Yesus notu ma lolin brana laklukut isa, ovu na'i vatuk ni salasilan ra, na'uk Yahudi rira dawan ovi rair Musa ni inukun ra wol inar afa ovi notu ra
1 Nata amar ifira nelak roak,
na Yesus nati ewal ahu Kapernaum,
ma tamata ra rarenar ivar ne,
newal roak Ia.
2 Ba tamata rivun rasdovu ira na'a rahan i Yesus nana'a,
ma rahan ralan ovu falfolat ngoran nngora lahir na'a tamata ra,
ma Yesus nfamalik Ubu Ni vaivatul ra verin ira.
3 Tamata ifa'at rsikat brana laklukut isa ma rati inyai.
Tamata laklukut ovu ni kida ra rna'a rahan ratan (Markus 2:4)
4 Na'uk wol rti nala rahan ralan ma rtuan Yesus,
tevek tamata rivun da'in.
Ba rarata rahan ratan* a,
ma rotu ma nablahi ma rtolar tamata laklukut yai ovu ni dari i ntuba na'a.
5 Yesus nsi'ik tamata avyai,
na nka'a lahir ne,
rira inorang a dawan,
ba nfalak verin tamata laklukut yai ne,
“Baba,
a'i vatuk roak mu salasilan ra.”
Tamata Farisi ra ovu Yahudi rira dawan ovi rair Musa ni inukun ra (Markus 2:6)
6 Nata tamata boku tali Yahudi rira dawan ovi rair Musa ni inukun ra rdoku inyai ma ranovak na'a ralarira ne,
7 “Afakinimi tamata ini nangrihi wean ini?
Ia nfalak sian Ubu!
Wol tamata isa bisma na'i vatuk tamata rira salasilan ra.
Ubu sa'i na'i vatuk.”
8 Yesus nka'a lahir afa i ranovak na'a ralarira ra,
ba nfalak verin ira,
“Afakinimi minovak wean inyai na'a ralabira ra?
9 Inabira ma ufalak verin tamata laklukut yai ne,
‘A'i vatuk roak mu salasilan ra,’
te ufalak ne,
‘Mdiri ma mlulung mu dari ma bwana.’
Afaka maraan ma ufalak na'a afa irua ini?
10 Boma mkya'a ne,
na'a lanit ivavan ini,
na Ya'a,
Tamata Yanan Ya'a,
Ning ngrebat ma a'i vatuk tamata rira salasilan ra.”
Ba Yesus nfalak verin tamata laklukut yai ne,
11 “Ufalak verin oa ma mdiri,
ovu mlulung mu dari a ma mewal oa muti mu rahan kikyai!”
12 Tamata laklukut yai ndiri ma nlulung ni dari a,
ma nbana na'a tamata rivun avyai wahar ralan ra ma nati murin,
ba tamata rivun rtalkaka ma rfadawang Ubu ma rfalak ne,
“Afa i wean ini ita wol trea obin.”
Yesus nera Lewi ma norang Ia, na tamata ovi tamata liak ra rfalak ira ne, tamata salasilan ra, rafna'an vali ovu Yesus, na'uk Yahudi rira dawan ovi rair Musa ni inukun ra wol inar afa ovi notu ra
13 Nata Yesus newal Ia nti danau Galilea nelan a,
na tamata rivun rma ma rdir-lilit Ia,
ba nair ira.
14 Ti ma Yesus nbana,
na nrea tamata isa ndoku rahan i ba'i rera babahir kulu na'a.
Ia naran Lewi,
yaman a naran Alfeus.
Yesus nfalak verin ia ne,
“Morang Ya'a.”
Ba Lewi ndir-talik ni karya a ma norang Yesus.
15 Na'ut inyai,
na Yesus ovu Ni tamata ovi rorang Ia rafna'an* na'a Lewi ni rahan.
Tamata rivun ovi rera babahir kulu tali tamata ra,
ovu tamata ovi tamata liak ra rfalak ira ne,
tamata salasilan ra,
rafna'an vali ovu Yesus,
tevek tamata rivun rban-orang Ia.
