6
1 ममोट बगवंतन सङा मीरे मासि काम किय्वलिर आता काड्कि, वोर मीकुन सीता पेर्मता-दयतुन येर्तम किय्वा इन्जेर मीकुन कोर्सेर मंतोम.
2 बारितेके बगवंतल दर्मा-ग्रंत्नगा,
“नना बरोबर वकत्ने नीवा विनंति केन्चि,
बचि किय्वल दिवोसुन नेटि नीकुन मदत कीतोन”+
इन्जेर लिहि कियुस्तोर.
केन्जट!
इदे बरोबर वकत आंद.
अनि इदे बचि किय्वल दिवोस आंद.
मावा जिन्गनिय बगवंतनुर सेव्कलिर इन्जेर तोहंता
3 ममोट बोनय सरदुन अड्डम-कोड वाट्वक्ने, अनि मावा सेवतुन बोरे बोटा सूट्वक्ने चोकोट-पांदे पिसेर मंतोम.
4 इद तीर्दे, हर उंदि गोस्टितगा ममोट बगवंतनुर सेव्कलिर आंदुम इन्जेर निरुपन कीसेर मंतोम.
आपतिनगा, दुक्सनगा, तक्लिब्क्नगा मनेके,
5 दन्कङ तिन्जि मनेके, टानेनगा मनेके, लोलिङ जर्ग्नेके, काया-कस्टम्नगा, चेतो मंवलिक गट्कनगा, करुसासि मंवलिक गट्कनगा वेले वोर्चि ताक्तोम.
6 सुदुड-पांदे मंवल, गियंते ताक्वल, सोसि कीसेर सांतिते मंवल, दया तोह्वल, पवित्रा आत्मा मा रोपो मंवल, कपट सेले अद पेर्मतुन तोह्वल,
7 सते बोदतुन वेह्वल, बगवंतना ताकदुन तोह्वल, ईतङ सम्दो नियत्नङ आय्तर्क तिना केय्दे-डेमा केय्दे पिय्सि, लडेय किय्वडगा मुने मत्तोम.
8 डगुर-पान सीतेर अनि हिजत गिर वोतेर.
रेह्चि वड्क्तेर अनि मेच्तेर गिर.
सतेम वेह्तेके गिर माकुन पकट्क इन्जेर केय्तेर.
9 दुस्रुर माकुन वोड्कि पिय्सि गिर पिय्मकि इत्तप सूडंतेर.
सातपिनय दिस्तेके गिर ममोट पिसिन मंवलिर आंदुम.
दुस्रुर माकुन वेल वेल आनल पातेके गिर जीवतेन मंवलिर आंदुम.
10 ममोट दुक्सत रोपो मत्तेके गिर बति, बस्केट आनंद येत्वलिर आंदुम.
ममोट गरिब्क आसि मत्तेके गिर बति, वेलेटिरकुन दनेवंतलिर किय्वलिर आंदुम.
ममोट बतय सेल्वक दिस्तेके गिर बति, सम्दोय मंवलिर आंदुम.
इद तीर्दे ममोट हर उंदितगा बगवंतनुर सेव्कलिर आंदुम इन्जेर निरुपन कीसेर मंतोम.
11 ये कोरंतितुर दादलिर-बायिक्निट!
बततुने मकुस्वक्ने मी सङा वेह्चेर मंतोम.
मी साटि मावा दिल पूरो कोलि कीसि इर्तोम.
12 मावा मन-दिलतगा बर्पुर मीकुन पेर्मा कीतोम बति, मिरट मीवा पेर्मतुन मह्गटल हब्रि इर्सेर मंतिट.
13 मीकुन ममोट मावा दिलतगा बर्पुर वोप्तपे, मिरट गिर माकुन वोप्किट इन्जि, मिरट नावुर मरि-मियड आंदिट इन्जेर सम्जे मासि मीकुन इहिन वेह्चेर मंतोन.
जीवा वाले बगवंतना करल मंदिर मरटे आंदट
14-15 मिरट पर्बुन नंमकि वूर सङा जोड आय्मट.
+ नियतुन अनि बगड-नियतुन दोस्तन बगा मंता?
असले सेले!
वेड्चित अनि सिकटित बगा पोत मंता?
असले सेले!
किरिसतुन अनि सय्तंतुन* बगा लागि-बागि मंता?
असले सेले!
16 बगवंतना मंदिरतगा मूर्तिङ मंले जागा बगा मंता?
असले सेले!
मरट जीवा वाले बगवंतना मंदिर आसि मंतट.
बारितेके बगवंतल दर्मा-ग्रंत्नगा,
“नना वूर रोपो मन्जि,
वूर सङा ताकंतोन.
वूरोर बगवंतना आसि मंदंतोन.
वूर ना पर्जा आसि मंदंतेर”+
इन्जेर लिहि कियुस्तोर.
17-18 “अदेन साटि वूर्गटल पेसिसि,
अलग आसि मंट.
बे-सुदुड वालेतल अलग मंद्किट्ते,
नना मीकुन करुम कींतोन”+
अनि “नना मीकुन बाबोना आसि मंदंतोन.
मिरट नाकुन मरि-मियड आसि मंदंतिट”+
इन्जेर सर्वा सक्ति वाले बगवंतल वेह्चेर मंतोर.