1 Ia ntafal ma nfalak verin ira ne,
“Afa i ufalak verin mia ini,
kena urun!
Tali bir tinemun na'a wan ini,
na boku wol rmata obin,
na'ut inyai,
na ira veka rsi'ik Ubu Ni Fareta nma ovu ngrebat!”
Yesus nfaturu Ni dawan verin Ni tamata itelu ovi rorang Ia na'a vuar ratan a
2 Ba amar inean nelak roak,
na Yesus novun Petrus,
Yakobus ovu Yohanes ma rva'al vuar karatat isa,
ma aksa ira watan na'a inyai.
Ira rsi'ik,
na Yesus felan a naling roak ia.*
3 Afa ovi nung a neluk ra,
rangiar urun ma rfitik-ryadat.
Wol tamata isa na'a lanit ivavan a veka ntof nala ma ravit ra rangiar wean inyai.
4 Brian munuk,
na irtelu rsi'ik,
na nabi Elia ovu nabi Musa rvotuk ma rangrihi nulu Yesus.
Musa ovu Elia rvotuk ma rangrihi ovu Yesus (Markus 9:4)
5 Ba Petrus nfalak verin Ia ne,
“Tuan Guru,
lolin urun ma tna'a wan ini.
Ni lolin a amfadiri befak itelu,
ma isa verin Oa,
isa verin Musa,
isa vali verin Elia.”
6 Velik aba,
Petrus wol nka'a afa ovi nfalak ra,
tevek irtelu rbobar urun,
na'uk nangrihi watan wean inyai.
7 Na'ut inyai,
na mutan isa nkum-teri ira,
ovu rarenar vai isa ntali mutan ralan yai ne,
“Ini Ya'a Yanak i ulobang urun Ia.
Mryenar afa ovi nfalak ra!”
8 Brian munuk,
na rsi'ik lilit wan yai,
na wol tamata roak na'a inyai.
Yesus a'uk sa'i nana'a inyai.
9 Nata rsuta tali vuar ma rna'a rira banbanan obin,
na Yesus nsurak ira ne,
“Deka fyamalik afa i mryea inlangin yai verin tamata ra veki.
Mnyaban ma Ubu nfava'at ewal Ya'a,
Tamata Yanan Ya'a ini tali matmatan,
beti fyamalik.”
10 Ira rot-orang Ni snurak yai,
na'uk ka'i rsiforat ira na'a Yesus Ni afa i nfalak a ne,
“Veka uva'at ewal tali matmatan.”
11 Ba rorat Yesus ne,
“Notu afakinimi Yahudi rira dawan ovi rair Musa ni inukun ra rfalak ne,
Elia veka nma ula ia,
beti Raja i ntevut mami salasilan ra?”
12 Yesus nfalak ne,
“Kena,
Elia nma ula ia,
boma nasusan afakataka munuk.
Na'uk mia mkya'a roak ne,
rtulis na'a Surat Ralan ne,
Ya'a,
Tamata Yanan,
veka utuan sian rivun ovu vali rangrihi visal-vasil Ya'a.
13 Ba ufalak verin mia ne,
Elia nma roak,
na'uk tamata ra ka'i rorang rira ininan ra ma rotu tia ma watan ia.
Inyai kena lahir ovu vaivatul ovi lalan a rtulis roak na'a Surat Ralan a.”*
Yesus naling vatuk nait sian tali kasiko'u brana isa
14 Yesus,
Petrus,
Yakobus ovu Yohanes rtali vuar rsuta roak mane rasdovu ira ovu Yesus Ni tamata liak ovi rorang Ia.
Ira rsi'ik,
na tamata rivun ila'a rdir-lilit rira kida ra.
Yahudi rira dawan ovi rair Musa ni inukun ra,
boku rsingarahi ovu ira.
15 Ti ma tamata rivun avyai rsi'ik Yesus,
na rtalkaka munuk,
ba rafla lahir rti ma rtuan Yesus.
16 Yesus norat ira ne,
“Msyingarahi ovu ira na'a aka?”
