Duila'a nsinir Ni tamata vutfitu ma rfamalik Ni vaivatul ra na'a ahu ovi veka nwelat ra
1 Duila'a Yesus nfalak munuk wean inyai,
beti nsinir Ni tamata vutfitu ovi rorang vali Ia,
ma raruan ira rti lan ahu ovi veka nwelat ra.
2 Ia nala vaivatul kamkuma ma nfalak verin ira ne,
“Tamata rivun wearira wanat ovi rwavar ma rivun ila'a roak,
na'uk tamata ifira watan ti ma rafdiar.
Ba wean inyai,
na myera verin va'i duan a ma nala tamata ma ti rafdiar.
Wean inyai,
na myera verin Ubu ma ntafal tamata ma ti rfaivar Ni vaivatul ra verin tamata ovi wol rarenar obin.”
3 Ia nfalak vali verin ira ne,
“Miti kikyai!
Usinir ma miti wan ovi tamata sian ra rna'a.
Mia weabira domba yanan ovi rva'at na'a serigala warira i rna'a.*
4 Deka mtyaha sadawan i ba'i fyadoku kubang na'a,
te sadawan liak ma fyadoku bira kesi na'a,
te tatea liak na'a bira banbanan a.
Wean i mtyuan tamata iki watan na'a bira banbanan a,
na deka mingrihi ma blawat ovu ira.*
5 Wean i miti rahan isa ralan a,
na fyalak lan verin tamata ovi rna'a inyai ne,
‘Fara Ubu naflahar bira rahan teta a ma malinan watan.’
6 Wean i tamata boku rna'a inyai inar lalawatan malinan a,
na mu salam yai veka nana'a watan tamata avyai.
Na'uk wean i wahal,
na mu salam yai veka nleka ma lolan watan.
7 Mnya'a rahan yai,
na myenu ovu mian watan afamtahan ovi tamata ra rala verin mia na'a inyai,
tevek tamata ovi rkarya inovan ma rala enarira ra.
Deka msyuta talik rahan ovi mnya'a lan roak a ma ti mnya'a rahan liak.
8 Wean i miti kota isa ralan a ma tamata ovi rna'a inyai rala mia ovu lolin,
ovu vali rasusan afamtahan ma mian,
na mian watan afamtahan ovi rasusan roak ma mian yai.
9 Myotu ma lolin tamata ovi rira suhut ra na'a inyai,
ovu fyalak verin tamata ovi rna'a kota yai ne,
‘Naran roak Ni amar a ma Ubu nfareta wean lahir Raja.’
10 Na'uk wean i tamata ovi rna'a kota yai wol rtorung ma mnya'a inyai,
na miti lahir kota yai ni linga'an dawan ra ma fyalak ne,
11 ‘Velik ne bira kota ini ni kyavu nlatan eamami ra obin,
na amasnabar vatuk watan,
boma neluk faneak verin mia ne,
Ubu veka nukun mia.
Na'uk mingnanang ma lolin ne,
Ni amar a sarseri roak ma Ubu nma ma nfareta wean lahir Raja.’
12 Mryenar ma lolin afa ovi ufalak ini!
Na'a amar i Ubu nma ma nukun munuk tamata ra,
na Ni inukun i veka nala verin tamata ovi rna'a kota yai,
nlia inukun i veka nala verin tamata ovi lan a rleal kota Sodom.”*
Yesus ntabu tamata ra na'a kota ovi nti roak a, tevek rafena ma rorang Ia, velik ne rsi'ik Ni mujizat ovi notu roak
13 Yesus nfalak ne,
“Sian urun i lahir verin mia tamata ovi mtyali ahu Korazim ovu ahu Betsaida!
Ya'a otu mujizat rivun roak na'a bira ahu ra,
na'uk wol myahil ma mtyalik tali bira salasilan ra obin.
Lalan a,
tamata ra na'a kota Tirus ovu Sidon rira sian a dawan urun,
ovu wol rsi'ik mujizat i wean mujizat avyai.
Na'uk wean i otu mujizat wean avyai na'ut lalan a na'a inyai,
na ira rahil ma mnanat roak tali rira salasilan ra,
ovu reluk roak kadaravit ovi rotu tali bibi vulun ra,
ovu vali rdoku fun ma rfadoku kfuan na'a ulurira ra.
