Ubu naflahar tamata ovi rorang Ni banbanan a
1 Ti ma Yesus nsi'ik tamata rivun avyai,
na nrata vuar isa na'a inyai ma ndoku.
Ba Ni tamata ovi rorang Ia* rti vali inyai ma irmunuk rasdovu ira.
2 Nata Yesus nair ira munuk ma nfalak ne,
3 “Ubu naflahar tamata ovi rfaklo'i a'uk rira vava'at verin Ia,
tevek Ia wean lahir Raja ma nfareta tamata ovi rorang Ia.
4 Ubu naflahar tamata ovi ralarira lalau,
tevek Ia veka nfaloling ralarira ra.*
5 Ubu naflahar tamata ovi rfakabava tenarira ra,
tevek Ia veka nfakena Ni tnorung a ma nala lanit ivavan verin ira.*
6 Ubu naflahar tamata ovi inar urun ma rira vava'at ra rmalola,
tevek Ia veka nala verin ira afa ovi rdava ra.*
7 Ubu naflahar tamata ovi ralarira lolin ma rlobang tamata liak ra,
tevek Ia veka nfaturu vali Ni silobang a verin ira.
8 Ubu naflahar tamata ovi ralarira rmerat urun,
tevek ira veka rarea Ia.*
9 Ubu naflahar tamata ovi rlobang tamata ma rotu ma malinan ewal ovu tamata liak ra,
tevek Ia veka nala ira ma reluk yanan ra.
10 Ubu naflahar tamata ovi tamata liak ra rwi-rwa ira tevek rira vava'at ra rmalola.
Ia Raja Ia ma nfareta tamata avyai.*
11 Ubu naflahar mia na'ut i tamata liak ra rfalak sian mia ovu rwi-rwa mia,
ovu vali rfalak sian mia ma rfangra narabira ra,
tevek myorang Ya'a.*
12 Lalan ana,
rwi-rwa vali Ubu Ni nabi ra,
ba ti ma rwi-rwa mia,
na ralabira lolin ovu inabira lolin watan,
tevek Ia veka naval ma dawan mia na'a bira rala lolin a,
na'a lanit ratan.”*
Tamata ovi rorang Yesus wearira sira ovu lyawan
13 “Mia ini weabira sira verin tamata ovi rna'a lanit ivavan a.
Wean i sira yai wol sarsiran roak,
na veka myot-ewal wean inba ma sarsiran?
Wol fyawan akataka roak,
ba rvatuk ia ovu rta sorat watan ia.
14 Mia ini weabira lyawan verin tamata ra na'a lanit ivavan.
Mia weabira vali kota i na'a vuar ratan,
ba wol rfonak nala ia.
15 Wol tamata isa ntutun damar ma nulang teri ia ovu suran.
Ia nfadoku na'a damar wan,
boma nyeba munuk tamata ovi rna'a rahan ralan a.
16 Wean vali inyai na'a afa lolin ovi myotu ra musti lyawan verin tamata ra,
boma rsi'ik afa lolin avyai ma rfadawang Yamabira i na'a lanit ratan a.”
Yesus nma ma nfakena lahir Musa ni inukun ra
17 “Mia deka minovak ne,
uma lanit ivavan a ma aling vatuk Musa ni inukun ra,
te afa ovi nabi rair ra,
na'uk uma ma ufakena lahir afa avyai.
18 Afa i ufalak verin mia ini,
kena urun!
Lanit ovu lanit ivavan nana'a obin,
na wol huruf te vaivatul isa tali Musa ni inukun ra veka rmamu,
ti naran i Ubu nfakena munuk afa ovi nfalak ra.
19 Ba wean inyai bi ufalak verin mia ne,
iki nangal kedan watan afa ovi Ubu nfareta roak,
ma nair tamata ra ma rotu vali wean inyai,
na tamata yai veka ko'u rahi lia munuk tali Ubu Ni tamata ovi rna'a Ni Fareta a.
