Tamata Farisi ra rorat Yesus na'a amar i Yahudi ra ryari ira
1 Amar isa,
na'ut i Yahudi ra ryari ira,
na Yesus ovu Ni tamata ovi rorang Ia rban-etal va'i gandum ra.
Ira rablafar,
ba rfufu gandum ni funu boku ma ra'an.
2 Tamata Farisi boku rarea ira,
ba rfalak verin Yesus ne,
“Msi'ik Mu tamata ovi rorang Oa!
Ira rangal dida agama ni inukun ra,
ma rotu afa i wol bisma totu na'a amar i tyari ita!”
3 Yesus nfalak verin ira ne,
“Mia byas roak afa ovi Raja Daud notu ra,
na'ut i ia ovu ni tamata ovi rorang ia rablafar.
4 Ia nti befak dawan i ba'i raraning Ubu na'a.
Ia nti ralan ma nala roti ovi rfadok-aling roak verin Ubu,
ma ia ovu ni kida ra'an.
Na'uk dida inukun ra rfalak ne,
mela falurut ra a'uk sa'i bisma ra'an,
ba ira wol rot-orang roak dida inukun ra.*
5 Mia mkya'a vali ne,
Musa ni inukun ra rfalak ne,
na'a amar i tyari ita,
na mela falurut ra rkarya na'a Rahan Dawan Falurut ralan a,
na'uk wol sala ira.
6 Na'uk ufalak verin mia ne,
na'a ini,
na isa a'uk sa'i ni dawan nlia Rahan Dawan Falurut a.*
7 Ubu Ni Surat Ralan nfalak ne,
‘Ya'a inak ma fyaturu bira silobang verin tamata ra,
nlia tali myala bira korban verin Ya'a.’
Wean i fyan-aran vaivatul avyai,
na wol fyasala tamata ovi wol rotu sala ra.*
8 Tevek Ya'a,
Tamata Yanan Ya'a,
Ningu ngrebat ma ufadoku munuk afa ovi inovan ma totu na'a amar i tyari ita.”
Tamata Farisi rvolan mane rfedan Yesus
9 Nata Yesus nban-talik wan yai ma nati Yahudi rira rahan falurut isa ralan a.
10 Na'a inyai,
na brana isa liman lihir nmata.
Tamata Farisi ra rdava mane rfasala Yesus,
ba rorat Ia ne,
“Dida agama ntorung ma tamata isa bis notu ma lolin tamata ra na'a amar i tyari ita,
te wahal?”*
11 Yesus nfalak verin ira ne,
“Wean i tamata isa ni domba nleka nsuta bilaman ralan na'a amar i tyari ita,
na veka mlyobang ma msyikat ia tali bilaman yai te wahal?
12 Ba wean inyai,
na tamata ra fyawar lia domba ra!
Ba dida agama ntorung ma bis totu afa ovi lolin ra na'a amar i tyari ita na'a.”
13 Nata Yesus nfalak verin brana yai ne,
“Mlauk limam a mwa!”
Ba nlauk liman a,
ma Yesus notu ma liman i nmata yai lolin lahir,
ma wean liman lihir a.
14 Ba tamata Farisi ra rdir-talik wan yai ma rti murin,
ma rasdovu ira al ranovak ma ra'an vai isa mane rfedan Yesus.
15 Na'uk Yesus nka'a lahir ne,
mane rotu sian Ia,
ba nban-talik wan yai.
Ubu nfili Yesus
Tamata rivun ila'a rorang Ia,
ba notu ma tamata ovi rira suhut ra lolin munuk ira.
16 Na'uk Yesus nfalak teri ira ma deka rfamalik Ia verin tamata ra.
17 Yesus notu mujizat avyai ma nfakena lahir afa ovi lan a nabi Yesaya nfalak roak na'a Ubu Ni Surat Ralan ne,*
18 “Ini Ning sansinir i ufili a,
Ulobang urun Ia.
Ia notu ma ralang a lolin urun.
Ya'a veka ala Ning Roh verin Ia,
ma nfamalik na'a wean inba ma tamata ra munuk rira vava'at ra rmalola.
19 Ia veka wol nsingarahi te nafwak tia ma watan,
ovu wol nangrihi ma vain a dawan na'a linga'an ralan.
