बगवंतना मंदा
5
1 चर्चितुर पेदोल्क आय्वलिर मी बरोबर पेदोल्ता आय्वना नना, किरिस्तु बोगे मातङ दुक्सन गवदारना आंदुन.
बगवंतल बविसत्ने तोह्वल मय्मतगा ईसा येत्वना मीकुन कोर्वल बतल इत्तेके,
2 मिरट लाबम्ना आसा किय्वक्ने, बल्मिते आय्वा बगवंतना इचा तीर वोर मीकुन सीता मंदतुन बर्पुर दिल्दे मेहना.
इत्तेके वूर बक्तलिरा सेवा कियना.
3 वूर बक्तलिर पोरो मिरट माल्कलिर दात मंवक्ने, मीवा नमुना येच्चि वूर ताकनल पिसट.
4 अस्के मी पोरो पेर्सोर गाय्कि आसि मंवल किरिस्तु वाता पेजे, बस्केट मिड्चेर मंवल मय्मता किरिट मीकुन पुटंता.
5 अदे तीर्दे डियङ-डियुर्निट!
मिरट डगुक वेह्तपिनय ताकट.
सम्दिर बक्तलिर आय्वलिर मिरट कमि-पान इंवल पाङुड पोंड्सि, वोरोर उंडे वोरोना सेवा कियना.
बारितेके,
“बगवंतल गर्वते मंवलिरकुन उल्टा तिरियंतोर.
बति कमि-पांदे मंवलिर पोरो पेर्मता-दया तोहंतोर”+
इन्जेर दर्मा-ग्रंत्नगा लिहि कीसि मंता.
6 अदेन साटि बगवंतल मीकुन बरोबर वकत्ने डगुर-पान सीनल, वोना सक्ति वाले केयदुन बूड चुडुर-पान कीसि मंट.
7 मी बारेते वोर बगवंतल बस्केट हेतु कीसेर मत्ता काड्कि, मी चिंता पूरो वोन पोरो वाटट.
8 मीवा मंदुन जरब्ने इर्सेर, दिहंते सूड्सेर मंट.
बारितेके मीवोर पगा-दारल आय्वल सय्तन, बोन मिङना इन्जि गार गार इन्जेर मह्क्वल चिहोत मोडि तिरिसेर मंतोर.
9 बति मिरट बरोसतगा गट आसि, वोन उल्टा तिरियट.
इद दुनियतगा मंवलिर किरिस्तुनुर बक्तलिर गिर ईतङ दुक्सनले वीड्सेर मंतेर इन्जेर करि कीसि ताकट.
10 पेर्मता-दयते बर्पुर निन्चि मंवल बगवंतल, बस्केट मंवल मय्मतगा किरिसतुन हिंदल, ईसा येतना इन्जेर मीकुन केय्तोर.
मिरट इचुसि गट्का वेरि, आतङ दुक्सङ बोगे माता पेजे, वोरे मीकुन बर्पुर तयर कींतोर.
बहन इत्तेके बरोसतगा बडि कीसि, मीकुन ताकद सीसि निपुसंतोर.
11 आतल अदिकार वाले बगवंतने पिडिनङ-पिडिङ डगुर-पान वायना.
आमेन!
आक्रिता दंडोस
12 बरोसतोर बक्तल इन्जेर नना नम्वल सिल्वनस दादना केय्दे इद चुडुसि चिटितुन लिहि कियुसि, मिह्गा रोह्चेर मंतोन.
मिरट बगवंतना इद सते पेर्मता-दयतगा, उंडे गिर गट निलना इन्जि, मीकुन हक्लि कीसेर गवा वेह्चेर मंतोन.