Yesus nfamalik vaivatul kamkuma na'a tamata i navuri nabat ra
1 Amar yai vali,
na Yesus nban-talik rahan yai ma ti ndoku danau Galilea nelan a.
2 Tamata rivun ila'a rma ma rdir-lilit Ia,
ba nroal ma ndata kumal isa ma ndoku ralan a.
Tamata rivun avyai rdiri watan ngur ratan.
3 Yesus nala vaivatul kamkuma ra al nair afa rivun verin ira,
ma nfalak ne,
“Amar isa,
na tamata va'i isa nti navuri nabat ra.
4 Na'ut i navuri nabat ra obin,
na boku rleka na'a linga'an ralan,
ba manut nangan ra rma ma ra'an munuk watan.
5 Nabat boku vali rleka na'a vatralan i lanun kadkedan watan.
Wol mnanat,
na nabat ra rarubu lahir,
tevek lanun a masnifit watan.
6 Na'uk ti ma lera ndirlola,
na nabat ovi rarubu roak yai roarira ra rakla munuk ma rangaran,
tevek wol rabwa'ar ma lolin obin.
7 Nabat boku vali rleka na'a kadkadir ralan.
Kadkadir avyai rmel-yatak irubun ra,
ma irubun ra rmata.
8 Tali nabat avyai,
na boku vali rleka na'a lanun tinemun,
ba vuarira.
Funu boku rira vatul ra ratratut sasan,
boku vatvutun nanean ovu vali boku vatvutun taltelun.
9 Iki arun,
na eka nrenar ma lolin!”
Tamata vai isa navuri nabat ra (Matius 13:4)
Yesus nsiair ovu vaivatul kamkuma ra
10 Yesus Ni tamata ovi rorang Ia rma ma rorat Ia ne,
“Notu afakinimi mair tamata ra ovu vaivatul kamkuma ra?”
11 Yesus nfalak verin ira ne,
“Ubu notu ma fyan-aran afa ovi Ia wol nfavotuk obin verin tamata ra,
na'a i wean inba ma nfareta tamata ra wean lahir Raja.
Na'uk verin tamata liak ra,
na wol rfan-aran afa avyai.
12 Tevek tamata iki watan inan ma nfan-aran Ubu Ni Fareta a,
na ni kaka'a na'a Ni fareta veka ntafal ma dawan.
Na'uk tamata iki watan wol inan ma nfan-aran Ubu Ni Fareta a,
velik ne nka'a kadkedan roak,
na Ubu veka nala munuk kaka'a yai tali ia.
13 Wean inyai bi air ira ovu vaivatul kamkuma ra,
boma rsi'ik afa ovi otu ra,
na'uk wean lahir i wol rarea afa avyai.
Rarenar Ning vaivatul ra,
na'uk wean i wol rarenar ovu wol rfan-aran vali.
14 Ba afa ovi lan nabi Yesaya nfadoku ra nkena ira.
Ia nfalak ne,
‘Ira rarenar,
na'uk wol rfan-aran afa ovi rarenar ra.
Ira rsi'ik,
na'uk wol rfan-aran afa ovi rsi'ik ra.*
15 Tevek tamata ovi ralarira ra rasmotak,
ba rsibi arurira ra ovu rkubak matarira ra,
boma deka rsi'ik ovu matarira ra,
deka rarenar ovu arurira ra,
ovu deka rfan-aran ovu ralarira ra.
Deka rahil ma rtalik tali rira salasilan ra,
ovu deka rdava Ya'a i bis otu ma lolin ewal ira.’*
16 Na'uk Ubu naflahar roak mia tamata ovi myorang roak Ya'a,
tevek msyi'ik afa ovi otu ra,
ovu vali mryenar afa ovi air ra.
17 Afa i ufalak verin mia ini,
kena urun!
Nabi rivun ovu tamata rivun ovi rira vava'at ra rmalola inar ma rsi'ik afa ovi msyi'ik ra,
na'uk wol rarea.
Ira inar ma rarenar afa ovi mryenar ra,
na'uk wol rarenar afa avyai.”
Yesus nfalyawang vaivatul kamkuma na'a tamata va'i i navuri nabat ra
18 “Eka mryenar ta did tinemun.
Mane ufalyawang vaivatul kamkuma yai na'a tamata va'i i navuri nabat ra.
19 Nabat ovi rleka na'a linga'an nelan,
ira wearira tamata ovi rarenar Ubu Ni vaivatul ra na'a i wean inba ma Ubu nfareta tamata ra wean lahir Raja,
na'uk wol rfan-aran ihin a.
Ba nitdawan a nma ma nal-ewal vaivatul avyai tali ralarira ra.
20 Nabat ovi rleka na'a vatralan,
ira wearira tamata ovi rarenar Ubu Ni vaivatul ra,
ma rtorung lahir ovu ralarira lolin.
