Yesus nfamalik vaivatul kamkuma na'a tamata ovi rwanar va'i anggur
1 Yesus nfamalik vaivatul kamkuma isa verin Yahudi rira dawan mela falurut ra,
ovu dawan Yahudi ra,
ntafal vali Yahudi rira dawan ovi rair Ubu Ni inukun ra.
Ia nfalak ne,
“Tamata isa notu ni va'i anggur,
na notu ngean ma nlilit ni va'i a,
ovu nkear wan isa ma al raramat anggur vuan ra na'a.
Ia nfadiri sari isa felan a wean farwan ma rata rdoku al rwanar ni va'i a.
Notu munuk wean inyai,
na nala verin tamata va'i ra ma rasusan ni va'i yai,
ma ki rsiduk anggur boku verin ia.
Nata nban-talik ni ahu ma nti wan raroa.
2 Ba ti naran roak ni amar i rfufu anggur vuan ra,
na va'i duan yai nsinir ni tamata sansinir isa ma ti nala ni wahat tali tamata ovi rwanar ni va'i a.
3 Na'uk tamata avyai rtaha tamata sansinir yai,
ma rvaval ia,
beti rsinir ma newal favu watan ia.
4 Ba va'i duan yai nsinir ni tamata sansinir isa ewal ma nti,
na'uk rvaval ma ulun a namngala,
beti rfama'it ia.
5 Va'i duan yai nsinir ni tamata sansinir isa ewal vali ma nti,
na'uk rfedan ia.
Ia nsinir tamata rivun ma sasan ira rti vali,
na'uk rotu lalawatan ira wean inyai,
ba rvaval boku ovu rfedan boku.
Va'i anggur ovu ngean i nlilit ia (Markus 12:1)
6 Teran a'uk yanan a brana i nlobang urun ia.
Ti nata nfalak ne,
‘Tamata avyai veka ralang yanak a,’
ba nsinir ia ma nti vali.
7 Na'uk rsifalak afa verin ira ne,
‘Tamata ini va'i duan yanan a brana,
ba mya ma tfedan ia,
boma tala va'i ini verin ita.’
8 Ba rtaha brana yai ma rfedan ia,
ma ti rvatuk tenan a na'a va'i yai murin a.”
9 Yesus norat ira ne,
“Va'i duan yai veka notu afaka?
Ia veka nma ma nfedan tamata avyai,
ma nala ni va'i yai verin tamata liak.
10 Mia wol byas obin vaivatul ovi rna'a Surat Ralan a?
Vaivatul avyai wean ini:
‘Vatu i tukan ra rvatuk yai,
fyawan lia munuk ma al nfangrebat rahan yai.
11 Afa i Duila'a notu lolin urun,
ovu notu ma tamata ra rtalkaka.’ ”*
12 Ba tamata ovi rarenar vaivatul kamkuma yai rdava linga'an mane rtaha Yesus,
tevek rka'a ne,
Ia nala vaivatul kamkuma yai al nta'ing ira.
Na'uk rbobar,
tevek tamata rivun inar Yesus,
ba rban-talik watan Ia.
Tamata ovi rtali Yahudi rira sidovung Farisi ovu Herodes ni tamata ra rorat Yesus ne, kena ma rbahir kulu verin Kaisar te wahal
13 Tamata ovi rarenar vaivatul kamkuma yai rsinir tamata Farisi boku,
ovu tamata boku vali ovi rorang Herodes ma rorat afa isa tali Yesus,
boma rfaleka Ia na'a Ni vaivatul ra.
14 Ti ma rtuan Yesus,
na rfalak ne,
“Tuan Guru,
ami amka'a ne,
afa ovi fwalak ra kena lalawatan.
Oa wol fwili tamata,
ovu wol mdava waham ralan,
na'uk msiair ovu ni malolan a,
wean Ubu ralan nfalak a,
verin tamata ra.
Ba,
eka fwalak verin ami ne,
dida agama nfalak ne,
kena ma tbahir kulu verin Kaisar te wahal?
Ba musti tbahir te wahal?”
