बर्पुर मंदे सिय्वडुन बारेते
8
1 दादलिर-बायिक्निट!
ममोट इंके मासिदोनिया येरियतङ चर्चिनुर नड्डुम बगवंतल तोह्ता पेर्मता-दयतुन बारेते मीकुन वेह्चेर मंतोम.
2-4 बहन इत्तेके, वूरकुन वेले तक्लिब्क वासि परिक्सा कीतङ अनि वूर वेले गरिब-पांदे मत्तेर.
आतल गट्कते गिर, जुरत मंवलिर येरुसलेम्नुर गरिब बक्तलिरकुन मदत किय्वडगा ईसा येता सीम्ट इन्जेर, माकुन जुल्मा कीतेर.
अनि वूर बेय आनंद्ने तम्वा गुन्जेस्ततुन तेर अदिक कोतङ सीतेर.
अचोरे आय्वा, तम्वा पसंद्ने बेय वेले सीतेर इन्जेर, वूर बारेते गवा वेहा परंतोन.
5 इदे आय्वा, वूर मोदोल पर्बुन अनि बगवंतना इचा तीर माकुन गिर तम्वा तमा हव्लि कीतेर.
इचोर वेले मदत कींतेर इन्जेर, ममोट असले इन्मकि.
6 ईतल पेर्मते मदत किय्वल कामुन तीतु दादल इदेन मोदोले, मी रोपो सुरु कीतोर.
ते अद कामुन महना गिर इन्जेर वोन कोर्तोम.
7 मिरट हर उंदि गोस्टितगा इत्तेके: मिरट बरोसतगा, वड्क्वडगा, तेलिवितगा, चोकोटे बगवंतना सेवा किय्वडगा अनि मा पोरो मिरट तोह्वल पेर्मतगा सम्दिर्गटल मुने मंतिट.
मिरट मदत किय्वलिक कोतनगा गिर सम्दिर्गटल मुने मंदना इन्जेर कोर्सेर मंतोन.
8 इदेन बारेते, मीकुन आगे सीसि वेह्चेर सेलोन.
बति दुस्रुर बक्तलिर लह्कि वर्सि किय्वडुन मिरट सूड्सि, मीवा पेर्मा बचोर करल मंतयो परिक्सा कियना इन्जेर वेह्चेर मंतोन.
9 बारितेके, मा येसु किरिस्तु पर्बुना पेर्मता-दया बचोर डगुर इंवल मीकुन टावय.
वोर दनेवंतल आसि मन्जि गिर, मी साटि वोर गरिब आतोर.
वोना गरिब-पांदुन हिंदल, मिरट दनेवंतलिर आयना इन्जेरेन अहन आतोर.
10-11 इद गोस्टितुन बारेते, नावा मंदगा मंवडुन वेह्चेर मंतोन.
कोतङ मीरि कीसि सियना इंवल इचा मीवा मंदगा मत्ता.
अदेन साटि, अद कामुन नीरेन मिरट सुरु कीतिट.
अदेन सुरु किय्वडगा तोह्ता लह्कितुन तान पूरि किय्वडगा गिर तोह्किट्ते मीकुने चोकोट मंदंता.
मीवा गुन्जेस्ततुन पिय्सि कीम्ट.
12 मिरट बचोर सींतिट इंवल गोस्टि आयो बति, मीवा बर्पुर दिल्ते अनि इस्टम्ने इचुसि सीतेके गिर बगवंतल तान वोपंतोर.
13-15 दुस्रुरकुन हल्को कीसि, मीकुन वजन तोचुसना इन्जेर आयो बति, अद वजंतुन सम्दिर बरोबर पाकि कियना इंवले नावा इचा.
इंके मिह्गा पह्जे मत्तङ सम्दो मंतङ.
अदेन साटि मिरट जुरत मंवलिरकुन मदत किय्वल बरोबर आंद.
अहन कीकिट्ते मीकुन जुरत मनेके, वूर सात सींतेर.
अस्के इदेन बारेते दर्मा-ग्रंत्नगा,
“बेय वेले मीरि कीतोनगा,
बतय वेले मेय्मकि
अनि कमि मीरि कीतोनगा,
बतय कमि आय्मकि”+
इन्जेर लिहि कीता अद पूरे मांता.
तीतु अनि वोना सेवतुन बारेता गोस्टि
16 मी बारेते नावा दिलतगा मंवल इचतुन मोडिन, तीतुना दिलतगा गिर पुटुस्वल बगवंतन दनेवाद वेह्चेर मंतोन.
17 ममोट बस्केते वोन मिह्गा सोंदना इन्जेर कोर्तोमो, अस्के वोर वोप्सि बेय कुसिते मिह्गा वासेर मंतोर.
18 अनि तीतुन सङा किरिस्तुनुर चर्चिनुर्गा अनि चोकोट्ना कबुर पचर किय्वडगा बेय चोकोट्ना पोरोल तर्वल वोरोर दादन गिर मिह्गा रोह्चेर मंतोम.
19 अदे आय्वा, इद चंदतुन ममोट येरुसलेम वोनेके, वोन मा सङा रोहना इन्जेर चर्चिनुर बक्तलिर नेमि कीतेर.
ममोट इद चंदतुन पर्बुना डगुर-पांदुन साटि वोसेर मंतोम.
मदत कियना इंवल आसतुन तोहना इन्जेरेन इद कामुन कीसेर मंतोम.
20 चर्चिनुर सम्दिर पेर्मते सीता, इद पूरो चंदता जिमा तोच्वलिर मा पोरो, बोरे कसुर वाट्वक मंले, दिहंते सूड्सेर मंतोम.
21 बहन इत्तेके, सिरिप पर्बुना नदुडेन आय्वा माय्नलिरा नदुडे गिर बे-कसुर वालिर आसि मंले, पर्पेडे मासेर मंतोम.
22 अनि वूर सङा मावोर उंडे वोरोर दादन गिर रोह्चेर मंतोम.
वेले तीर्क्ने वेले गोस्टिनगा वोन परिक्सा कीसि सूड्तोम.
ते वोर अव सम्दिन बेय चोकोट कीसि मेय्तोर.
इंके गिर मीकुन वोर बेय पसंद कींतोर.
मी पोरो वोन वेले बरोसा मंवल कीनेके, मीकुन वेले मदत कियना इन्जेर मंतोर.
23 तीतु बोर आंदुर?
इन्जेर बोरे पूसि कीनुर्ते, ना बरोबर सेवा कीसेर, मीकुन मदत किय्वल आंदुर इन्जेर वेहट.
अनि मेय्तुर दादलिर बारेते बोरे पूसि कीनुर्ते, वूर चर्चिनुर कब्रियलिर अनि किरिसतुन डगुर-पान तर्वलिर आंदिर इन्जेर वेहट.
24 अदेन साटि मी चर्चितुर मुने अनि बह्रि गिर वूरकुन पेर्मते सूडट.
मी बारेते ममोट मेच्ततुन निरुपन कीसि, वूरकुन तोहट.