21 Na'uk ira wearira irubun ovi wol rabwa'ar,
ba wol rtahang ma mnanat.
Ba ti ma rtuan susa te tamata ra rwi-rwa ira,
tevek rorang Ya'a,
na rafla talik lahir rira inorang a.
22 Nabat ovi rleka na'a kadkadir ralan,
ira wearira tamata ovi rarenar Ubu Ni vaivatul ra,
na'uk ralarira ra raruan na'a afa rivun,
ma inar ma rira metan rivun.
Ba Ubu Ni vaivatul ra wol wan roak na'a ralarira ra,
ma rira vava'at ra wol vuarira.
23 Nabat ovi rleka na'a lanun tinemun,
ira wearira tamata ovi rarenar Ubu Ni vaivatul ra ma rfan-aran na'a ralarira ra,
ba vuar ma dawan.
Ira wearira gandum ni funu ovi rira vatul ra ratratut sasan,
boku vatvutun nanean,
boku vali vatvutun taltelun.”
Vaivatul kamkuma na'a ria-lavurun ovi rna'a gandum ralan
24 Yesus nfamalik vaivatul kamkuma isa vali verin tamata rivun avyai ne,
“Ubu Ni Fareta wean tamata i navuri nabat gandum ovi lolin ra na'a ni va'i a.
25 Na'uk ti ma tamata ra rtub-lufa munuk,
na tamata i ni sian tamata va'i yai nti ma navuri yatak lavurun nabat ra na'a gandum avyai,
beti newal ia.
26 Nata ti ma gandum ra rarubu ma betmane vuarira,
na lavurun ra rarubu vali na'a va'i yai.
27 Tamata sansinir ovi rkarya na'a va'i yai rma ma rtuan tamata i ni va'i yai ma rfalak ne,
‘Baba,
oa muvuri nabat ovi lolin ra na'a mu va'i a.
Wean inbinimi lavurun avyai rarubu vali?’
28 Ia nfalak verin ira ne,
‘Tamata isa i ni sian ya'a nma ma notu afa yai.’
Ba tamata sansinir avyai rorat ia ne,
‘Inam ma amati amvutuk lavurun avyai?’
29 Ia nfalak ne,
‘Deka,
tevek wean i byutuk lavurun avyai,
na gandum ra veka ratvutuk vali.
30 Mnyaban watan ma rmel-yatak ira,
nata ti naran amar i tafdiar.
Na'ut inyai,
na ki ufalak verin tamata ovi rafdiar ra ma rasdovuk lan lavurun avyai ma rtenak ira,
beti rasnuri ira,
ki rdiar gandum ra ma rasdovuk na'a ning syahawan a.’ ”*
Vaivatul kamkuma ovi rfalyawang ne wean inba ma Ubu Ni Fareta veka nmela
31 Yesus nfamalik ewal vaivatul kamkuma liak verin ira ne,
“Ubu Ni Fareta wean ini.
Tamata isa nala sesawi ni vatul a,
ma nava na'a ni va'i a.
32 Sesawi ni vatul yai ko'u lia munuk tali afa ovi rira vatul ra munuk,
na'uk ti ma narubu,
na dawan lia munuk afa liak ovi rna'a va'i a.
Sesawi nmela wean aa ma sanan ra dawan,
ba manut nangan ra rti ma rotu rira renga na'a.”*
33 Yesus nfamalik vaivatul kamkuma liak isa ewal verin ira ne,
“Ubu Ni Fareta wean ragi.
Vata isa nala ragi yai ma nsileti na'a terigu loyang dawan isa,
nata terigu yai nmela ma dawan.”*
34 Yesus nala vaivatul kamkuma ra ma nfamalik munuk afa avyai verin tamata rivun avyai.
Ia wol nair ira wean i wol nala vaivatul kamkuma ra.
35 Ia nsiair wean inyai,
boma nfakena lahir vaivatul ovi lan a nabi isa ntulis ne,
“Ya'a veka ala vaivatul kamkuma ra ma ungrihi verin mia.
Ya'a ufamalik afa fanfonak ovi tamata wol rka'a obin,
tali na'ut i Ubu notu lanit ivavan a.”*
Yesus nfalyawang vaivatul kamkuma yai na'a lavurun ovi rna'a gandum ra
36 Nata Yesus nban-talik tamata rivun avyai ma newal Ia nti rahan ralan.
Ni tamata ovi rorang Ia rma ma rfalak verin Ia ne,
“Baba,
eka fwalyawang vaivatul kamkuma yai na'a lavurun ovi rna'a va'i.”
37 Yesus nfalak ne,
“Ya'a,
Tamata Yanan Ya'a,
uvuri nabat lolin avyai.
38 Va'i yai wean lanit ivavan a.
Nabat ovi lolin,
inyai tamata ovi Ubu nfareta ira.
