Yesus nsinir Ni tamata vutu rahin irua ma ti rfamalik Ubu Ni Ivar Lolin i nfamalik Ia
1 Yesus nasdovu Ni tamata vutu rahin irua ovi rorang Ia,
ma nala Ni fareta ovu Ni ngrebat a verin ira,
boma raling vatuk nait sian ra tali tamata ra ovu rotu ma lolin tamata ra tali rira suhut ra.
2 Ia nsinir ira ma rti rotu ma lolin tamata ra tali rira suhut ra,
ovu rfamalik na'a i wean inba ma Ubu nfareta tamata ra wean lahir Raja.
3 Yesus nfalak verin ira ne,
“Deka mtyaha afakataka na'a bira banbanan a.
Deka mtyaha takil,
sadawan,
kesi,
kubang ovu kadaravit.
Myoru watan kadaravit ovi rna'a tenabira ra.
4 Wean i tamata ra rtorung ma mnya'a teri rira rahan,
na mnya'a inyai,
ti naran i mane miti talik rira ahu a.
5 Wean i tamata ra na'a ahu isa wol rtorung ma mnya'a inyai,
na byan-talik ahu yai,
ovu misnabar vatuk kyavu tali eabira ra,
boma neluk faneak ne,
Ubu veka nukun ira.”
6 Ba Yesus Ni tamata ra rban-soru ahu ra ma rfamalik Ubu Ni Ivar Lolin,
ovu rotu ma lolin tamata ra tali rira suhut ra na'a wan inba watan.
Herodes wol nka'a ma nanovak ne, Yesus yai iki
7 Ti ma raja Herodes i ntaha fareta na'a propinsi Galilea nrenar afa ovi Yesus notu ra,
na wol nka'a ma nroal te nra,
tevek tamata boku rfalak ne,
Yohanes i nbaptis tamata ra nva'at ewal roak.
8 Tamata boku rfalak ne,
Elia nvotuk ewal roak,
ovu tamata boku vali rfalak ne,
nabi isa tali nabi lan ra nva'at ewal roak.
9 Herodes nfalak ne,
“Ya'a usinir roak ma tamata ra rvangal Yohanes ulun a,
na'uk Ia ini tamata iki mnga'un Ia ma notu mujizat wean inyai?”
Ba nkiwal mane ntuan Yesus.
Yesus nfa'an tamata rivun ilima
10 Ti ma Yesus Ni tamata vutu rahin irua ovi nsinir ma rfamalik Ni Ivar Lolin rewal ira,
na rfamalik munuk afa ovi rotu ra verin Yesus.
Ira rfamalik munuk afa avyai,
beti Yesus novun ira ma rti wan isa i nfaseri kota Betsaida ma aksa ira rna'a inyai.
11 Na'uk ti ma tamata rivun rka'a ne,
Yesus ovu Ni tamata ovi rorang Ia rti wan yai,
na rorang lahir Ia.
Ba Yesus ntorung ma rna'a inyai ma nfamalik i wean inba ma Ubu nfareta wean lahir Raja verin ira,
ovu notu ma lolin tamata ovi rdava mane lolin ira tali rira suhut ra.
12 Ti ma lera nakduvul ma laflofan roak,
na Yesus Ni tamata vutu rahin irua yai rma ma rfalak verin Ia ne,
“Msinir ma tamata rivun ini rti ahu ovi rfaseri wan ini ma rdava rira fana'an,
ovu rahan siwelat ma rna'a,
tevek ita tna'a wan i tamata ra wol rna'a.”
13 Na'uk Yesus nfalak verin ira ne,
“Mia musti fya'an ira!”
Ira rfalak ne,
“Ami mami roti ilima ovu ian irua watan.
Ba wean inyai,
na ami musti amati ma amfaha fana'an verin tamata rivun ovi?”
