Yahudi rira dawan ra ranovak mane rfedan Yesus
1 Amar irua ewal,
beti tamata Yahudi rotu rira snoba Paskah,
ovu rotu rira snoba ma ra'an roti i wol rfadoku ragi na'a.
Yahudi rira dawan mela falurut ra ovu rira dawan ovi rair Musa ni inukun ra rdava linga'an mane rtaha fanfonak Yesus ma rfedan Ia.*
2 Ira rfalak ne,
“Na'ut i snoba nbana obin,
na deka tataha Ia,
beta ne tamata rivun vangoa-vanga.”
Vata isa nli'i ngul i voan lolin na'a Yesus ulun
3 Yesus ndoku Simon ni rahan na'a ahu Betania.
Simon ini lan a ni suhut ngabaa.
Yesus ndoku nafna'an,
na vata isa nma ma ntuan Ia.
Vata yai ntaha botal ko'u isa i rotu tali vatu lolin isa naran pualam.
Botal yai nsa'a ngul i voan a lolin urun ovu fyawan urun,
naran narwastu.
Ba nfefar botal yai relan a,
ma nli'i ngul yai na'a Yesus ulun.*
4 Tamata ovi rna'a inyai boku rangrova ma rsifalak afa verin ira ne,
“Notu afakinimi nawahak watan ngul i voan lolin yai?
5 Ngul yai fyawan urun,
ba bisma tfedi,
na fyawan a dinar ratut itelu teran,
ma tala kubang a verin tamata kasian ra.”
* Ba rfasala ma dawan vata yai.
6 Na'uk Yesus nfalak ne,
“Deka fyalak teri ia!
Afakinimi fyasala ia?
Afa i notu verin Ya'a lolin urun.
7 Tamata kasian ra rna'a lalawatan ovu mia,
ba na'ut inba watan bisma mlyobang ira.
Na'uk Ya'a wol mane una'a lalawatan ovu mia.
8 Vata ini not-nala roak afa ovi bis notu verin Ya'a.
Wol naran amar i umata obin,
na ia nli'i lan roak ngul voan lolin a na'a tenang a.
9 Afa i ufalak verin mia ini,
kena urun!
Na'a wan inba watan rfamalik Ubu Ni Ivar Lolin na'a lanit ivavan a,
na veka rfamalik vali afa i vata ini notu roak a,
ma al rangnanang ia.”
Yudas ntorung ma nfedi Yesus
10 Tamata isa tali Yesus Ni tamata vutu rahin irua ovi rorang Ia,
naran Yudas Iskariot.
Ia ti ntuan Yahudi rira dawan mela falurut ra,
boma nfedi Yesus verin ira.
11 Rarenar afa i Yudas nfalak yai,
na inar urun,
ba rtorung ma veka rala kubang verin ia.
Ba ndava amar kena mane nfedi Yesus.
Yesus nafna'an ovu Ni tamata ovi rorang Ia al rotu rira snoba Paskah, ma rangnanang amar i uburir-nusirira ra rdir-talik Mesir
12 Na'a amar i nban-ulu na'a tamata Yahudi rira snoba ma ra'an roti wol rfadoku ragi na'a,
na tamata ra rfedan domba Paskah ra.
* Yesus Ni tamata ra rorat Ia ne,
“Bapa,
inam ma amati ma amasusan dida fana'an Paskah na'a inba?”
13 Ba Yesus nsinir Ni tamata irua tali ovi rorang Ia,
ma nfalak verin ira ne,
“Miti kota ralan,
na veka mtyuan brana isa ntaha suran isa nsa'a roak wear,
ba byan-orang ia.*
14 Ti myaran rahan i veka nwelat yai,
na fyalak verin rahan duan yai ne,
‘Tuan Guru norat ne:
Wan i misusan roak ma veka ufna'an Paskah ovu Ning tamata ovi rorang Ya'a,
na'a inba?’
15 Rahan duan yai veka nfaturu verin mia kamar dawan i nana'a ratan a,
na'a ni rahan yai.
Ira rasusan munuk roak kamar yai,
ba mia musti misusan watan afamtahan Paskah verin ita.”
16 Yesus nfalak munuk wean inyai,
beti irua rti kota yai.
Ira rti ma rtuan munuk afa avyai wean lahir i Yesus nfalak roak a.
Nata rasusan afamtahan Paskah yai.
