Kamus 1

Kamus Surat Ralan na'a Vaidida

Amasusan vaivatul ovu faliak ovi rna'a Kamus Surat Ralan ini tali huruf a ti naran huruf y. Vaivatul ovu faliak ovi rna'a vai Mala (na'a tanda kurung ralan) rorang vaivatul te faliak ovi rna'a Vaidida.

Aa walwalur (salib): Fareta Roma ba'i rfaleka inukun matmatan verin tamata ktufan ra, ma rbaku ira na'a aa walwalur. Tamata ktufan avyai rvara rira aa walwalur ra, ti naran wan i suldadu ra rbaku ira na'a. Rotu munuk wean inyai, beti rfadiri aa walwalur avyai, ma tamata ktufan avyai rbaklo'i watan, nata rmata.

Abraham (Abraham , Abram): Ia ntali Ur-Kasdim na'a wan dawan (daerah) Mesopotamia ni lihir tranan a. Ubu nera ia ma nti Kanaan. Na'a wan yai, na Ubu veka notu Ni tnorung ovu ia ma tamata Israel ra munuk veka reluk ubun a nusin ra. Ubu nfareta Abraham ma rsunat ia, ma neluk faneak ne, Ubu notu ma ni vava'at nmalola, tevek ni inorang a. Wean inyai bi, tamata ovi rorang Ubu, ira munuk reluk Abraham ubun-nusin ra.

Afa ovi rmerat urun (barang yang kudus atau suci): Ubu npake khusus afa ovi rmerat urun.

Afwatan isa naran unta (unta): Unta ini dawan ia ovu karatat vali ia, ba tamata ra ba'i rata rdoku tetan ratan a, ovu rtaha vali rira vnuat ra. Tamata ra ba'i rotu vulun ra na'a maloli i dadedar, ma wean kadut nur (Matius 19:24; 23:24).

Amar dawan Paskah (hari raya Paskah): Tamata Yahudi rotu rira amar dawan isa naran Paskah ma al nfangnanang ira na'a amar i uburir-nusirira ra rdiri talik Mesir. Ira rfanara vali snoba ini ne, snoba i ra'an roti i wol rfadoku ragi na'a. Yahudi rira amar dawan Pentakosta mane roak munuk roak, beti rotu Snoba Paskah. Snoba ini nbana ti naran amar iwalu. Paskah ini naling ia tali Paskah i fiang ini totu ma al nfangnanang ita na'a amar i Yesus nva'at ewal tali matmatan.

Amar i Yahudi ra ryari ira (hari Sabat): Tamata Yahudi ra rarekan amar i ryari ira tali Jumat lersian, ti naran Sabtu lersian. Yahudi ra wol rkarya na'a amar ini. Wol rti vali wan i rfedi-rfaha afa, na'uk rti watan rira rahan falurut ra ma raraning Ubu.

Amar Pentakosta (hari Pentakosta): Na'a Perjanjian Mnanat na'a Surat Ralan, na Snoba Pentakosta naran a naling ia. Rfanara ia ne, Snoba Karedralan ra ovu Snoba Fadiar, tevek tamata ra rdiar rira gandum ra, beti rotu snoba ini. Yahudi rivun tali nuhu ra munuk rti Yerusalem ma rorang snoba ini. Amar vutlima nelak roak tali amar i Yahudi ra rangnanang amar i uburir-nusirira ra rdiri talik Mesir, beti Pentakosta. Pentakosta na'a vai Yunani ihin a vutlima.

Baptis / nbaptis (baptis, membaptis): Kareda ra ba'i rala wear ma rbaptis tamata ra, na'uk rotu ma rsialing ira na'a rira cara ra. Baptis ihin a na'a vai Yunani ne, tduvul tamata ra na'a wear, te tliru tamata ra ovu wear. Yohanes nbaptis tamata ra ma al rfaturu ne, rahil ma rtalik roak tali rira salasilan ra, ma Ubu na'i vatuk roak rira salasilan ra.

