Yohanes i nbaptis tamata ra nfalak ma tamata ra rahil ma rtalik tali rira salasilan ra
1 Varat ifira relak roak,
na Yohanes i nbaptis* tamata ra nti wan lean vu dawan na'a propinsi Yudea ma nfamalik Ubu Ni vaivatul ra.
Ia nfalak ne,
2 “Myahil ma mtyalik tali bira salasilan ra,
tevek sarseri roak ma Ubu nma ma nfareta tamata ra wean lahir Raja.”*
3 Lan ana,
nabi Yesaya nfamalik roak Yohanes na'a Surat Ralan ne,
“Tamata isa nafwak na'a wan lean vu dawan,
ma nfalak ne,
‘Misusan linga'an verin Duila'a,
fyamalola linga'an verin Ia.’ ”*
4 Yohanes ini ni ravit blawat i noru a,
rotu tali afwatan isa naran unta,
vulun ra,
ovu ni ngesa a rotu tali afwatan ulin.
* Ni fana'an a kabina ovu wenan vahan i na'a nangan a.
5 Tamata rivun rma wan lean vu dawan yai.
Boku rtali Yerusalem ovu wan ovi rna'a Yudea ra munuk,
ovu vali boku rtali ahu ovi rna'a oar Yordan ni lihir timur ovu lihir varat a.
Ira rma ma rarenar afa ovi Yohanes nfalak ra.
6 Ira rahil ma rtorung rira salasilan ra,
ba Yohanes nbaptis ira na'a oar Yordan.
7 Tamata rivun rtali Yahudi rira sidovung isa naran Farisi,
ovu sidovung isa vali naran Saduki,
rma ma rera ma Yohanes nbaptis ira.
Ia nsi'ik ira ma nfalak ne,
“Hoi,
mia sian urun mia wean nifa isa naran aru!
Bira vava'at ra wol kena ovu bira vaivatul ra.
Iki nfalak verin mia ne,
wean i rbaptis mia,
na Ubu Ni inukun wol nkena mia?
8 Ba fyaturu lahir na'a bira vava'at ra ne,
myahil ma mtyalik roak tali bira salasilan ra!
9 Deka minovak na'a ralabira ra ne,
ububir-nusibira Abraham,
ba Ubu veka wol nukun mia!
Mryenar ma lolin afa ovi ufalak ini!
Ubu bis notu watan ma Abraham yanan ra rtali vatu ovi!
10 Ubu Ni amar sarseri roak ma nukun tamata ra.
Ni inukun a wean tamata i ntaha savi ma veka netal aa ra tali rira wa'ar ra.
Aa ovi vuarira wol lolin a,
na veka netal vatuk ira ma nala ira rti yafu ralan.
11 Ubaptis mia ovu wear ma nfaturu ne,
myahil ma mtyalik roak tali bira salasilan ra ma myorang Ubu,
na'uk Ia i veka nma yai Ni ngrebat a nlia ya'a.
Ya'a wol verang a ratang Ia,
ba wol inovan lahir ma aling Ni tatea ra.
Ia veka nbaptis mia ovu Ni Roh a ovu yafu.*
12 Ia wean tamata isa i ntaha fanan lafan ma al ntafi gandum.
Gandum vatul ovi lolin ra nfadok-aling ira na'a wan i ba'i rfadoku gandum ra na'a,
na'uk ovi sian ra ovu kukan ra,
nasnuri ira na'a yafu i wol nmat-nala.”
Yesus nma ma Yohanes a nbaptis Ia
13 Na'ut inyai,
na Yesus ntali propinsi Galilea nti oar Yordan,
boma Yohanes nbaptis Ia.
14 Na'uk Yohanes nafena.
Ia nfalak ne,
“Velik aba Oa bwaptis ya'a,
tevek wol verang a ratang Oa.
Notu afakinimi mwa ma mera verin ya'a ma ubaptis Oa i?”
15 Na'uk Yesus nfalak verin ia ne,
“Motu watan wean i ufalak yai,
boma mot-orang munuk afa ovi Ubu ralan nfalak a.”
Ba Yohanes norang watan ma nbaptis Ia.