Vaivatul kamkuma al nfalyawang ne, Ubu nasweang tamata rivun ma rorang Ia, na'uk etal dawan rafena
1 Yesus nal-ewal vaivatul kamkuma ma nfalak verin ira ne,
2 “Ubu Ni Fareta ralan wean raja isa i mane notu snobsifa verin yanan brana a.
3 Ia nsinir ni tamata sansinir ra ma ti rera tamata ovi nasweang roak ira ma rma snobsifa yai,
na'uk tamata avyai rafena rma.
4 Ia nsinir ni tamata sansinir liak boku vali ma nfalak verin ira ne,
‘Fyalak verin tamata ovi usweang roak ira yai ne,
tasusan munuk roak afamtahan ra,
ovu tfedan roak afwatan ra,
wean sapi brana,
ovu sapi yanat ovi rfa'an ma dawan roak ira.
Fyalak vali verin ira ne,
afa avyai ramtahan munuk roak,
ba rma kikyai snobsifa ini.’
5 Na'uk tamata ovi rasweang ira yai wol rkamlabir ma rti snobsifa yai.
Boku rti rira va'i ra,
na boku vali rti ma rasusan rira karya liak ra.
6 Boku vali rtaha tamata sansinir ovi raja nsinir ira yai ma rwi-rwa ira,
ovu rfedan ira.
7 Ti ma raja nrenar afa avyai,
na nangrova urun,
ba nsinir ni suldadu ra ma ti rfedan munuk tamata ovi rfedan ni sansinir ra,
ovu rasnuri rira kota.
8 Nata nfalak verin ni tamata sansinir liak boku vali ne,
‘Tasusan munuk roak ma totu snobsifa,
na'uk tamata ovi tasweang roak ira,
wol inovan ma rma snoba ini.
9 Ba miti linga'an dawan ra ma misweang tamata iki watan na'a ineri,
ma fyalak ma rma snobsifa ini.’
10 Tamata sansinir avyai rti ma rasdovu munuk tamata ovi rtuan ira na'a linga'an ra,
ba ti nata wan i rotu snobsifa na'a yai nngora lahir.
Tali tamata ovi rasweang ira yai,
na boku rmarkai,
na'uk boku vali raktufan.
11 Nata raja yai nti snobsifa ralan ma ntuan ni mangun avyai,
na nsi'ik tamata isa ni kadaravit wol inovan ma nma snobsifa yai.
12 Ba nfalak verin ia ne,
‘Kida,
notu afakinimi mwa ini,
na meluk kadaravit i wol inovan na'a snoba i?’
Tamata yai wol vain.
13 Raja nfalak verin ni tamata ra ne,
‘Mkyeak tamata yai ean ovu liman a ma ti byatuk ia na'a deda fafyat ralan.
Na'a inyai,
na tamata ra rvakar ovu nifarira ra rsitutu watan ira,
tevek rfarnuang wawa'uk i dawan a.’ ”
14 Yesus nfamalik munuk roak vaivatul kamkuma yai,
beti nfalak ne,
“Ubu nera tamata rivun,
na'uk nfili ifira watan.”
Tamata Farisi ovu Herodes ni tamata ra rorat Yesus ne, kena ma rbahir kulu verin Kaisar te wahal
15 Tamata boku tali sidovung Farisi rti ma rfamalik ne,
wean inba ma rangrihi waweang Yesus,
ma al rdava mane rfaleka Ia na'a Ni vaivatul ra.
16 Ba rsinir rira tamata boku,
ovu boku vali tali ovi rorang Herodes ma ti rorat Yesus ne,
“Tuan Guru,
ami amka'a ne,
afa ovi fwalak ra kena lalawatan,
ovu vali Oa msiair ovu ni malolan a wean Ubu ralan nfalak a.
Oa wol bwobar tamata,
tevek wol fwili tamata ovu wol mdava waham ralan.
17 Amera verin Oa ma eka fwalak verin ami ne,
dida agama nfalak ne,
kena ma tbahir kulu verin Kaisar te wahal?”
18 Yesus nka'a rira siweang ra,
ba nfalak verin ira ne,
“Hoi,
mia ba'i msyiklabir ma fyalak afa isa,
na'uk myotu afa liak.
Notu afakinimi mane mlyabir teman Ya'a i?
19 Eka fyaturu kubang i ba'i myala ma al byahir kulu a ma usi'ik.”
Ba rala kubang dinar isa ma nsi'ik.*
20 Ba norat ira ne,
“Tamata iki walun ovu naran a na'a kubang ini?”
21 Ira rfalak ne,
“Kaisar walun ovu naran a.”
