2वा कोरंति
कोरंतितुरकुन लिहि कीता रेंडवा चिटि
दंडोस्क
1
1 बगवंतना इचा तीर येसु किरिस्तुनोर अपोस्तुल आय्वल पव्लुना अनि मा दात बक्तल आय्वल तिमोति मीरे मासि, कोरंति नगुडे मंवल बगवंतना चर्चितुरकुन अनि पूरो अकया येरियतगा पग्रे मासि मंवलिर बक्तलिरकुन दंडोस दोसि, लिहि कीसेर मंतोम.
2 मा बाबो बगवंतल अनि मा येसु किरिस्तु पर्बु मीकुन पेर्मता-दया अनि सांति सियिर!
बगवंतन पव्लु दनेवाद वेह्वल
3 मा येसु किरिस्तु पर्बुनोर बाबो आय्वल बगवंतन दनेवाद वेह्कट.
वोर पेर्मता-दया वाले बगवंतनले, माकुन सम्दो तीर्दा मदत पुटंता.
4 वोर मावङ तक्लिबकुन वीडुस्ले मदत कीता तीरे, मरट गिर दुस्रुर तक्लिब्क्नगा मनेके, सात सियना इन्जेर कोरंतोर.
5 मरट किरिस्तुनङ तक्लिब्क्नगा ईसा येच्चेर मत्ता तीरे, वोर किरिस्तु सिय्वल मदत्नगा गिर ईसा येतंतट.
6 मीकुन मदत कियना अनि बचि कियना इन्जेरेन ममोट तक्लिब्क बोगे मासेर मंतोम.
मीकुन मदत किय्ले, बगवंतल माकुन सात सीसेर मंतोर.
अनि ममोट तक्लिब्क बोगे मासेर मत्ता तीरे, मिरट गिर अवेन वोर्चि बोगे माकिट्ते, बगवंतना मदत्ना अनुबव येतंतिट.
7 मिरट तक्लिब्क्नगा बहंते ईसा येच्चेर मंतिटो, अह्ने मदत्नगा गिर मीकुन ईसा पुटंता इन्जेर बरोबर माकुन टावा.
8 दादलिर-बायिक्निट!
आसिया येरियते माकुन वातङ अव तक्लिबकुन बारेते मीकुन करे माय्वक मंवल माक पसंद सेले.
माकुन अगा तोचा परोम आतङ तक्लिब्क वातङ.
अद गट्कते ममोट पिसंतोम इंवल आसा गिर सुटि कीतोम.
9 मा पोरो ममोट बरोसा इर्वक्ने, सातुरकुन नेंडुस्वल बगवंतनगन बरोसा इरनल, मरंता सिक्सा वाड्तपिनय मावा मंदे लाग्ता.
10 ईतल गाचेरमनल बगवंतल माकुन तपुस्तोर.
अनि मा साटि मिरट किय्वल पार्तनता मदतुन हिंदल, वोर उंडे गिर मुने माकुन तपुसंतोर इन्जेर आसते मंतोम.
11 अदेन साटि, वेलेटिर पार्तना किय्वडुन हिंदल, माकुन पुड्ता इद पेर्मता-दयता वरमुन बारेते, सम्दिर गिर बगवंतन दनेवाद वेहंतेर.
पव्लु तंवङ मारितङ अव पिलनकुन बारेते कारन वेह्वल
12 ममोट मा सादा गियंतुन पिय्सि आय्वा, बगवंतना पेर्मता-दयतुन हिंदल ताक्तोम.
बगवंतल सिय्वल सुदुड-पांदे अनि नियत्ने इद दुनियतगा पिस्तोम.
मुकेते मी सङा अहन पिस्तोम इन्जेर मावा मन-दिल गवा सीसेर मंता.
13-14 मिरट वाचि कीसि, अर्तम किय्वलिक गोस्टिङे लिहि कीसेर मंतोम.
मिरट मा बारेते जरसि अर्तम कीतिट.
उंडे मुने बर्पुर अर्तम कीकिट इन्जेर आसा कीसेर मंतोम.
अहन कीकिट्ते, येसु पर्बुना वाय्वल दिवोसुन नेटि मी हिंदल, ममोट गर्वते मत्तपे, मिरट गिर मा हिंदल गर्वते मंदंतिट.
15-16 इद गोस्टितगा नाकुन बरोसा मत्ता काड्कि, नना मासिदोनिया सोनेके, मिह्गा आग्सि सोंदना अनि मासिदोनियतल मल्सि वानेके गिर, मिह्गा आगना इंवल पिलन वाट्सि मत्तोन.
अद आता पेजे, नाकुन यूदया येरियते सारि कीकिट इन्जि मत्तोन.
इद तीर्दे रंड जोकङ आग्वडा पाय्दा मीकुन पुटना इन्जेर सोन्च कीसि मत्तोन.
17 नना इव पिलन्क बतय सोन्च किय्वक्ने कीतोर इंतिट कि?
असले किय्मकि!
नना सादरन माय्नलिर मोडि उंदि जोका ‘हो’ इन्जि, उंडे उंदि जोका ‘सेले’ इन्जेर लबड वेह्वना आयोन.
18 बहंते बगवंतल बस्केन लबड वड्कोरेय, अह्ने ममोट गिर बस्केन लबड वेह्मकि.
19 नना, सिल्वनस दादल अनि तिमोति दादल, बगवंतनोर मरि आय्वल येसु किरिसतुन बारेते, मी नड्डुम पचर कीतोम.
वोर येसु बर्पुर बरोसा वाले आंदुर* अनि तना बतल वेहंतोरो, अदेने बस्केट कींतोर.
20 बगवंतल सीतङ सम्दो वाग्दन्क किरिस्तुनगा पूरे मातङ.
अदेन साटि, येसु किरिसतुन हिंदल मरट, “आमेन*” इन्जेर, बगवंतन डगुर-पान सीसेर मंतट.
21 बगवंतल मी बरोबर माकुन गिर नेमि कीसि, किरिस्तुनगा गट निपुसंतोर.
22 मरट तंवुर आंदट इन्जेर निरुपन किय्ले, बगवंतल मावा दिलतुन रोपो तंवा आत्मा इर्तोर.
बगवंतल वाग्दन सीतङ सम्दोन येतंतट इन्जेर तंवा आत्मा मा रोपो गारंटित मोडि मंता.