14 Na'uk mryenar ma lolin afa ovi ufalak ini!
Na'a amar i Ubu veka nma ma nukun tamata ra,
na Ni inukun i veka nala verin mia aleman lia tali inukun i veka nala verin tamata ovi rna'a kota Tirus ovu kota Sidon.
15 Tamata ovi mnya'a ahu Kapernaum!
Mnyarin ne,
Ubu veka nfasaka mia ma mirata lanit ratan?
Wahal lahir!
Ubu veka naling vatuk mia ma ti mnya'a yafwan kakiwal!”
16 Yesus nfalak verin Ni tamata ovi rorang Ia ne,
“Tamata ovi rarenar afa ovi fyalak ra,
na rarenar roak Ya'a.
Tamata ovi wol rarenar afa ovi fyalak ra,
na wol rarenar vali Ya'a.
Tamata iki watan wol norang afa ovi ufalak ra,
na ia wol ntorung vali Ubu i nsinir Ya'a ma uma lanit ivavan ini.”
Yesus Ni tamata vutfitu yai rewal ira
17 Ti ma Yesus Ni tamata vutfitu ovi nsinir ira yai rewal ira,
na ralarira lolin urun i lahir.
Ba rfalak verin Ia ne,
“Duila'a,
nait sian ra vali rot-orang afa ovi amfalak ra ma rti lahir,
na'ut i amala naram a ma amaling vatuk ira!”
18 Ba Yesus nfalak verin ira ne,
“Ya'a usi'ik roak na'ut i Ubu nvatuk nitdawan ma nleka tali lanit ratan a nsuta ma snga'ut urun i lahir wean fitik a nyelar.
19 Ya'a ala roak ngrebat verin mia ma wean i mtya aru te katkatan,
na wol akataka.
Ya'a ala vali ngrebat verin mia roak ma utubira nitdawan ni ngrebat a,
ba wol afakataka veka rotu sian mia.
20 Na'uk velik ne wean inyai,
na deka myotu ralabira lolin urun,
tevek nait sian avyai rorang roak afa ovi fyalak ra.
Na'uk ralabira lolin urun,
tevek Duila'a ntulis roak narabira ra na'a lanit ratan.”
Yesus ralan a lolin urun
21 Na'ut inyai vali,
na Ubu Ni Roh notu ma Yesus ralan a lolin urun.
Yesus nfalak ne,
“Duila'a,
Yamang Oa!
Oa fwareta lanit ratan ovu lanit ivavan ini.
Ufalak fara weninyai verin Oa,
tevek wol fwalyawang munuk afa avyai verin tamata ovi rira kaka'a dawan a,
ovu tamata ovi rbitar ra.
Na'uk Oa fwalyawang verin tamata ovi wearira kasiko'u ra.
Bapa,
afa avyai rotu ma ralam lolin urun.”
22 Yesus nfalak verin tamata ovi rna'a inyai ne,
“Yamang a nala roak ngrebat ovu Ni kaka'a dawan a verin Ya'a.
Tamata ovi rna'a lanit ivavan a wol rka'a Ya'a.
Yamang a'uk sa'i nka'a Ya'a.
Tamata ovi rna'a lanit ivavan a vali wol rka'a Yamang a.
Ya'a a'uk sa'i uka'a,
ovu vali tamata ovi ralang a nfalak ma ufalyawang Yamang a verin ira.”
23 Yesus nfalak munuk wean inyai,
beti nti nelan kedan ma nangrihi ovu Ni tamata ovi rorang Ia yai,
ma nfalak ne,
“Mia utubira,
tevek msyi'ik roak Ning afa ovi otu ra.
24 Ufalak ne utubira,
tevek nabi ovu raja rivun tali lalan roak inarira ma rsi'ik afa ovi fiang ini msyi'ik a,
na'uk wol rarea.
Ira inar vali ma rarenar afa ovi fiang ini mryenar roak a,
na'uk wol rarenar nala vali.”
Vaivatul kamkuma isa nfamalik tamata Samaria i nfaturu ni silobang verin tamata liak isa
25 Amar isa,
na tamata isa tali Yahudi rira dawan ovi rair Musa ni inukun ra nlabir teman Yesus ne,
“Tuan Guru,
ya'a musti otu afaka,
boma ning vava'at kakiwal?”
26 Yesus nfalak ne,
“Musa ntulis aka na'a ni inukun ra,
ovu fwikir aka na'a afa ovi bwas ra?”
