Nitdawan nlabir teman Yesus
1 Ubu Ni Roh nleal roak Yesus,
ba na'ut i nban-talik oar Yordan a,
na Ubu Ni Roh novun Ia nti wan lean vu dawan isa.
2 Na'a wan yai,
na nitdawan nlabir teman Yesus,
ti naran amar vutfa'at.
Na'ut inyai,
na Ia wol nafna'an,
ba nablafar urun.
3 Ba nitdawan nma ma nfalak ne,
“Wean i Ubu Yanan urun Oa,
na eka motu vatu ini na'a afamtahan ma muan.”
4 Yesus nfalak ne,
“Wol kena,
tevek rtulis roak na'a Surat Ralan ne,
‘Tamata ra wol rva'at tali afamtahan watan.’ ”*
5 Nitdawan novun ewal Yesus ma rti vuar karatat isa ni tutul a,
ma brian munuk wean tkubak-tvelar watan matadida ra,
na nfaturu negara ovi rna'a lanit ivavan munuk verin Ia.
6 Ba nitdawan nfalak ne,
“Ya'a veka ala munuk fareta ovu metan ra verin Oa,
tevek ning munuk roak afa avyai,
ovu bisma ala verin iki watan wean i ralang nfalak.
7 Ba wean i msangatur ma mraning ya'a,
na veka ala munuk afa avyai verin Oa.”
8 Na'uk Yesus nfalak verin ia ne,
“Rtulis roak na'a Surat Ralan ne,
‘Msangatur ma mraning a'uk Duila'a,
mu Ubu i morang a.’ ”*
9 Nata nitdawan novun ewal Yesus ma rti Yerusalem,
na'a Yahudi rira Rahan Dawan Falurut ni wan i karatat lia munuk a.
Ia nfalak verin Yesus ne,
“Wean i Ubu Yanan urun Oa,
na eka muswatil tali ini msuta.
10-11 Tevek rtulis roak na'a Surat Ralan ne,
‘Ubu veka nfareta Ni sansinir ra tali lanit ratan ma rsi'ik ma lolin Oa.
Ira veka rvelar limarira ra ma rtada Oa,
boma eam ra deka rkena vatu ra.’ ”*
12 Yesus nfalak verin nitdawan ne,
“Na'uk Ubu Ni vaivatul ra rfalak vali ne,
‘Tamata ra deka rlabir teman Duila'a,
tevek Ia Ubu i rorang a.’ ”*
13 Ti ma nitdawan nlabir teman munuk roak Yesus,
na nti talik Ia ma nanaban amar liak ewal.
Yesus newal Ia nti propinsi Galilea
14 Ubu Ni Roh a nleal roak Yesus,
ma newal Ia nti propinsi Galilea.
Yesus Ni ivar a ti nsoru munuk lahir wan yai.
15 Ia nsiair na'a rahan falurut ra,
ba tamata ra munuk raraning Ia.
Tamata ovi rna'a ahu Nazaret rala'ing Yesus
16 Yesus nti ahu Nazaret.
Ia nleal wan yai tali Ni kako'u,
nata ti naran i dawan Ia.
Na'ut amar i tamata Yahudi ryari ira,
na Yesus nti tamata Yahudi rira rahan falurut isa.
Ia ba'i notu wean inyai.
Ia ndiri mane nbas Surat Ralan a.
17 Ba tamata isa nala nabi Yesaya ni buku lalulung a verin Yesus.
Ti ma nvadil buku yai,
na ntuan vaivatul ovi:
18 “Ubu Ni Roh a nleal Ya'a,
ba wean inyai bi nfili Ya'a ma ufamalik Ni Ivar Lolin verin tamata ovi rira kasian ra.
Ia nsinir Ya'a ma ufalak verin tamata ovi rkeak roak ira ne,
rfatalik roak ira.
Ia nsinir vali Ya'a ma otu ma tamata ovi rkibu ra rsirea ewal,
ovu vali veka ufatalik tamata ovi tamata liak ra rwi-rwa ira.
19 Ia nsinir vali Ya'a ma ufamalik amar i Duila'a veka nma ma nala Ni rala lolin a verin Ni tamata inorang ra.”
Yesus ndiri mane nbas Surat Ralan na'a Yahudi rira rahan falurut isa ralan a (Lukas 4:19)
20 Ia nlulung ewal buku yai ma nala verin tamata i nkarya na'a rahan falurut yai,
beti nti ndoku mane nsiair.
Tamata ovi rna'a rahan falurut yai rsi'ik nanuang watan Ia.
21 Yesus nair ira ma nfalak ne,
“Amar ini Ubu nfakena vaivatul ovi mryenar tali Ni Surat Ralan yai.”
22 Afa ovi Yesus nfalak ra rotu ma tamata ra munuk rtalkaka ovu inar urun Ia.
Na'uk rira fikiran ratvali ewal ma rfalak ne,
“Ia ini Yusuf yanan watan Ia!”
23 Ba Yesus nfalak verin ira ne,
“Mia veka myala vaivatul kamkuma ini ma fyalak verin Ya'a ne,
‘Dokter,
Oa bis motu ma tamata ra lolin ewal ira tali rira suhut ra,
na eka motu lan tenam a.
Amrenar ne,
motu roak mujizat wean inyai na'a ahu Kapernaum,
ba eka motu vali na'a mu ahu ini.’ ”*
24 Yesus nfalak vali ne,
“Afa i ufalak verin mia ini,
kena urun!