15 Yesus nka'a rira siweang ra,
ba nfalak verin ira ne,
“Afakinimi mlyabir teman Ya'a?
Eka myala bira kubang dinar* isa ma usi'ik.”
16 Nata rala kubang dinar isa ma nsi'ik,
ba norat ira ne,
“Tamata iki walun a ovu naran a na'a kubang ini?”
Ira rfalak ne,
“Kaisar.”
17 Ia nfalak ne,
“Ba wean inyai,
na myala verin Kaisar afa ovi Kaisar nia,
ovu myala vali verin Ubu afa ovi Ubu Nia.”
Ira rarenar afa ovi Yesus nfalak ra,
na rtalkaka lahir.
Yahudi rira sidovung isa naran Saduki rira tamata ra rorat waweang Yesus ne, tamata matmatan ra veka rva'at ewal te wahal
18 Tamata boku tali Yahudi rira sidovung isa naran Saduki rma ma rtuan Yesus.
Tamata Saduki ra wol rorang ne,
tamata matmatan ra veka rva'at ewal.
Ba rorat Ia ne,
19 “Tuan Guru,
Musa ntulis inukun ini verin ita:
Wean i brana isa nmata ma teran a'uk awan a,
na'uk wol yanarira,
na brana yai a'an te warin musti nala varu yai neluk awan,
ma fara ia i nmata roak yai veka duan yanan boku.
20 Ba wean i brana ifitu iya'an iwarin ira,
ma iya'an nsifa roak,
na'uk wol yanan obin,
na nmata.
21 Nata warin nsifa vali ovu varu yai,
na'uk wol yanar obin,
na nmata.
Ba brana i norang a'an i beti nmata yai nsifa vali ovu varu yai,
nata wol yanar obin,
na nmata vali.
22 Warin i norang ia nsifa vali ovu varu yai,
na'uk wol yanar obin,
na nmata vali.
Wean inyai lalawatan,
nata ti naran iwarin tutul a.
Ti nata vata yai nmata vali.
23 Ba wean inyai,
na ti naran amar i tamata matmatan ra rva'at ewal,
na iki veka awan mnga'un vata yai,
tevek brana ifitu yai awar munuk roak ia?”
24 Yesus nfalak verin ira ne,
“Mia sala ma dawan mia,
tevek wol fyan-aran Surat Ralan a,
ovu wol mkya'a Ubu Ni ngrebat a!
25 Ba na'ut i Ubu nfava'at ewal tamata matmatan ra,
na ira veka wol rsifa roak,
na'uk rva'at wean Ubu Ni sansinir ra na'a lanit ratan.
26 Mia wol byas obin na'a Ubu Ni vaivatul ovi rfamalik na'a tamata ovi rmata roak,
na'uk veka rva'at ewal a?
Ia ntulis na'a Surat Ralan ma nfamalik na'ut i nsi'ik yafu nonga na'a lavurun lesmat ralan.
Ia ntulis ne,
‘Ya'a ini Ubu i Abraham,
Ishak ovu Yakub ba'i raraning a.’*
27 Ia wol neluk Ubu verin matmatan ra,
na'uk neluk Ubu verin tamata ovi rva'at ra.
Ba bira afa ovi fyalak ra wol kena lahir.”
Ubu Ni inukun i nlia munuk inukun ra
28 Yahudi rira dawan isa i nair Musa ni inukun ra nma ma nrenar vali Yesus ovu tamata Saduki ra rsisoal ira.
Ia nrenar Yesus Ni vaivatul ra kena munuk,
ba norat Ia ne,
“Inukun bi nlia munuk tali inukun ra?”
29 Yesus nfalak ne,
“Inukun i nlia inukun ra munuk wean ini:
‘Tamata Israel ra eka mryenar!
Ubila'a i traning a ikisa watan,
ovu wol Ubu liak.
30 Oa musti mlobang Duila'a,
mu Ubu i mraning a,
ovu ralam urun.
Mala munuk mu vava'at a,
mu kaka'a ra,
ovu vali mu ngrebat ra verin Ia ma al mlobang Ia.’*
31 Inukun isa vali i norang i ula lalean yai wean ini:
‘Oa musti mlobang vali tamata liak ra wean watan i mlobang tenam a.’
