Tamata ovi Yesus nera lan ira ma rorang Ia
1 Amar isa,
na Yesus ndiri danau Genesaret* nelan a,
na tamata rivun rma,
tevek inar ma rarenar i nfamalik Ubu Ni vaivatul ra.
Rivun ira,
ba rdiri ma rsidekin ira.
2 Ia nsi'ik kumal irua rna'a danau yai nelan a.
Tamata ovi ba'i rdava ian ovu kumal irua yai rsuta roak ma rfamerat rira jaring ra.
3 Ia nrata Simon ni kumal a.
Ba nsinir Simon ma nala'ing kumal yai nroal kedan a,
beti ndoku ma nair tamata rivun avyai.
4 Ti ma nsiair munuk,
na nfalak verin Simon ne,
“Bwahi muroal wan i bilaman a ma fyasuka bira jaring ra,
boma rala ian.”
5 Simon nfalak ne,
“Tuan Guru,
indean a,
na amdava ian nata varverak nala ami,
na'uk wol amwadar akataka.
Na'uk Oa msinir ami,
ba veka amfasuka ewal jaring ra.”
6 Ti ma rfasuka roak rira jaring ra,
na rala ma ian rivun urun i lahir,
ba rira jaring ra mulai ma ramsat roak.
7 Ba rotu faneak ovu limarira ra,
boma rira kida ovi rna'a kumal liak a rma ma rlobang ira.
Ira rma ma irmunuk rfak ian avyai na'a kumal irua yai,
ma ti nata sarseri mane rakduvul.
8 Simon i Yesus nfanara vali ia ne Petrus nsi'ik afa yai,
na nsangatur ma nsoak wahan a na'a Yesus wahan ralan a ma nfalak ne,
“Duila'a,
muti talik ya'a,
tevek tamata salasilan ya'a!”
9 Simon ovu ni kida avyai rtalkaka lahir,
tevek rwadar urun i lahir.
10 Simon ni kida Yakobus irua Yohanes i yamarira verin Zebedeus,
rtalkaka vali.
Yesus nfalak verin Simon ne,
“Deka bwobar!
Tali amar ini,
na oa wol fwasuka jaring roak ma nala ian,
tevek ala karya verin oa ma mair tamata ra ma rorang Ya'a.”
11 Ba Simon ovu ni kida ra resa rira kumal ra,
beti rban-talik lahir rira afakataka munuk ma rorang Yesus.
Yesus notu ma tamata i ni suhut ngabaa lolin ewal ia
12 Amar isa,
na Yesus nti kota isa.
Na'a inyai,
na tamata isa tenan a nngora lahir ovu suhut ngabaa.
* Na'ut i nsi'ik Yesus,
na nsangatur ma wahan nkena lanun na'a Yesus wahan ralan a.
Ia nera lablobang verin Yesus ne,
“Duila'a,
wean i mtorung,
na fara motu ma lolin ewal ya'a.”
13 Ba Yesus nlauk liman a ma nkena ia,
beti nfalak ne,
“Ya'a utorung ma ulobang oa,
ba lolin roak oa!”
Brian munuk,
na tamata yai lolin lahir ia tali ni suhut a.
14 Nata Yesus nfalak teri ma tamata yai deka nfamalik afa ini verin tamata iki watan,
ovu nfalak vali ne,
“Muti ma fwaturu tenam a verin Yahudi rira mela falurut a,
ma nsi'ik ne,
lolin roak oa.
Beti mala mu korban verin Ubu,
wean i rfalak roak na'a Musa ni inukun ra,
boma tamata ra rka'a ne,
lolin roak oa.”
15 Na'uk ivar na'a afa ovi Yesus notu ra nti nsoru wan inba watan,
ba tamata rivun rma ma rarenar afa ovi nair ra,
ovu rera ma Ia notu ma lolin ewal ira tali rira suhut ra.
16 Na'uk Yesus ba'i nfaroa Ia tali ira ma nti wan i wol tamata rna'a ma naflurut.
Yesus notu ma tamata laklukut isa lolin ia
17 Amar isa,
na'ut i Yesus nsiair,
na tamata boku rtali sidovung Farisi ovu Yahudi rira dawan ovi rair Musa ni inukun ra rdoku vali inyai.
* Ira rtali ahu ovi rna'a propinsi Galilea,
propinsi Yudea ovu vali kota Yerusalem.
Duila'a Ni ngrebat a nana'a Yesus ma notu ma tamata ovi rira suhut ra,
lolin ewal ira.
18 Na'ut inyai,
na tamata boku rovun tamata laklukut isa na'a ni dari i ntuba a.
Ira rdava linga'an fafira roak mane rovun tamata yai nti rahan ralan,
boma rfanuba ia na'a Yesus wahan ralan a.
19 Na'uk tamata rivun da'in rna'a inyai,
ba wol rovun nala ia nti rahan ralan.
Ba ira rovun ia rarata rahan ratan,
* beti ra'ar rafat boku ma rtolar ia ovu ni dari a nsuta tamata rivun avyai fruarira ra,
ma nana'a lahir Yesus wahan ralan a.
