वेय्लोक अनि माड्सुर बारेते वेह्वल
3
1-2 बायिक्निट!
मिरट मीवुर माड्सुर वेह्तपिनय ताकना.
अस्के वूर्गटल बोरे वोरोर, बगवंतना बोदतुन वोपोर वोर मत्तेके गिर, मीवा वेह्वडुन पिय्सि आयो बति, वोर मीवा सुदुड-पांदे वेरेते ताक्वडुन सूड्सि, बगवंतनगा बरोसा इरा वचो.
3-4 तीर-तीर्दङ वेनिङ वाट्वल, सेलेके सोनेतङ वेर्क केर्वल, सेलेके बारितङ कप्डिङ पोंड्वल, इंवलिक्ने मीवा सोबतुन बह्रि तोह्वल मुकेम आयो.
बति मन-दिलतगा रोपो मंवल सादु-पान अनि सांति इंवलिक गुन्क्ने मीवा सोबतुन बस्केट तोह्वले मुकेम आंद.
ईतल सोबा बगवंतना नदुडे बेय विलुवता आंद.
5 अदेन साटिने तोत्तङ बक्ति किय्वलिक वेय्लोक, बगवंतन पोरो आसा इर्सि, तम्वुर माड्सुर वेह्ता तीर ताक्तङ.
इद तीर्दे सजे मासि तम्वा सोबतुन तोह्तङ.
6 नमुनत सारल तंवोर माड्सो अब्राहमुन, ‘माल्क’ इन्जेर केय्सेर वोर वेह्ता तीर ताक्ता.
इंके मिरट गिर चोकोटे ताक्सेर, बततुने वेरिवक्ने पिस्किट्ते, अद सारनङ मियक्ना लेकते वांतिट.
7 अदे तीर्दे दादलिर्निट!
मीकुन तेर मीवङ वेय्लोक कम्जोर वालेक इन्जेर सम्जे मासि, चोकोटे ताकट.
अस्के मिरट किय्वलिक पार्तनन बतङे अड्डम मनोङ.
मीकुन पुड्ता पेर्मता-दयता जिन्गनितगा मीवङ वेय्लोक गिर मी बरोबर ईसदारेक आंदुङ इन्जेर मान सीसेर पिसट.
चोकोट किय्वडुन साटि दुक्सा बोगे माय्वल
8 आक्रित वेह्वल बतल इत्तेके, मिरट सम्दिर उंदि येकिते मंट.
दुक्सनगा वोरोन पोरो वोरोर किवुल वासेर, पेर्मते अनि दयते सूड्सेर, वोरोन्गटल वोरोर चुडुर-पान कीसि पिसट.
9 आसिर्वाद्नगा ईसदार्क आय्ले, बगवंतल मीकुन केय्ता काड्कि, वायुट कीतुरकुन मिरट उल्टा वायुट किय्मट.
अनि मीकुन सापेना सीतुरकुन उल्टा सापेना सिय्मट बति, आसिर्वाद सीम्ट.
10 बारितेके,
“तंवा जिन्गनितगा सुक-सांत्ने पिस्का इंवल,
अनि चोकोट्नङ दिवोस्क सूड्का इंवल हर वोरोर,
तंवा वेन्जेर करब वड्क्वक्ने
अनि तंवङ सिव्लिङ कपट वड्क्वक्ने काबाडना.
11 वोर आतोर करबुन सुटि कीसि, चोकोटुन कियना.
अनि सांतितुन मह्क्सि, तान पिय्सि ताकना.
12 पर्बुना नदुर नियत्नुर पोरो मंता.
वूरङ पार्तनङ केवि सीसि केन्जंतोर.
बति करेबलिरकुन उल्टा वोर पेरे-गेहंतोर”+
इन्जेर ग्रंत्नगा लिहि कीसि मंता.
13 मिरट चोकोट किय्ले पर्पेडे माकिट्ते, मीकुन बोर नुक्सन कींतोर?
बोरे कियोर!
14 बति उंदि मोका नियतुन साटि मिरट दुक्सा बोगे माकिट्ते, मीकुन बगवंतल आसिर्वाद सींतोर.
ते वूर वेरुस्तेके वेरिमट अनि तकपिका गिर आय्मट.
15-16 इदेन बद्लि, पर्बु आय्वल किरिसतुन मीवा दिलतगा उपुसट.
मिरट डाग सेले अद मन-दिल वालिर आसि, मिरट बरोसा किय्वल आसतुन बारेते बोर पूसि कीतेके गिर, सादु-पांदे, बाव-बक्तिते बस्केट जवब सिय्ले, तयर मंदना.
अस्के बव्ते गोस्टिन पिय्सि वूर मीवा हिजत वोतेरो, अवेन बारेते किरिस्तुनगा मंवल मीवा सत्ना ताक्वडुन पिय्सि, वूर लजे मांतेर.
17 उंदि मोका मिरट वायुट कीसि दुक्सा बोगे माय्वडुन तेर, चोकोट कीसि दुक्सा बोगे माय्वले बगवंतना इचा मंदर्ते, वेले चोकोट्ना गोस्टि.
18-20 बहन इत्तेके, नियत्नोर किरिस्तु, बगड-नियत्नुर आय्वलिर मावङ पापकुन पिय्सि, सिक्सा बोगे मातोर.
अनि माकुन बगवंतनगा करुम तर्ले, उंदिय जोका मेंदोडा रूप्ने मरन आतोर.
बति बगवंतना आत्मतुन पिय्सि नेंड्तोर.
तोले नोवहु रूका निव्डि कीनेके, बगवंतल तनकुन उल्टा ताक्वलिरकुन वोर्च्तोर.
अद गट्कते येता गंडमनल रूकते सिरिप आट जन्के बचे मातेर.
सातुरङ आत्मङ कोंडे मासि मंवल जागतगा किरिस्तु आत्मता रूप्ने सोन्जि, पचर कीतोर.
21 अद येर मरट येत्वल बाप्तिस्मतुन मोडि मंता.
इंके बगवंतना केय्दे बचे मातट इंवडा अद निसनि आसि मंता.
अद बाप्तिस्मता कार्या मेंदोडा मेय्लतुन तेंड्सि वाट्वल आयो बति, बगवंतन डाग सेले अद मन-दिल्ते सिय्वल जवब आंद.
अनि येसु किरिस्तुना नेंड्वडुन हिंदल मरट बचे मांतट.
22 वोर किरिस्तु इंके स्वर्ग्नगा सोन्जि, दूतलिर पोरो, अदिकारिर पोरो अनि सक्तिन पोरो अदिकार वाले आसि, बगवंतना तिना बग्ला* उच्चि राज ताकुसेर मंतोर.