5
1 मावङ मेंदोल्क इद दर्तुरित पोरो मरट मंवल सादा रोतुन मोडि मंतङ.
इद रोन उल्टे मासि, नासेडम आता पेजे, मरट स्वर्ग्नगा मंले, मा साटि उंदि रोन मंता.
अदेन मायनल दोह्मकि बति, बस्केट निल्सि मंले, बगवंतले दोह्तोर इंवल माकुन टावा.
2 अदेन साटिने अद स्वर्ग्ना रोन आय्वल मेंदोड मोडि मारियना इन्जेर, इंके इद मेंदोडुन रोपो बेय तल्मेले मासेर मंतट.
3 अद गट्कते मरट कुडेके दिस्वक्ने बस्केट मनल मावा मेंदोडुन बगवंतल पाङुड पोंडुसंतोर.
4 मरट इद मेंदोडगा मत्ता अचेजेल वजंता नोपिते तल्मेले मांतट.
इद सडे माय्वल मेंदोल इंकेने सुटि कियना इन्जेर आयो बति, बस्केट मंवल मेंदोडेके मारियना इन्जेर बेय आसते कोर्सेर मंतट.
5 अद मेंदोडुन साटि, बगवंतल माकुन तयरि कीतोर.
अनि तान तप्वक माकुन सींतोर इंवल गारंटित साटि, मा रोपो तंवा आत्मतुन इर्तोर.
6-7 अदेन साटिने, मरट नदुडे सूड्सि आय्वा, सिरिप पर्बुनगा बर्पुर बरोसा इर्वडुन हिंदले ताक्सेर मंतट.
इव मेंदोल्क्ने मनेके पर्बुनल लङ मंतट इन्जेर माकुन टावा.
तेर बति, मरट बस्केट दर्यम्ने मंदंतट.
8 बारितेके, इद मेंदोडुन सुटि कीसि, पर्बुन सङा मंदना इन्जेर पसंद कीसेर मंतट.
9 अदेन साटिने मरट इद मेंदोडगा मत्तेके गिर, सेलेके इदेन सुटि कीतेके गिर बति, पर्बुन आनंद सीनले पिसना इन्जेर इचा कीसेर मंतट.
10 बारितेके मरट सम्दिर गिर किरिस्तुना नाय्दा कचुरित मुने निला लागर.
अस्के मह्गटल हर वोरोर तना कीतङ चोकोट्नङ, सेलेके वायुट्नङ कामकुन पिय्सि, बदेना अद पंडि येता लागर.
किरिसतुन हिंदल बगवंतन सङा लागि-बागिते मंवल
11 अदेन साटि ममोट पर्बुन बारि वेरियनयो करि कीसि, वोना गोस्टितुन वोपना इन्जेर माय्नलिरकुन हक्लि कीसेर मंतोम.
मा बारेते बगवंतन सम्दो टावा.
इद गोस्टि मीवङ मन-दिलकुन गिर टावय इन्जेर नना आसा कीसेर मंतोन.
12 ममोट बचोर चोकोट्नुर आंदुमो तोहन साटि इहिन वेह्चेर सेलोम.
इदेन बद्लि, दिलतगा मंवलिकुन आय्वा, बह्रि दिस्वलिकुन पिय्सि, पोक्डा किय्वलिरकुन मा बारेते जवब सीकिट इन्जेरेन मीकुन वेह्चेर मंतोम.
13 मोका बोरे माकुन पिसलिर इंदनिर्ते, ममोट बगवंतन डगुर-पान तर्लेने पिसलिर आतोम.
अह्ने मोका बोरे माकुन बरोबरे कीसेर मंतेर इंदनिर्ते, अहन मी साटिने कीसेर मंतोम.
14-15 किरिस्तुना पेर्मा माकुन हक्लि कीसेर मंता.
बारितेके, सम्दिर साटि वोर जीवा सीतोर.
अदेन साटि, पिसि मंवलिर इङेडल तम्वा साटि पिस्वा, बति पर्जत लासि सासि-नेंड्तोर वोर किरिसतुन साटिने पिसना.
इदेन हिंदल, वोना मरंतगा मरट सम्दिर ईसा येत्ता लेकते वांतट.
16 किरिस्तु सम्दिर साटि जीवा सीता काड्कि, इङेडल बोने सादरन माय्नलिर सूड्तपिनय सूडोम.
इदेन मुने, किरिसतुन अद तरिकते सूड्तोम बति, इंके असले अहन सूडोम.
17 किरिस्तुनगा येकि आय्वल पूनोर मायनल आतोर.
वोना पडना जिन्गनि बर्पुर मारिसि, पूना जिन्गनि आता.
18 इद सम्दोतुन बगवंतले जर्गुस्तोर.
वोरे माकुन किरिसतुन हिंदल, तन्गा मीरि कीतोर अनि इहिन मीरि किय्वल सेवा माकुन हव्लि कीतोर.
19 अद बतल इत्तेके, दुनियतुर माय्नलिर कीतङ पाप्ना लेकतुन वूर पोरो वाट्वक्ने किरिसतुन हिंदल, वूरकुन तन्गा मीरि कींतोर.
इदेन वेहना इन्जेरेन बगवंतल माकुन आगे सीतोर.
20 अदेन साटि, ममोट किरिस्तुनुर कब्रियलिर आंदुम.
बगवंतन सङा मीरे मायना इन्जेर किरिसतुन हिंदल आसि, मीकुन जुल्मा कीसेर मंतोम.
21 बारितेके, पापेस्तलिर आय्वलिर मरट किरिसतुन हिंदल, तंवा नदुडे नियत्नुर आय्ले, पाप्ना डाग सेलोर वोर किरिसतुन बगवंतल सिक्सा कीतोर.