Bileam (Bileam): Bileam nabi ia. Balak i notu raja na'a Moab nera ia, boma nti ma near nfasoba tamata Israel ra. Ia wahan kubang, ba not-orang raja Balak ni fareta a. Na'ut i Bileam na'a ni banbanan ma nti Israel, na Ubu Ni sansinir tali lanit ratan notu teri ia. Ia wol nrea Ubu Ni saninir yai, na'uk ni keledai nrea sansinir yai ovu nangrova Bileam. Ti nata wol bisma near nfasoba tamata Israel ra, tevek Ubu naflahar ira (Bilangan 22:4-24:25).

Danau Galilea (danau Galilea): Danau ini nana'a propinsi Galilea, na'a Israel ni lihir marmar. Danau ini wol tahat, na'uk wear watan. Tamata rivun rdava ian na'a inyai. Ravul kumal ra ma rdava ian, ovu vali robal rti ahu liak ovi rna'a danau nelan. Danau ini dawan urun, ba naling ma dawan ia ovu kewal te malela te tar ovi rna'a Tnebar. Ira rfanara vali danau yai ne, danau Tiberias te danau Genesaret (Msi'ik Lukas 5:1; Yohanes 6:1).

Dawan kareda felan itelu: ovi reluk penatua, ovi rban-ulu, ovu ovi reluk diaken (penatua, penilik, diaken)

dawan kareda ovi rban-ulu verin rira sidovung (penilik na'a vai Mala, episkopos na'a vai Yunani) irua ihirira wer isa. Ira rira varvara ma rwanar rira sidovung tamata inorang ra, ovu musti rfaturu rira vava'at i kena verin rira sidovung a. Ira veka rdiri Ubu wahan ralan a, ma rvalat Ia na'a karya i nala roak verin ira. Ira musti wearira domba duan ra ma rwanar ma lolin rira domba ra. (1 Petrus 5:2-4)

Dawan kareda ovi reluk diaken (diaken): Dawan kareda ovi reluk penatua ovu dawan kareda ovi rban-ulu, rala dawan kareda ovi reluk diaken ma rlobang ira, ovu vali rlobang rira sidovung tamata inorang ra.

Dawan kareda ovi reluk penatua (penatua na'a vai mala, presbuterous na'a vai Yunani) ovu Dawan Yahudi ra (tua-tua bangsa Yahudi): Tamata Yahudi rira tamata ovi rban-ulu verin ira. Boku rtali rira rahan matan ra, ovu boku vali rtali agama Yahudi ni sidovung ra.

Dinar, kubang perak (dinar, uang perak): Tamata Roma rira kubang ra, nararira dinar ovu kubang perak. Dinar isa fyawan sama ovu tamata karya ni kadi na'a amar isa (Matius 20:2). Kubang perak (sekel na'a vai Ibrani) irua fyawarira ra wearira isa ovu tamata karya ni kadi na'a karedralan isa.

Domba (domba): Tamata Israel rira afwatan isa naran domba. Ira ba'i rfedan domba ra ma neluk rira korban verin Ubu, ma na'i vatuk rira salasilan ra. Faliak isa npake vaivatul domba, ma nfaturu ne, Yesus Kristus yai Domba Duan i ralan a lolin urun, ovu tamata ovi rorang Ia, ira reluk Ni domba ra.

Duila'a (Tuhan)

Elia (Elia): Tamata Israel rira nabi i wol inan lahir ma nsangatur ma nraning walut ra. Ira rnaban nabi Elia nma, ma nasusan linga'an verin Raja i ntevut tamata ra tali rira salasilan ra. Wean inyai bi, Yohanes i nbaptis tamata ra, ia wean lahir nabi Elia (Matius 11:14).

Galilea (Galilea): Yesus nleal Israel ni lihir marmar, na'a propinsi Galilea. Tamata Yahudi ra ovu ovi wol Yahudi ra rna'a vali inyai. Na'a Galilea ni lihir timur a, na danau Galilea nana'a inyai. Herodes Antipas (Herodes Antipas): Herodes ini Herodes Ila'a yanan a. Na'ut i yaman nmata, na fareta Roma nsikat ia ma nfareta tamata Yahudi ra. Ia nfareta tamata isa ma ti nvangal Yohanes i nbaptis tamata ra, relan a.

