Yohanes norat ne, Yesus yai Raja i ntevut dida salasilan ra te wahal
1 Na'ut i Yesus nair munuk roak Ni tamata vutu rahin irua ovi rorang Ia,
na nban-talik wan yai ma ti nair tamata ra ovu nfamalik Ubu Ni Ivar Lolin na'a ahu ovi rna'a propinsi Galilea.
2 Na'ut inyai,
na Yohanes i nbaptis tamata ra nana'a roak bu'i ralan.
Ia nrenar na'a afa ovi Yesus notu ra,
3 ba nsinir ni tamata ifira ma ti rorat Yesus ne,
“Bapa,
Oa ini Raja i veka mtevut mami salasilan ra,
wean i Ubu nfadoku roak na'a Ni tnorung a,
te musti amnaban tamata liak?”
4 Ba Yesus nfalak verin ira ne,
“Myewal mia ma fyamalik verin Yohanes na'a afa ovi mryenar,
ovu afa ovi msyi'ik ra.
5 Tamata ovi rkibu rsirea ewal,
tamata ovi raklukut rbana nala ewal.
Tamata ovi rira suhut ngabaa lolin ewal ira,
ovu tamata ovi raktun,
rafrenar ewal.
Tamata ovi rmata roak rva'at ewal,
ovu ufamalik Ubu Ni Ivar Lolin verin tamata ovi kasian ra.
6 Ubu naflahar tamata ovi ralarira ra wol raruan na'a rira inorang verin Ya'a.”
Yesus nangrihi na'a Yohanes i nbaptis tamata ra
7 Ti ma Yohanes ni tamata ra rban-talik wan yai,
na Yesus nfamalik Yohanes verin tamata rivun ovi rna'a inyai.
Ia nfalak ne,
“Na'ut i miti wan lean vu dawan yai ma msyi'ik Yohanes,
na minovak aka?
Miti ma msyi'ik tavtevu ovi nait nean tia ma watan ira a?
Wahal!
8 Inabira ma ti msyi'ik aka?
Beta ne inabira ma msyi'ik tamata isa i neluk kadaravit ovi lolin urun a?
Wahal,
tevek tamata ovi reluk kadaravit lolin ra rleal raja rira rahan dawan ra.
9 Inabira ma ti msyi'ik aka?
Beta ne inabira ma msyi'ik nabi isa?
Wean inyai,
na kena lahir,
ovu Yohanes ni dawan a nlia nabi ra.
10 Tevek lan a,
Ubu nfamalik ia na'a Ni Surat Ralan a,
ma nfalak ne,
‘Ini Ya'a Ning tamata sansinir a,
Ya'a usinir lan ia,
beti Oa,
ma nasusan Mu linga'an a.’*
11 Afa i ufalak verin mia ini,
kena urun!
Tali lalan ma naran amar ini,
wol tamata isa vali ni dawan a veran lia Yohanes i nbaptis tamata ra.
Na'uk tamata ovi rtorung ma Ubu nfareta rira vava'at ra,
na rira dawan a nlia Yohanes,
velik ne tamata ko'u ira watan.
12 Tali amar i Yohanes betmane nfamalik Ubu Ni banbanan a,
ma naran amar ini,
na tamata ovi rsitaha sian ra rangal Ubu Ni Fareta a.
13 Tevek Yohanes wol nma obin,
na tali lalan ana,
Musa ni inukun ra ovu nabi ra rfamalik roak Ubu Ni Fareta a.
14 Wean i inabira ma myorang afa ovi ufalak ra,
na eka mryenar.
Lan ana,
rfadoku roak na'a Surat Ralan ne,
nabi Elia veka nma ewal.
Velik aba,
ia nfamalik Yohanes.*
15 Iki arun,
na eka nrenar ma lolin!
16 Ya'a veka ala vaivatul kamkuma aka ma ufamalik tamata ovi rva'at na'a tuvu ini?
Ira wearira kasiko'u ovi rdoku wan i rfedi-rfaha afa na'a,
ma rafwak verin rira kida ra ne,
17 ‘Amafraik flo'its verin mia,
na'uk mifena ma msyo'i-msyomar.
Amdedang dadedang ovi lalau ra,
na'uk wol byakar.’