Lavurun avyai wean tamata ovi nitdawan nfareta ira.
39 Tamata i ni sian tamata va'i yai,
nitdawan ia.
Ia navuri lavurun vatul avyai.
Amar fadiar yai nfaturu amar i lanit ivavan veka namwear.
Tamata fadiar avyai,
Ubu Ni sansinir ra tali lanit ratan.
40 Ba wean lavurun ovi rasdovuk ma rasnuri ira na'a yafralan,
na wean inyai vali na'ut amar i lanit ivavan veka namwear.
41 Ya'a,
Tamata Yanan Ya'a veka usinir Ning sansinir ra tali lanit ratan ma rma lanit ivavan ini.
Ira veka rasdovu munuk tamata ovi rweang tamata ra ma rotu salasilan ra,
ovu vali tamata ovi rotu afa ovi sian ra,
ma rala'ing ira tali Ning Fareta.
42 Sansinir avyai veka rvatuk ira rti yafwan kakiwal.
Na'a inyai,
na veka rvakar ma dawan ovu nifarira ra rsitutu ira tevek rfarnuang wawa'uk i dawan a.
43 Na'uk tamata ovi rira vava'at ra rmalola veka vanar wean lera na'a Yamarira Ubila'a,
Ni Fareta a.
Iki arun,
na eka nrenar ma lolin!”
Vaivatul kamkuma na'a metan ovi roving ira, ovu mutiara ovi fyawan a
44 “Ubu Ni Fareta wean metan ovi fyawarira ma roving fanfonak ira na'a va'i isa.
Tamata isa nma ma nrea metan avyai,
na noving fanfonak ewal.
Ralan a lolin urun ma nti ma nfedi munuk ni metan ra ma nfaha va'i yai.
45 Vaivatul kamkuma isa vali nfalak ne,
Ubu Ni Fareta wean vali tamata i nfedi-nfaha afa ma ndava mutiara ovi fyawarira ra.
46 Ba ti ma nrea mutiara isa i fyawan dawan a,
na ti ma nfedi ni metan ra munuk,
ma ti nfaha mutiara yai.”
Yesus nala vaivatul kamkuma na'a jaring
47 “Ubu Ni Fareta wean tamata ovi rfalau jaring na'a danau*,
ma nala ian rivun.
48 Ti ma jaring nala ma rivun roak,
na raravut jaring rara ngur ratan,
ma rdoku rtakal ian ra.
Ira rasdovuk ian ovi lolin ra na'a ahir ra,
na'uk rvatuk watan ian ovi sian ra.
49 Wean inyai vali na'ut amar i lanit ivavan veka namwear.
Ubu Ni sansinir ra tali lanit ratan veka rma ma raling tamata ovi lolin ra tali tamata sian ra.
50 Nata sansinir avyai veka rvatuk tamata sian ra ma ti rna'a yafwan kakiwal.
Na'a inyai,
na veka rvakar ma dawan ovu nifarira ra rsitutu ira,
tevek rfarnuang wawa'uk i dawan a.
51 Wean inba?
Fyan aran munuk afa avyai te wahal?”
Ira rvalat ma rfalak ne,
“O'u,
amfan-aran.”
52 Ba Yesus nfalak verin ira ne,
“Tamata ovi rair Musa ni inukun ra ovu rorang roak Ubu Ni Fareta a,
na ira wearira tamata isa i ni rahan.
Ia nala metan ovi ngorva'an ra,
ovu mnanat* ra tali wan i ba'i nfadoku metan ra na'a.”
Tamata ovi rtali Yesus Ni ahu wol rorang Ia
53 Yesus nfamalik munuk vaivatul kamkuma avyai,
beti nban-talik wan yai.
54 Ti ma naran Ni ahu livur a,
na Yesus nair tamata ra na'a rira rahan falurut.
Ira rarenar afa ovi nair ra,
ba rtalkaka ma rfalak ne,
“Ia nka'a afa avyai tali inba?
Iki nala ngrebat verin Ia ma not-nala mujizat ra?
55 Ita tka'a basil ne,
Ia yaman a tukan kayu ia,
na renan a naran Maria.
Warin ra nararira Yakobus,
Yusuf,
Simon ovu Yudas.
56 Ita tka'a vali ne,
itmunuk uran ra!
Ba nala ni kaka'a ovu ngrebat tali inba ma notu mujizat ra?”
57 Ba rangrova Ia ma rafena ma rorang Ia.
Yesus nfalak verin ira ne,
“Tamata ra ralang nabi isa na'a wan inba watan,
na'uk wol ralang ia na'a ni ahu,
ovu na'a ni rahan teta,
ovu ni tiniman ra wol ralang vali ia.”
58 Yesus wol notu mujizat rivun na'a inyai,
tevek wol rorang Ia.