Tamata ovi rtali Yesus Ni ahu wol rorang Ia
1 Yesus ovu Ni tamata ovi rorang Ia rti talik wan yai,
ma rti Ni ahu.
2 Na'ut amar i Yahudi ra ryari ira,
na Yesus nsiair na'a rira rahan falurut.
Tamata rivun rarenar afa ovi nfalak ra,
na rtalkaka.
Ba rsiforat ira ne,
“Ia nka'a afa avyai tali inba?
Ia Ni kaka'a ntali iki?
Iki nala ngrebat ini verin Ia ma not-nala mujizat ra?
3 Ia tukan kayu Ia.
Renan naran Maria ovu warin ra verin Yakobus,
Yoses,
Yudas ovu Simon.
Uran ra rleal vali ini.”
Tamata rivun avyai ralar sian Ia,
ba rafena ma rorang Ia.
4 Yesus nfalak verin ira ne,
“Tamata ra ralang nabi isa na'a wan inba watan,
na'uk wol ralang ia na'a ni ahu,
ovu na'a ni rahan teta,
ovu ni tiniman ra wol ralang vali ia.”
5 Yesus wol notu mujizat na'a inyai,
tevek wol rorang Ia.
Na'uk nfadoku liman nana'a tamata ifira watan ovi rira suhut ra,
ma lolin ewal ira.
6 Yesus nabrian,
tevek wol rorang Ia.
Yesus nsiair na'a Yahudi rira rahan falurut (Markus 6:2)
Yesus nala Ni ngrebat verin Ni tamata vutu rahin irua, ma nsinir ira ma ti rfamalik Ubu Ni Ivar Lolin
Nata Yesus nban-lilit ahu ovi rna'a wan yai, ma nsiair.
7 Na'ut inyai,
na Ia nasdovu Ni tamata vutu rahin irua ovi rorang Ia,
beti nsinir ma raruan ira rti,
ovu nala Ni ngrebat verin ira ma raling vatuk nait sian ra tali tamata ra.
8 Yesus nsurak ira ma nfalak ne,
“Deka mtyaha afa rivun na'a bira banbanan,
ba mtyaha watan bira takil ra.
Deka mtyaha kesi,
sadawan,
ovu vali kubang.
9 Mya'adoru tatea ra na'a eabira ra,
na'uk deka mtyaha ravit blawat,
nlia tali isa.”
10 Ia ntafal ma nfalak verin ira ne,
“Wean i miti rahan isa,
na mnya'a inyai,
ti naran i mane miti talik wan yai.
11 Wean i tamata ovi rna'a ahu isa wol rtorung ma mnya'a inyai,
ovu vali wol rarenar bira vaivatul ra,
na byan-talik wan yai.
Misnabar vatuk kyavu tali eabira ra,
boma neluk faneak ne,
Ubu veka nukun ira.”
12 Ba Yesus Ni tamata ovi rorang Ia rti rfamalik Ubu Ni Ivar Lolin verin tamata ra,
boma rahil ma rtalik tali rira salasilan ra.
13 Ira raling vatuk nait sian rivun tali tamata ra.
Raslofi vali ngul na'a tamata rivun ovi rira suhut ra,
ma lolin ewal ira.
Herodes nanarin Yesus ne, Yohanes i nmata roak nva'at ewal
14 Raja Herodes* nrenar roak afa ovi Yesus notu ra,
tevek tamata rivun rka'a roak naran a.
Tamata boku rfalak ne,
“Yohanes i nbaptis tamata ra nva'at ewal roak tali matmatan a,
ba ia ni ngrebat ma not-nala mujizat ra.”
15 Na'uk tamata liak boku rfalak ne,
“Ia ini nabi Elia.”
*
Boku rfalak vali ne,
“Yesus yai nabi Ia, wean nabi lalan ra.”
16 Herodes nrenar afa ovi tamata ra rfamalik yai,
na nfalak ne,
“Wahal,
inyai Yohanes i usinir tamata ra ma rvangal ia nva'at ewal roak!”
17-20 Herodes nala roak warin i Filipus awan a naran Herodias ma neluk awan,
ba Yohanes nfalak lalawatan verin ia ne,
“Wol bisma msifa ovu ia,
tevek motu wean inyai,
na mangal roak Ubu Ni inukun ra!”