Ira rtolar tamata laklukut tali rahan ratan (Lukas 5:19)
20 Na'ut i Yesus nsi'ik tamata avyai,
na nka'a ne,
rira inorang a dawan,
ba nfalak verin tamata laklukut yai ne,
“Baba,
fiang ini a'i vatuk roak mu salasilan ra.”
21 Yahudi rira dawan ovi rair Musa ni inukun ra ovu tamata ovi rtali sidovung Farisi ranovak na'a ralarira ra ne,
“Tamata ini iki Ia ma nfalak sian Ubu?
Wol tamata isa bisma na'i vatuk tamata rira salasilan ra.
Ubu sa'i na'i vatuk.”
22 Na'uk Yesus nka'a lahir afa i ranovak na'a ralarira ra,
ba nfalak verin ira ne,
“Notu afakinimi minovak wean inyai na'a ralabira ra?
23 Inabira ma ufalak verin tamata laklukut yai ne,
‘A'i vatuk roak mu salasilan ra,’
te ufalak ne,
‘Mdiri ma bwana kikyai’?
Afaka maraan ma ufalak na'a afa irua ini?
24 Ya'a,
Tamata Yanan Ya'a,
mane ufaturu verin mia,
boma mkya'a ne,
na'a lanit ivavan ini,
na Ya'a,
Tamata Yanan Ya'a Ning ngrebat ma a'i vatuk tamata rira salasilan ra.”
Ba Yesus nfalak verin tamata laklukut yai ne,
“Ufalak verin oa ma mdiri ovu mlulung mu dari a,
ma mewal oa muti mu rahan kikyai!”
25 Brian munuk,
na tamata yai nbatar lahir ma nlulung ni dari a na'a waharira ralan ra,
beti newal ia nti ni rahan.
Na'a ni banbanan a,
na nfadawang Ubu.
26 Tamata ra munuk rtalkaka,
ba rfadawang Ubu.
Ira rbobar vali ma rfalak ne,
“Amar ini,
ita tsi'ik lahir afa ovi tamata ra wol rot-nala!”
Yesus nera Lewi ma norang Ia
27-28 Nata Yesus nban-talik wan yai ma nati murin,
na nsi'ik tamata isa i ba'i nera babahir kulu,
naran Lewi.
Tamata yai ndoku rahan i ba'i rera babahir kulu na'a.
Yesus nfalak verin ia ne,
“Morang Ya'a!”
Ba Lewi ndiri ma nban-talik lahir ni karya ma norang Yesus.
29 Lewi notu snoba dawan verin Yesus na'a ni rahan a.
Tamata rivun ovi ba'i rera babahir kulu ovu tamata liak ra rma ma irmunuk rafna'an ovu Yesus.
30 Ti ma tamata Farisi ra ovu rira dawan ovi rair Musa ni inukun ra rsi'ik afa avyai,
na rorat Yesus Ni tamata ra ne,
“Notu afakinimi mifna'an-mifnenu ovu tamata ovi ba'i rera babahir kulu ra,
ovu tamata salasilan ra?”
31 Yesus nfalak verin ira ne,
“Tamata ovi wol rira suhut ra wol rti dokter,
na'uk tamata ovi rira suhut ra a'uk sa'i rti dokter.
32 Ya'a wol uma ma era tamata ovi rira vava'at ra rmalola,
na'uk uma ma era tamata salasilan ra,
boma rahil ma rtalik tali rira salasilan ra.”
Yesus Ni tamata ra wol rtolat na'ut i novun ira obin
33 Tamata boku rfalak vali verin Yesus ne,
“Tamata ovi rorang Yohanes i nbaptis tamata ra ba'i rtolat ovu raflurut.
Tamata ovi rtali sidovung Farisi a rtolat ovu raflurut vali wean inyai.
Na'uk Mu tamata ovi rorang Oa rafna'an ovu rafnenu.”
34 Yesus nala vaivatul kamkuma ma nfalak verin ira ne,
“Na'a snobsifa isa,
wean i brana i mane nsifa irmunuk ni kida ra obin,
na musti rtolat?
Wahal!*
35 Na'uk ni amar veka nma,
ma tamata ra rala brana i mane nsifa yai tali ni kida ra.
Na'ut inyai,
beti rtolat.”
Vaivatul kamkuma ovi rfamalik ne, wol lolin ma rsileti afa ovi Yesus nair ra ovu Yahudi rira adat ra
36 Yesus nala vaivatul kamkuma isa ewal ma nfalak vali ne,
“Wol tamata isa nkamsat ravit ngorva'an isa ma nlavan na'a ravit i mnanat a.
Wean i notu wean inyai,
na ravit ngorva'an yai namsat,
ovu vali ravit i mnanat yai wol inovan ovu maloli i rlavan na'a.
37-38 Wean vali inyai,
na wol tamata isa vali nli'i anggur ngorva'an na'a sadawan mnanat i rotu tali karba ulin a,
tevek anggur ngorva'an yai veka notu ma sadawan yai naksat ma anggur a nvoak munuk,
ovu sadawan veka nakvisal lahir.
Ba musti tli'i anggur ngorva'an a na'a sadawan ngorva'an vali.
39 Wol tamata isa inan ma nenu anggur ngorva'an,
wean i nenu roak anggur i mnanat a,
tevek ia veka nfalak ne,
‘Anggur i mnanat yai manminak lia anggur i ngorva'an a.’ ”