Yahudi rira Rahan Dawan Falurut veka nama'ar
1 Ti ma Yesus nban-talik Yahudi rira Rahan Dawan Falurut yai ma wol ka'i raroa obin,
na Ni tamata ovi rorang Ia rma ma rebang Ia,
beti rfaturu Rahan Dawan Falurut ovu rahan ovi rdir-ebang Rahan Dawan Falurut.
2 Yesus nfalak verin ira ne,
“Mia msyi'ik roak ne,
rahan averi felar lolin urun?
Afa i ufalak verin mia ini,
kena urun!
Ni amar veka nma,
ma vatu ovi rotu na'a rahan averi veka rama'ar munuk,
ma wol teran vatu isa vali na'a wan a.”
Yahudi rira Rahan Dawan Falurut (Matius 24:1)
Tamata ra veka rtuan sian dawan ila'a
3 Yesus ti ma ndoku vuar Zaitun a,
na Ni tamata ovi rorang Ia rti ma rorat aling afa tali Ia.
Ira rorat Ia ne,
“Bapa,
amera ma fwalak verin ami ne,
na'ut inba na afa ovi beti fwalak yai veka rvotuk?
Faneak aka veka nvotuk ma nfaturu ne,
mane mwa ewal?
Faneak aka vali veka nvotuk ma nfaturu ne,
lanit ivavan a mane namwear?”
4 Ba Yesus nfalak verin ira ne,
“Msyi'ik wabira ma lolin,
boma tamata ra deka rlabir nala mia!
5 Ufalak wean inyai,
tevek tamata rivun veka rma ma rala narang a,
ma lokat ira ka'i rfalak ne,
‘Ya'a Raja i ntevut bira salasilan ra.’
Ira veka rlabir nala tamata rivun.
6 Mia veka mryenar ne,
tamata ra rotu rihi,
ovu ivar ne,
rihi ra rvotuk,
na'uk deka byobar.
Afa avyai veka rma urun,
na'uk lanit ivavan a wol namwear obin.
7 Bangsa isa veka notu rihi ovu bangsa liak.
Fareta dawan isa veka notu rihi ovu fareta dawan liak.
Na'a lanit ivavan a,
na veka ruru ovu lafar dawan na'a wan rivun.
8 Na'uk afa avyai munuk reluk faneak ne,
susa ra beti rvotuk.
Wawa'uk ovi na'a amar avyai wean wawa'uk i vata ovi mane rarali ira rfarnuang a.
9 Na'ut inyai,
na tamata ovi rangal mia veka rtaha mia ti verin tamata ovi veka rwi-rwa mia ma rotu sian mia,
ovu veka rfedan mia.
Tamata ra tali inba watan na'a lanit ivavan a veka wol inar lahir mia,
tevek myorang Ya'a.
10 Na'ut inyai,
na tamata rivun vali veka rafla talik lahir rira inorang a,
ma rotu a'uk afa ovi sian ra.
Ira veka rsifedi-sikual ira,
ovu vali isa wol inan lahir isa.
11 Tamata rivun veka rma ma rsiklabir ma rfalak ne,
nabi ira.
Ira veka rlabir tia ma watan tamata ra ma rorang ira.
12 Afa sian ovi tamata ra rotu veka ntafal ma dawan,
ma tamata rivun veka wol rsilobang roak ira.
13 Na'uk tamata ovi rorang Ya'a ti naran amar i rmata,
na Ubu veka nsikat ira tali rira salasilan ra,
ma rira vava'at kakiwal.
14 Tamata ovi rorang Ya'a veka rfamalik Ubu Ni Ivar Lolin i nfalak ne,
Ubu veka nfareta tamata ra wean lahir Raja.
Ira veka rfamalik Ivar yai verin bangsa ra munuk,
beti lanit ivavan a namwear.”
Afa ovi sian urun ra ovu nabi siklabir ra veka rvotuk
15 “Lan a,
na nabi Daniel nfamalik ne,
mia veka msyi'ik afa isa i sian urun ndiri wan i nmerat urun na'a Ubu Ni Rahan Dawan Falurut ralan a,
ma nfangra ia.
