2
1 बति नना मिह्गा वासि, मीकुन दुक्सा सिय्वा इन्जेर निर्नय कीतोन.
2 बारितेके मीकुन नना दुक्सा सीकते, नाकुन बूर आनंद सीनिर?
बूरे सियुर!
3 नना वाता पेजे, बूरा गोस्टित पिय्सिते आनंद येतनयो, वूरा गोस्टित पिय्सि, नना दुक्सा येत्वा इंवल बरोसतेन अदेन लिहि कीतोन.
नना आनंद्ने मंवडुन हिंदल, मीकुन गिर आनंद लागंता इंवल नाकुन टावा.
4 दिलतगा बचोरो दुक्सते, काडेर तुह्चेर, तक्लिब्ने अद चिटितुन लिहि कीतोन.
+ मीकुन दुक्सा सियना इन्जेर आयो बति, मी पोरो नाकुन मंवल पेर्मतुन वेह्चि तोहना इन्जेरेन लिहि कीतोन.
उल्टा आतोन मापि किय्वडुन बारेते
5 बोरे आयि दुक्सा सीसि मत्तेके, वोर नाकुन आयो बति, मी सम्दिरकुन गिर दुक्सा सीतोर.
वोन पोरो उंडे अदिक वजन तोचुस्वा इन्जेर इद गोस्टि वेह्चेर मंतोन:
6 वोर आतोन मिह्गटल वेलेटिर सिक्सा सीता अदे आयर.
7 ते इंके वोन उंडे गिर सिक्सा सिय्वक्ने, मापि कीसि, सुम्जि किय्वल चोकोट मंदंता.
इहिन किय्वेके वोर उंडे अदिक पिकर कीसेर मंदंतोर.
8 अदेन साटि, मीवा पेर्मतुन वोन तोहना इन्जेर, मीकुन जुल्मा कीसेर मंतोन.
9 मिरट सम्दोन पिय्सि ताकंतिटो सेलेयो इन्जेर मीकुन परिक्सा किय्लेक गिर अद चिटितगा लिहि कीतोन.
10-11 मिरट बदे गोस्टित साटि बोने आयि मापि कीकिट्ते, नना गिर वोन मापि कींतोन.
नना बोने आयि मापि कीसि मंद्कते, मी साटि किरिस्तुना नदुडुन मुने वोन मापि कीतोन.
सय्तंतङ कुट्रन हिंदल, मरट पसे माय्वा इन्जेरेन इहिन मापि कीतोन.
बारितेके वोर माकुन बहन कोंडि किय्ले सूडंतोर इंवल, माकुन टावा.
पूना नियम्नुर सेव्कलिर बारेते
12 नना बस्केते त्रोयकु नगुडे सोत्तोनो, अस्के तंवा चोकोट्ना कबुर पचर किय्ले, येसु किरिस्तु पर्बु नाकुन मोका सीतोर.
13 बति तीतु दादल नाकुन दिस्वा काड्कि, नावा मन-दिलतगा सांति पुट्मकि.
अस्के वूरकुन दांतोन इन्जेर वेह्चि, वूर्गटल मासिदोनिया येरियते सोत्तोन.
14 बगवंतल हर जागतगा किरिसतुन हिंदल, माकुन बस्केट मेयुसेर मंतोर.
अनि किरिसतुन बारेता गियंता गमा गमा गाडि सिय्वल वासुन मा हिंदल, बगवंतल पग्रे मानल कीसेर मंतोर.
वोर बगवंतने दनेवाद वेह्चेर मंतोन.
15 बारितेके बगवंतन साटि, किरिस्तु अर्पना कीता गमा गमा गाडि सिय्वल ऊदुन मोडि ममोट मंतोम.
इद सोबता गाडि बचे मातुरकुन अनि बरोसा इर्मकि वूर्गा पग्रे मासेर मंता.
16 बरोसा इर्मकि वूरकुन कूर सडे माता वासुन मोडि मंतोम बति, बचे मातुरकुन बस्केट मंवल जिन्गनि सिय्वल गमा गमा वाले वासुन मोडि आसि मंतोम.