Yesus notu ma tamata isa i ni suhut ngabaa lolin ewal ia
1 Ti ma Yesus nsuta tali vuar,
na tamata rivun rorang Ia.
2 Na'ut inyai,
na tamata i ni suhut ngabaa nma ma nsangatur na'a Yesus wahan ralan a,
ma nfalak ne,
“Duila'a,
wean i mtorung,
na fara motu ma lolin ewal ya'a.”*
3 Ba Yesus nlauk liman a ma nkena ia ma nfalak ne,
“Ya'a utorung ma ulobang oa,
ba lolin roak oa!”
Brian munuk,
na tamata yai lolin lahir ia tali ni suhut a.
4 Nata Yesus nfalak verin ia ne,
“Mungnanang ma deka fwamalik afa ini verin tamata iki watan,
na'uk ti ma fwaturu tenam a verin mela falurut a ma nsi'ik ne,
lolin roak oa.
Mala mu korban verin Ubu,
wean i rfalak roak na'a Musa ni inukun ra,
boma tamata munuk rka'a ne,
lolin roak oa.”
Roma rira suldadu dawan isa norang Yesus
5 Yesus nbana nti ahu Kapernaum.
Roma rira suldadu dawan isa* nma ma ntuan Ia,
ma nera lablobang verin Ia ne,
6 “Duila'a,
ya'a ning tamata sansinir nawar ma dawan ia ma naklukut,
ba ntuba watan rahan eri.”
Yesus nangrihi ovu Roma rira suldadu dawan isa (Matius 8:6)
7 Ba Yesus nfalak verin ia ne,
“Baba,
Ya'a ki uti mu rahan ma otu ma lolin ia.”
8 Na'uk suldadu dawan yai nfalak ne,
“Duila'a,
ya'a wol verang a ratang Oa,
ba deka muti ning rahan.
Fwalak watan vaivatul isa na'a ini,
na ning tamata sansinir veka lolin lahir ia.
9 Uka'a lahir ne,
afa ovi fwalak ra kena,
tevek usoak vali verin ning dawan a,
ovu suldadu ra rsoak vali verin ya'a.
Wean i ufareta suldadu isa ma ufalak ne,
‘Muti’,
na ia nti.
Wean i ufalak verin isa vali ne,
‘Mwa ini’,
na ia nma.
Wean i ufalak verin ning tamata sansinir a ne,
‘Mkarya afa ini’,
na ia notu.”
10 Yesus nrenar afa ovi suldadu dawan yai nfalak a,
na ntalkaka,
ma nfalak verin tamata ovi rban-orang Ia ne,
“Afa i ufalak verin mia ini kena urun!
Tamata ini ni inorang a dawan urun.
Na'a Israel,
na wol utuan tamata isa obin ni inorang a dawan wean tamata ini!
11 Ufalak vali verin mia ne,
tamata ovi wol Yahudi ra veka rtali timur ovu rtali varat rma ma rdoku rafna'an ovu Abraham,
Ishak ovu Yakub,
na'a Ubu Ni Fareta a.*
12 Na'uk,
velik ne tali lalan Ubu nera tamata Yahudi ra ma rleal Ni Fareta a,
Ia veka nvatuk ma rivun vali ira ti rna'a dedan ralan i raroa tali Ia.
Ira veka rvakar lalawatan ovu nifarira ra rsitutu ira,
tevek rfarnuang wawa'uk i dawan a.”*
13 Nata Yesus nfalak verin ia ne,
“Mewal oa kikyai,
tevek morang urun ne,
veka otu ma mu tamata sansinir yai lolin ia.
Wean urun i morang yai,
ba mu sansinir a lolin roak ia.”
Na'ut inyai,
na tamata sansinir yai lolin lahir ia.
Yesus notu ma tamata rivun lolin ira
14 Nata Yesus nti Petrus ni rahan ma nsi'ik,
na Petrus avan a ntuba watan,
tevek tenan ngnea.
15 Ti ma Yesus ntaha vata yai liman a,
na lolin lahir ia.
Itvata yai nbatar lahir ma ti nasusan afamtahan verin Ia ma na'an.
16 Ya'i laflofan roak,
na tamata ra rovun tamata rivun rma verin Yesus.
Tamata avyai nait sian ra rleal ira.
Yesus nfareta nait sian ra ma rti rtalik tamata avyai,
ovu notu ma tamata ovi rira suhut ra lolin ewal ira.