17 Tali tamata rivun avyai,
na tamata isa nfalak verin Yesus ne,
“Tuan Guru,
ya'a ovun yanak a brana nma verin Oa ma motu ma lolin ia,
tevek nait sian nleal ia ma notu ma nmanu.
18 Wean i nait sian nlabir ia,
na notu ma nvatuk tenan nsuta lanun,
ovu vali bera faluvur ia,
nifan ra rsitutu ira,
ovu nablingu lahir.
Era roak verin Mu tamata ovi rorang Oa ma raling vatuk nait sian yai,
na'uk wol rot-nala.”
19 Ba Yesus nfalak verin Ni tamata ovi rorang Ia ne,
“Wol bira inorang lahir!
Amar ifira vali ma udoku ovu mia ma utahang nal ralang ovu mia,
tamata ovi wol bira inorang a?
Myovun kasiko'u yai mya ini!”
20 Ba rovun kasiko'u yai verin Yesus.
Na'ut i nait sian yai nrea Yesus,
na notu lahir ma kasiko'u yai tenan a raruru lalean ia,
ovu nleka ma nlawar ia na'a lanun,
ovu vali bera faluvur ia.
21 Yesus norat kasiko'u yai yaman a ne,
“Nait sian ini nleal ia mnanat roak?”
Yaman nfalak ne,
“Tali ni kako'u roak!
22 Nait sian ini nleal ia ma nfaleka dalang ia na'a yafu ovu vali na'a wear mane nfedan ia.
Ba wean i Oa bisma mlobang ia,
na mlobang ma fwaturu Mu silobang verin ami!”
23 Yesus nfalak ne,
“Oa fwalak ne,
wean i bis ot-nala?
Tamata i norang Ubu ovu ralan urun veka not-nala afakataka munuk lahir!”
24 Kasiko'u yai yaman nafwak lahir ne,
“Ya'a orang,
na'uk ning inorang a kako'u obin,
ba mlobang ya'a ma mtafal ning inorang verin Oa!”
25 Yesus nsi'ik,
na tamata rivun rma roak,
ba nfalak ne,
“Hoi,
nait sian oa,
ovu motu tamata ra ma raktun ovu rmanu.
Ufareta ma muti talik kasiko'u ini,
ovu deka mewal kikyai oa ma mleal ia.”
26 Nait sian yai nafwak ovu notu ma kasiko'u yai raruru lalean ia,
ma nleka nsuta ntuba wean tamata matmatan roak,
beti nait sian nti ntalik ia.
Ba tamata rivun avyai rfalak ne,
“Ia nmata roak.”
27 Na'uk Yesus ntaha kasiko'u yai liman a ma nfadiri ia ma ndiri.
28 Nata Yesus ovu Ni tamata ovi rorang Ia sa'i rna'a rahan,
beti rorat Ia ne,
“Afakinimi ami wol amaling nala nait sian yai?”
29 Yesus nfalak ne,
“Nait sian i wean inyai,
wol bisma mila'ing ia,
wean i wol miflurut.”
Yesus nfavotuk Ni matmatan a verin Ni tamata ovi rorang Ia
30 Ira rti talik wan yai ma rban-oli propinsi Galilea.
Yesus nafena ma tamata ra rka'a ne,
ira rna'a inyai,
31 tevek Ia nair Ni tamata ovi rorang Ia.
Yesus nair ira ma nfalak ne,
“Tamata ra veka rala Ya'a,
Tamata Yanan Ya'a ini,
verin tamata ra ma rfedan Ya'a,
na'uk amar itelu nelak,
na uva'at ewal”
32 Na'uk Yesus Ni tamata ovi rorang Ia wol rfan-aran afa ovi nfalak ra,
ovu rbobar ma wol rorat Ia na'a afa avyai.
Yesus Ni tamata ovi rorang Ia rsingarahi ma rdava ne, iki veka dawan lia munuk tali ira
33 Rewal ira rti Kapernaum,
na rti rahan isa ralan a.
