Tamata ovi rira kaka'a dawan ma al rfaneak nara ra, rtali timur rma ma rfadawang Yesus
1 Rarali Yesus na'a ahu isa naran Betlehem,
na'a propinsi Yudea.
Na'ut inyai,
na raja Herodes ntaha fareta.
Rarali roak Yesus,
beti tamata boku rtali wan raroa na'a lihir timur* veli rma kota Yerusalem.
Tamata avyai rira kaka'a dawan ma al rfaneak nara ra.
2 Ira rorat tamata ovi rna'a inyai ne,
“Kasiko'u yanat i beti rarali Ia yai nana'a inba?
Tamata Yahudi ra rira raja verin Ia.
Ami amsi'ik roak na'a lihir timur ne,
nara isa notu faneak ne rarali roak Ia,
ba amama ini ma amsangatur ma amraning Ia.”
3 Ti ma raja Herodes nrenar afa avyai,
na sara wor watan ia.
Tamata ovi rna'a Yerusalem ra munuk wean vali inyai.
4 Ba nera Yahudi rira dawan mela falurut ra ovu dawan ovi rair Musa ni inukun ra ma rasdovu ira,
beti norat ira ne,
“Raja i ntevut dida salasilan ra,
veka rarali Ia na'a inba?”
Raja Herodes nasdovu Yahudi rira dawan mela falurut ra (Matius 2:4)
5 Ira rfalak ne,
“Veka rarali ia na'a Betlehem na'a propinsi Yudea,
tevek nabi isa ntulis roak na'a Surat Ralan ne,
6 ‘O Betlehem,
oa mna'a arun dawan Yehuda rira lanun.
Oa ahu ko'u watan na'a Yehuda,
na'uk mu dawan nlia munuk ahu ra,
tevek dawan isa veka nvotuk tali oa ma nfareta ovu nsi'ik ma lolin Ning tamata Israel ra.’ ”*
7 Herodes nrenar munuk afa avyai,
na nera tamata kaka'a dawan avyai,
ma rasdovu fanfonak ira.
Rasdovu ira,
beti norat ira ma al ndava ne,
rarea nara yai lafira.
8 Nata nsinir ira ma rti Betlehem,
ovu nfalak verin ira ne,
“Miti ma mdyava ma lolin kasiko'u yanat yai ne,
na'a inba.
Wean i mdyav-nala roak ia,
na fyaivar verin ya'a,
boma uti ma usangatur ma uraning vali Ia!”
9,10 Rarenar munuk afa ovi Herodes nfalak ra,
beti rti.
Ira rti,
na rarea ewal nara i lan rsi'ik na'a lihir timur yai,
ba ralarira lolin urun.
Nara yai nbana ula ia tali ira,
beti na'a teri na'a wan i rarali kasiko'u yanat yai.
11 Ba rti rahan ralan ma rsi'ik kasiko'u yanat yai ovu renan a Maria,
ma rsangatur ma raraning Ia.
Nata rvadil rira sadawan ra ma rala afa ovi fyawar urun verin kasiko'u yanat yai.
Ira rala masa ovu afa irua i fyawar ovu voarira lolin,
nararira mur ovu kemenyan.
12 Na'uk na'a rira mifi a,
na Ubu nfalak teri ma deka rewal ira rti verin Herodes,
ba rban-talik wan yai,
na'uk rahu linga'an liak watan ma rti ewal rira ahu.
Yusuf ovu ni rahan teta rafla rti Mesir
13 Ti ma tamata ovi rira kaka'a dawan avyai rban-talik wan yai,
na Duila'a Ni sansinir isa tali lanit ratan nfavotuk tenan a verin Yusuf na'a mifi.
Ia nfalak ne,
“Yusuf!
Bwatar kikyai ma movun kasiko'u yanat yai ovu renan a ma mifla talik wan ini ma miti Mesir.
Mnya'a ineri nata ti naran i ufalak ma myewal mia,
tevek Herodes ndava mane nfedan Ia.”
14 Ovan yai,
na Yusuf novun kasiko'u yanat yai ovu renan a ma irmunuk rti Mesir.
15 Ira rna'a inyai ti naran i raja Herodes nmata.
Afa yai nvotuk munuk,
boma nfakena lahir vaivatul ovi lan Duila'a nfalak verin nabi isa ma ntulis ne,
“Ya'a era roak Yanak ma nti talik Mesir.”*
Herodes nanovak mane nfedan Yesus
16 Ti ma Herodes nka'a roak ne,
tamata kaka'a dawan avyai rlabir ia,
na nangrova urun,
ba nsinir ni suldadu ra ma ti rfedan munuk kasiko'u brana ovi rira varat irua nsuta,
na'a Betlehem ovu ahu ovi rna'a inyai.
Herodes nka'a roak ne nara yai nvotuk na'a amar aka,
tevek norat roak tamata kaka'a dawan avyai.
17 Afa sian ovi Herodes notu ra rfakena lahir afa ovi lan a nabi Yeremia ntulis ne,
18 “Tamata isa nvakar ovu nfaktanit ma vain a dawan urun na'a ahu isa naran Rama.
Rahel nvakar yanan ra ovu nafena ma nmolu,
tevek yanan ra rmata munuk roak.”*
Yusuf novun ni rahan teta ma rti talik Mesir
19 Na'ut i raja Herodes nmata ana,
Yusuf,
Maria ovu Yesus rna'a Mesir obin,
na Duila'a Ni sansinir isa ntali lanit ratan nma ma nfavotuk tenan a verin Yusuf na'a mifi,
ma nfalak ne,
20 “Herodes ovu ni tamata ovi rvolan mane rfedan kasiko'u yanat yai rmata munuk roak,
ba bwatar ma movun ia ovu renan a ma myewal mia miti Israel rira lanun.”
21 Ba Yusuf nbatar ma novun kasiko'u yanat yai ovu renan a ma rewal ira rti Israel rira lanun.
22 Na'uk ti ma Yusuf nrenar ne,
Arkhelaus nkati roak yaman i Herodes ma nfareta na'a Yudea,
na nbobar ma nti inyai.
Nata Yusuf ni mifi isa vali ne,
Ubu nfalak verin ia ma novun ni rahan teta a ma rti propinsi Galilea.
23 Ba rti raran ineri,
na rleal ahu isa naran Nazaret.
Afa yai nvotuk,
boma nfakena lahir afa ovi lalan a nabi ra rfamalik roak na'a Raja i ntevut dida salasilan ra.
Ira rfalak ne,
“Tamata ra veka rfalak ne,
tamata Nazaret Ia.”
Yusuf, Maria ovu Yesus rti ahu Nazaret (Matius 2:23)