Herodes nanari ne, Yesus yai Yohanes i nmata roak a
1 Na'ut inyai,
na tamata i ntaha fareta na'a propinsi Galilea naran Herodes.
* Ia nrenar roak afa ovi Yesus notu ra,
2 ba nfalak verin tamata ovi rkarya verin ia ne,
“Yohanes i nbaptis tamata ra nva'at ewal roak tali matmatan,
ba ni ngrebat ma not-nala mujizat ra.”
3 Herodes nfalak wean inyai,
tevek lan ana,
nfareta ma rtaha Yohanes ma rkeak ia,
beti rovun ia ti rfadoku ia na'a bu'i ralan.
Herodes notu wean inyai,
tevek awan a Herodias.
Herodes nala roak warin i Filipus awan a,
Herodias,
ma neluk awan.
4 Ba Yohanes nfalak lalawatan verin Herodes ne,
“Wol bisma msifa ovu ia,
tevek motu wean inyai,
na mangal roak Ubu Ni inukun ra!”
5 Velik aba,
Herodes inan ma nfedan Yohanes,
na'uk tamata rivun rna'a inyai,
ba nbobar,
tevek ira rfalak ne,
Yohanes nabi ia.
6 Na'ut i Herodes ni amar vulan kena,
na ia notu snoba.
Herodias yanan vata nti snoba ralan ma nso'i-nsomar na'a mangun waharira ralan ra,
ma notu ma Herodes inan urun.
7 Ba Herodes nafwaba lahir verin vata mnelat yai ne,
“Mera afaka watan tali ya'a,
na veka ala verin oa.”
8 Vata yai renan a nsinir ia ma nfalak verin Herodes ne,
“Era ma fwadoku Yohanes i nbaptis tamata ra,
ulun a,
na'a binan dawan isa ma mala verin ya'a.”
9 Ti ma Herodes nrenar afa yai,
na ralan lalau urun,
na'uk nafwaba roak ma ni mangun ra rarenar.
Ba nfareta ni tamata ra ma rot-orang afa i vata mnelat yai nera a.
10 Ba nsinir ni suldadu ra rti ma rvangal Yohanes ulun a.
11 Nata rfadoku ulun a na'a binan dawan isa,
beti rala verin vata mnelat yai,
ma ntaha ti verin renan a.
12 Yohanes ni tamata ovi rorang ia rarenar ne nmata roak,
ba rti ma rala tbunan a ma ti rfanuba na'a van isa ralan.
Nata ti ma rfamalik verin Yesus.
Yesus nfa'an tamata rivun ilima teran
13 Ti ma Yesus nrenar ivar ne,
Yohanes nmata roak,
na nrata kumal isa ma aksa Ia nti wan lean vu isa.
Na'uk tamata rivun rarenar ne Yesus nti roak,
ba rbana earira rtali rira ahu ra ma rorang Ia.
14 Yesus nda ma nsuta tali kumal ma nsi'ik tamata rivun avyai,
na nfaturu Ni silobang verin ira,
ba notu ma tamata ovi rira suhut ra lolin ewal ira.
15 Ya'i laflofan roak,
ba Yesus Ni tamata ovi rorang Ia rma ma rfalak verin Ia ne,
“Wol tamata rleal wan lean vu ini ovu ya'i laflofan roak.
Ba ni lolin a,
msinir tamata rivun avyai ma rti ahu ovi sarseri ra ma rfaha rira afamtahan.”
16 Yesus nfalak verin ira ne,
“Tamata rivun avyai deka rti.
Mia musti fya'an ira!”
17 Ira rfalak ne,
“Ami amtaha watan roti ilima ovu ian irua.”
18 Ba Yesus nfalak ne,
“Mtyaha ian ovu roti avyai mya ini.”
19 Nata nsinir tamata rivun avyai ma rdoku ngrova yanat ratarira ra.
Yesus nala roti ilima ovu ian irua yai,
beti ntadata nrata lanit ma nfalak fara weninyai verin Ubu.
Ia notu munuk wean inyai,
beti nvisul roti ovu ian avyai ma nala verin Ni tamata ovi rorang Ia,
boma rti rsiduk verin tamata rivun avyai.
20 Tamata avyai munuk rafna'an ma evurira rveda.
Rafna'an munuk roak,
beti rasdovuk roti ovu ian teran ra na'a ahir vutu rahin irua rngora.
21 Tali tamata ovi rafna'an ra,
na rarekan brana ra watan,
na ka'a bi rivun ilima.
Wol rarekan vata ovu kasiko'u ra obin.
Yesus Ni tamata ovi rorang Ia rsiduk roti ovu ian ra verin tamata rivun ilima (Matius 14:19)
Yesus nbana na'a wear ratan
22 Nata Yesus nsinir lahir Ni tamata ovi rorang Ia ma ravul kumal yai ma ula ira rti Danau Galilea ni lihir a.
Yesus nfalak ma tamata rivun avyai rewal a'uk ira.
23 Ia nfalak ma rewal ira,
beti nva'al vuar isa na'a inyai ma naflurut.
Ovan roak,
na aksa Ia nana'a watan inyai obin.
24 Kumal i Ni tamata ra ravul yai natlitir ma nfaroa ngur a,
ma ti rna'a roak danau ni fruan a.
Nait dawan a nangal ira ma saksakan ra rfari kumal yai tia ma watan.
25 Nfada'ing amar,
na Yesus nroal ma nbana na'a wear ratan ma ntuan ira.
26 Ni tamata ra rarea Ia nbana na'a wear ratan,
ba rbobar urun i lahir ma rafwak ne,
“Ya'i yo,
ini nitu ngran a!”
27 Yesus nfalak lahir verin ira ne,
“Ralabira ra deka kako'u,
tevek ini Ya'a,
ba deka byobar!”
28 Ba Petrus nfalak verin Ia ne,
“Duila'a,
wean i Oa mna'a urun inyai,
na msinir ya'a ma ubana na'a wear ratan ma uti wan i mna'a yai.”
29 Ba Yesus nfalak ne,
“Mwa ini kikyai!”
Petrus nsuta tali kumal yai ma nbana roak na'a wear ratan mane ti ntuan Yesus.
30 Na'uk nfarnuang nait dawan a,
ba nbobar urun ma tenan a nsuta lahir wear ralan.
Ia nafwak ne,
“Duila'a,
mlobang ya'a!”
31 Ba Yesus nlauk lahir liman a ma ntaha ia,
ma nfalak ne,
“Mu inorang a kako'u obin.
Notu afakinimi ralam raruan na'a Ya'a i?”
Yesus nlauk liman ma ntaha Petrus, tevek ia mane nakduvul (Matius 14:31)
32 Ti ma Yesus irua Petrus rarata kumal yai,
na nait ntalik lahir.
33 Ni tamata ra rsangatur ma raraning Ia na'a kumal ralan yai ma rfalak ne,
“Oa Ubu Yanan urun Oa!”
Yesus notu ma tamata ovi rira suhut ra lolin ewal ira
34 Yesus ovu Ni tamata ovi rorang Ia retal roak danau Galilea,
ma rda raran ngur tavun i rfanara ia ne,
Genesaret.
35 Tamata ovi rna'a inyai ref nala roak Yesus,
ba ti rfaivar verin ahu ovi rfaseri wan yai.
Ba tamata ra rvara munuk tamata ovi rira suhut ra rma verin Yesus.
36 Ira rera verin Yesus ma fara rkena watan Ni ravit blawat wahan a.
Ba tamata ovi rkena Ni ravit blawat a,
lolin munuk ira.