20 Ia veka wol nkametal tavtevu i mane nleka roak,
ovu wol nfedan damar i ongan a ko'u lalean roak,
na'uk wol nmata obin.
Ba Ning sansinir a veka nlobang tamata ovi wol rangrebat.
Ia nfabana lalawatan afa ini,
ti naran tamata ra rtorung ne,
afa ovi notu ra kena.
21 Ba tali arun dawan ra munuk na'a lanit ivavan a,
na tamata rivun veka rfaklo'i a'uk rira vava'at ra verin Ia.”
Tamata Farisi ra rfalak ne, Yesus nala ngrebat tali Beelzebul
22 Nata tamata ifira rovun brana isa rti verin Yesus.
Brana yai nait sian nleal ia ma notu ma nkibu ovu nmanu,
ba Yesus naling vatuk nait sian yai tali ia,
ma nangrihi ovu nsirea ewal roak!
23 Tamata rivun ovi rna'a inyai rtalkaka munuk,
ma rsifalak afa verin ira ne,
“Beta ne tamata ini Raja Daud ubun te nusin i lan a Ubu nfadoku roak na'a Ni tnorung a.”
24 Ti ma tamata Farisi ra rarenar vaivatul avyai,
na rfalak ne,
“Tamata ini naling vatuk nait sian ra tali tamata ra,
tevek nait sian rira dawan a,
naran Beelzebul,
nala ngrebat verin Ia.”
25 Na'uk Yesus nka'a afa ovi ranovak ra,
ba nfalak verin ira ne,
“Wean i rsiduk nuhu dawan isa na'ut ifira ma sidovung ra rotu rihi,
na nuhu dawan yai veka nama'ar.
Wean inyai vali wean i tamata ra rsingarahi na'a ahu isa te rahan teta isa,
na rira ahu a te rira rahan teta a veka nama'ar vali.
26 Ba nitdawan ni fareta veka wean watan inyai.
Wean i nitdawan nsingarahi-sikual ovu ni nait sian ra,
na ni fareta veka nama'ar vali.
27 Wean i fyalak ne,
aling vatuk nait sian ra ovu ngrebat i ntali Beelzebul,
na tamata ovi rorang mia yai rala ngrebat tali iki ma raling vatuk nait sian avyai?
Tamata ovi rorang mia yai ka'i rfaturu lahir ne,
sala mia.
28 Na'uk wean i ala ngrebat tali Ubu Ni Roh ma aling vatuk nait sian ra tali tamata ra,
na inyai nfaturu ne,
Ubu nma roak ma nfareta tamata ra wean lahir Raja.
29 Wean i tamata* isa mane nti tamata ngrebat isa ni rahan ma nbori ni metan ra,
na musti nkeak ia veki,
beti nbor nala ni metan ra tali ni rahan a.
30 Tamata iki watan wol norang Ya'a,
na ia nangal roak Ya'a.
Tamata iki watan wol nkarya ovu Ya'a,
na ia not-visal Ning karya.
31 Ba ufalak verin mia ne,
Ubu veka na'i vatuk tamata rira salasilan ra,
velik ne rfalak sian Ia.
Na'uk tamata iki nfalak sian Ubu Ni Roh a,
na Ubu wol na'i vatuk roak ni salasilan ra.
32 Tamata iki watan nfalak sian Ya'a,
Tamata Yanan Ya'a ini,
na Ubu veka na'i vatuk ni salasilan yai.
Na'uk wean i nfalak sian Ubu Ni Roh a,
na Ubu wol na'i vatuk roak ni salasilan ra,
na'a amar ini ovu na'a amar ovi veka rma.
33 Wean i mane mdyav-nala aa vuan ovi lolin ra,
na mdyava na'a aa ovi lolin ra.
Wean i aa ovi wol ihirira ra,
na vuarira ra sian vali.
Ita tka'a ne,
aa lolin te sian tali vuan ra.
34 Hoi,
mia sian urun mia weabira nifa isa naran aru,
ba wean inba ma fyamalik afa ovi lolin ra?
Vaivatul ra tali sumarbira ra rfaturu lahir ralabira ra.
