेते पव्लु कारन वेह्वल
10
1-2 ‘मी मुने मनेके वेरिसि चुडुर-पांदे मंदंतोर अनि मिह्गटल लङ मनेके दर्यम्ने वड्कंतोर्’ इन्जेर ना बारेते कहितुर वेह्चेर मंतेर.
‘दुनियतुर माय्नलिर मोडि वूर पिसेर मंतेर्’ इन्जेर गिर वूर इंतेर.
वूर आतुरकुन नना वाता पेजे तेग्सि नावा दर्यमुन तोहना इंतोन.
बति इदेन बद्लि, वूर पोरो किरिस्तुना दयतुन अनि सादु-पांदुन तोहना इन्जेर, पव्लुना आय्वल ननये जुल्मा कीसेर मंतोन.
3 करलेन ममोट दुनियतुर सङा, दुनियतगा पिसेर मंतोम.
बति वूर कीतपिनय लडेय्क कियोम.
4 बहन इत्तेके, लडेय किय्ले ममोट वाप्रि किय्वलिक आय्तर्क वूर माय्नलिर मोडितङ आयोङ.
बति किलन उल्टि कीनल बगवंतन हिंदल सक्ति वालेक आंदुङ.
5 ममोट बगवंतना गियंतुन उल्टा मंवलिक तगपर लाग्वलिकुन, अनि अड्चंदकुन मेय्सि नासेडम कींतोम.
हर उंदि सोन्च किरिस्तुना इचा तीर मनल कींतोम.
6 ममोट वेह्ता तीर मिरट ताक्तिट इंवल निरुपन आता पेजे, वेह्ता तीर ताक्मकि वूरकुन सिक्सा सिय्ले, तयर मंदंतोम.
7 पोरो पोरो दिस्वलिकुने कहितुर सूड्सेर मंतेर.
‘तना किरिस्तुनगा बरोसा इर्तोना आंदुन्’ इन्जेर सोन्च किय्वल, तना बद तरिकते किरिस्तुनोर आंदुरेय, अह्ने ममोट गिर किरिस्तुनुर आंदुम इन्जेर वोर सोन्च कियना.
8 मीकुन नासेडम किय्ले आयो बति, मिरट बडे माय्लेके पर्बु माकुन अदिकार सीतोर.
इदेन बारेते जरसि पोक्डते वेह्ले गिर लजे मायोन.
9 नावङ चिटिने मीकुन वेरुस्वन मोडि मंवा इन्जेर इहिन वेह्चेर मंतोन.
10 बारितेके कहितुर, “वोनङ चिटिङ ताकद वालेकुन मोडि अनि मुके वालेकुन मोडि दिसंतङ.
बति वोर मा मुने मनेके जिगि सेलोर वोन मोडि मंदंतोर.
वोना वेह्वल गिर बततुने कामि सिय्वक मंदंता” इन्जेर इंतेर.
11 बति, ममोट लङ मन्जि बहन बहंते चिटिनगा लिहि कींतोमो, अह्ने मी मुने मनेके गिर, ताकंतोम इंवल वूर करि कियना.
12 वूर तम्वा डगुर-पांदुन दुस्रुर मुने तोहंतेर.
अनि ‘ममोट वूर दात्नुर आयोम्’ इन्जेर तम्वा दात्नुर सङन परिक्सा कीसि सूडंतेर.
इहिन सूड्वल वेले पिसल तरिका आंद.
वूर आतुर सङा मावा तेडा सूड्लेक, तेग्सि मुने सोनोम.
13-14 बति माकुन बचोर वेरि पोके मायना इंवल दूरा दोसि मंता.
अनि ममोट मावङ दूरनल वीड्सि सोंवलिर आयोम.
ममोट बगवंतल माकुन सीता सेवतुन तपुसि, दुस्रोत बारेते पोके मायोम.
ममोट मोदोले मी वेरि, किरिस्तुना चोकोट्ना कबुर पिय्सि वातोम.
इदेन हिंदल, अद सेवता दूरत रोपो मिरट गिर मंतिट.
15 अनि ममोट मावा दूरा वीड्सि, दुस्रुरा काया-कस्टम्ना पंडितुन मावा आंद इन्जेर वेह्वलिर आयोम.
मीवा बरोसा बडे मातेकमना मी हिंदल, नालुङ कोन्क्नेके सेवा पचर आयना इन्जेर आसते सूड्सेर मंतोम.
16 इद चोकोट्ना कबुर पचर किय्वल सेवा मीवा येरियतगन आय्वा, मिह्गटल वीड्सि दुस्रोक येरियनगा गिर जर्गना इंवले मावा इचा.
दुस्रोक येरियनगा दुस्रुर केय्दे मोदोले जर्ग्तङ अव कामकुन बारेते, पोक्डा किय्वल जुरत माकुन सेले.
17 बति, “पोक्डा किय्वल सिरिप पर्बु आय्वल बगवंतना गोस्टित पिय्सिने पोक्डा कियना”+ इन्जेर दर्मा-ग्रंत्नगा लिहि कीसि मंता.
18 बारितेके, पर्बु बोंते मेचंतोरो, वोरे कामि सींतोर.
बति तंवा तनकुन मेच्वल कामि सियोर.