17 Ti ma ovan roak,
na Yesus nma ovu Ni tamata vutu rahin irua.
18 Rdoku rafna'an obin,
na Yesus nfalak ne,
“Afa i ufalak verin mia ini,
kena urun!
Tali ovi tafna'an ini,
na tamata isa veka nfedi Ya'a.”*
19 Rarenar munuk afa i Yesus nfalak yai,
na ralarira lalau urun.
Ba rsikati ira al rfalak verin Yesus ne,
“Duila'a,
ya'a wahal!”
20 Yesus nfalak ne,
“Tamata isa tali mia vutu rahin irua ini mane nfedi Ya'a.
Tamata yai amrua amsovu roti na'a moko isa.
21 Ya'a,
Tamata Yanan Ya'a,
veka umata wean i rfalak roak na'a Ubu Ni Surat Ralan a.
Na'uk sian urun i lahir verin tamata i nfedi Ya'a!
Ni lolin a,
tamata yai deka rarali lahir ia!”
Yesus nafna'an ovu Ni tamata vutu rahin irua ovi rorang Ia
22 Yesus ovu Ni tamata ra rafna'an obin,
na nala roti a ma nfalak fara weninyai verin Ubu,
beti nvisul roti yai ma nsiduk verin ira.
Ia nfalak ne,
“Myala ma mian kikyai,
ini Ya'a tenang a.”
23 Nata Yesus nala vali kobi i nsa'a anggur a ma nfalak fara weninyai verin Ubu,
beti nala ma irmunuk renu tali kobi yai.
24 Ia nfalak verin ira ne,
“Ini Ya'a larang i nvoat verin tamata rivun ma neluk faneak ne,
Ubu nfakena roak Ni tnorung a.*
25 Afa i ufalak verin mia,
kena urun!
Ya'a veka wol enu roak anggur ini,
ti naran amar i veka enu ewal anggur ngorva'an na'a Ubu Ni Fareta.”
26 Ira rdedang ma rfadawang roak Ubu,
beti rarata vuar Zaitun.
Yesus nfalak ne, Petrus veka nalak ia ne wol nka'a Ia
27 Yesus nfalak verin ira ne,
“Bira inorang a veka wol nangrebat ma mifla talik Ya'a,
tevek rtulis roak na'a Surat Ralan ne,
‘Ya'a veka ufedan domba duan a,
ba domba ra veka rlilin watan.’*
28 Na'uk Ubu veka nfava'at ewal Ya'a tali matmatan,
ba veka ula Ya'a uti Galilea.”
29 Petrus nfalak verin Yesus ne,
“Velik ne ira munuk rira inorang wol nangrebat ma rafla talik Oa,
na'uk ya'a wahal.”
30 Ba Yesus nfalak verin ia ne,
“Afa i ufalak verin oa ini,
kena urun!
Ovan ini lahir,
manut wol nkukuwai farua obin,
na veka malak nala fatelu roak ne,
wol mka'a Ya'a.”
31 Na'uk Petrus nfangrebat ralan a,
ma nfalak ewal verin Yesus ne,
“Velik ne musti umata vali ovu Oa,
na'uk wol alak ya'a ne,
wol uka'a Oa.”
Yesus Ni tamata liak ra munuk rfalak vali wean i nfalak a.
Yesus naflurut na'a Getsemani
32 Yesus ovu Ni tamata ovi rorang Ia rbana ma raran va'i isa naran Getsemani.
Ia nfalak verin ira ne,
“Mdyoku ini ma ti uflurut veki.”
33 Ba Yesus ti naflurut,
na novun vali Petrus,
Yakobus,
ovu Yohanes.
Yesus ralan lalau urun Ia ovu wol malinan.
34 Ba nfalak verin ira ne,
“Ralang a lalau urun i lahir,
wean i ufarnuang ne,
mane umata roak.
Mnya'a ini veki ovu msyi'ik wabira ma lolin!”
35 Yesus nbana ma ya'i nfaroa kedan tali ira,
beti nsangatur na'a lanun ma naflurut.
Ia nera verin Ubu ma fara ntorung ma susa i dawan urun deka nkena Ia.
36 Ia nfalak ne,
“Bapa,
o Bapa!
* Oa mot-nala akataka munuk,
ba fara fwaroa susa i dawan urun ini tali Ya'a.
Na'uk deka wean i ralang nfalak a,
ba wean watan i ralam nfalak a.”