Herodes Ila'a (Herodes Agung): Na'ut i rarali Yesus, tamata Roma rfareta Palestina (Israel) ovu negara liak rivun vali. Fareta Roma nsikat Herodes Ila'a ma nfareta Palestina (tamata Yahudi, ovu ovi wol Yahudi). Kitab Markus wol nfamalik Herodes ini. Na'ut i nmata, na Yesus Ni kako'u obin.

Inukun (hukum, hukuman): Ubu wol mane nfadoku inukun vutu watan verin nabi Musa, na'uk nfadoku ma nlia tali inyai verin ia. Tamata ovi rorang Yesus rka'a Musa ni inukun vutu a, ovu ni inukun liak ra vali, na'uk Yahudi rira inukun rivun vali na'a rira adat a.

Israel (Israel): Yahudi uburir-nusirira ra tali lalan nararira ra Abraham, Isak ovu Yakub. Yakub ini, Ubu nfanara ia ne Israel. Israel yanan brana vutu rahi irua yai reluk Israel rira arun dawan vutu rahin irua. Ba tamata Yahudi, tamata Israel ovu tamata Ibrani wer isa watan. Rfanara vali rira lanun a ne, Israel.

Kain (Kain): Adam ovu Hawa yanar iya'an verin Kain. Kain nangrova, tevek Ubu wol ntorung ma nala ni korban a. Ia ntorung watan ma nala warin i Habel ni korban a. Wean inyai bi ia nfedan Habel. Nata Ubu nukun ia, ma nban tia ma watan na'a wan lean vu dawan (Kejadian pasal 4; Ibrani 11:4; 1 Yohanes 3:12; Yudas 11).

Kaisar (kaisar): Roma rira tamata isa i nfareta tamata Romawi ra munuk naran Kaisar. Ia ni dawan nlia raja ra munuk. Na'ut Perjanjian Ngorva'an a, na tamata ovi reluk Roma ni Kaisar: Agustus, tali ta'un 31 (Sebelum Masehi) ti naran 14 (Masehi- msi'ik Lukas 3:1); Tiberius, ta'un 14-37 (Masehi, msi'ik Lukas 3:1); Kaligula, ta'un 37-41; Klaudius, ta'un 41-54, (msi'ik Kisah 11:28; 18:2); Nero, ta'un 54-68; Vespasianus, ta'un 69-79; Titus, ta'un 79-81.

Kaka'a dawan (bijaksana / hikmat)

Kalolin (berkat): Ubu notu afa ovi lolin ra verin tamata ra, te nala afa ovi lolin ra verin ira. Msi'ik vali faliak Kobi (cawan / gelas): Kobi ini, wan i tamata ra ba'i rli'i anggur na'a ma renu. Kobi ini vali neluk faneak na'a i wean inba ma tamata ra rfarnuang wawa'uk. Tamata ra renu anggur na'a kobi ini ihin a ne, tamata ra rfarnuang wawa'uk (Matius 20:22), ovu vali neluk faneak ne, Ubu nfaturu Ni ngrova a (Wahyu 14:10; 16:19).

Kristus / Mesias: Msi'ik

Maria (Maria): Na'a kitab Ubu Ni Ivar Lolin (Injil) ra, na vata ifira nararira Maria:

1. Maria i yanan verin Yesus Kristus.

2. Maria Magdalena i norang Yesus. Yesus naling vatuk nait sian ifitu tali ia. (Matius 27:55-56; Lukas 8:2).

3. Maria i ntali ahu Betania. Ia warin Marta ovu uran Lazarus. Yesus ni kida verin ira (Yohanes 11:1-3).

4. Maria i yanan verin Yakobus ovu Yusuf. Ia norang Yesus tali Galilea (Matius 27:56; Markus 15:40).

5. Maria i awan verin Klopas. Ia nana'a vali na'ut i rbaku Yesus na'a aa walwalur (Yohanes 19:25).

6. Maria i yanan verin Yohanes i rfanara vali ia ne, Markus. Maria ini ni rahan a nana'a Yerusalem. Yesus Ni tamata ovi rorang Ia ba'i rasdovu ira na'a ni rahan a (Kisah 12:12).

