Vata varu isa nala kubang ma neluk ni persembahan verin Ubu
1 Na'ut i Yesus na'a Yahudi rira Rahan Dawan Falurut a,
na Ia nsi'ik tamata ka'i ra ti rfadoku rira kubang ra na'a vatvatat i ba'i rfadoku rira kubang ma reluk rira persembahan verin Ubu.
2 Ia nsi'ik vali vata varu isa i ni kasian a dawan,
nala ni kubang ihin irua i fyawar a ko'u lean ma ti nfadoku vali na'a wan yai.*
3 Nata Yesus nfalak ne,
“Afa i ufalak verin mia ini,
kena urun!
Vata varu i ni kasian dawan ini ni kubang i nala a,
fyawan lia munuk kubang ovi tamata liak ra rala a.
4 Tevek tamata avyai munuk rala rira kubang ra tali rira metan teran ra,
na'uk vata varu ini,
velik ne ni kasian a dawan,
na ia nala munuk lahir ni kubang ovi nala al nva'at a.”
Vata varu isa nala ni kubang ihin irua verin Ubu (Lukas 21:2)
Yahudi rira Rahan Dawan Falurut i na'a Yerusalem veka nama'ar
5 Na'ut inyai,
na tamata boku rfamalik Yahudi rira Rahan Dawan Falurut ni lolin a.
Ira rfalak ne,
Rahan Dawan Falurut felan a lolin buas,
tevek rdamur ovu vatu marmer ovi lolin urun a,
ovu vali tali tamata rira afa fyawan ovi rala ma reluk rira persembahan verin Ubu.
Yesus nrenar afa avyai,
na nfalak ne,
6 “Afa ovi msyi'ik avyai,
ni amar veka nma ma vatu ovi rotu na'a rahan averi veka rama'ar munuk,
ma wol teran vatu isa vali na'a wan a.”
Yesus nfamalik afa ovi mane rma, beti lanit ivavan namwear
7 Yesus Ni tamata ovi rorang Ia rorat ne,
“Tuan Guru,
na'ut inba na afa avyai veka rvotuk?
Faneak aka veka nvotuk ma nfaturu ne,
afa avyai veka rvotuk?”
8 Yesus nfalak ne,
“Msyi'ik wabira ma lolin,
boma tamata ra deka rlabir nala mia!
Ufalak wean inyai,
tevek tamata rivun veka rma ma rala narang a ma lokat ira ka'i rfalak ne,
‘Ya'a Raja i ntevut bira salasilan ra.’
Ovu vali boku veka rfalak ne,
‘Duila'a mane nma ewal roak.’
Deka myorang lahir afa ovi rfalak ra.
9 Na'ut i mryenar ivar ne,
tamata ra rotu rihi ovu rotu vangoa-vanga,
na deka byobar,
tevek afa avyai munuk musti rvotuk lan veki.
Na'uk inyai wol neluk faneak ne,
naran roak ni amar a ma lanit ivavan a namwear.”
10 Nata Yesus nfalak ewal ne,
“Bangsa isa veka notu rihi ovu bangsa liak ra,
ovu vali fareta dawan isa veka notu rihi ovu fareta dawan liak.
11 Na'a lanit ivavan,
na veka ruru dawan,
ovu lafar dawan,
ovu vali suhut dawan na'a wan rivun.
Na'a lanit a,
na veka trea lahir faneak ovi raling ma lolan watan,
ovu rotu ma tamata ra rbobar urun.
12 Na'uk afa avyai munuk wol rvotuk obin,
na veka rtaha lan mia ma rwi-rwa mia.
Veka rala mia ti mdyiri fareta waharira ralan ra na'a dida rahan falurut ra,
ovu vali veka rala mia ti mnya'a bu'i ralan.
Ira veka rala mia ma ti mdyiri raja ra ovu dawan fareta waharira ralan ra,
tevek myorang Ya'a.
13 Na'ut inyai vali,
mia veka fyamalik Ubu Ni Ivar Lolin verin ira.
14 Mia musti fyangrebat lan ralabira ra,
boma na'a amar yai,
na deka ralabira raruan na'a vaivatul ovi veka myala al mlyotar tenabira ra.
15 Wean inyai bi Ya'a veka ala ngrebat verin mia ma mingrihi nala vaivatul ovi kena ra,
boma tamata ovi rira sian mia wol rangal nala bira vaivatul avyai,
ovu wol rfasala nala mia.
16 Renabir-yamabira ra,
terabir-valibira ra,
a'abir-waribira ra ovu bira kida ra veka rfedi mia verin tamata ovi rira sian mia.
Tamata ra veka rfedan boku tali mia vali.
17 Tamata ra munuk veka wol inar lahir mia,
tevek myorang Ya'a.