Yesus naflurut na'a va'i Zaitun isa naran Getsemani (Markus 14:35)
37 Naflurut munuk ma newal Ia,
na Ni tamata itelu i rfatuang Ia yai rtub-lufa roak.
Ba Yesus nfalak verin Simon Petrus ne,
“Simon,
afakinimi mtub-lufa i?
Wol mtahang nala jam isa vali ma msi'ik wam ma lolin.
38 Msyi'ik wabira ma lolin ovu miflurut,
boma nitdawan deka nlabir nala mia ma myotu salasilan.
Ralabira rfalak ma myotu afa lolin,
na'uk wol myot-nala,
tevek tenabira ra rmafun.”
39 Nata Yesus nti ewal vali ma naflurut,
ma nfalak wean i inlangin nfalak roak a.
40 Ti ma naflurut munuk ma newal Ia,
na ira rtub-ewal,
tevek matarira ra raswosu da'in roak,
ovu wol rka'a ne,
mane rfalak aka verin Yesus.
41 Yesus newal fatelu Ia roak,
ba nfalak verin ira ne,
“Afakinimi mtyuba watan obin?
Naran roak ni amar,
ba deka mtyuba kikyai!
Tevek tamata ovi mane rtaha Ya'a,
Tamata Yanan Ya'a,
rma roak.
Ira mane rovun Ya'a ti verin tamata salasilan ra.
42 Byatar ma tati kikyai.
Eka msyi'ik!
Tamata i mane nfedi Ya'a nma ma sarseri roak!”
Yahudi ra rtaha Yesus
43 Na'ut i Yesus nangrihi obin,
na brian munuk Yudas i ntali Ni tamata vutu rahin irua yai nma.
Tamata rivun ovi rtaha nahin blawat ovu rira navnaval ra rban-orang vali ia.
Yahudi rira dawan mela falurut ra ovu rira dawan ovi rair Ubu Ni inukun ra,
ntafal vali dawan Yahudi liak ra rsinir ira ma rti inyai.
44 Yudas i nfedi Yesus nfalak lan roak verin tamata rivun avyai ne,
veka notu faneak.
Faneak yai wean ini:
“Tamata i uvoan Ia yai,
Ia hi inyai i.
Ba mtyaha lahir Ia ma myovun Ia ovu msyi'ik ma lolin Ia.”
45 Ba ti nfaseri lahir Yesus ma nfalak verin Ia ne,
“Oo Tuan Guru.”
Nata nvoan Ia.
46 Ba tamata avyai rti rtaha lahir Yesus.
47 Na'uk tamata isa i ndiri wan yai ntavar ni nahin blawat,
ma nafat vatuk Yahudi rira Mela Falurut Ila'a ni tamata sansinir arun a.
48 Ba Yesus nfalak verin ira ne,
“Mia beta myarin ne,
Ya'a ini wean tamata ktufan i nwi-nwa tamata ra ma nbori rira metan ra,
bi mya mtyaha nahin blawat ovu navnaval ra ma mtyaha Ya'a?
49 Lokat amar,
na itmunuk tna'a dida Rahan Dawan Falurut ma usiair,
na wol mtyaha Ya'a.
Na'uk wean urun ini,
boma nfakena lahir afa ovi rtulis roak na'a Surat Ralan a.”
50 Nata Ni tamata ra munuk rafla talik Ia.
51 Varverun isa norang Yesus ovu neluk watan maloli etal isa al nteri tenan a.
Ba ti mane rtaha ia,
52 na'uk nafla,
ba raravut vatuk ni maloli etal yai ma nafla faluhu ia watan.
Yahudi rira dawan ovi rdoku na'a rira sidovung dawan rorat Yesus ma al rdava Ni sala
53 Tamata ovi beti rtaha Yesus rovun Ia rti Yahudi rira Mela Falurut Ila'a ni rahan a.
Na'a inyai,
na Yahudi rira dawan mela falurut ra ovu dawan Yahudi ra ntafal vali Yahudi rira dawan ovi rair Ubu Ni inukun ra munuk rasdovu ira.
54 Petrus nban-orang Yesus tali raroa watan,
ma ti naran Mela Falurut Ila'a ni lean a.
Nana'a inyai,
na ia ndoku ma nafraran ovu tamata ovi rwanar Yahudi rira Rahan Dawan Falurut.
55 Dawan Mela Falurut ra ovu dawan fareta Yahudi ovi rdoku na'a rira sidovung dawan rkiwal mane rka'a Yesus Ni sala ra,
boma rukun Ia ma nmata.
