Yesus notu ma lolin tamata isa tali ni suhut na'a amar i Yahudi ra ryari ira
1 Amar isa na'ut i Yahudi ra ryari ira,
na Yesus nti dawan Farisi isa ni rahan ma nafna'an na'a inyai.
Tamata ovi rna'a inyai rsi'ik nanuang Ia.
2 Tamata isa nma ma ndiri Yesus wahan ralan a.
Tamata yai ni suhut notu ma ean ovu liman ra rbara.
3 Ba Yesus norat Yahudi rira dawan ovi rair Musa ni inukun ra ovu tamata Farisi avyai ne,
“Na'a Musa ni inukun ra,
bis totu ma tamata lolin ira na'a amar i ita tamata Yahudi tyari ita a?”
4 Tamata avyai munuk wol vairira lahir.
Yesus ntaha tamata i ni suhut yai liman a ma notu ma lolin ia,
beti nsinir ma newal ia.
5 Nata Yesus norat ewal ira ma nfalak ne,
“Wean i yanabira isa,
te bira sapi isa nleka nsuta wear kakear ralan a,
na wol msyuta ma msyikat lahir ia,
velik ne na'a amar i tyari ita?”
6 Na'uk wol tamata isa nvalat nala afa i Yesus norat yai.
Ubu inan ma ita tfakabava tenadida ra
7 Yesus nsi'ik mangun ovi rma dawan Farisi yai ni rahan a,
na ira ti rdoku kadera ovi rna'a ulu ra.
Ba Yesus nala vaivatul kamkuma isa ma nair ira.
Ia nfalak ne,
8 “Wean i tamata isa nasweang oa ma movu ni snobsifa a,
na deka muti mdoku kadera ovi rna'a ulu ra,
beta ne snoba duan yai nasweang roak tamata ovi rira van ra dawan lia oa.
9 Snoba duan yai veka nma ma nfalak verin oa ne,
‘Deka mungrova,
tevek ufadoku roak wan ini verin mangun eri.’
Ba veka mwa'it urun i lahir ma ti mdoku kadera ovi rna'a muri lalean a.
10 Ba wean i rasweang oa ma muti snoba isa,
na mdoku kadera ovi rna'a muri lalean a,
boma snoba duan yai nfalak verin oa ne,
‘Kida,
mwa ma muti mdoku kadera ovi rna'a ulu eri.’
Wean inyai,
na snoba duan yai nalang roak oa na'a mangun waharira ralan ra.
11 Tamata iki watan wean i nfakaratat tenan a,
na Ubu veka nfakabava ia.
Na'uk tamata iki nfakabava tenan a,
na Ubu veka nfakaratat ia.”
12 Nata Yesus nfalak verin dawan Farisi yai ne,
“Wean i musweang tamata ra ma rovu mu snoba a ma rafna'an lera ndirlola te lervava,
na deka musweang watan mu kida ra te a'am a warim ra,
ovu vali tamata ka'i ovi rna'a mu rahan nelan a,
tevek ira veka rasweang vali oa ma mimunuk mifna'an ma rfaturu ne,
raval roak mu lolin a.
13 Na'uk wean i motu snoba,
na musweang tamata ovi rira kasian ra,
tamata ovi ear limarira rametal,
te tamata ovi ratlukut ra,
ovu vali tamata ovi rkibu ra.
14 Motu wean inyai,
na Ubu veka naflahar oa,
tevek tamata avyai veka wol raval nala mu lolin a.
Ubu veka nbalas mu lolin yai na'ut i nfava'at ewal tamata ovi rira vava'at ra rmalola.”
Vaivatul kamkuma al nfalyawang ne, Ubu nasweang tamata rivun ma rorang Ia, na'uk etal dawan rafena
15 Ti ma rarenar munuk afa ovi Yesus nfalak ra,
na tamata isa tali tamata ovi rdoku rafna'an yai nfalak verin Yesus ne,
“Lolin urun verin tamata ovi veka rafna'an na'a snoba dawan ovu Ubu na'a Ni Fareta a!”
16 Na'uk Yesus nfalak verin ia ne,
“Amar isa,
na tamata isa notu ni snoba dawan,
na ia nasweang ma tamata rivun rma!
