Yahudi rira Rahan Dawan Falurut veka nama'ar
1 Na'ut i Yesus mane nban-talik Yahudi rira Rahan Dawan Falurut a,
na Ni tamata isa tali ovi rorang Ia nfalak ne,
“Tuan Guru,
Rahan Dawan Falurut ovu rahan ovi rdir-ebang Rahan Dawan Falurut felarira lolin buas!
Eka msi'ik lahir vatu dawan ovi rotu na'a rahan averi!”
2 Yesus nfalak verin ia ne,
“Oa msi'ik roak rahan averi lolin buas.
Ni amar veka nma ma vatu ovi rotu na'a rahan averi veka rama'ar munuk,
ma wol teran vatu isa vali na'a wan a.”
Yesus nfamalik afa ovi veka rma, beti lanit ivavan namwear
3 Yesus ovu Ni tamata ovi rorang Ia rti vuar Zaitun,
na ndoku ma wahan nti Yahudi rira Rahan Dawan Falurut a.
Ba Petrus,
Yakobus,
Yohanes,
ovu vali Andreas rti ma rorat aling afa tali Ia.
4 Rorat Ia ne,
“Bapa,
amera ma fwalak verin ami ne,
na'ut inba na afa ovi beti fwalak yai veka rvotuk?
Faneak aka veka nvotuk ma nfaturu ne,
afa avyai munuk veka rvotuk?”
5 Ba Yesus nfalak verin ira ne,
“Msyi'ik wabira ma lolin,
boma tamata ra deka rlabir nala mia!
6 Tamata rivun veka rma ma rala narang a,
ma lokat ira ka'i rfalak ne,
‘Ya'a Raja i ntevut bira salasilan ra.’
Ira veka rlabir nala tamata rivun.
7 Na'ut i mryenar tamata ra rotu rihi,
ovu ivar ne rihi ra rvotuk,
na deka byobar.
Afa avyai munuk musti rvotuk lan veki,
na'uk lanit ivavan a wol namwear obin.
8 Bangsa isa veka notu rihi ovu bangsa liak.
Fareta dawan isa veka notu rihi ovu fareta dawan liak.
Na'a lanit ivavan a,
na veka ruru ovu lafar dawan na'a wan rivun.
Afa avyai munuk reluk faneak ne,
susa ra beti rvotuk.
Wawa'uk ovi na'a amar avyai wean wawa'uk i vata ovi mane rarali ira rfarnuang a.
9 Na'uk msyi'ik wabira ma lolin!
Tamata ovi rangal mia veka rtaha mia ma rovun mia ti verin tamata dawan ovi rfaleka inukun verin tamata ra,
ma rvaval mia na'a rahan falurut ra.
Ira veka rala mia ma ti mdyiri raja ra ovu dawan fareta waharira ralan ra,
tevek myorang Ya'a.
Na'ut inyai vali,
na mia veka fyamalik Ya'a verin ira.
10 Tamata ovi rorang Ya'a veka rfamalik lan Ubu Ni Ivar Lolin verin tamata ra munuk.
11 Wean i rtaha mia ti verin tamata ovi rukun tamata ra,
na deka ralabira ra kako'u ma mingrihi nulu ira.
Ba ti naran ni amar a,
na fyalak watan afa ovi Ubu veka nfadoku na'a ralabira ra,
tevek afa ovi fyalak ra wol rtali mia,
na'uk rtali Ubu Ni Roh.
12 Na'ut inyai,
na tamata ra veka rsifedi-sikual ira.
Ira veka rfedi a'arir-waririra ra ma tamata ra rfedan ira.
Brana ra rotu vali wean inyai,
ma veka rfedi yanarira ra,
ovu vali tamata yanarira ra veka rangal renarir-yamarira ra ma rala ira ti verin tamata ra ma rfedan ira.
13 Tamata ra munuk veka wol inar lahir mia,
tevek myorang Ya'a.
Na'uk tamata ovi rorang Ya'a ovu ralarira urun ma ti naran i rmata,
na veka rira vava'at kakiwal.”
Yesus nfamalik verin Ni tamata ra na'a amar ovi veka rma, ma tamata ra veka rtuan sian i dawan urun
14 “Ni amar veka nma ma msyi'ik afa isa i sian urun ndiri wan isa i wol inovan ma nana'a,
ma nfangra ia (Mia tamata ovi byas ini,
eka msyi'ik ma lolin,
boma fyan-aran vaivatul ovi).
Tamata ovi rna'a Propinsi Yudea musti rafla talik wan yai ma rti vuar ra.*
15 Tamata ovi ryari ira na'a rira rahan ratan ra,
deka rsuta ma rala rira afa ovi rna'a rira rahan ralan.*
16 Tamata ovi rkarya na'a rira va'i ra deka rewal ira rma rira rahan ra ma rala rira kadaravit ra.
17 Na'ut inyai,
na sian urun i lahir verin vata ovi rbarlewan ra ovu vata ovi rsusu kasiko'u yanat ra.