Na'uk tamata iki watan not-orang afa ovi Ubu nfareta roak ovu nair afa avyai verin tamata liak,
na tamata yai veka dawan ia na'a Ubu Ni Fareta a.
20 Ba ufalak verin mia ne,
ralabira ra musti rmalola rahi dida dawan ovi rair Musa ni inukun ra,
ovu tamata ovi rtali sidovung Farisi.
Na'uk ne wahal,
na wol wabira na'a Ubu Ni Fareta a.”
Yesus nair ita ma deka tsingrova ita
21 “Mia mkya'a roak ne,
lan a Ubu nfalak na'a Ni Surat Ralan verin ubud-nusid ra ne,
deka msyifedan,
tevek wean i tamata isa nsifedan,
na musti rfaleka inukun verin ia.
22 Na'uk ufalak verin mia ne,
tamata iki watan nangrova tamata liak,
na Ubu veka nukun ia.
Tamata iki watan nangrihi ma nworuk-nwak tamata liak,
na veka rala ia ma ndiri dawan fareta Yahudi waharira ralan ra ma rfaleka inukun verin ia.
Tamata iki watan nfalak tamata liak ne,
nboda-nbadi,
na nahu roak linga'an i nti yafwan kakiwal.
23 Ba wean i tamata isa mane ti nfadoku ni korban* na'a wan i ba'i rasnuri rira korban ra na'a,
na'uk nangnanang ne,
tamata isa ralan sian ia, na
24 nfadok-aling ni korban yai,
ma ti notu lolin ovu tamata yai veki,
beti newal ia ma ti nfadoku ni korban yai verin Ubu.
25 Ba wean i tamata isa nala oa nti wan i ba'i rfaleka inukun verin tamata ra,
na yarak ti motu ma lolin ewal ovu ia,
ma deka ti maran wan yai.
Tevek wean i wol motu ma lolin ewal ovu ia,
na tamata yai veka nala oa ti verin tamata i ba'i nfaleka inukun verin tamata ra.
Tamata inukun yai veka nala oa ti ma ra'abu'i oa.
26 Afa i ufalak verin mia ini,
kena urun!
Wean i wol bwahir nala mu utan ra obin,
na wol rfatalik oa tali bu'i yai.”
Yahudi rira mela falurut ra rasnuri tamata ra rira korban ra na'a wan i ba'i rasnuri rira korban ra na'a (Matius 5:23)
Yesus nfalak ma tamata ovi rsifa roak, deka rtuba ovu tamata ovi wol awarira verin ira
27 “Mia mkya'a roak ne,
lan a Ubu nfalak na'a Ni Surat Ralan ne,
‘Wean i msyifa roak,
na deka mtyuba ovu tamata ovi wol awabira verin ira.’*
28 Na'uk ufalak verin mia ne,
tamata iki watan wean i nsi'ik vata isa ma ka'i norang ni ininan sian ma inan ma ntuba ovu vata yai,
na na'a ralan a ntuba roak ovu vata yai.
29 Ba wean i matabira lihir mela notu ma myotu salasilan,
na mkyivul vatuk ia.
Ni lolin a matabira lihir watan,
tevek wol lolin lahir ma rvatuk fatnemung tenabira na'a yafwan kakiwal.
30 Wean inyai vali,
na wean i limabira mela notu ma myotu salasilan,
na myetal vatuk ia.
Ni lolin a limabira lihir watan,
tevek wol lolin lahir ma rvatuk fatnemung tenabira na'a yafwan kakiwal.”
Yesus wol ntorung ma vata ovu brana rsitalik
31 “Ubu Ni vaivatul ra rfalak vali ne,
‘Wean i brana isa mane ntalik awan a,
na ia musti nasusan ni surat sitalik veki ma nala verin ia.’*
32 Na'uk ufalak verin mia ne,
wean i brana awan ntuba ovu tamata liak,
na bis ntalik ia.
Na'uk wean i awan a wol notu sala,
ma brana ntalik watan ia,
na brana yai notu ma awan a notu sala,
wean lahir i awan ntuba ovu tamata i wol awan verin ia.