Musa ni inukun ra (Hukum Taurat atau Hukum Allah): Ubu nala Ni inukun ra munuk verin tamata Israel ra nahu Musa. Ubu nala inukun vutu verin Musa na'a vuar Sinai, na'uk nala inukun rivun vali verin ia ma ntulis kitab ilima ovi: Kejadian, Keluaran, Imamat, Bilangan ovu Ulangan. Nabi / Tamata i nrenar lahir tali Ubu ma ti nfamalik Ni vaivatul ra (nabi): Tamata isa i Ubu nera ia ma nfamalik Ni vaivatul ra verin tamata ra, na tamata yai nabi ia. Lan Ubu nera tamata Israel boku ma reluk nabi, wean Musa, Elia, Amos, Yesaya, ovu tamata liak ra. Ira ba'i rfasala raja ra ovu tamata Israel ra, tevek wol rot-orang afa ovi Ubu ralan nfalak ra. Yohanes i nbaptis tamata ra notu vali wean ini (Matius 11:5), ovu tamata ra rfanara vali Yesus ne, nabi Ia (Lukas 24:19). Ira rfamalik vali afa ovi wol rvotuk obin, ovu afa ovi veka rkena tamata ra. Ayat boku rfamalik nabi ovi rna'a tamata inorang rira sidovung ra na'a Kisah 13:1; 1 Korintus 12:28-29; Efesus 4:11.

naflahar tamata.

Naflahar tamata ra (dia memberkati orang-orang): Ubu nala afa ovi lolin ra verin tamata ra.

Nait sian (setan, roh jahat): Nait sian ra rotu lalawatan sian a verin tamata ra.

Naval (dia membalas atau upah): Ubu veka naval, te nala afa ovi lolin ra verin tamata ra, na'a rira rala lolin a.

Ngrebat (kuasa / wibawa): Ngrebat tali Ubu ma bisa totu afa isa, te afa rivun. Ngrebat tali tamata ma bisa tfareta tamata ra.

Nitdawan (Iblis): Nitdawan ikisa watan, na'uk ni nait sian rivun. Ia naran vali Iblis, Lusifer te Beelzebul. Nitdawan ini nfareta nait sian ra munuk. Lalan ana, wol tamata obin na'a lanit ivavan ini, na ia neluk sansinir verin Ubu. Na'uk ia nfakaratat tenan a mane irua Ubu wer isa, ba Ubu nala'ing vatuk ia tali lanit ratan, ovu ni sansinir ovi rorang ia. Sansinir avyai reluk nait sian roak.

Nlabir teman (dia mencobai): Tamata ra ba'i rlabir teman tamata liak ma rka'a afa boku.

Nlobang / Ni silobang (dia mengasihi / kasihnya): Ubu nlobang tamata ra, ovu wean i tlobang Ia, na tot orang Ni vaivatul ra. Ita tlobang Ubu wol ihin a ne, bantu te menolong Dia.

Ntalkaka (dia heran): Vaivatul ini ihin a, naling ia tali vaivatul nabrian.

Ntevut / nakvanak (dia menebus): Tamata i ntevut afa ovi tamata liak rotu a, te nbahir afa ovi tamata ra rfedi roak a. Wean vali inyai verin Yesus Kristus. Ia nma roak lanit ivavan a, ma nmata al nakvanak tamata rivun tali rira salasilan ra (Markus 10:45). Yesus laran nvoat ma al ntevut tamata ra tali rira salasilan ra (Kisah 20:28).