Mia tamata ovi byas ini,
eka msyi'ik ma lolin,
boma fyan-aran ni vaivatul ra.*
16 Amar yai,
na tamata ovi rna'a propinsi Yudea musti rafla talik wan yai ma rti vuar ra.
17 Tamata ovi ryari ira na'a rira rahan ratan ra*,
deka rsuta ma rala rira afa ovi rna'a rira rahan ralan.
18 Tamata ovi rkarya na'a rira va'i ra deka rewal ira rma rira rahan ra ma rala rira kadaravit ra.
19 Na'ut inyai,
na veka sian urun i lahir verin vata ovi rbarlewan ra ovu ovi rsusu kasiko'u yanat ra.
20 Miflurut verin Ubu,
boma na'a amar i mifla yai,
na deka na'ut i da'ut ovu radridin,
te na'a amar i tyari ita.
21 Amar ovi veka rma yai,
na tamata ra veka rtuan susa dawan ila'a.
Tali amar i Ubu notu lanit ivavan a ti naran amar ini,
na tamata ra wol rtuan susa i wean inyai obin.
Susa i wean inyai,
tamata veka wol rtuan roak.
22 Wean i Ubu wol nfaketa amar avyai,
na veka wol tamata isa nva'at vali.
Na'uk Ubu nlobang Ni tamata ovi nfili ra,
ba veka nfaketa amar avyai.
23 Na'ut inyai,
na wean i tamata ra rfalak verin mia ne,
‘Eka msyi'ik.
Raja i ntevut dida salasilan ra nma roak,
ma nana'a ini te nana'a ineri,’
na'uk deka myorang ira!
24 Tevek na'ut inyai,
na tamata boku veka rsiklabir ma rfalak ne,
ira Raja i ntevut bira salasilan ra,
ovu rfalak vali ne,
nabi ira.
Ira veka rotu faneak ovi wol tfikir aran ra,
ovu mujizat ra ma rlabir tamata ra,
boma tamata ranovak ne,
rira ngrebat a ntali Ubu.
Wean i rot-nala afa avyai,
na ira veka rlabir nala vali tamata ovi Ubu nfili ra.
25 Ba msyi'ik wabira ma lolin!
Velik ne wol naran ni amar obin,
na'uk ufalak lan roak verin mia,
boma tamata ra wol rlabir nala mia.
26 Wean i tamata ra rfalak verin mia ne,
‘Eka msyi'ik Kristus nana'a wan lean vu dawan eri.’
Te rfalak ne,
‘Ia nana'a rahan ralan eri,’
na deka myorang afa avyai.
27 Tevek fitik nfitik tali lihir timur ma nyelar nti lihir varat,
ba Ya'a,
Tamata Yanan Ya'a,
veka uma ewal lanit ivavan ini wean vali inyai,
ma tamata ra munuk rsi'ik.
28 Wean i msyi'ik ne,
manut nangan dawan ovi ba'i ra'an afa matmatan ra rasdovu ira,
na tka'a vali ne,
afa matmatan nana'a inyai.
Inyai neluk faneak roak ne,
Ya'a veka uma ewal.”*
Tamata Yanan veka nma ewal
29 “Na'ut i susa dawan avyai rlia roak,
na amar yai lahir lera a veka wol vanan,
vulan wol nyeba,
ovu vali nara ra veka rleka tali lanit rsuta.
Afa ovi rira ngrebat ra na'a lanit veka rarwa'ung ma rasmoang tia ma watan ira.*
30 Na'ut inyai,
na faneak veka nvotuk na'a lanit ma nfaturu ne,
Ya'a,
Tamata Yanan Ya'a ini,
veka uma ewal.
Tamata ra munuk na'a lanit ivavan ini veka rvakar ma rfaktanit,
tevek rsi'ik Ya'a,
Tamata Yanan Ya'a,
una'a mutan ratan ra uma ovu Ning ngrebat dawan a,
ovu vali vanang a nfitik nyadat.
