पव्लु किय्वल बगवंतना सेवतुन बारेते
4
1 अदेन साटि बगवंतले तंवा दयते माकुन सेवतुन सीता काड्कि, ममोट दर्यम्ने इदेन कीसेरेन मंदंतोम.
2 ममोट सिर्मिंदिङ किय्वलिक मक्डितङ कामकुन वोपोम.
पसि किय्वक्ने बगवंतना वचन मत्ता तीर वेहंतोम इंवडुन बगवंतले गवदारल आसि मंतोर.
सतेमुन तात्कर वेह्वडुन हिंदल, बातुर आंदुम इंवल हर वोरोना मन-दिलतुन टावा.
3 ममोट वेह्वल चोकोट्ना कबुर कहितुरकुन अर्तम आसेर सेले इत्तेके, सिरिप मूरे मासि सोंवलिर्कुने अर्तम आसेर सेले.
4 बारितेके बगवंतल बहन मंतोर इंवडुन तोह्वल किरिस्तुना चोकोट्ना कबुडा मय्मतुन, अर्तम किय्वक्ने वूर नंमकि वूरङ मन-दिलकुन, इद दुनियता पेन आय्वल सय्तन मुह्चि वाड्तोर.
5 अदेन साटि मा बारेते ममोट पचर किय्वक्ने, येसु किरिस्तु पर्बुन अनि वोन साटि मीवुर दासिर आंदुम इन्जेर पचर कींतोम.
6 बारितेके बगवंतल, “सिकटितल वेड्चि पारना”+ इन्जेर वेह्तोर.
वोर बगवंतना मय्मता वेड्चिये येसु किरिस्तुना मोकोमनल पार्सेर मंता.
अद मय्मता गियंता वेड्चितुने मा दिल्क्नगा पारुस्तोर.
7 इद वेड्चि मिसि मंवल बेय डगुर गटित मोडि मंता.
बति मावङ मेंदोल्क सादरन तोडितङ बुड्डिन मोडि मंतङ.
इद गटितुन बगवंतले मा रोपो इर्तोर.
इदेन हिंदल मा पिस्वडगा दिस्वल सक्ति मावा आयो बति, बगवंतनल वाता इन्जेर सम्दिर करि कींतेर.
8 हर उंदि बाजनल तक्लिब्क वासेर मंतङ बति, अव माकुन हारि किय्मकि.
गंडम्नगा कोंडे मासि मंदंतोम बति, आसा सेलुर वूर आयोम.
9 मावा पीचा पिय्सि पूडंतेर बति, बगवंतल माकुन बस्केन सुटि कियोर.
माकुन बेय जह्चेर मंतेर बति, नासेडम आसेर सेलोम.
10-11 येसुन हिंदल जीवते मंवल ममोट हर दिवोस मरंता सवद सूड्सेर मंतोम.
वोना मरन बातल इंवल, मावङ मेंदोल्क तोह्चेर मंतङ.
अदे तीर्दे, वोना जीवा गिर मावा जिन्गनितगा दिसंता.
12 ते ममोट मरंता सवद सूड्सेर मंतोम बति, इदेन हिंदल, मिरट बस्केट मंवल जीवा येत्तिट.
13-14 दर्मा-ग्रंत्नगा, “नना बरोसा कीता काड्कि, वड्क्तोन”+ इन्जेर लिहि कीसि मंता.
अद तीर्दे, ममोट गिर उंदिय आत्मतगा बरोसा कीता काड्कि, वड्क्सेर मंतोम.
बारितेके, सातोर वोर येसु पर्बुन नेंडुस्वल बगवंतल, माकुन गिर, वोन बरोबर नेंडुसंतोर इंवल माकुन टावा.
बगवंतल इहिन माकुन नेंडुसि, मी बरोबर तंवा चर्नते निपुसंतोर.
15 माकुन वाय्वलिक इव सम्दो दुक्सङ, मीवा चोकोटुन साटिने वासेर मंतङ.
बगवंतना पेर्मता-दया, पर्जत रोपो बहन बहंते पग्रे मासेर दांतयो, अहन अहन उंडे वेलेटिर, बगवंतन डगुर-पान सीसेर दनेवाद वेहनिर इन्जेरेन जर्ग्सेर मंता.
मह्गा बरोसा मत्ता काड्कि पिसि मंतोम
16 अदेन साटि ममोट वेरियोम.
मावा दिस्वल मेंदोल जिगि सेल्वक आसेर मंता.
बति मह्गा रोपो मंवल आत्मा रोजि रोजित पूना ताकद्ने निन्चेर मंता.
17 अनि इचुसि गट्का वेरि, मंवलिक मावङ तक्लिबकुन सङा माकुन पुट्वल बस्केट मंवल मय्मतुन जोकि कीतेके, अव तक्लिब्क बततुने कामि सियोङ.
18 नदुडे दिस्वलिक दर्तुरितङ सम्दो मूरे मांतङ.
बति नदुडे दिसोङ अव स्वर्ग्नङ सम्दो बस्केट निल्सि मंदंतङ.
अदेन साटि, कडकुन दिस्वलिकुन पोरो मावा नदुर इर्वक्ने दिसोङ अवेन पोरो, मावा नदुर इर्सेर मंतोम.