9
1 पर्बुनुर बक्तलिर साटि किय्वल इद सेवतुन बारेते, मीकुन लिहि किय्वल जुरत सेले.
2 बारितेके तान साटि, मीवा मन तयर मंता इंवल नाकुन टावा.
अकया येरियतगा मंवलिर मिरट उंदि साल्दल चंदा सिय्ले तयर मंतिट इन्जेर, मी बारेते मासिदोनिया येरियतुर बक्तलिर मुने बेय मेच्तोन.
आसते मिरट किय्वल इद काम वेलेटिरा मंदुन तापि कीसि, वूरा दिलतुन हक्लि कीता.
3 ते इंके मी बारेते मेच्तङ अव गोस्टिन, मिरट येर्तम किय्वा इंवले नावा इचा.
मिरट चंदतुन तयर कीसि इरंतिट इन्जेर, वीर दादलिरकुन मिह्गा रोह्चेर मंतोन.
4 मिरट अहन तयर कीसि इर्वक मंद्किट्ते, मासिदोनियतल बोरे मा सङा वासि अदेन सूड्तेके, ममोट मीकुन नम्ता काड्कि, मावा हिजत सोडियंता.
मीवा गिर हिजत दांता इंवल वेह्वल जुरत सेले.
5 अदेन साटि मिरट मोदोल सींतोम इत्ता अद चंदतुन मीरि कीनिर इन्जेर दादलिरकुन मुनेने मिह्गा रोह्चेर मंतोम.
वूर वाता पेजे मावा जुल्मते आयो बति, मीवा मिरट बर्पुर दिल्ते सीसेर मंतिट इन्जेर सम्दिर सूडंतेर.
6-7 इदेन बारेते, गोल्ग्वक्ने, जुल्मते आय्वक्ने, हर वोरोर गिर तंवा दिलतगा निर्नय कीततुन पिय्सि, अद चंदा सिया लागर.
अहन सिय्वन बगवंतल लाड कींतोर.
“इचुसि विजा वीत्वल इचुसिन पंटा कोयंतोर.
अनि वेले विजा वीत्वल बर्पुर पंटा कोयंतोर” इंवल सास्तुरतुन हेतु इरट.
8-9 इदेन बारेते दर्मा-ग्रंत्नगा,
“पह्जे मत्तुरकुन बर्पुर वोर सींतोर.
वोनङ दर्मतङ काम्क बस्केट निल्सि मंदंतङ”+
इन्जेर नियत्नोन बारेते लिहि कीसि मंता.
अनि मिरट हर उंदि चोकोट्ना काम कीनल, हर गोस्टितगा हर गट्का मीकुन सम्दो बर्पुर मनल, बगवंतल तंवा पेर्मता-दयते मीकुन अवेन सिया परंतोर.
10 अदेन साटि, बूर्ते विजा वीतंतेरो, वूर तिंले काने सिय्वल बगवंतले वूरकुन उंडे अदिक विजा वीत्ले सींतोर.
अह्ने दुस्रुरकुन मिरट सीता अदेन हिंदल, बगवंतल वूर्गा बर्पुर मनल कींतोर.
11 इद तीर्दे मिरट पेर्मते सिय्ले, बगवंतल मीकुन सम्दो बर्पुर सींतोर.
अनि मा केय्दे इद चंदा येरुसलेम्नगा मंवलिर बक्तलिर्गा येव्ता पेजे, वूर बगवंतन दनेवाद वेहंतेर.
12 मिरट किय्वल इद मदत्ना काम पर्बुनुर बक्तलिरा जुरतुन पूरि कींता.
अचोरे आय्वा, बगवंतन वूर बस्केट दनेवाद वेहनल कींता.
13 मिरट किय्वल इद सेवा, येसु किरिस्तुना चोकोट्ना कबुडुन वोप्तिट इंवल, मीवा बरोसतुन निरुपन कीता.
मिह्गा मंवडुन वूर सङा अनि उंडे वेलेटिर दुस्रुर सङा बर्पुर तूस्तिट.
इदेन सूड्सि पर्जा बगवंतन मान सींतेर.
14 अचोरे आय्वा मिह्गा मंवल बगवंतना बर्पुर वाले पेर्मता-दयतुन पिय्सि, आसते वूर मीवा चोकोटुन साटि बगवंतन पार्तना कींतेर.
15 पोडि कीसि वेहा पर्वट अद बगवंतल सीता वरमुन बारेते वोन दनेवाद वेह्कट!