18 Na'uk wol mane bira vut van isa vali natvutuk tali ulubira ra,
te rfamngala mia.*
19 Ba wean i mtyahang nal ralabira ma myorang lalawatan Ya'a,
na veka bira vava'at kakiwal.”
Yesus nfamalik ne, kota Yerusalem veka nama'ar
20 Yesus nfalak verin Ni tamata ovi rorang Ia ne,
“Wean i msyi'ik suldadu ra rbelat lilit Yerusalem,
na mia musti mkya'a ne wol mnanat,
na kota yai veka nama'ar.
21 Na'ut inyai,
na tamata ovi rna'a propinsi Yudea musti rafla talik ma rti vuar ra.
Tamata ovi rna'a kota yai ralan a musti rafla talik kota yai,
ovu vali tamata ovi rna'a kota yai murin a,
deka rati kikyai kota yai ralan a.
22 Tevek amar avyai amar ma Ubu nukun Yerusalem,
boma nfakena lahir afa ovi rtulis roak na'a Surat Ralan a.
23 Na'ut inyai,
na veka sian urun i lahir verin vata ovi rbarlewan ra,
ovu vata ovi rsusu kasiko'u yanat ra!
Na'ut i Duila'a nukun bangsa Israel ini,
tamata ovi rna'a wan yai veka rtuan susa dawan urun.
24 Tamata boku veka rfedan ira ovu nahin a blawat.
Boku vali veka rkeak teri ira ovu rtaha ira ma reluk tamata ovi rfaleka roak ira verin bangsa ra munuk na'a lanit ivavan a.
Tamata ovi wol Yahudi ra veka rma ma rta sorat Yerusalem na'a amar ovi Duila'a nfadoku roak verin ira.”
Faneak ovi veka rvotuk na'ut i Tamata Yanan nma ewal lanit ivavan a
25 Yesus nfalak verin Ni tamata ovi rorang Ia ne,
“Faneak ra veka rvotuk na'a lera,
vulan,
ovu nara ra.
Bangsa ovi rna'a lanit ivavan a veka rbobar ovu wol rka'a ma raroal te rara,
tevek rsi'ik saksakan dawan ra ovu rarenar dodurira ra.
26 Tamata ra rbobar ma rablingu lahir na'ut i rsi'ik afa ovi rvotuk na'a lanit ivavan a munuk,
tevek afa ovi rira ngrebat ra na'a lanit veka rarwa'ung ma rasmoang tia ma watan ira.*
27 Na'ut inyai,
na tamata ra munuk veka rsi'ik Ya'a,
Tamata Yanan Ya'a ini,
uma ovu mutan a ovu Ning ngrebat a,
ovu vali vanang i nfitik a nyadat a.
28 Na'ut i faneak avyai beti rvotuk,
na fara fyangrebat ralabira ra ovu inabira lolin watan,
tevek sarseri roak ma Ubu mane nfatalik mia tali bira susa ovi mtyuan ra.”
Vaivatul kamkuma na'a aa ara
29 Nata,
Yesus nfamalik vaivatul kamkuma isa verin Ni tamata ra ne,
“Msyi'ik ma lolin aa ara ovu aa afaka watan.
30 Wean i aa avyai raftuvul roak,
na mia mkya'a lahir ne,
lera dawan a sarseri roak.
31 Wean vali inyai wean i mryea munuk roak afa ovi ufalak ra,
na veka mkya'a lahir ne,
sarseri roak ma uma ewal ma ufareta tamata ra wean lahir Raja.
32 Afa i ufalak verin mia ini,
kena urun!
Tamata ovi rva'at fiang ini veka wol rmata munuk obin,
na afa avyai munuk rvotuk roak.*
33 Lanit ovu lanit ivavan a veka ramwear,
na'uk Ning vaivatul ra rna'a kakiwal watan.”
Snurak ma msyi'ik wabira ma lolin
34 “Msyi'ik wabira ma lolin,
boma deka fyikir lalawatan ma myotu snoba ma boranavut mia,
ovu deka ralabira raruan na'a bira vava'at ra.
Wean i fyikir lalawatan wean inyai,
na veka mibrian na'a amar i Ya'a,
Tamata Yanan a uma,
tevek brian munuk,
na uma lahir.
35 Amar yai,
na veka uma verin tamata ovi rna'a lanit ivavan munuk ma rabrian watan,
na inyai wean vali afwatan ovi brian munuk,
na voar nakevu nala roak ira.
36 Ba msyi'ik wabira ma lolin ovu miflurut lalawatan,
boma byan-lia afa ovi veka rvotuk na'a amar yai,
ovu bisma mdyiri nala Tamata Yanan wahan ralan a.”