27 Tamata yai nfalak ne,
“Oa musti mlobang Duila'a,
mu Ubu i mraning Ia a,
ovu ralam urun.
Mala munuk mu vava'at a,
mu ngrebat ovu vali mu kaka'a ra ma al mlobang Ia.
Oa musti mlobang vali tamata liak ra,
wean watan i mlobang tenam a.”
28 Ba Yesus nfalak ne,
“Mu afa ovi fwalak yai kena urun,
ba motu watan wean i fwalak roak yai,
na oa veka mu vali vava'at kakiwal.”
29 Na'uk dawan Yahudi yai notu felan a wean tamata ovi ba'i rotu a'uk afa ovi lolin ra,
ba norat ewal Yesus ne,
“Tamata ovi musti ulobang avyai,
aba ira?”
30 Yesus nfamalik vaivatul kamkuma isa ewal ma nfalak wean ini,
“Brana isa ntali Yerusalem a nsuta mane nti kota Yerikho.
Na'a ni banbanan obin,
na ntuan tamata ovi ba'i rbori tamata liak rira metan ra.
Tamata avyai rala munuk lahir ni kadaravit ovu afa ovi ntaha ra,
beti rvaval ma brana yai kata kedan watan,
na nmata.
Rotu munuk wean inyai,
beti rban-talik brana yai ma aksa ia watan na'a linga'an nelan.
31 Na'ut inyai vali,
na Yahudi rira mela falurut isa nahu vali linga'an yai.
Na'uk ti ma nsi'ik tamata yai,
na ia nban-etal watan linga'an yai ma ti nahu ni lihir a.
32 Tamata Lewi isa vali nahu linga'an yai.
Ia nrea tamata yai,
na'uk nban-etal vali linga'an yai ma nban-talik ia.*
33 Nata tamata Samaria isa nahu vali linga'an yai.
Ti ma nrea tamata yai,
na nfarnuang lahir na'a ralan ma nfaturu ni silobang verin ia.*
34 Ba nti nebang tamata yai ma nala ni anggur ovu ngul al nfamerat ni mngala ra,
ovu nkum-teri ni mngala ra ovu maloli,
beti nfasaka ia na'a ni keledai a ma novun ia nti rahan siwelat isa.
Na'a inyai,
na ia nasusan munuk lahir afakataka verin tamata yai.
35 Ni ilyan ana,
ia nala kubang dinar irua verin tamata i ni rahan siwelat yai,
beti nfalak verin ia ne,
‘Msi'ik ma lolin tamata yai ni mngala ra.
Wean i kubang ini wol naran,
na mala mu kubang a veki ma ewal ya'a ki ukati.’ ”*
36 Yesus nfamalik munuk vaivatul kamkuma yai,
beti norat dawan Yahudi yai ne,
“Tali tamata itelu yai,
na iki nfaturu ni silobang a ma al nlobang tamata i rvaval ia yai?”
37 Dawan Yahudi yai nfalak verin Yesus ne,
“Tamata i nfaturu roak ni silobang verin tamata i rvaval ia yai.”
Ba Yesus nfalak verin ia ne,
“Muti ma motu vali wean inyai!”
Tamata ktufan ra rvaval tamata isa ma rbori ni metan ra (Lukas 10:30)
Yesus nati nalola Maria ovu Marta
38 Yesus nfamalik munuk afa avyai,
beti irmunuk Ni tamata ovi rorang Ia rban-ewal vali ma rti raran ahu isa.
Na'a inyai,
na vata isa i naran Marta nasweang Ia ma nana'a ni rahan.
39 Marta warin isa naran Maria.
Ia ndok-ebang Duila'a Yesus ean a ma al nrenar afa ovi nfalak ra.
40 Na'uk Marta wol ndok-nala wan isa al nasusan fana'an-fanenu verin ira munuk.
Ia ti nfaseri Yesus ma nfalak ne,
“Duila'a,
Oa wean i wol mkamlabir ya'a,
ma aksa ya'a ukarya watan.
Msinir ia ma nlobang ya'a!”
41 Duila'a nfalak ne,
“Marta,
oa ralam a kako'u da'in ovu ka'i motu susa watan tenam a ovu afa avyai.
42 Velik aba,
oa pwerlu afa isa watan.
Maria nfili roak afa i lolin a,
ma afa yai tamata ra wol bisma rala tali ia.”