Nvolan / rvolan (dia / mereka berjanji atau memutuskan): Wean i tamata ra mane rotu rira snoba isa, te rotu afaka watan, na ira musti rvolan lan veki ne, amar aka ki rotu. Raja i ntevut dida salasilan ra

Raja i ntevut dida salasilan ra (Mesias na'a vai Ibrani / Kristus na'a vai Yunani): Tali lalan a, Ubu Ni tamata ra rarenar tali Ia ne, Ia veka nsinir Tamata isa nma ma neluk rira Raja ma nfareta ira. Vaivatul Mesias ovu Kristus ihirira wearira isa: Tamata i Ubu nfili ma neluk Raja, te Tamata i Ubu na'ung ngul na'a ulun a ma al nfaturu ne, Ia nfadoku aling roak Raja yai. Vai Mala nfalak ne, Yang Diurapi-Nya (Kisah 4:26). Tali Perjanjian Mnanat tka'a Raja yai musti rarali Ia na'a ahu Betlehem, ovu musti raja Daud ubun-nusin Ia. (Matius 2:4-6, 22:41-42; Yohanes 7:41-42) Raja i ntevut dida salasilan ra ovu nfareta Ni tamata ra, na inyai Yesus. (Markus 8:29-30; 14:61-62; Kisah 2:36; 4:42; 17:2-3; Roma 1:4).

Rasul (Rasul): Yesus Ni tamata sansinir vutu rahin irua, ira reluk rasul vali. Ira ba'i rfamalik Yesus Ni vaivatul ra verin tamata ra. Ubu nfadoku ma tamata liak boku vali reluk rasul, wean Paulus.

Sidovung Zelot (partai Zelot): Tamata ovi rtali sidovung Zelot ini, tamata Yahudi ira. Ira rafena ma rtalik ma rangal fareta Roma, tevek fareta Roma rkiwal ma rala rira lanun ra. Simon i norang Yesus, lan a ntali vali sidovung Zelot (Matius 10:4).

Sunat / nsunat (sunat, dia menyunat): Tamata Yahudi ra rsunat yanarira brana ra na'ut i rira amar iwalu, ma al rotu faneak ne, ira rna'a roak Ubu Ni tnorung ovu tamata Israel ra. (Kejadian 17:9-14). Tamata Farisi (orang Farisi): Tamata Yahudi rira sidovung isa naran Farisi. Tamata Yahudi ralang ma dawan ira, tevek rira dakdokun na'a Yahudi rira agama. Ira wol reluk Yahudi rira mela falurut. Tamata Farisi rivun ira inar ma rfaleka Yesus, tevek Ia ntabu ira na'a rira inukun rivun ovi ka'i rotu ra, ovu wol rot-orang afa ovi rfalak ra.

Tamata i ni vava'at nmerat urun (Orang kudus atau suci): Ubu nfili khusus tamata ovi rira vava'at ra rmerat urun ma rot-orang afa ovi ralan nfalak a.

Tamata ovi rorang Yesus rira sidovung / tamata inorang rira sidovung / sidovung tamata inorang (Jemaat): Tamata ovi rorang Yesus rasdovu ira na'a wan te kota isa, ma al raraning Ubu ovu rarenar Ni vaivatul ra. Faliak itelu ini, ihirira wer isa watan, ba ampake ma sesuai ovu ni konteks a.

Tamata ovi rorang Yesus / tamata inorang (Orang percaya / pengikut Yesus): Yesus Ni tamata vutu rahin irua ula ira ma rorang Ia. Nata tamata ovi rorang Yesus munuk. Yesus inan ma tamata ra rtali arun dawan munuk ovu negara munuk veka rorang Ia. (Matius 28:19). Na'a ayat boku, na tpake tamata inorang, na'uk faliak ini wean isa watan ovu tamata ovi rorang Yesus.

Tamata ovi wol Yahudi ira (orang-orang bukan Yahudi): Tamata ovi uburir-nusirira ra wol rtali Israel, na tfalak ira ne, wol tamata Yahudi ira.

Tamata Saduki (Orang Saduki): Tamata Yahudi rira sidovung isa naran Saduki. Tamata Saduki rivun reluk Yahudi rira mela falurut ra. Ira rorang a'uk kitab ilima i Musa ntulis. Ira wol rorang ne, Ubu nfava'at ewal tamata ovi rmata roak. Ira wol rorang vali ne, Ubu Ni sansinir ra tali lanit ratan rna'a. Ira ba'i vair ovu tamata Farisi ra.