35 Tamata lolin ra rfamalik afa lolin ra,
tevek ralarira ra lolin.
Na'uk tamata ovi raktufan ra,
veka rotu watan afa ovi sian ra,
tevek ralarira ra rngora lahir ovu afa ovi sian ra.
36 Ba ufalak verin mia ne,
naran amar i Ubu nma ma nukun lanit ivavan a,
na lokat tamata veka ka'i rvara rira vaivatul ra munuk,
ma rvalat Ia na'a rira vaivatul vu ra.
37 Ba Ubu veka nukun mia tali bira vaivatul ra.
Wean i fyalak afa ovi lolin ra,
na veka nfadoku ne,
wol sala mia.
Na'uk wean i fyalak afa ovi sian ra,
na veka nfadoku vali ne,
sala mia.”
Ubu veka nukun tamata ovi wol rorang Ia
38 Tamata Farisi boku ovu tamata boku tali Yahudi rira dawan ovi rair Musa ni inukun ra rfalak verin Ia ne,
“Tuan Guru,
inamami ma motu mujizat ma nfaturu ne,
Mu ngrebat a tali Ubu.”
39 Yesus nfalak verin ira ne,
“Tamata ovi rva'at na'a tuvu ini raktufan urun,
ovu wol rot-orang Ubu Ni vaivatul ra.
Ira rera ma otu faneak* i tamata ra wol rot-nala,
na'uk otu watan faneak i wean lan a Ubu notu roak verin nabi Yunus.
40 Tevek Yunus nana'a ian dawan isa evun ralan a,
ma amar itelu ovan itelu,
wean vali Ya'a,
Tamata Yanan Ya'a ini,
veka una'a lanun ralan amar itelu ovan itelu vali.*
41 Na'ut amar i Ubu veka nma ma nukun lanit ivavan a,
na tamata Niniwe veka rdiri vali ovu tamata ovi rva'at na'a tuvu ini ma rta'i nuang ira,
tevek tamata Niniwe avyai rahil roak ma rtalik tali rira salasilan ra na'ut i Yunus nangrihi verin ira.
Na'uk Ia i nana'a fiang ini Ni dawan a nlia Yunus! *
42 Na'ut amar i Ubu veka nukun lanit ivavan a,
na ratu i ntali nuhu dawan isa i raroa ila'a na'a tranan a,
veka nma ma irmunuk tamata ovi rva'at na'a tuvu ini.
Ia veka nfaturu lahir tamata ovi rva'at na'a tuvu ini rira sala ra.
Ratu ini nma ma nrenar Raja Salomo i ni kaka'a dawan tali Ubu.
Na'uk Ia i nana'a fiang ini,
Ni dawan a nlia Salomo!”*
Yesus nala vaivatul kamkuma na'a nitdawan ni karya a
43 “Wean i nait sian nti talik roak tamata isa,
na nait sian yai veka nlilin watan na'a wan ovi wol wear na'a ma ndava wan ma nyari ia,
na'uk wol ndav-nala wan.
44 Ba wean inyai,
na nait sian veka ka'i nfalak ne,
‘Ya'a veka ewal ya'a ma ti una'a ewal rahan i uti talik roak ia yai!’
Ba nait sian yai newal ia nti rahan yai ma nsi'ik,
na rbitin roak ma rahan yai nmerat,
ovu rasusan roak ma afakataka munuk rna'a warira ra.
45 Ba nait sian yai novun nait sian ifitu i rira sian veran lia ia.
Ira rti ma rleal tamata yai.
Ti nata tamata yai ni sian veran rahi roak lan a.
Wean inyai vali verin tamata ktufan ovi rva'at na'a tuvu ini.”
Yesus renan ovu warin ra
46 Yesus nangrihi verin tamata rivun avyai obin,
na renan ovu warin ra rma.
Ira inar ma rangrihi ovu Ia,
na'uk rdiri watan murin.
47 Ba tali tamata rivun avyai,
na tamata isa nfalak verin Yesus ne,
“Baba,
eka ti ma msi'ik renam a ovu warim ra rdiri watan murin eri.
Ira inar ma rangrihi nulu Oa.”
48 Yesus nfalak verin ia ne,
“Ya'a renang iki te waring aba?”