Yesus nfaturu kubang dinar verin tamata Farisi ra (Matius 22:19)
Yesus nfalak verin ira ne,
“Myala verin Kaisar afa ovi ia nia ra, ovu vali myala verin Ubu afa ovi Ubu Nia ra.”
22 Yesus nfalak wean inyai,
na rtalkaka lahir,
ba rban-talik Ia.
Yahudi rira sidovung isa naran Saduki ni tamata ra rma ma rorat waweang Yesus ne, tamata matmatan ra veka rva'at ewal te wahal
23 Amar yai vali,
na tamata boku tali sidovung Saduki rma ma rorat afa tali Yesus.
Ira wol rorang ne,
tamata matmatan ra veka rva'at ewal,
ba rorat Ia ne,
24 “Tuan Guru,
Musa nfalak ne,
‘Wean i brana isa nmata ma teran a'uk awan a,
na'uk wol yanarira,
na brana yai a'an te warin nal-ewal varu yai ma neluk awan,
ma fara ia i nmata roak yai veka duan yanan boku.’
25 Lan ana,
brana ifitu iya'an iwarin ira.
Iya'an nsifa roak,
na'uk wol yanan obin,
na nmata.
Ia warin nsifa ewal ovu varu yai.
26 Na'uk wol yanar obin,
na brana yai nmata.
Ba varu yai nsifa ewal ovu warin isa vali.
Wean inyai lalawatan,
nata ti naran iwarin tutul a.
27 Brana ifitu yai rmata munuk,
beti vata yai nmata vali.
28 Ba wean inyai,
na ti naran amar i tamata matmatan ra rva'at ewal,
na iki veka awan mnga'un vata yai,
tevek brana ifitu yai awar munuk roak ia?”
29 Yesus nfalak verin ira ne,
“Mia sala ma dawan mia,
tevek wol fyan-aran Surat Ralan a,
ovu wol mkya'a Ubu Ni ngrebat a!
30 Na'ut i tamata ovi rmata roak rva'at ewal,
na ira veka wol rsifa roak,
ba rva'at wean Ubu Ni sansinir ra na'a lanit ratan.
31 Mia wol byas obin na'a Ubu Ni vaivatul ovi rfamalik na'a tamata ovi rmata roak,
na'uk veka rva'at ewal a?
Ubu nfalak verin mia na'a Ni Surat Ralan ne,
32 ‘Ya'a ini Ubu i Abraham,
Ishak ovu Yakub ba'i raraning a.’
Matmatan ra wol raraning Ubu,
na'uk tamata ovi rva'at ra sa'i raraning Ia.”*
33 Ti ma tamata rivun avyai rarenar afa ovi Yesus nair ra,
na rtalkaka lahir.
Tamata Farisi rorat Yesus ne, na'a Musa ni inukun ra, na inbi nlia munuk?
34 Ti ma tamata Farisi rarenar ne,
Yesus nangrihi ma tamata Saduki ra wol rvalat nala roak Ia,
na Farisi avyai rasdovu ewal ira.
35 Tali rir tinemun,
na dawan Yahudi isa i nair Musa ni inukun ra mane nlabir teman Yesus.
Ia norat Yesus ne,
36 “Tuan Guru,
inukun bi nlia munuk tali Musa ni inukun ra?”
37 Yesus nfalak verin ia ne,
“ ‘Oa musti mlobang* Duila'a,
mu Ubu i mraning Ia a,
ovu ralam urun.
Mala munuk mu vava'at verin Ia,
ovu mala munuk mu kaka'a al mlobang Ia.’*
38 Inyai inukun i nlia munuk tali inukun ra.
Inukun ini ula lalean ia,
beti inukun liak ra.
39 Inukun isa vali i norang i ula lalean yai wean ini,
‘Oa musti mlobang vali tamata liak ra,
wean watan i mlobang tenam a.’
40 Musa ni inukun ra munuk ovu afa ovi nabi rair ra,
raklo'i a'uk na'a inukun irua ini.”
Yesus norat tamata Farisi na'a Kristus, Raja i ntevut dida salasilan ra
41 Tamata Farisi avyai rasdovu ira obin,
na Yesus norat ira ne,
42 “Mia minovak aka na'a Kristus,
Raja i veka ntevut bira salasilan ra?
Ia ubun nusin verin iki?”
Ira rfalak ne,
“Raja Daud ubun-nusin Ia.”
43 Ba Yesus norat ewal ira ne,
“Wean i afa i fyalak yai kena,
na notu afakinimi Ubu Ni Roh nfalak verin Daud ma nfalak ne,
ni Duila'a verin Ia.
Daud nfalak ne,
44 ‘Ubu nfalak verin ning Duila'a* ne:
Mdoku Ning lihir mela a,
ti naran i otu ma tamata ovi rira sian Oa rsoak nulu Oa.’