Nitdawan nlabir teman Yesus
1 Ira rotu afa avyai munuk roak,
beti Ubu Ni Roh novun Yesus nti wan lean vu dawan isa ma nitdawan nlabir teman* Ia.
2 Yesus ntolat* ti naran amar vutfa'at,
ba nablafar urun.
3 Ba nitdawan nma ma nlabir teman Ia ma nfalak ne,
“Wean i Ubu Yanan urun Oa,
na eka motu ma vatu ovi rna'a afamtahan ma muan.”
4 Na'uk Yesus nfalak ne,
“Wol kena,
tevek rtulis roak na'a Surat Ralan ne,
‘Tamata ra wol rva'at tali afamtahan watan,
na'uk rva'at vali wean i rorang Ubu Ni vaivatul ra munuk.’ ”*
5 Nata nitdawan novun ewal Yesus ma rati Yerusalem,
kota i nmerat urun*,
ma nfadoku Ia na'a Yahudi rira Rahan Dawan Falurut ni wan i karatat lia munuk a.
6 Ia nfalak verin Yesus ne,
“Wean i Ubu Yanan urun Oa,
na eka muswatil tali ini msuta,
tevek rtulis roak na'a Surat Ralan ne,
‘Ubu veka nfareta Ni sansinir ra rtali lanit ratan ma rsi'ik ma lolin Oa.
Ira veka rvelar limarira ra ma rtada Oa,
boma eam ra deka rkena vatu.’ ”*
7 Yesus nfalak verin nitdawan ne,
“Na'uk rtulis vali roak na'a Surat Ralan ne,
‘Tamata ra deka rlabir teman Duila'a,
tevek Ia Ubu i rorang a.’ ”*
8 Nata,
nitdawan novun ewal Yesus ma rti vuar karatat isa ni tutul ma nfaturu negara ovi rna'a lanit ivavan munuk ovu rira metan ra,
verin Ia.
9 Ia nfalak verin Yesus ne,
“Ya'a veka ala munuk afa ovi verin Oa,
wean i msangatur ma mraning Ya'a.”
10 Yesus nfalak ne,
“Nitdawan,
muti vatuk oa tali wahang ralan ini kikyai,
tevek rtulis roak na'a Surat Ralan ne,
‘Msangatur ma mraning a'uk Duila'a,
mu Ubu i morang a.’ ”*
11 Ba nitdawan nti talik lahir Yesus,
na Ubu Ni sansinir ra rtali lanit ratan rma ma rfatuang Ia ma rlobang Ia.
Yesus nfabana Ni karya
12 Ti ma Yesus nrenar ne,
rtaha roak Yohanes ma ra'abu'i ia,
na nti talik propinsi Yudea ma newal Ia nti propinsi Galilea.
13 Yesus nahu ahu Nazaret ma nbana nti ahu Kapernaum ma nleal inyai.
Kapernaum na'a danau Galilea nelan a,
na'a Yahudi rira arun dawan isa naran Zebulon ovu arun dawan isa vali naran Naftali,
rira lanun a.
14 Yesus nleal inyai,
boma nfakena lahir vaivatul ovi lan a Ubu nfalak verin nabi Yesaya ne,
15 “Arun dawan Zebulon ovu arun dawan Naftali rira lanun a,
sarseri ovu danau Galilea,
nana'a oar Yordan ni lihir a.
Tamata rivun ovi wol Yahudi ra rleal vali propinsi Galilea.
16 Lan ana,
tamata ra rna'a dedan ralan obin,
na'uk rarea lyawan i dawan ila'a.
Tamata ovi rleal wan matmatan a,
ira rarea lyawan yai.”*
17 Na'ut inyai vali,
na Yesus nfamalik Ubu Ni vaivatul ra ma nfalak ne,
“Myahil ma mtyalik tali bira salasilan ra,
tevek sarseri roak ma Ubu nma ma nfareta tamata ra wean lahir Raja.”
Yesus nera tamata sinat roal ifa'at ma rorang Ia
18 Amar isa,
na Yesus nbana na'a danau Galilea nelan a,
na nrea tamata irua,
iya'an iwarin ira.
Isa naran Simon i rfanara vali ia ne,
Petrus,
ovu isa vali naran Andreas.
Ira sinat roal ira,
ba rfasuka rira jaring na'a inyai ma al rdava ian.
19 Ba Yesus nfalak verin ira ne,
“Mya ma myorang Ya'a!
Mia wol fyasuka jaring roak ma nala ian,
tevek ala karya verin mia ma myair tamata ra ma rorang Ya'a.”
20 Ba rfadoku lahir rira jaring ra na'a inyai ma rorang Ia.
21 Nata Yesus nban-ewal ma nsi'ik tamata liak irua vali,
iya'an iwarin ira.
Nararira Yakobus ovu Yohanes,
yamarira naran Zebedeus.
Ira rdoku ovu yamarira na'a rira kumal a ma roar rira jaring ra,
na Yesus nera ira ma rorang Ia.
22 Ba irua rsuta talik lahir yamarira na'a kumal yai ma rorang Ia.
Yesus nsiair ovu notu ma tamata ra lolin ewal ira
23 Nata Yesus nban-lilit propinsi Galilea ma nsiair na'a Yahudi rira rahan falurut ra.
Ia nfamalik Ubu Ni Ivar Lolin i nfalak ne,
Ubu veka nfareta tamata ra wean lahir Raja.
Yesus notu ma lolin vali tamata ra tali rira suhut ra,
ovu notu ma lolin vali tamata ovi tenarira ra rmafun.
24 Ivar i nfamalik Yesus yai ti nsoru propinsi Siria roak,
ba tamata rivun rma ma rtuan Ia.
Ira rovun tamata ovi rira suhut ra,
ovi rfarnuang wawa'uk ra,
laklukut ra,
tamata ovi nait sian ra rleal ira,
ovu boku rira suhut manut a,
rma ma Yesus notu ma lolin ewal ira.
25 Ba tamata rivun ila'a rban-orang Yesus.
Boku rtali Galilea,
boku rtali Dekapolis,
ovu boku vali rtali Yerusalem.
* Boku rtali propinsi Yudea,
ntafal vali boku rtali oar Yordan ni lihir timur.