14 Brana ovi rna'a wan yai ka'a bi nlabas rivun ilima.
Ba Yesus nfalak verin Ni tamata ovi rorang Ia ne,
“Msyinir ma tamata rivun avyai rotu rira sidovung ra,
ma lokat sidovung tamata nlabas vutlima ma lokat ira rdoku na'a rira sidovung a.”*
15 Yesus Ni tamata ovi rorang Ia yai rot-orang afa ovi nfalak ra,
ba rsinir ma tamata rivun avyai rdoku munuk.
16 Nata Yesus nala roti ilima ovu ian irua yai,
beti ntadata nrata lanit ma nfalak fara weninyai verin Ubu.
Ia notu munuk wean inyai,
beti nvisul roti avyai ma nala verin Ni tamata ovi rorang Ia,
boma rti rsiduk verin tamata rivun avyai.
17 Tamata rivun avyai rafna'an ma evurira ra rveda munuk roak,
beti Yesus Ni tamata ovi rorang Ia rasdovuk munuk roti teran ra na'a ahir vutu rahin irua rngora.
Petrus ntorung ne, Yesus yai Raja i ntevut ita tali dida salasilan ra
18 Amar isa,
na Yesus aksa Ia naflurut.
Ni tamata ovi rorang Ia rna'a wan yai vali.
Ba norat ira ne,
“Tamata ra rfalak ne,
Ya'a ini iki?”
19 Ira rfalak ne,
“Tamata boku rfalak ne,
Oa ini Yohanes i nbaptis tamata ra,
boku rfalak ne Elia,
boku vali rfalak ne,
nabi isa tali nabi ovi lan ra nva'at ewal roak.”
20 Yesus norat ira ne,
“Na'uk mia fyikir ne,
Ya'a ini iki?”
Petrus nfalak ne,
“Oa ini Raja i mtevut mami salasilan ra.”
21 Ba Yesus nfalak teri lahir ma deka rfaivar afa yai verin tamata ra.
Yesus nfamalik na'a susa i veka ntuan a, ovu Ni matmatan a
22 Yesus nfalak verin Ni tamata ovi rorang Ia ne,
“Ya'a,
Tamata Yanan Ya'a musti utuan susa rivun.
Dawan Yahudi ra,
ovu Yahudi rira dawan mela falurut ra ovu vali Yahudi rira dawan ovi rair Musa ni inukun ra veka rala'ing Ya'a ma rfedan Ya'a,
na'uk amar itelu nelak,
na Ubu veka nfava'at ewal Ya'a.”
23 Yesus nfalak verin tamata ovi rna'a inyai munuk ne,
“Tamata iki watan inan ma norang Ya'a,
na lokat amar ia musti nalak tenan a ovu nvara ni aa walwalur a.
Notu wean inyai,
beti bisma norang Ya'a.
24 Tamata iki watan inan ma ntahang teri ni vava'at i na'a lanit ivavan a,
na ia veka wol ni vava'at kakiwal a.
Na'uk iki watan nmata tevek norang Ya'a,
na ia veka ni vava'at kakiwal a.
25 Velik ne tamata isa nasdovu munuk metan ovi rna'a lanit ivavan a,
na'uk wol ni vava'at kakiwal,
na ihin aka?
Metan ovi rna'a lanit ivavan ini wol rotu ma utun akataka.
26 Wean i tamata iki watan nma'it ma nfalak ne norang Ya'a,
ovu wol ntorung afa ovi ufalak ra,
na Ya'a,
Tamata Yanan Ya'a,
veka wol utorung vali tamata yai,
na'ut i uma ewal a ovu vanang i nfitik nyadat,
ovu Yamang vanan i nfitik nyadat a,
ovu vali Ubu Ni sansinir ra tali lanit ratan ovi rmerat urun.
27 Afa i ufalak verin mia ini,
kena urun!
Tali bir tinemun na'a wan ini,
na boku wol rmata obin,
na'ut inyai na ira veka rsi'ik lahir wean inba ma Ubu nfareta wean lahir Raja.”
Yesus nfaturu Ni dawan verin Ni tamata itelu ovi rorang Ia na'a vuar ratan a
28 Snain a amar iwalu nelak roak tali na'ut i Yesus nair afa avyai,
na Ia novun Petrus,
Yohanes ovu Yakobus ma rva'al vuar isa ma raflurut.
