3
1 इहिन वड्क्वल मावा ममोट पोक्डा वेह्तप मीकुन दिसेर मंता कि?
कहितुरकुन जुरत मत्तपिनय मिह्गा वानेके, सेलेके मिह्गटल सोनेके, वोड्कि अरुस्वलिक चिटिङ पिय्सि, ममोट वाय्वल जुरत कि बतल?
असले जुरत सेले!
2 सम्दिर करि कीसि, वाचि कीनल मावङ दिल्क्नगा लिहि कीसि मंवलिक अनि मा बारेते वोड्कि अरुस्वलिक चिटिङ मिरटे आंदिट.
3 बहन इत्तेके: मिरट किरिस्तु लिहि कियुस्तङ चिटिन मोडि तात्कर दिसेर मंतिट.
इव चिटिङ साय्ते आयो बति, जीवा वाले बगवंतना आत्मते लिहि कीसि मंतङ.
अनि बंडता पाटितगा आयो बति, माय्नलिरङ दिल्क्नगा मावा सेवतुन हिंदल लिहि कीसि मंतङ.
4 इद तीर्दे बारि वेह्चेर मंतोम इत्तेके, ममोट किरिसतुन हिंदल, बगवंतनगा बरोसा कीसेर मंतोम.
5 मावा ममोट बद सूडा किय्ले, ताकद वालिर आयोम.
बति अवेन किय्ले ताकद बगवंतले माकुन सीसेर मंतोर.
6 वोरे माकुन पूना नियमुन साटि सेव्कलिर आसि मंले ताकद सीतोर.
इद पूना नियम्ना सेवा लिहि कीता रूप्ने सेले बति, बगवंतना आत्मता रूप्ने मंता.
लिहि कीसि मंवल दर्मता कानुन मरंतुन तरंता बति, बगवंतना आत्मा बस्केट पिसुसंता.
पूना नियम्ना मय्मतुन बारेते
7-9 बंडता पाटितगा बगवंतल आगेङ लिहि कीसि मोसेन सीतोर अस्के, वोना मोकोम बक मय्मता वेड्चिते निन्चि मत्ता.
ते वूर इज्रयेल लोकुर अदेन सूडा पर्मकि.
बति अद आता पेजे, अद वेड्चि कमि आसेर सोत्ता.
माय्नन मरन अनि सिक्सा तर्वल पडना नियमुने इचोर मय्मा मत्तेके, माय्नन नियत्ना लेकते तर्वल बगवंतना आत्मता पूना नियमुन, उंडे बचोर डगुर मय्मा मंदंतयो सोन्च कीम्ट.
10 इंके पूना नियम्ना मय्मतुन अनि पडना नियम्ना मय्मतुन परक सूड्तेके, अद पडना वाले सेले इत्तप दिसंता.
11 कमि आसि सोंवले अचोर मय्मा वाले आसि मत्तेके, बस्केट मंवल उंडे बचोर मय्मा वाले आसि मंदंतयो सोन्च कीम्ट.
12 अदेन साटि, बस्केट मंवल बगवंतना अद पूना नियम्नगा आसा इर्सि, बेय दर्यम्ने बोदा वेह्चेर मंतोम.
13 अद वेड्चि कमि आसेर मंता इंवल इज्रयेल पर्जतुन करे माय्वा इन्जि, मोसे तंवा मोकोमुन मुच्तोर.
बति ममोट मोसेन दात्नुर आयोम.
14-15 वूर इज्रयेल लोकुरा मन कटिंता आता काड्कि, बगवंतल मोसेन सीता पडना नियम नेट्क वेरि वाचि कीतेके गिर, वूरकुन सम्जे मायो.
बारितेके अद मोसे तंवा मोकोमुन मुच्ता पागोटा वूरा दिलतुन मुच्तपिनय मंता.
अनि सिरिप किरिस्तुये वूरा मंदुन कोलि कीसि सम्जि किया परंतोर.
16 बति बस्केते पर्बुना चर्नते वूर वांतेरो, अस्के अद मुच्चि मंवल पागोटा तेंड्सि वाट्वल जर्गंता.
17 वेर पर्बु बगवंतना आत्मा आंदुर.
वोना आत्मा बगते मंदंतयो, अगा मोक्डो-पान मंदंता.
18 मरट सम्दिर गिर मुच्चि सेलेङ अव मोकोम्क्ने पर्बुना मय्मता वेड्चितुन सूड्सि, आर्सतुन मोडि तान तोह्चेर मंतट.
इहिन मय्मतल उंडे अदिक मय्मतेके पर्बुन मोडि, पर्बुना आत्मतुन हिंदल मारिसेर मंतट.