Inukun ra munuk wol verar lia inukun irua ini.*”
32 Ba Yahudi rira dawan yai nfalak verin Yesus ne,
“Tuan Guru,
kena urun,
tevek afa ovi fwalak ra rfaturu ne,
Ubu ikisa watan,
ovu vali wol Ubu liak.
33 Tlobang Ubu ovu ralad urun,
ovu tala munuk dida kaka'a ra ovu vali tala munuk dida ngrebat ra ma al tlobang Ia.
Tlobang tamata liak wean i tlobang tenadida ra,
na inyai lolin lia munuk tali dida afwatan ra,
te dida korban liak ovi tala ma veka rasnuri ira verin Ubu.”
34 Yesus nrenar dawan Yahudi yai ni vaivatul ra,
na nka'a ne,
ni kaka'a dawan,
ba nfalak verin ia ne,
“Sarseri roak ma mna'a Ubu Ni Fareta a.”
Ba wol tamata isa vali nabrahi roak ma norat afa tali Yesus.
Yesus nfalyawang ne, Raja i ntevut dida salasilan ra Ni dawan a nlia Raja Daud
35 Na'ut i Yesus nsiair na'a Yahudi rira Rahan Dawan Falurut ni lean,
na norat tamata ovi rna'a inyai ne,
“Wean inba ma dida dawan ovi rair Musa ni inukun ra bisma rfalak ne,
Raja i ntevut tamata rira salasilan ra,
Daud ubun-nusin Ia?
36 Ubu Ni Roh nleal Daud ralan a ma Daud nfalak ne,
‘Ubu nfalak verin ning Duila'a ne:
Mdoku Ning lihir mela a,
ti naran i otu ma tamata ovi rira sian Oa rsoak nulu Oa*.’
37 Ba wean i Daud nfalak ne,
Raja i ntevut tamata rira salasilan ra Duila'a Ia,
na wean inba ma Daud ubun-nusin Ia?”
Tamata rivun ila'a rna'a inyai inar ma rarenar Yesus.
38 Yesus nair ira ma nfalak ne,
“Msyi'ik wabira ma lolin na'a dawan ovi rair Musa ni inukun ra.
Wean i rbasiar,
na inar ma roru ravit blawat,
ovu inar vali ma tamata ra ralang ira ma rala salam verin ira na'a wan i rfedi-rfaha afa na'a.
39 Ira inar ma rdoku wan ovi tamata ra ba'i ralang ira na'a rahan falurut ra ovu vali na'a snoba ra.
40 Ira rlabir kual a moang watan vata varu ra ma rala rira rahan ra ovu rira metan liak ra.
Rira falurut ra blawat urun ma al rteri rira afa sian ovi rotu ra.
Ba wean inyai,
na Ubu veka nukun ira ovu inukun i aleman urun,
ma nlia tamata liak ra!”
Vata varu isa ntaha ni persembahan nti Yahudi rira Rahan Dawan Falurut
41 Yesus ti ndoku ma nfaseri wan i tamata ra ba'i rfadoku rira kubang ra ma reluk rira persembahan verin Ubu,
ma nsi'ik tamata rivun rfadoku rira kubang ra.
Tamata ka'i rivun rfadoku ma rira kubang dawan vali.
42 Na'uk vata varu isa i ni kasian a dawan nma ma nala ni kubang ihin irua i fyawar ko'u lean,
ma ti nfadoku vali na'a wan yai.
43 Yesus nera Ni tamata ovi rorang Ia ma nfalak ne,
“Afa i ufalak verin mia ini,
kena urun!
Vata varu i ni kasian a dawan ini,
ni kubang i nfadoku na'a vatvatat i ba'i rfadoku rira kubang ra verin Ubu,
fyawan lia munuk kubang ovi tamata liak ra rala a.
44 Tamata avyai munuk rala kubang dawan,
tevek rira metan rivun,
na'uk vata varu ini,
nala munuk lahir ni kubang ovi nala al nva'at a,
velik ne ni kasian a dawan.”