17 Ti ma snoba yai mane nbana,
na nsinir ni tamata sansinir isa ma ti nfalak verin tamata ovi nasweang roak ira yai ne,
‘Afakataka rna'a munuk roak,
ba mya kikyai.’
18 Na'uk tamata avyai munuk lahir,
lokat ira,
ka'i rdava rira lola.
* Tamata i ula lalean ia nfalak verin sansinir yai ne,
‘Ya'a ufaha roak va'i isa,
ba musti uti ma usi'ik.
Era ma deka mungrova ya'a,
tevek wol uti.’
19 Tamata isa vali nfalak ne,
‘Beti ufaha sapi brana vutu a,
ba musti uti ma ucoba sapi avyai ma usi'ik ne,
rkarya ma lolin te wahal.
Wol bis uti,
ba era ma deka mungrova.’
20 Tamata isa vali nfalak ne,
‘Ya'a beti usifa,
ba veka wol uti mu snoba.’
21 Ba sansinir yai newal ia ma ti nfamalik munuk afa avyai verin ni dawan a.
Ba rahan duan yai nangrova urun ma nfalak verin ni sansinir yai ne,
‘Muti lahir kota ini ni linga'an ko'u ovu dawan ra,
ma movun tamata kasian ra ovu tamata ovi ear-limarira ra rametal,
ovu tamata ovi rkibu ra,
ntafal vali tamata ovi ratlukut ra ma rma snoba ini.’
Ba,
sansinir yai nti.
22 Ti ma sansinir yai newal ia,
na nfalak ne,
‘Baba,
otu munuk roak afa ovi fwalak ra,
na'uk wan rivun na'a snoba ini vu obin.’
23 Snoba duan yai nfalak ne,
‘Muti lahir linga'an dawan ovu linga'an ko'u ovi rna'a kota murin a ma mkiwal tamata ra ma rma,
boma ning rahan a nngora.
24 Ufalak urun verin mia ne,
wol tamata isa vali tali mangun ovi usweang ula roak ira yai veka rfatemang ning afamtahan ovi na'a ning snoba ini.’ ”
Tamata iki watan ralan urun ma norang Yesus, na deka nfikir ne maraan watan
25 Tamata rivun rorang Yesus na'a Ni banbanan a.
Yesus nfulak wahan a,
ma nfalak verin ira ne,
26 “Wean i tamata isa nma ma norang Ya'a,
na ia musti nlobang Ya'a nlia tali renan a,
yaman a,
awan a,
yanan ra,
a'an a warin ra,
ovu tenan a.
Na'uk wean i wol notu wean inyai,
na ia wol bisma norang Ya'a.
27 Tamata i norang Ya'a musti ntorung ma ntuan susa,
te nmata,
wean i nvara ni aa walwalur a.
Ba tamata i nafena ma nvara ni aa walwalur,
wol bisma norang Ya'a.
28 Wean i tamata isa tali mia mane nfadiri rahan dawan isa,
na ia musti ndoku ma nrekan ni kubang ra veki,
boma bisma nka'a ne,
ni kubang avyai naran ma not-nala rahan yai te wahal.
29 Tevek,
wean i nfadoku roak ni fanderen,
na'uk wol not-nala rahan yai,
na tamata rivun veka rsi'ik ni karya a ma rmalit ia.
30 Tamata avyai veka rfalak ne,
‘Ya'i yo,
tamata ini mulai roak ma nfadiri ni rahan dawan,
na'uk ni kubang wol naran ma not-nala munuk!’
31 Wean i raja isa ni suldadu rivun vutu mane rti rotu rihi ovu raja liak isa i ni suldadu rivun vutrua,
na raja yai musti ndoku ma nanovak veki ne,
ia veka utun raja i ni suldadu rivun vutrua yai te wahal.
32 Wean i nka'a roak ne,
ia veka wol utun,
na na'ut i raja i ni suldadu rivun vutrua yai raroa ira obin,
na nsinir lahir ni suldadu ifira rati rera ma deka rotu rihi.”
33 Ti nata,
Yesus nfalak ne,
“Mia weabira vali inyai.
Wean i inabira ma myorang Ya'a,
na musti byan-talik bira metan ra munuk.”
Tamata ovi rorang Yesus wearira sira