*
Afa i Yohanes nfalak yai notu ma Herodias ntonan mane nfedan ia,
na'uk wol not-nala,
tevek Herodes nalang Yohanes ovu nka'a ne,
ni vava'at a nmalola ovu wol ni salasilan lahir.
Velik ne afa ovi Yohanes nfalak yai rotu ma Herodes ralan raruan,
na'uk inan ma nrenar watan.
Herodes nfalak ma rtaha Yohanes ma rkeak ia ma ti rfadoku ia na'a bu'i ralan a.
Notu wean inyai tevek awan a, na'uk nsinir tamata ovi rna'a bu'i ralan a ma rwanar Yohanes.
21 Ti nata Herodias ndav-nala roak linga'an mane nfedan Yohanes.
Na'ut inyai,
na Herodes notu ni snoba ma al nfangnanang ni amar vulan kena.
Ia nasdovu munuk ni dawan fareta ra,
dawan suldadu ra,
ovu vali tamata dawan ra na'a propinsi Galilea.
22 Herodias yanan vata nti snoba ralan ma nso'i-nsomar.
Ba notu ma raja Herodes ovu ni mangun ra inar urun.
Herodes nfalak verin vata mnelat yai ne,
“Mera afaka watan tali ya'a,
na veka ala verin oa!”
23 Ia nafwaba lahir verin vata yai ne,
“Mera afaka watan tali ya'a,
na veka ala verin oa,
velik ne wang i ufareta ni lihir vali,
veka ala watan verin oa.”
24 Ba vata yai nti murin ma norat renan ne,
“Veka era afaka tali ia?”
Renan nfalak ne,
“Mera Yohanes i nbaptis tamata ra,
ulun a.”
25 Nata vata yai newal lahir ia ma ti nfalak verin Herodes ne,
“Era ma fwadoku Yohanes i nbaptis tamata ra,
ulun a,
na'a binan dawan isa ma mala verin ya'a.”
26 Herodes nrenar afa i vata yai nfalak a,
na ralan lalau urun,
na'uk wol nala'ing nala roak afa i vata yai nera,
tevek nafwaba roak ma ni mangun ra rarenar.
27 Ba Herodes nsinir lahir suldadu isa ma ti nfedan Yohanes,
ma nala ulun a verin ia.
Suldadu yai nti bu'i ralan ma nvangal Yohanes ulun a.
28 Ia nfadoku Yohanes ulun a na'a binan dawan isa,
beti rala verin vata mnelat yai,
ma ntaha ti verin renan a.
29 Ti ma Yohanes ni tamata ovi rorang ia rarenar ne nmata roak,
na rti ma rala tbunan a ma ti rfanuba na'a van isa ralan a.
Yesus notu mujizat ma nfamela roti ovu ian ra al nfa'an tamata rivun ilima
30 Yesus Ni tamata ovi lan nsinir ira ma rti rfamalik Ubu Ni vaivatul ra rewal ira ma ti rtuan Ia.
* Ira rfamalik munuk afa ovi rotu ra,
ovu vali rira afa ovi rair ra verin Ia.
31 Yesus nfalak verin ira ne,
“Mya ma did tinemun tati wan lean vu isa ma myari kedan mia.”
Ia nfalak wean ini,
tevek tamata ra rma ma rtuan lalawatan ira,
ma wol rafna'an ovu wol rot-nala akataka vali.
32 Ba aksa ira ravul kumal rti wan lean vu isa.
33 Tamata rivun rarea ira rti,
na ref nala ira,
ma tamata avyai rtali ahu munuk na'a wan yai rafla watan rahu raa ma raran lan,
beti Yesus ovu Ni tamata ra raran.
34 Ti ma Yesus nsuta tali kumal ma nda,
na nsi'ik tamata rivun avyai.
Ia nfaturu Ni silobang verin ira,
tevek ira wean domba ovi wol duarira.
Nata nair afa rivun verin ira.
35 Lera nakduvul ma laflofan roak,
ba Yesus Ni tamata ovi rorang Ia rma rtuan Ia ma rfalak ne,
“Wol tamata rleal wan lean vu ini,
ovu vali lera sian roak,
36 ba msinir ira ma rti ahu ovi sarseri ma rfaha afamtahan ma ra'an.”