16 Yahudi rira dawan boku ovi rair Ubu Ni inukun ra rtali Yahudi rira sidovung isa naran Farisi.
Ira rorat Yesus Ni tamata ovi rorang Ia ne,
“Afakinimi Yesus nafna'an ovu tamata sian avyai?”
Ira rfalak wean inyai,
tevek rarea Yesus nafna'an ovu tamata ovi rera babahir kulu ra,
ovu tamata ovi rotu salasilan.
17 Yesus nrenar rira afa ovi rfalak ra,
ba nfalak ne,
“Tamata ovi wol rira suhut ra wol rti dokter,
na'uk ovi rira suhut ra a'uk sa'i rti dokter.
Ya'a wol uma ma era tamata ovi rira vava'at ra rmalola,
na'uk uma ma era tamata salasilan ra,
ma rorang Ya'a.”
Tamata Farisi rorat Yesus na'a i tamata ra rtolat
18 Na'ut inyai,
na tamata ovi rorang Yohanes i nbaptis tamata ra,
ntafal vali tamata ovi rtali sidovung Farisi,
rtolat ma raflurut verin Ubu.
Ba tamata boku rma ma rorat Yesus ne,
“Afakinimi Yohanes ni tamata ra ovu ovi rorang tamata Farisi ra rtolat,
na'uk Mu tamata ra wol rtolat i?”
19 Yesus nala vaivatul kamkuma ma nfalak verin ira ne,
“Na'a snobsifa isa,
na wean i brana i mane nsifa irmunuk ni kida ra obin,
na musti rtolat?
Wahal,
ira veka rafna'an ovu rotu rira snobsifa.
20 Brana i mane nsifa yai ni amar a veka nma ma rala ia,
ma wol nana'a roak ini.
Na'ut inyai,
beti rtolat*.”
21 Yesus nfamalik vaivatul kamkuma isa ewal wean ini:
“Wol tamata isa nlavan ni kadaravit mnanat ovu maloli ngorva'an,
tevek maloli ngorva'an yai wol naslura obin,
ba veka notu watan ma kadaravit yai ntafal ma namsat.
22 Wean vali inyai,
ma wol tamata isa vali nli'i anggur ngorva'an na'a sadawan mnanat i rotu tali karba ulin a.
Wean i tamata isa notu wean inyai,
na sadawan veka naksat ma anggur yai nvoat,
ovu vali sadawan sian lahir.
Ba tli'i anggur ngorva'an na'a sadawan ovi ngorva'an ra a'uk.”*
Tamata Farisi ra rorat Yesus na'a amar i Yahudi ra ryari ira
23 Amar isa na'ut i Yahudi ra ryari ira,
na Yesus ovu Ni tamata ovi rorang Ia rban-etal va'i gandum ra,
na Yesus Ni tamata ra rfufu gandum ni funu boku.
24 Tamata Farisi ra rfalak verin Yesus ne,
“Msyi'ik kikyai!
Afakinimi ira rangal dida agama ni inukun ra,
ma rotu afa i wol bisma totu na'a amar i tyari ita?”
25-26 Yesus nfalak ne,
“Mia wol byas obin afa ovi Raja Daud notu ra na'ut Abyatar neluk Yahudi rira Mela Falurut Ila'a?
Daud ovu ni tamata ra rablafar,
ba Ia nti befak dawan i ba'i raraning Ubu na'a.
Ia nti ralan ma nala roti i rfadok-aling roak verin Ubu ma na'an.
Nata ntanang vali roti avyai verin ni tamata ovi rorang ia,
velik ne na'a dida agama ni inukun ra,
na mela falurut ra a'uk sa'i bisma ra'an roti avyai.”*
27 Nata Yesus ntafal ma nfalak verin ira ne,
“Ubu nala amar isa ma tamata ra ryari ira.
Ia wol nfadoku tamata verin amar i ryari ira.
28 Ya'a Tamata Yanan Ya'a,
ba Ning fareta ti naran vali amar i tyari ita.”