29 Na'ut i Yesus naflurut,
na felan a naling roak Ia,
ovu afa ovi nung a neluk ra,
rangiar urun ma rfitik-ryadat.
30-31 Brian munuk,
na tamata irua rvotuk ovu vanarira i nyadat a,
ma rangrihi nulu Yesus.
Tamata irua yai Musa ovu Elia.
Ira rangrihi ovu Yesus na'a Ni matmatan i veka nti ma nfakena na'a Yerusalem.
32 Na'ut inyai,
na Petrus ovu ni kida ra rtuba roak.
Brian munuk,
na rbatar ma rsi'ik Yesus ovu vanan i nfitik nyadat a.
Ira rsi'ik vali tamata irua i rdir-ebang Ia.
33 Ti ma tamata irua yai mane rti talik Yesus,
na Petrus nfalak verin Yesus ne,
“Tuan Guru,
lolin urun ma tna'a wan ini.
Ni lolin a amfadiri befak itelu ma isa verin Oa,
isa verin Musa,
isa vali verin Elia.”
Petrus nfalak wean inyai,
na'uk wol nfan-aran afa ovi nfalak ra.
34 Petrus nangrihi obin,
na mutan nma ma nkum-teri ira,
ba rbobar urun.
35 Na'a mutan ralan yai,
na rarenar vai isa nfalak ne,
“Ini Yanak i ufili roak Ia.
Mryenar afa ovi nfalak ra!”
36 Ti ma vai yai nlia roak,
na rsi'ik watan i Yesus aksa Ia na'a inyai.
Na'ut inyai,
na Yesus Ni tamata itelu yai wol rfamalik afa yai verin tamata iki watan.
Yesus naling vatuk nait sian tali kasiko'u isa
37 Ti ma ni ilyan a,
na Yesus ovu Ni tamata itelu ovi rorang Ia yai rsuta tali vuar yai,
na tamata rivun ila'a rma ma rtuan Yesus.
38 Brana isa tali tamata rivun avyai nafwak ma nfalak ne,
“Tuan Guru,
era lablobang verin Oa ma eka msi'ik yanak a,
tevek yanak ikisa lalo'i watan.
39 Nait sian isa nlabir ia,
ba brian munuk nafwak ma vain a dawan,
ovu tenan a raruru lalean ia ma bera faluvur ia.
Nait sian yai labir mane nana'a lalawatan ia,
ovu not-visal lahir ia.
40 Era roak verin Mu tamata ovi rorang Oa ma raling vatuk nait sian yai,
na'uk wol rot-nala.”
41 Ba Yesus ntabu ira ma nfalak ne,
“Wean inba mia?
Wol bira inorang lahir ovu wol myorang afa ovi kena ra.
Amar ifira vali ma udoku ovu mia ma utahang nal ralang ovu mia,
tamata ovi wol bira inorang a?
Movun yanam a mwa ini!”
42 Ti ma kasiko'u yai nfaseri Yesus,
na nait sian i nleal ia yai nasba vatuk ia nsuta lanun,
ovu notu ma tenan a raruru lalean ia.
Na'uk Yesus nfareta nait sian yai ovu vain dawan ma nti talik kasiko'u yai,
ovu notu ma kasiko'u yai lolin ewal ia,
beti nala ia verin yaman a.
43 Ba tamata rivun avyai rtalkaka,
tevek rsi'ik lahir Ubu Ni ngrebat a.
Na'ut i tamata rivun avyai rtalkaka obin,
tevek rsi'ik afa ovi Yesus notu ra,
na Yesus nfalak verin Ni tamata ovi rorang Ia ne,
44 “Mryenar ma lolin ovu deka miblufang afa ovi ufalak ini.
Tamata ra veka rala Ya'a,
Tamata Yanan Ya'a ini,
verin tamata ra.”
45 Na'uk Yesus Ni tamata ovi rorang Ia wol rfan-aran afa ovi nfalak ra,
tevek Ubu notu ma wol rfan-aran vaivatul avyai ihirira ra.