Na'uk wol rtuan Ni sala isa vali,
56 tevek tamata rivun ovi rfalak sian Yesus rsiklabir watan.
Afa ovi rfalak ra rfarsangal tia ma watan,
ba rira afa ovi rfalak ra wol wer isa.
57 Nata tamata boku rdiri ma rsiklabir ma al rfasala Yesus.
58 Ira rfalak ne,
“Ami amrenar,
na Ia nfalak ne,
‘Ya'a veka a'ar vatuk dida Rahan Dawan Falurut i tamata ra rotu ini,
ma na'a amar itelu watan,
na ufadiri liak ewal,
na'uk tamata ra wol rotu.’ ”
59 Na'uk afa ovi rfalak ra rfarsangal tia ma watan,
ba rira afa ovi rfalak ra wol wer isa.
Yesus ndiri Yahudi rira Mela Falurut Ila'a wahan ralan a (Markus 14:60)
60 Ba Mela Falurut Ila'a ndiri waharira ralan ra,
ma norat Yesus ne,
“Notu afakinimi wol mlotar tenam a,
ma fwalak na'a afa ovi tamata avyai rfalak a?”
61 Na'uk Yesus wol vain ovu Ia wol nvalat akataka.
Ba Mela Falurut Ila'a yai norat ewal Ia ne,
“Oa ini Raja i veka mtevut tamata ra rira salasilan ra?
Ubu i tamata raraning a,
Yanan Oa?”
62 Yesus ntorung ma nfalak ne,
“Kena lahir,
ini Ya'a.
Mia veka msyi'ik Ya'a,
Tamata Yanan Ya'a ini,
udoku Ubu i nfareta munuk afakataka Ni lihir mela,
ovu veka utali lanit ma una'a mutan ra uma.”
63-64 Ba Mela Falurut Ila'a nangrova urun ma nkamadir ni ravit blawat a ma nfalak ne,
“Mia ka'i mryenar Ia nfalak sian Ubu,
tevek nfalak ne,
Ia wean lahir Ubu.
Wol tperlu ma tdava tamata liak roak ma rfalak ni sala ra.
Ba minovak wean inba?”
Ira ralar isa ma rfadoku ne,
Ia musti nmata.
65 Ba tamata boku rafnit Yesus,
ovu rkeak teri matan a.
Ira raskevu tia ma watan Ia,
beti rorat Ia ne,
“Nabi Oa,
ba eka fwalak ne,
inlangin a iki naskevu Oa!”
Nata tamata ovi rwanar Rahan Dawan Falurut a rovun Yesus rti ma rvaval Ia.
Petrus nalak nala fatelu ia ne wol nka'a Yesus
66 Amar yai,
na Petrus nana'a lean obin.
Mela Falurut Ila'a ni vata sansinir isa nma wan yai.
67 Ti ma nrea Petrus nafraran na'a yafu,
na nsi'ik ma lolin wahan a,
ma nfalak ne,
“Oa ba'i morang vali Yesus,
tamata Nazaret eri.”
68 Na'uk Petrus nalak watan ia,
ma nfalak ne,
“Ya'a wol uka'a afa i fwalak yai.”
Ba ti naran tembok dawan ni falfolat ngoran a,
na manut isa nkukuwai vali.
Petrus nalak ia ne, wol nka'a Yesus (Markus 14:68)
69 Vata sansinir yai nrea ewal ia ma nfalak verin tamata ovi rna'a inyai ne,
“Tamata yai norang vali Yesus!”
70 Na'uk Petrus nalak ewal vali ia.
Ba wol mnanat,
na tamata ovi rafraran na'a yafu yai rfalak ewal verin Petrus ne,
“Amka'a lahir ne,
oa morang vali Ia,
tevek mtali Galilea vali!”
71 Ba Petrus nalak matmatan watan ia,
ma ka'i nafwaba tenan a ma nfalak ne,
“Ya'a wol uka'a tamata i fyalak yai!”
72 Brian munuk,
na manut nkukuwai ewal.
Ba Petrus nangnanang nal-ewal vaivatul ovi Yesus nfalak lan roak verin ia ne,
“Manut wol nkukuwai farua obin,
na oa veka malak nala fatelu roak ne,
wol mka'a Ya'a.”
Ba Petrus nvakar ma na'a samsekur.