7
1 अदेन साटि, लाड्नुर दादलिर-बायिक्निट!
माकुन इव वाग्दन्क मत्ता काड्कि, मावा मेंदोडगा अनि आत्मतगा मंवल बे-सुदुडुन नोर्सि, सुदुड आकट.
बगवंतन वेरिसि, बाव-बक्तिते बर्पुर सुदुड आय्ले, कोसिद कीकट.
पव्लुना आनंदुन बारेते
2 माकुन मीवा दिलतगा जागा सीम्ट.
ममोट बोने वायुट्ने सूड्मकि, बोने करब किय्मकि अनि बोने पसि गिर किय्मकि.
3 मी पोरो पिरदि कियना इन्जेर नना इहिन वेह्चेर सेलोन.
बारितेके, मीकुन मोदोल वेह्तपे मावा दिलतगा आतल जागा सीतोम.
बातल इत्तेके, मी सङा मीरे मासि पिस्ले अनि साय्ले गिर तयर मंतोम.
4 मीकुन मेच्चेर मी सङा नना वेले दर्यम्ने वड्क्सेर मंतोन.
मिरट सिय्वल गटि-दीर्यते मावङ दुक्सङ सम्दोनगा वेले आनंद येच्चेर मंतोन.
5 ममोट मासिदोनिया येरियते वातोम अस्के, मावा मेंदोल जरा गिर आरम येत्मकि.
बगा सोत्तेके गिर माकुन तक्लिब्के वातङ.
बह्रि लडेय्क्ने अनि रोपो वेरेते निन्चि मत्तोम.
6 तक्लिब्नगा मंवलिरकुन मदत किय्वल बगवंतल, तीतु दादन रोह्चि, माकुन गिर मदत कीतोर.
7 वोर दादना वाय्वडुन हिंदले आय्वा, मिरट वोन कीता मदतुन बारेते, चोकोट सूड्ततुन बारेते, वोर माकुन वेह्ततुन हिंदल आनंद लाग्ता.
वोर मीवा इचतुन बारेते, मीवा दुक्सतुन बारेते अनि मिरट ना पोरो तोह्वल मांदुन बारेते, नाकुन वेह्तोर.
अदेन साटि, इंके नना बेय आनंद्ने मंतोन.
8-9 नना लिहि कीता चिटि मीकुन नारज कीता इंवल नाकुन टावा आता.
अस्के नना गिर जरसि नारज आतोन.
अद कहि रोज्क मीकुन नारज कीतेके गिर, अदेन लिहि कीता काड्कि, नना विचर कीसेर सेलोन.
मिरट नारज आतिट इन्जेर आनंद येच्चेर सेलोन.
बति, मीवङ गल्तिन बारेते चुक चुके मातिट इन्जेर आनंद येच्चेर मंतोन.
बगवंतना इचा तीर इहिन जर्ग्ता काड्कि, मावा चिटि मीकुन बतय नुक्सन किय्मकि.
10 इहिन बगवंतल सिय्वल दुक्सा मीवा मंदुन मार्युसीसि, बचे माय्वडेके मीकुन ताकुसंता.
इदेन हिंदल मीकुन बतय नुक्सन जर्गो.
बति मंदुन मार्युसिय्वक्ने इद दुनियतुर मोडि नारज आय्वल मीकुन मरंतेके ताकुसंता.
11 बगवंतल सीता दुक्सतुन हिंदल मी रोपो मारितङ अवेन बारेते सोन्च कीम्ट.
अद मी रोपो वेले बाव-बक्तितुन पुटुस्ता!
गल्तिङ जर्ग्वक मंले दिहंतुन पुटुस्ता!
मी रोपो बरोसतुन अनि इचतुन पुटुस्ता!
मी रोपो बगवंतना वेरेतुन पुटुस्ता!
बगड-नियतुन सोसि किय्वक मंवल सोङुन मी रोपो पुटुस्ता.
इव सम्दो गोस्टिनगा मिरट बे-कसुर वालिर इन्जेर निरुपन कीतिट.
12 नना रोह्ता चिटि सिरिप वोर करेबन साटिने, सेलेके वोना केय्दे करब आतोन साटिने लिहि किय्मकि.
बति, बगवंतना नदुडुन मुने मिरट माकुन बचोर पेर्मते सूडंतिटो करि कियन साटि गिर इदेन लिहि कीतोन.
13 इदेन हिंदल, माकुन वेले गटि-दीर्या वाता.
इदेन बरोबर तीतु दादल अनुबव कीता आनंद अनि सांतितुन सूड्सि, माकुन उंडे अदिक कुसि लाग्ता.
14 ममोट मीकुन वेह्तङ सम्दो गोस्टिङ सतेमे आंदुङ.
अह्ने मी बारेते नना मेच्चेर तीतु दादन वेह्तङ अव सम्दो गोस्टिङ सतेमे आंदुङ इन्जेर मिरट निरुपन कीतिट.
इदेन हिंदल मिरट नाकुन लजे माया सिय्मकि.
15 मिरट वोन मानि कीसेर, वेरेते करुम कीतिट.
इदेन हेतु कीसि, वोना मन-दिलतगा मी पोरो पेर्मा बडे मासेर मंता.
16 नना इंके बेय आनंद येच्चेर मंतोन.
बारितेके हर उंदि गोस्टितगा मी पोरो नना बरोसा इरा परंतोन.