37 Na'uk Ia nfalak verin ira ne,
“Mia musti fya'an ira!”
Ira rfalak verin Ia ne,
“Ba ami musti amfaha roti fyawan dinar* ratut irua ma amfa'an tamata rivun ovi?”
38 Ba Ia norat ira ne,
“Bira roti ifira?
Eka miti ma msyi'ik.”
Ira rti ma rsi'ik,
ma rewal ira ma rfalak ne,
“Roti ilima ovu ian irua.”
39 Yesus nsinir tamata avyai munuk ma rotu rira sidovung ma rdoku ngrova yanat ratarira ra.
40 Ba tamata rivun avyai rdoku na'a sidovung ra,
ma tali sidovung avyai,
na boku tamata vatvutun lamliman,
boku vali ratratut sasan.
41 Yesus nala roti ilima ovu ian irua yai,
beti ntadata nrata lanit ma nfalak fara weninyai verin Ubu.
Ia notu munuk wean inyai,
beti nvisul roti avyai ma nala verin Ni tamata ovi rorang Ia,
boma rti rsiduk verin tamata rivun avyai.
Nvisul vali ian irua yai ma rsiduk verin tamata ra munuk.
42 Ira rir tinemun rafna'an ma evurira ra rveda munuk roak,
43 beti Yesus Ni tamata ovi rorang Ia rasdovuk munuk roti teran ovu ian teran avyai na'a ahir vutu rahin irua rngora.
44 Tali tamata ovi ra'an roti ovu ian avyai,
brana ra watan rivun ilima.*
Yesus nbana na'a wear ratan na'a danau Galilea
45 Yesus nsinir lahir Ni tamata ovi rorang Ia ma ravul kumal yai,
ma ula ira rti ahu Betsaida na'a danau Galilea ni lihir a.
Ia nana'a wan yai obin ma nsinir tamata rivun avyai ma rewal ira.
46 Ti ma tamata rivun avyai rsilyaha,
beti Yesus nva'al vuar ma naflurut.
47 Ti ma ovan roak,
na Ni tamata ra rna'a kumal yai ma rti raran roak danau ni fruan a,
na aksa Ia na'a da obin.
48 Yesus nsi'ik ira rvahi ma nawar ira,
tevek nait a dawan nangal ira.
Ka'a bi nfada'ing amar roak,
beti Yesus nbana na'a wear ratan ma norang ira,
ovu notu mane nbana lia ira.
49 Na'uk ti ma rarea Ia nbana na'a wear ratan,
na rnarin ne nitu ngran Ia,
ba rafwak,
50 tevek ira munuk rarea Ia ovu rbobar urun i lahir.
Na'uk Ia nfalak lahir verin ira ne,
“Ralabira ra deka kako'u,
tevek ini Ya'a,
ba deka byobar!”
51 Yesus nrata kumal yai ma ntuan ira,
na nait ntalik lahir.
Ira rabrian munuk,
52 tevek wol rka'a Yesus Ni dawan obin.
Velik ne rsi'ik roak Ia nfamela roti ovu ian ra,
na'uk ralarira rasmotak watan.
Yesus notu ma lolin ewal tamata rivun tali rira suhut ra
53 Ira ravul kumal yai ma retal nala roak danau Galilea,
ma rda raran ngur tavun i rfanara ia ne Genesaret,
ma rfalau rira kumal a.
54 Rsuta tali kumal yai,
na brian munuk,
tamata ra ref-nala lahir Yesus.
55 Ba tamata ra rban-lilit lahir wan yai,
ma rfaivar verin tamata ra ne,
Yesus nana'a wan yai.
Nata,
tamata ovi wol rira suhut ra rvara ovi rira suhut ra na'a rira dari ra,
ma rti wan inba watan ovi rarenar ne,
Yesus nana'a.
56 Na'a wan inba watan Yesus nma,
na'a ahu te kota te wan liak,
ira rovun tamata ovi rira suhut ra rti wan i rfedi-rfaha afa na'a.
Nata tamata ovi rira suhut ra rvakar al rera verin Ia ne,
“Fara mtorung ma amkena watan mu ravit a blawat ni wahan a.”
Ba tamata ovi rkena Ia,
lolin munuk ira.