Ira wol rabrahi vali ma rorat vaivatul avyai ihirira ra.
Tamata ovi fyawarira na'a Ubu wahan ralan a, inyai tamata ovi rka'a ma rlobang tamata ovi wol fyawarira akataka
46 Yesus Ni tamata ovi rorang Ia rsitaku ulurira na'a rira fikiran ra ma rdava ne,
iki dawan lia munuk tali ira.
47 Na'uk Yesus nka'a lahir afa i ranovak na'a ralarira ra,
ba nala kasiko'u isa ma ndir-ebang Ia,
48 beti nfalak verin ira ne,
“Tamata iki watan nalang kasiko'u ini tevek narang a,
na ia nalang roak Ya'a.
Tamata iki watan nalang Ya'a,
na ia nalang roak Ubu i nsinir Ya'a,
tevek tali bir tinemun,
na tamata i wol fyawan akataka,
ia veka fyawan urun.”
Yesus nsurak Ni tamata ra ma deka rfalak teri tamata ra ma raling vatuk nait sian ra
49 Yohanes nfalak ne,
“Tuan Guru,
ami amsi'ik tamata isa nala naram a vali ma naling vatuk nait sian a,
ba amtab-teri ia,
tevek ia wol ntali dida sidovung a.”
50 Yesus nfalak verin ia ne,
“Deka mtab-teri tamata yai,
tevek tamata iki watan wean i wol nangal mia,
na ia nlobang roak mia.”
Tamata ovi rtali ahu isa na'a Samaria rala'ing Yesus
51 Ti ma Yesus Ni amar sarseri roak mane nrata lanit ratan,
na nfadoku lahir ma musti nti Yerusalem.
52 Ba nsinir lan tamata ifira ma ula ira rti.
Tamata avyai rti ahu isa na'a propinsi Samaria,
ma rasusan munuk lahir afakataka verin Yesus.
53 Na'uk tamata ovi rna'a ahu yai rala'ing Yesus,
tevek rka'a roak ne,
Ia mane nti Yerusalem.*
54 Ti ma Yesus Ni tamata irua ovi nararira Yakobus ovu Yohanes rka'a afa yai,
na rfalak verin Yesus ne,
“Duila'a,
mtorung ma amera verin Ubu ma nfasuka yafu tali lanit ratan ma nfedan munuk tamata ovi?”
55 Na'uk Yesus nfulak wahan a ma ntabu irua,
tevek rfalak wean inyai,
56 beti rti ahu liak.
Tamata ovi inarira mane rorang Yesus veka rtuan susa
57 Na'ut i Yesus ovu Ni tamata ovi rorang Ia rban-ewal mane rti Yerusalem,
na tamata isa nfalak verin Ia ne,
“Baba,
muti inba watan,
na orang Oa.”
58 Yesus nfalak verin ia ne,
“Serigala ra warira ma rna'a,
ovu manut nangan ra rira renga,
na'uk Ya'a,
Tamata Yanan Ya'a,
wol wang ma uyari Ya'a.”
59 Nata Yesus nfalak verin tamata liak isa vali ne,
“Morang Ya'a!”
Na'uk tamata yai nfalak ne,
“Baba,
fara mtorung ma ewal ya'a veki ti ma oving yamang a.”
60 Yesus nfalak verin ia ne,
“Tamata ovi wol rorang Ya'a,
ira wearira tamata ovi rmata roak.
Ba ira ka'i roving tamata ovi rmata roak a,
na'uk oa musti muti ma fwaivar na'a inba watan ne,
Ubu nfareta tamata ra wean lahir Raja.”
61 Tamata liak isa vali nfalak ne,
“Duila'a,
ya'a mane orang Oa,
na'uk mtorung ma ti utuli tamata ovi rna'a ning rahan a veki.”
62 Ba Yesus nfalak ne,
“Tamata i betmane nta ni va'i,
na'uk ntamuri lalawatan,
na ni karya wol kena.
Wean inyai vali verin tamata ovi inar ma rkarya verin Ubu na'a Ni Fareta a.”