18 Wean inyai vali verin Yohanes i nma ma ntolat ovu wol nenu anggur a,
na'uk rafena ia ma rfalak ne,
‘Nait sian nleal ia.’
19 Ya'a,
Tamata Yanan Ya'a,
uma ma ufna'an ovu ufnenu.
Ira rafena vali Ya'a,
ma rfalak ne,
‘Ia nafna'an sian ovu ba'i nanavut,
ovu notu kida ovu tamata ovi ba'i rera babahir kulu ra,
ovu vali notu kida ovu tamata salasilan ra!’
Velik ne wean inyai,
na'uk tali afa ovi Ubu Ni tamata ra rotu,
na tamata ra veka rsi'ik ne,
Ni kaka'a dawan a kena.”
Yesus ntabu tamata Yahudi ovi wol rorang Ia
20 Yesus ntabu tamata ovi rleal ahu ovi notu roak mujizat rivun na'a,
tevek wol rahil ma rtalik tali rira salasilan ra obin.
21 Ia nfalak ne,
“Sian urun i lahir verin mia tamata ovi mtyali ahu Korazim ovu ahu Betsaida!
Ya'a otu mujizat rivun roak na'a bira ahu ra,
na'uk wol myahil ma mtyalik tali bira salasilan ra obin.
Lalan a,
tamata ra na'a kota Tirus ovu Sidon rira sian a dawan urun,
ovu wol rsi'ik mujizat i wean mujizat avyai.
Na'uk wean i otu mujizat wean avyai na'ut lalan a na'a inyai,
na ira rahil ma mnanat roak ma rtalik tali rira salasilan ra,
ovu reluk roak kadaravit ovi rotu tali bibi vulun ra,
ovu vali rdoku fun ma rfadoku kfuan na'a ulurira ra.*
22 Na'uk ufalak verin mia ne,
na'a amar i Ubu veka nukun tamata ra,
na inukun i nala verin tamata ovi rna'a Tirus ovu Sidon maraan lia mia.
23 Tamata ovi mnya'a ahu Kapernaum!
Mnyarin ne Ubu veka nfasaka mia ma mirata lanit ratan?
Wahal lahir!
Ubu veka naling vatuk mia ma ti mnya'a yafwan kakiwal.
Otu mujizat rivun roak na'a wahabira ralan ra,
na'uk wol myahil.
Wean i mujizat avyai na'a kota i ni sian a dawan naran Sodom,
na ira rahil roak ma kota yai ndiri obin ma naran amar ini.*
24 Na'uk ufalak verin mia ne,
na'a amar i Ubu veka nukun tamata ra,
na Ni inukun i veka nala verin mia aleman lia tali inukun i veka nala verin tamata ovi rna'a kota Tirus ovu kota Sidon.”
Yesus nair ita ma ralad lolin verin Ubu
25 Nata Yesus naflurut ma nfalak ne,
“Duila'a,
Yamang Oa!
Oa fwareta lanit ratan ovu lanit ivavan a!
Ufalak fara weninyai verin Oa,
tevek wol fwalyawang munuk afa avyai verin tamata ovi rira kaka'a dawan a,
ovu tamata ovi rbitar ra.
Na'uk Oa fwalyawang verin tamata ovi ka'i rfikir ne,
ira wearira kasiko'u ra.*
26 Bapa,
afa avyai rotu ma ralam lolin urun.*
27 Yamang nala munuk roak afakataka verin Ya'a.
* Tamata ovi rna'a lanit ivavan a wol rka'a Ya'a.
Yamang a'uk sa'i nka'a Ya'a.
Tamata ovi rna'a lanit ivavan a vali wol rka'a Yamang a.
Ya'a a'uk sa'i uka'a Ia,
ovu vali tamata ovi ralang a nfalak ma ufalyawang Yamang a verin ira.
28 Ya'a era ma tamata ovi mifrea ra,
ovu vali tamata ovi bira varvara aleman ra,
mya boma otu ma myari mia.*
29 Myorang afa ovi air verin mia ovu afa ovi ufalak ra,
tevek ufakabava tenang a ovu ufamafung ralang verin mia.
Mia ralabira ra veka malinan vali.
30 Varvara i ala verin mia yai maraan watan,
ovu afa ovi ufalak ma myotu ra wol susa ma fyabana.”