Wol nabi isa vali ma ralang ia na'a ni ahu livur a.
25-26 Na'uk mryenar ma lolin afa ovi ufalak ini:
Na'ut i nabi Elia nva'at obin,
na wol da'ut varat itelu vulan inean,
ba lafar dawan nsoru munuk wan ovi rna'a Israel.
Na'ut inyai,
na vata varu rivun rna'a Israel.
Velik ne wean inyai,
na'uk Ubu wol nsinir Elia ma nti nalola varu isa vali tali varu avyai.
Na'uk Ubu nsinir ia ma nti nalola varu isa i na'a ahu i naran Sarfat.
Ahu yai wol ka'i raroa tali kota Sidon.*
27 Wean vali inyai na'ut i nabi Elisa nva'at a,
na tamata rivun na'a Israel rira suhut ngabaa.
Na'uk Elisa wol notu ma tamata isa vali tali tamata avyai lolin ia tali ni suhut a.
Ia notu a'uk ma Naaman i ntali Siria yai lolin ewal ia tali ni suhut ngabaa a.”*
28 Tamata ovi rna'a rahan falurut yai rangrova urun Yesus na'ut i rarenar afa ovi nfalak ra.
29 Ba rdiri lahir ma rtaha Yesus ma rovun Ia nti ahu yai murin a na'a vuar i rfadiri rira ahu na'a,
ni bili'in a.
Ira mane rala'ing vatuk Ia nsuta bili'in ralan yai.
30 Na'uk Yesus nbana watan nahu tamata rivun avyai fruarira ra,
ma nti talik wan yai.
Yesus ndiri vuar ni bili'in a, na'uk nbana watan nahu tamata rivun avyai fruarira ra (Lukas 4:29-30)
Yesus naling vatuk nait sian tali tamata isa na'a ahu Kapernaum
31 Nata Yesus nti Galilea ma nsiair na'a ahu Kapernaum.
Ia nsiair na'ut amar i tamata Yahudi ra ryari ira.
32 Tamata ovi rarenar afa ovi nair ra rtalkaka lahir,
tevek nsiair ovu Ubu Ni ngrebat a.
33 Na'a Yahudi rira rahan falurut i na'a inyai,
na tamata isa nait sian nleal ia,
ba nafwak ovu vain dawan ne,
34 “Hoi Yesus tamata Nazaret!
Oa mane motu afaka verin ami?
Oa mwa ini mane fwedan ami?
Ya'a uka'a ne,
iki Oa.
Oa sansinir i ralam nmerat urun tali Ubu.”
35 Na'uk Yesus ntabu lahir nait sian yai ovu vain dawan ma nfalak ne,
“Deka vaim!
Muti talik tamata ini!”
Ba nait sian yai nfaleka tamata yai na'a tamata rivun waharira ralan ra,
beti nti talik ia,
na'uk wol not-nala ma tamata yai namngala.
36 Tamata ra munuk rtalkaka,
ba rsifalak afa verin ira ne,
“Yesus Ni vaivatul avyai rangrebat urun!
Ia Ni ngrebat ma nfareta nait sian ra,
ma rti talik lahir tamata ra.”
37 Ba Yesus Ni ivar a ti nsoru munuk lahir wan inba watan na'a Galilea.
Yesus notu ma tamata rivun ila'a lolin ewal ira tali rira suhut ra
38 Yesus nban-talik rahan falurut yai ma nti Simon ni rahan a.
Na'a inyai,
na Simon avan a nawar ma dawan ia ovu tenan ngnea urun,
ba tamata ra rera lablobang tali Yesus ma nlobang ia.
39 Nata Yesus nti ma ndir-ebang ko'i i vata yai ntuba a,
beti nfareta suhut yai ma nti talik vata yai,
na suhut yai nti talik lahir ia.
Ba nbatar lahir ma nasusan afamtahan verin Yesus ovu Ni tamata ovi rna'a inyai ma ra'an.
40 Ti ma lera nakduvul roak,
na tamata ovi terarir-valirira ra rira suhut afaka watan rovun munuk ira rma verin Yesus.
Ia nfadoku liman a na'a lokat tamata ma notu ma lolin ira tali rira suhut ra.
41 Yesus naling vatuk nait sian ra tali tamata rivun,
ba nait sian avyai rafwak ne,
“Oa ini Ubu Yanan Oa!”
Na'uk Yesus ntabu ira ovu vain dawan,
ovu vali nfalak teri ma deka rafwak wean inyai,
tevek rka'a ne,
Ia Raja i ntevut tamata rira salasilan ra.
Yesus nsiair na'a kota ovi rna'a propinsi Yudea
42 Ti ma ilyan varverak sumatan,
na Yesus nti talik ahu yai ma nti wan i wol tamata rna'a,
ma aksa Ia na'a inyai.
Na'uk tamata rivun rdava ma rtuan roak Ia,
ba rkiwal Ia ma deka nti talik ira.
43 Na'uk Yesus nfalak verin ira ne,
“Ya'a musti ufamalik Ubu Ni Ivar Lolin na'a kota liak ra vali ne,
Ia nfareta tamata ra wean lahir Raja.
Wean inyai bi nsinir Ya'a ma uma lanit ivavan ini.”
44 Ba Yesus nti ma nfamalik Ubu Ni Ivar Lolin na'a Yahudi rira rahan falurut ovi rna'a propinsi Yudea.