Yesus norat ira ne,
“Inlangin a na'a linga'an,
na vaibira na'a afaka?”
34 Wol rfalak akataka verin Ia,
boma deka nka'a,
tevek inlangin a rsitaku ulurira na'a rira fikiran ra ma rdava ne,
iki dawan lia munuk tali ira.
35 Yesus ndoku ma nera Ni tamata vutu rahin irua ma nfalak ne,
“Iki mane dawan lia munuk ia,
na nfakabava tenan veki ma neluk sansinir ovu nlobang tamata ra munuk.”
36 Nata Yesus nala kasiko'u isa ma nfalak ma ndiri waharira ralan ra.
Yesus nangabuk kasiko'u yai ma nfalak verin ira ne,
37 “Tamata iki watan nalang kasiko'u ra wean kasiko'u ini tevek narang a,
na ia nalang roak Ya'a.
Tamata iki watan nalang Ya'a,
na wol nalang watan Ya'a,
na'uk nalang roak Ubu i nsinir Ya'a.”
Tamata isa naling vatuk nait sian tali tamata, velik ne ia wol ntali Yesus Ni tamata vutu rahin irua ovi rorang Ia
38 Yohanes nfalak verin Yesus ne,
“Tuan Guru,
ami amsi'ik tamata isa nala naram a ma naling vatuk nait sian tali tamata,
ba amtab-teri ia,
tevek wol ntali mami sidovung.”
39 Yesus nfalak ne,
“Deka mtyab-teri ia,
tevek wol tamata isa bisma nala narang a ma notu mujizat,
beti nangrihi lahir ma nfalak sian Ya'a.
40 Tamata iki watan wol nangal ita,
na ia nlobang roak ita.
41 Afa i ufalak verin mia kena urun!
Tamata iki watan nala wear gelas isa ma myenu tevek myorang Kristus*,
na Ubu veka naval ia na'a ni rala lolin a.”
Afa ovi rweang tamata ra ma rotu salasilan ra
42 “Na'uk tamata iki watan notu ma kasiko'u i norang Ya'a nleka ma notu salasilan,
na Ubu veka nukun ia.
Ni lolin a rkeak vatu dawan isa na'a relan a,
ma relik ia na'a tahat ralan.
43 Wean i limabira lihir notu ma myotu salasilan,
na myetal vatuk ia.
Ni lolin a,
bira vava'at kakiwal ovu Ubu,
velik ne limabira lihir watan,
tevek wol lolin lahir ma miti yafwan kakiwal ovu limabira irua. [
44 Na'a wan yai yafu wol nmat-nala,
ovu bwa ovi ra'an matmatan ra wol rmat-nala vali.]*
45 Wean i eabira lihir notu ma myotu salasilan,
na myetal vatuk ia.
Ni lolin a,
bira vava'at kakiwal ovu Ubu,
velik ne eabira lihir watan,
tevek wol lolin lahir ma miti yafwan kakiwal ovu eabira irua. [
46 Na'a wan yai,
na bwa ovi ra'an matmatan ra wol rmat-nala ovu yafu wol nmat-nala vali.]
47 Wean i matabira lihir notu ma myotu salasilan,
na mkyivul vatuk ia.
Ni lolin a,
ti mnya'a Ubu Ni Fareta,
velik ne matabira lihir watan,
tevek wol lolin lahir ma nvatuk mia na'a yafwan kakiwal ovu matabira irua.
48 Na'a wan yai,
na yafu wol nmat-nala ovu bwa ovi ra'an matmatan ra wol rmat-nala vali.
49 Yafu veka notu ma tamata ovi rorang Ubu rmerat.
50 Sira lolin,
na'uk wean i wol sarsiran roak,
na myotu wean inba ma sarsiran ewal?
Fara bira vava'at lolin,
wean afamtahan ovi rtafal sira ma lanun.
Deka vaibira na'a iki dawan lia munuk,
ba msyiotu lolin watan mia,
boma bira vava'at ra malinan.”