Tamata Yahudi (Orang Yahudi): Tamata Yahudi ihin a ne, bangsa isa i Ubu nfili ma reluk yanan ra. Yahudi uburir-nusirira ra tali lalan nararira ra Abraham, Isak ovu Yakub. Yakub ini, Ubu nfanara ia ne Israel. Ba tamata Yahudi ovu tamata Israel wer isa watan. Lalan a tamata Yahudi rafena ma rorang Ubu, ba negara liak ra rala Yahudi ra rti rira negara ra ma reluk tamata sansinir te iria lesan (budak) verin ira. Wean i Paulus nti inba watan ma nrea Yahudi rira rahan falurut ra, na nti ralan ma nfamalik Ubu Ni Ivar Lolin verin ira.

Tamata Yahudi rira mela falurut (imam): Ira rfabana Yahudi rira agama. Tamata avyai sa'i rti wan i nmerat na'a rira Rahan Dawan Falurut ralan.

Tamta ovi ba'i rera babahir kulu (penagih pajak / pemungut cukai): Na'ut i Yesus nana'a lanit ivavan a, na tamata Yahudi boku rkarya verin fareta Roma ma rera babahir kulu. Tamata ovi ba'i rera babahir kulu rasdovuk munuk tamata rira kubang ra, ma rfaha afa verin Roma rira suldadu ra. Wean inyai bi, tamata Yahudi ra wol inar lahir ira. Ira ba'i rera ma nlia tali kubang ovi inovan ma rala, boma rira vali kubang avyai.

Terad a valid / terad a valid ovi rorang Yesus (Saudara-saudara seiman / saudara-saudara Kristen): Tamata ovi rtulis kitab ovu surat ovi rna'a Surat Ralan ba'i rpake faliak terad a valid, te terang a valing, na ihin a ne, terad a valid ovi rorang Yesus. Bisa tamata iki watan ntali dida tiniman a, te wol ntali dida tiniman a. Ubila'a (Tuhan Allah): Wean i rtulis Tuhan Allah na'a Surat Ralan na'a vai Mala, na ampake Ubila'a. Wean rtulis Allah Bapa (kita) na'a Surat Ralan, na ampake vali Yamadida Ubila'a.

Ubu (Allah): Wean i rtulis Allah na'a Surat Ralan na'a vai Mala (Theos na'a vai Yunani), na ampake Ubu.

Ubu nala Ni rala lolin (Kasih karunia / Anugerah): Ubu Ni silobang verin tamata ra ovu nlobang ira, wol ntali afa ovi rotu ra. Ia ka'i nala Ni rala lolin verin ita. Ia wol nala Ni rala lolin verin ita tevek afa lolin ovi totu ra, na'uk nala Ni rala lolin, tevek nfadoku roak na'a ralan ma ka'i notu. Msi'ik Kisah 15:11; Roma 3:24; 11:5-6; Efesus 2:8; 2 Timotius 1:9; Titus 3:5-7.

Ubu nfaturu Ni silobang / tamata nfaturu ni silobang (Belas kasihan): Ubu nfaturu Ni silobang verin tamata ovi rtuan susa. Ia ka'i nfili ma nfaturu Ni silobang yai.

Ubu Ni Fareta / Ubu nfareta tamata ra wean lahir Raja / Ubu Raja Ia ma nfareta tamata ra (Kerajaan Allah / kerajaan Surga): Ampake faliak itelu ini na'a Perjanjian Ngorva'an. Wean lahir i raja nfareta tamata ra ma rot-orang afa ovi nfalak ra, na Ubu nfareta tamata ovi rorang Ia na'a rira vava'at ra ovu ralarira ra. Ia nsi'ik ovu nwanar Ni tamata ra, ma nala afa ovi rperlu na'a rira vava'at ra. Na'ut i Yesus Kristus neluk tamata ma nma lanit ivavan a, na Ubu Ni Fareta nma vali tamata fruarira ra. Msi'ik Matius 4:17 ovu Lukas 17:20. Yesus nfamalik ne, Ubu nma roak ma nfareta tamata ra wean lahir Raja na'a lanit ivavan a, ba bisma rira vava'at isa ovu Ia. Msi'ik Lukas 4:43. Ubu Ni Fareta nana'a tamata ovi rtorung ne, Ia notu Raja verin ira, na'a wan inba watan. Na'ut i Yesus Kristus nma ewal lanit ivavan a, na veka nfareta munuk lanit ivavan a. Msi'ik Wahyu 11:15.