Ba wean i brana iki watan nsifa ovu vata i brana ntalik roak ia yai,
na ia* notu sala vali,
wean lahir i ntuba ovu tamata i wol awan verin ia.”
Yesus nfalak ma deka tafwaba
33 “Mia mkya'a roak ne,
lan a Ubu nfalak na'a Ni Surat Ralan verin ubud-nusid ra ne,
‘Wean i mifwaba afa isa verin Ubu,
na myot-orang lahir afa i mifwaba roak yai verin Ia.’*
34 Na'uk ufalak verin mia ne,
deka mifwaba na'a afaka watan.
Deka myala lanit ratan al mifwaba,
tevek inyai Ubu wan i ndoku ma nfareta a.
35 Deka myala lanit ivavan ma al mifwaba,
tevek Ubu nfareta vali na'a inyai.
Deka myala Yerusalem ma al mifwaba,
tevek inyai Raja Dawan Ni kota a.
36 Deka myala ulubira ra al mifwaba,
tevek wol bira ngrebat ma myotu ma bira vut van isa vali nangiar te nangtoan.
37 Ni lolin a,
fyalak watan ne,
‘O'u,
ya'a veka otu,’
te fyalak watan ne,
‘Wahal,
ya'a wol otu.’
Wol lolin ma mifwaba al fyangrebat bira vaivatul ra,
tevek myotu wean inyai,
na inyai ntali watan nitdawan a.”
Yesus nair ma deka tsiaval ita na'a afa ovi tala te totu verin tamata ra
38 “Mia mkya'a roak ne,
lan a Ubu nfalak na'a Ni Surat Ralan ne,
‘Iki not-visal matam a,
na mot-visal vali matan a,
ovu iki nfarofuk nifam a,
na fwarofuk vali nifan a.’*
39 Na'uk ufalak verin mia ne,
deka myaval tamata ovi rotu sian mia.
Wean i tamata isa ntafitil fifim mela,
na mala vali fifim balit a ma ntafitil.
40 Wean i tamata isa nmangadu oa ma miti fareta,
tevek inan ma nala mu ravit a,
na mala vali mu ravit blawat verin ia.
41 Wean i tamata isa nkiwal oa ma bwara ni vnuat ra ma byana kil isa,
na bwara ma ti naran kil irua.
42 Wean i tamata isa nera afa tali oa,
na mala verin ia,
ovu wean i tamata isa inan ma ner-teri afa boku tali oa,
na deka mula'ing ia.”
Tlobang tamata ovi rira sian ita
43 “Mia mkya'a roak ne,
lan a Ubu nfalak na'a Ni Surat Ralan ne,
‘Mlyobang tamata liak ra,
na'uk wol inabira lahir tamata ovi rira sian mia.’*
44 Na'uk Ya'a ufalak verin mia ne,
mlyobang tamata ovi rira sian mia,
ovu miflurut verin tamata ovi rwi-rwa mia.
45 Tevek wean i mlyobang tamata ovi rira sian mia,
na fyaturu roak ne,
Ubu i nleal lanit ratan veka nala mia ma neluk yanan,
tevek Ia notu ma lera vanan verin tamata ra munuk,
velik ne sian te lolin ira.
Ia nala da'ut verin tamata ovi rira vava'at ra rmalola,
ovu verin tamata ovi rira vava'at ra wol rmalola.
46 Wean i mlyobang watan tamata ovi rlobang mia,
na deka minovak ne,
Ubu veka nala akataka verin mia.
Velik ne tamata ovi ba'i rera babahir kulu rira vava'at ra sian,
na'uk rlobang vali tamata ovi rlobang ira.
47 Wean i mtyuli bira kida ra watan,
na afa i myotu yai veka lolin lia aka?
Tamata ovi wol rorang Ubu rotu vali wean inyai te wahal?
48 Ba dida vava'at ra musti rmalola,
wean Yamadida i na'a lanit ratan,
Ia wol Ni salasilan lahir.”