बगवंतना इचा तीर पिसट
4
1-2 ते किरिस्तु मेंदोडगा मा साटि दुक्सा येत्ता काड्कि, आतले मंदुन मरट गिर आय्तरतुन दात केरना.
बारितेके मेंदोडगा दुक्सा येत्तोर वोर तंवा पिसगतितगा उंडे गिर, माय्नलिरङ आसन पिय्सि ताकोर.
बति बगवंतना इचा तीरे ताक्सेर, पाप्ना जोलित सोंवक्ने मंदंतोर.
3 बारितेके मिरट मोदोल कीतङ लन्जेतनम्क, मेंदोडङ आसङ, कल उन्जि निसते मंवल, लोलि कीसेर वार्वल-डेय्वल अनि पीर किय्वल, उंवलिर सङा कीतङ दावत्क अनि किय्वा आतङ मूर्तिना पूजा किय्वल, ईतङ करेबलिक सम्दोन पिय्सि ताक्तिट.
इहिन मिरट बगवंतना बक्ति कियुर वूर दुस्रुरा इस्टम तीर ताक्ता कालमे मस्त आयर.
4 अदेन साटि इंके तम्वङ करेबलिक तरिकन पिय्सि तम्वा सङा, ‘मिरट बारि ताक्सेर सेल्विट?’
इन्जेर वूर दुस्रुर गुल आसेर, मीवा हिजत वोसेर मंतेर.
5 बति वूर, पिसि मंवलिरकुन अनि सातुरकुन तस्वा किय्वल, बगवंतन तम्वा लेका वेहा लागर.
6 इद कारंतुन हिंदले, सातुर वूर मेंदोडुन पिय्सि, तस्वा जर्ग्ले अनि आत्मतुन पिय्सि बगवंतन हिंदल बस्केट जीवते मंले, वूरकुन बगवंतना चोकोट्ना कबुर वेह्वल जर्ग्ता.
7 सम्दो मूरे माय्वल गट्का करुम येव्ता काड्कि, मीवा मिरट जरब्ने मन्जेर, चोकोट्ना बुदिते पार्तना कीसेर दिहंते मंट.
8 मुकेते वोरोन वोरोर वेले पेर्मते सूड्सेर मंट.
अस्के मिरट लेका किया पर्विट अचोङ पापकुन मापि किया परंतिट.*
9 गोल्ग्वक्ने मीवङ रोह्क्नगा वोरोन वोरोर मान-पान कीम्ट.
10 हर वोरोर रोतुन ताकुस्वल कारोबारिन मोडि, तनकुन बगवंतल सीता वरमुन, बरोसते सेवतगा वाप्रि कियना.
11 वोरोन बोदा वेह्वल वरम पुड्तेके, वोर बगवंतना वचन तीरे बोदा वेहना.
वोरोर सेवा किय्वल आतेके, वोर बगवंतल सिय्वल सक्तितुन पिय्सि अद सेवा कियना.
अस्के बगवंतन सम्दो तीर्दे येसु किरिसतुन हिंदल, डगुर-पान पुटंता.
पिडिनङ-पिडिङ वोने अदिकार अनि मय्मा वासेर मंदना.
आमेन!
12 लाड्नुर दादलिर-बायिक्निट!
मीकुन परिक्सा किय्ले, तड्मित दात नोमुर किय्वलिक दुक्सङ वांतङ.
मीकुन जर्ग्वा अद बतलेय जर्ग्सेर मंता इन्जेर परेसन आय्मट.
13 बति, ‘किरिस्तु बोगे मातोर अव दुक्सनगा ईसा येच्चेर मंतोम्’ इन्जेर मिरट वेले आनंद येतट.
बारितेके मय्मते किरिस्तु मल्सि वायन नेटि मीकुन उंडे अदिक आनंद पुटंता.
14 किरिस्तुना पोरोडुन हिंदल मीवा लजा दायर्ते, मिरट आसिर्वाद येत्तुरा लेकते वांतिट.
बारितेके, मी पोरो बगवंतना मय्मा वाले आत्मा निल्सि मंता.
15 बति मिह्गटल बोरे आयि दुस्रोना जीवा येत्वडुन हिंदल, सेलेके कल्वडुन हिंदल, सेलेके तप किय्वडुन हिंदल, सेलेके दुस्रुरा जोलित सोंवडुन हिंदल, दुक्सा बोगे माय्वा.
16 बति बोरे आयि किर्चन आततुन हिंदल दुक्सा बोगे मानुर्ते, वोर लजे माय्वडुन बद्लि बगवंतनोर आता काड्कि, अद पोरोडुन पिय्सिने, वोन डगुर-पान सियना.
17 बारितेके बगवंतनुर बक्तलिर्गटले जर्ग्वल तस्वा वेय्ने मोदोल आय्वल मंता.
अद तस्वा मह्गटले सुरु आतेके, बगवंतना चोकोट्ना कबुडुन वटिन इंवलिरा गति बहन मन्मड मंदर?
18 अनि,
“नियत्नुरे बचे माय्वल कस्टम आतेके,
बगड-नियत्नुर अनि पापेस्तलिर बगा निला परनिर?”
+