Ubu Ni Ivar Lolin (Kabar Baik / Injil): Ubu Ni Ivar Lolin nfalyawang ne, Ia nsikat tamata ovi rorang Yesus Kristus tali rira salasilan ra, ma rira vava'at kakiwal. Ivar Lolin yai nfalyawang vali Yesus Ni vava'at, afa ovi nair ra, Ni matmatan a ovu nva'at ewal tali matmatan. Msi'ik Lukas 24:46-49; Yohanes 3:16; Kisah 2:37-39; 1 Korintus 15:3-8.

Ubu Ni Roh (Roh Kudus / Roh Allah): Ubu i notu lanit ratan ovu lanit ivavan ini, Yanan a Yesus Kristus, ovu Ni Roh a, irtelu ini ikisa watan. Ita wol trea Ubu Ni Roh, na'uk nkarya na'a raladida ra, ovu Ni ngrebat notu ma tamata ra rorang Ubu. Rtulis roak na'a Surat Ralan ne, Ubu Ni Roh nala ngrebat verin Ni rasul ra, ovu tamata liak ovi rorang Yesus ma ti rfamalik Ni vaivatul ra na'a Yerusalem, propinsi Yudea munuk, ovu Samaria, ti naran lanit ivavan ni wahan a.

Ubu Ni sansinir ra tali lanit ratan (Malaikat): Ubu nsinir Ni sansinir ra ma rma lanit ivavan ini ma rlobang Ni tamata ra. Msi'ik Ibrani 1:14. Ubu Ni vaivatul ra (Firman Allah): Vaivatul ovi Ubu nala verin Ni nabi ra ovu rasul ra ma rtulis na'a Surat Ralan a. Ba Ubu Ni vaivatul ra ovu Ni Surat Ralan, irua wer isa watan.

Ubu nsikat tamata ra tali rira salasilan ra, ma rira vava'at kakiwal (Selamat / menyelematkan- secara rohani): Ubu notu linga'an ma tamata ra wol rmata kakiwal, tevek rira salasilan ra. Salasilan ra rotu ma tamata ra musti rtuan Ubu Ni inukun a ma rmata, na'uk Ubu nsikat tamata ovi rorang Yesus ma rira vava'at kakiwal. Bisma tfalak vali ne, Ubu nala vava'at ngorva'an verin tamata ovi rorang Yesus.

Ubu Yanan a (Anak Allah): Tamata Yahudi rera Yesus Kristus ne, Ubu Yanan a, boma lyawan ne, ralang ma dawan Ia, ovu Ia nma tali Ubu, ovu vali notu afa ovi Yaman ralan nfalak a.

Vaivatul kamkuma (Perumpamaan): Yesus nala vaivatul kamkuma ra ma al nair afa ovi penting verin tamata ra.

Vaivatul ovi tamata nrenar lahir tali Ubu ma ti nfamalik verin tamata ra / Vaivatul ovi Ubu nala verin Ni nabi ra (Nubuat)

Wan i tamata Yahudi ra ba'i rasnuri rira korban ra verin Ubu (Mezbah): Lalan ana, na'a Yahudi rira Rahan Dawan Falurut a, na ra'ang vatu ra. Na'a vatu avyai ratarira ra, na rasnuri afwatan ovi rfedan roak ma reluk rira korban verin Ubu. (Roma 11:3; Yakobus 2:21). Wan isa vali ma rasnuri rira aa i uman a voan lolin (mezbah pembakaran ukupan).

Yabi (Karunia-karunia yang diberikan Roh Kudus): Afa ovi Ubu Ni Roh nala verin tamata ovi rorang Yesus ma al rfangrebat rira sidovung ra.