17 Afa ovi Yesus notu ra rfakena lahir Ubu Ni vaivatul ovi nabi Yesaya ntulis roak na'a Surat Ralan a ne,
“Ia veka nvara dida wawa'uk ra,
ovu notu ma lolin ita tali dida suhut ra.”*
Tamata ovi mane rorang Yesus
18 Amar isa,
na tamata rivun rdir-lilit Yesus,
ba nfareta Ni tamata ra ma rovun Ia rti danau Galilea ni lihir a.
19 Yesus mane nti,
na tamata isa tali Yahudi rira dawan ovi rair Musa ni inukun ra,
nma ma nfalak verin Ia ne,
“Tuan Guru,
muti inba watan,
na orang Oa!”
20 Yesus nfalak verin ia ne,
“Serigala ra warira ma rna'a,
ovu manut nangan ra rira renga,
na'uk Ya'a,
Tamata Yanan Ya'a,
wol wang ma uyari Ya'a.”
21 Nata tamata isa tali tamata ovi rorang Yesus nfalak verin Ia ne,
“Duila'a,
fara mtorung ma ewal ya'a veki ti ma oving yamang a.”
22 Yesus nfalak verin ia ne,
“Morang a'uk Ya'a!
Tamata ovi wol rorang Ya'a,
ira wearira tamata ovi rmata roak.
Ba ira ka'i roving rira tamata ovi rmata roak a.”
Yesus ntabu nait ovu saksakan ra
23 Tali inyai,
na Yesus nrata ula Ia na'a kumal isa,
beti Ni tamata ra rorang Ia rarata,
ma rti talik wan yai.
24 Brian munuk,
na nait fufakmetan nkena ira na'a danau yai ralan a,
ba saksakan dawan ra mane rulang ira ovu vali vaha mane nngora roak na'a rira kumal ralan a.
Na'uk Yesus ntub-lufa watan.
25 Ni tamata ra rkadu Ia ma rfalak ne,
“Duila'a,
bwatar ma mlobang ami!
Ita mane takduvul roak ini!”
Nait fufakmetan nkena Yesus ovu Ni tamata ovi rorang Ia na'a danau Galilea (Matius 8:24)
26 Yesus nfalak verin ira ne,
“Notu afakinimi byobar i?
Bira inorang a ko'u da'in.”
Nata Yesus ndiri ma nfareta nait ovu saksakan ra,
ma rtalik ma ngarlina ma latlatan.
27 Ni tamata avyai rtalkaka ma rsifalak afa verin ira ne,
“Tamata ini iki Ia?
Ia nfaret-nala nait ovu saksakan ra ma rorang Ia!”
Yesus naling vatuk nait sian ra tali tamata irua
28 Yesus ovu Ni tamata ovi rorang Ia ti raran roak danau ni lihir a,
na'a wan i tamata Gadara rleal.
Raran inyai,
na tamata irua nait sian ra rleal ira,
rtali van ovi rfadoku tamata matmatan na'a rma ma rtuan Yesus.
Tamata irua yai rira afa ovi rotu ra sian urun ma rfabobar tamata ra,
ba tamata ra wol rabrahi ma rahu linga'an yai.
29 Nait sian avyai rsi'ik Yesus ma rafwak ne,
“Ubu Yanan Oa,
mwa ini ma motu afaka verin ami?
Deka motu sian ami,
tevek Ubu Ni amar wol naran obin ma nukun ami!”
30 Nata Yesus nsi'ik tali raroa ma nrea vavu dur dawan isa rafnuak ma al rdava rira fana'an na'a inyai.
31 Nait sian avyai rera lablobang verin Yesus ne,
“Wean i mane mula'ing ami tali tamata irua ini,
na fara msinir ami ma ti amna'a vavu avyai.”
32 Ba Yesus nfalak verin ira ne,
“Miti kikyai!”
Nata nait sian avyai rti talik tamata irua yai ma ti rna'a vavu dur yai.
Vavu avyai rafla ma rti rtobur tali bili'in nelan a ma rsuta danau yai,
ba rakduvul ma rmata munuk.
33 Tamata ovi rfawatak vavu avyai ka'i rsi'ik afa avyai,
ba rafla rti rira kota ma rfamalik afa avyai verin tamata ra.
Ira rfamalik vali tamata irua i inlangin a nait sian ra rleal ira.
34 Ba ti nata tamata ovi rna'a ahu yai rti munuk ma rtuan Yesus.
Rarea Yesus,
na rera lablobang verin Ia ma nti talik warira yai.