31 Ba Ubu veka nafraik tvuri ma ngoan dawan ila'a ovu ufareta Ning sansinir ra tali lanit ratan ma rti rasdovu tamata ovi Ubu nfili roak ma rorang Ya'a,
tali inba watan na'a lanit ivavan.
32 Eka myair tali aa i rfanara ia ne,
ara.
Wean i anan ra raftuvul ewal ma rafroang,
na inyai neluk faneak verin mia ne,
lera dawan sarseri roak.
33 Wean i mryea munuk roak afa ovi ufalak avyai,
na veka mkya'a lahir ne,
sarseri roak ma uma ewal.
34 Afa i ufalak verin mia ini,
kena urun!
Tamata ovi rva'at fiang ini veka wol rmata munuk obin,
na afa avyai munuk rvotuk roak.
35 Lanit ovu afa ovi rna'a lanit ivavan a veka ramwear,
na'uk Ning vaivatul ra rna'a kakiwal watan.”
Ita musti tsi'ik wadida ma lolin, tevek wol tka'a ne, lafira ki Yesus nma ewal
36 “Wol tamata isa nka'a ne,
lafira ki amar i ufalak yai nma.
Ubu Ni sansinir ra na'a lanit ratan wol rka'a vali.
Ubu Yanan Ya'a ini wol uka'a vali.
Yamang a'uk sa'i nka'a.
37 Amar i Ya'a,
Tamata Yanan a,
veka uma,
na tamata ra veka wean lahir na'ut i Nuh nva'at a.
38 Na'ut i wear dawan wol nma obin,
na tamata ra rafna'an-rafnenu,
ovu rsifa wean watan wean a,
ti naran amar i wear dawan nma ma Nuh nrata ni kabal a.
39 Ira wol rka'a ne,
wear dawan mane nma ma nfedan munuk ira.
Ya'a,
Tamata Yanan Ya'a,
veka uma wean vali inyai,
ma ufabriang tamata ra munuk.
40 Na'ut inyai,
na wean i tamata irua rkarya na'a va'i,
na Ubu veka nala isa,
na'uk isa nana'a watan.
41 Wean i vata irua rbutar slaru na'a batu putar,
na Ubu veka nala isa,
na'uk isa nana'a watan.
42 Ba wean inyai,
na msyi'ik wabira ma lolin,
tevek wol mkya'a ne,
lafira ki bira Duila'a nma.
43 Mingnanang afa ovi ufalak ini!
Wean i rahan duan nka'a ne,
ovan jam ifira,
na tamata barborin veka nma ni rahan,
na ia veka nsi'ik ma lolin ni rahan a,
boma deka nti ni rahan ralan.
44 Ba wean inyai bi lokat amar,
na mia musti msyi'ik wabira ma lolin,
tevek Ya'a,
Tamata Yanan Ya'a,
veka uma na'ut i wol mkya'a.”
Vaivatul kamkuma na'a tamata sansinir i nbosa a ovu tamata sansinir i iva'un a
45 “Wean i tamata sansinir isa ni kaka'a dawan ovu not-orang lalawatan afa ovi duan nfalak ra,
na duan a veka nfili ia ma nfareta tamata sansinir liak ra,
ovu lokat amar nala afamtahan ma ra'an.
46 Tamata sansinir yai veka utun urun na'ut i duan a newal ia,
na ntuan ia nfabana ni karya ra.
47 Afa i ufalak verin mia ini,
kena urun!
Tamata sansinir yai duan a veka nfili ia ma nasusan munuk ni metan ra.
48 Na'uk wean i tamata sansinir yai naktufan ma nanovak na'a ralan a ne,
‘Mnanat obin beti duang nma ewal.’
49 Ba ti ma nvaval tamata sansinir liak ra,
ovu nafna'an-nafnenu ovu tamata ovi ranavut sian ra.
50 Nata duan newal ia nma na'ut i sansinir yai wol nka'a.
51 Duan a veka nfar-visal sansinir yai ma nvatuk ia ovu tamata ovi ba'i rfalak afa isa,
na'uk rotu afa liak.
Irmunuk veka rvakar ovu nifarira ra rsitutu,
tevek rfarnuang wawa'uk dawan a.”*