Yahudi rira dawan ovi rair Musa ni inukun ra (Ahli-ahli Taurat): Tamata Yahudi rira tamata dawan ovi rfalyawang ovu rair Ubu Ni vaivatul ovi rna'a Perjanjian Mnanat verin tamata ra. Ira rfamalik ma rivun tali Musa ni kitab ilima. Rfaliak kitab avyai ne, Musa ni inukun ra (hukum Taurat).

Yahudi rira Mela Falurut Ila'a (Imam Besar / Imam Agung): Tamata Yahudi rira Mela Falurut Ila'a isa watan. Ia nfareta mela falurut ra munuk. Ia nfareta vali Yahudi rira sidovung dawan a, ma rfamalik rira agama ovu rira adat a. Ia sa'i nti ruang i nmerat rahi lia munuk ralan a, na'a tamata Yahudi rira Rahan Dawan Falurut a. Rahan Dawan Falurut yai ikisa watan, nana'a Yerusalem. Lokat varat ia nti fasa watan ruang yai, ma ntaha afwatan lararira ra tali Yahudi rira korban ra ma naflurut verin Ubu ma na'i vatuk rira salasilan ra.

Yahudi rira Rahan Dawan Falurut (Bait Allah, Bait Suci): Tamata Yahudi rira Rahan Dawan Falurut isa watan. Rahan Dawan Falurut yai nana'a Yerusalem. Yahudi ovi rna'a Israel ovu tali negara liak vali rtaha rira afamtahan ovu afwatan boku ma reluk rira persembahan ovu korban ra. Nata rala rira afa avyai verin Yahudi rira mela falurut ra. Mela falurut ra rasnuri tamata ra rira korban ra na'a ruang i nmerat urun na'a Rahan Dawan Falurut ralan a. Ruang isa vali nmerat rahi lia munuk na'a Rahan Dawan Falurut ralan. Yahudi rira Mela Falurut Ila'a sa'i nti wan yai ralan a, varat isa fasa watan. Tamata Roma rira suldadu ra rot-visal Rahan Dawan Falurut ini na'ut varat vutfitu (70) Masehi. Wol rotu afa ini obin, na Yesus nfamalik lan roak na'a Markus 13.

Yahudi rira rahan falurut (Rumah ibadat): Tamata Yahudi rira rahan falurut ra na'a lokat ahu, na'uk sasan watan. Yahudi ra rasdovu ira na'a rahan falurut avyai na'ut amar i ryari ira, ma raraning Ubu. Amar boku, na rair yanarira ra na'a rira rahan falurut ra.

Yahudi rira sidovung dawan (Mahkama agama): Tamata Yahudi rira dawan ra munuk (tamata vutfitu) rdoku na'a sidovung dawan ini. Yahudi rira Mela Falurut Ila'a nfareta sidovung ini. Ira rira ngrebat ma rfareta Yahudi rira agama, ba rfamalik tamata ovi wol rorang Musa ni inukun ra, ovu ira rira inukun ra, na'uk wol rfadok-nala ma tamata nmata. Fareta Roma rira dawan a'uk sa'i rfadoku ma tamata nmata.

Yusuf (Yusuf): Na'a Surat Ralan a, na tamata rivun nararira Yusuf:

1.Yusuf i yaman verin Yakub. Yusuf ovu a'an a warin ra, rala vutu rahin irua (Kejadian 37-50).

2. Yusuf i awan verin Maria. Yusuf ini yanan Yesus Kristus.

3. Yusuf ini, Yesus warin a. Ira irlima (Matius 13:55; Markus 6:3)

4. Yusuf ini Maria yanan ia, ovu norang Yesus (Matius 27:56; Markus 15:47).

5. Yusuf i ntali ahu Arimatea. Ia norang Yesus, ovu vali notu kida ovu dawan Yahudi ra. Ia nera Yesus tenan a tali Pontius Pilatus (Matius 27:57-60).

6. Yusuf Barsabas i norang Yesus. Ia ini veka rfili ia ma nkati Yudas Iskariot. Na'uk amar i rotu undi a, na Matias naran a nvotuk (Kisah 1:23).

7. Yusuf Barnabas i notu kida ovu Paulus ma irua rkarya (Kisah 4:36).