18 Miflurut verin Ubu,
boma deka mtyuan afa avyai na'ut i da'ut ovu radridin a.
19 Amar ovi veka rma yai,
na tamata ra veka rtuan susa dawan urun.
Tali amar i Ubu beti notu lanit ivavan a,
ma naran amar ini,
na tamata ra wol rtuan susa i wean inyai obin.
Tamata ra veka wol rtuan roak susa i wean inyai.
20 Wean i Duila'a wol nfaketa amar avyai,
na veka wol tamata isa nva'at vali.
Na'uk Duila'a nlobang Ni tamata ovi nfili ra,
ba veka nfaketa amar avyai.
21 Na'ut inyai,
na wean i tamata ra rfalak verin mia ne,
‘Eka msyi'ik,
Raja i ntevut dida salasilan ra nma roak ma nana'a ini te nana'a ineri!’
na'uk deka myorang ira.
22 Tevek na'ut inyai,
na tamata boku veka rsiklabir ma rfalak ne,
ira Raja i ntevut bira salasilan ra,
ovu rfalak vali ne,
nabi ira.
Ira veka rotu faneak ovi wol tfikir aran ra,
ovu mujizat ra ma rlabir tamata ra,
boma tamata ra ranovak ne,
rira ngrebat a ntali Ubu.
Ba wean i bisma rlabir nala vali tamata ovi nfili ra,
na veka rlabir ira.
23 Ba msyi'ik wabira ma lolin!
Ufalak lan roak afa avyai munuk verin mia.”
Tamata Yanan veka nma ewal
24 “Na'ut inyai,
na susa dawan avyai rlia roak,
na lera veka wol vanan ovu vulan wol nyeba vali.
25 Nara ra veka rleka tali lanit rsuta.
Ngrebat ovi rna'a lanit veka rarwa'ung ma rasmoang tia ma watan ira.*
26 Na'ut inyai,
na tamata ra veka rsi'ik Ya'a,
Tamata Yanan Ya'a ini,
una'a mutan ra uma ovu Ning ngrebat dawan a,
ovu vali vanang i nfitik nyadat.
27 Ya'a veka ufareta Ning sansinir ra tali lanit ratan ma rti rasdovu tamata ovi Ubu nfili roak ira ma rorang Ya'a.
Tamata ovi Ubu nfili ra rtali munuk tamata ovi rna'a lanit ivavan;
boku rtali varat,
timur,
marmar,
ovu vali tranan,
ma ti naran lanit ni wahan a.”
28 “Eka myair tali aa i rfanara ia ne ara.
Wean i anan ra raftuvul ewal ma rafroang,
na inyai neluk faneak verin mia ne,
lera dawan sarseri roak.*
29 Wean i mryea roak afa avyai,
na veka mkya'a lahir ne,
sarseri roak ma uma ewal.
30 Afa i ufalak verin mia ini,
kena urun!
Tamata ovi rva'at fiang ini veka wol rmata munuk obin,
na afa avyai munuk rvotuk roak.
31 Lanit ovu afa ovi rna'a lanit ivavan veka ramwear,
na'uk Ning vaivatul ra rna'a kakiwal watan.”
Ita musti tsi'ik wadida ma lolin, tevek wol tka'a ne, lafira ki Yesus nma ewal
32 “Wol tamata isa vali nka'a ne,
lafira ki amar i ufalak yai nma.
Ubu Ni sansinir ovi rtali lanit ratan wol rka'a.
Ya'a Ubu Yanan ini wol uka'a vali.
Yamang a'uk sa'i nka'a.
33 Ba msyi'ik wabira ma lolin,
tevek wol mkya'a ne,
veka ewal Ya'a na'ut inba.
34 Ya'a veka uma ewal,
wean tamata i nti talik ni rahan ma nobal.
Wol nti obin,
na nasdovu ni tamata sansinir ra ma nala karya lokat ira ma rasusan ni rahan.
Ia nfalak verin ni tamata sansinir i nwanar falfolat ngoran a ma nsi'ik ma lolin wan yai.
35 Ba wean inyai,
na msyi'ik wabira ma lolin,
tevek mia wol mkya'a ne,
rahan duan yai lafira ki newal ia.
Wol mkya'a ne,
nma na'ut i lera nakduvul ma laflofan roak,
te nafafruan tenan,
te manut ra vair,
te varverak sumatan.
36 Wean i brian munuk,
na ewal Ya'a ma utuan mia,
na deka mtyub-lia.
37 Afa ovi ufalak verin mia ini,
ufalak vali verin tamata ra munuk ne:
msyi'ik wabira ma lolin!”